Ku sukela khale Xikwembu a xi tirhisa tintsumi ni vaprofeta swaku xi vulavula ni vanhu. Kambe xi game xi yentxa swaku marito ya xona ni leswi xi lavaka ku swi yentxa swi tsaliwa. Xikwembu xi tshembisa swaku hi ta tsaka ka nkama lowu taka. Se hi nga swi kuma kwini switshembiso swoleswo swa Xikwembu?

Switshembiso swa Xikwembu swi tsaliwe ka Bibele. (2 Timotiya 3:16) Xikwembu xi swi yentxise ku yini swaku vaprofeta va tsala Bibele? (2 Petro 1:21) Xikwembu xi yentxe swaku lava va nga tsala Bibele va tsala leswi xi swi lavaka. Hi xikombiso, loko patrao a rhuma mutirhi wa yena swaku a mu tsalela karta, karta lolelo i la patrao. Hi ku fanana, Xikwembu xi rhume vanhu swaku va tsala leswi xona xi swi lavaka. Hi mhaka leyo, Bibele i la Xikwembu.

Xikwembu xi lava swaku vanhu va lerha Bibele va tlhela va li twisisa hikusa lona i la lisima. Namuntlha mahungu ya ku tsakisa ma kumeka ka ‘vanhu va matiko hinkwawu, ni va tinxaka hinkwatu, ni va tindzimi hinkwatu, ni va swib’ongo hinkwaswu.’ (Nhlavutelo 14:6) Bibele la kumeka na li helelile kumbe li nga helelanga hi tirimi ta ku tlula 3.000 naswona a ku na buku lin’wana la ku fana na lona amisaveni.