“Loko u khongela, u nga phindhaphindhi minchumu ya ku fana”. — Matewu 6:7.

Xikwembu a xi swi lavi swaku hi vekisa swikhongelo ka nhloko kumbe ku yentxa hi ku swi lerha ka buku. Kambe xi lava hi vula leswi nga mbilwini. A wu ta titwisa ku yini loko a wo va ni munghanu lweyi a ku byelaka marito wolawu ya man’we siku ni siku? Vanghanu va vanene va byelana leswi nga mbilwini. Loko hi khongela ka Xikwembu hi ku tirhisa marito ya hina, hi kombisa swaku hi xi vona na xi li munghanu wa hina.

“Hambiloko mi kombela a mi kumi nchumu, hikusa a mi kombeli hi xikongomelo xa xinene”. — Yakobo 4:3.

Ha swi tiva swaku Xikwembu a xi nge swi hlamuli swikhongelo swa hina loko hi kombela swilo leswi hi swi tivaka swaku a xi swi lavi. Hi xikombiso, indje Xikwembu a xi ta ku hlamula loko a wo khongela u kombela swaku u ganya loko u tha batota? Phela Xikwembu xi hi byela swaku a hi fanelanga hi lava swaku swilo hinkwaswu swi va swa hina kumbe ku kholwa ka tindjombo. (Esaya 65:11; Luka 12:15) A hi nge nyimeli swaku Xikwembu xi hlamula swikhongelo swa ku fana ni leswi. Leswaku Xikwembu xi hlamula swikhongelo swa hina, hi fanele hi tiyiseka swaku leswi hi swi kombelaka swi fambisana ni leswi xi swi vulaka ka Bibele.

 “Lweyi a yalaka ku yingisa nawu, hambi hi xikhongelo xa yena i nchumu xa ku nyenyetsa.” — Swivuriso 28:9.

A minkameni ya ku tsaliwa ka Bibele, Xikwembu a xi nga swi hlamuli swikhongelo swa vanhu lava a va nga xi yingisi. (Esaya 1:15, 16) Ni swoswi a xi se txintxa. (Malakiya 3:6) Loko hi lava swaku xi hlamula swikhongelo swa hina hi fanele hi yingisa minawu ya xona. Se hi ta ku yini loko hi tshame hi yentxa minchumu ya ku biha? Swi vula swaku Yehovha a nge swi hlamuli swikhongelo swa hina? A swi vuli swona! Loko hi tisola ka swidjoho swa hina hi tlhela hi lwela ku kala hi nga ha swi phindhi Yehovha a ta hi rivalela. — Mintirho 3:19.