HAKUNENE LOWO I NTSHEMBO WA KUTSAKISA! Muvumbi wa hina ahi tshembisa leswaku hita hanya hilaha kungaheliki kola misaveni. Vanyingi ava kholwi leswaku leswo swita yendleka. Va vula leswaku kufa i swa ntumbuluku. Van’wana va vula leswaku loko hi fa higama hi pfuxiwa leswaku hiya hanya hilaha kungaheliki atilweni. Se wena uli yini?

Ungese hlamula, rhanga hi kukuma tinhlamulu ta Bibele ta swivutisu leswi landzelaka: Xana ndlela leyi munhu a vumbisiweke xiswona yi kombisa leswaku a afanele a hanya nkama wa kugama kwini? Xana ama li wahi makungu ya Xikwembu hi vanhu ni hi misava? Hiza hi fa namuntlha hi mhaka muni?

Xikwembu xi vumbe vanhu hi ndlela leyi hambaneke ni swivumbiwa leswin’wana hinkwaswu. Hayini hi vula leswo? Bibele li vula leswaku i vanhu ntsena lava vumbiweke hi “xifanisu” xa Xikwembu. (Genesa 1:26, 27) Xana leswo swi lava kuvula yini? Swi lava kuvula leswaku vanhu va ni wumunhu la kufana ni la Xikwembu. Hi xikombisu, kufana na xona, vanhu vanga kombisa lirhandzu ni wululami.

Xin’wana lexi hambanisaka vanhu ka swivumbiwa leswin’wana i wuswikoti leli vanga na lona la kuyanakanya, la kuhambanisa leswinene ka leswo biha ni kunavela ka ntumbuluku loku vanga na kona ka kulava kutiva Xikwembu ni kuyaka xinghana na xona. Aku na xivumbiwa xin’wana xinga ni kunavela loku. Handle ka leswo, ha tsaka hileswi hi kotaka kuvona kuhlamalisa ka ntumbuluku wa Xikwembu, dlambu, n’weti ni tinyeleti totala letinga matilweni. Hi tsakela wuyimbeleli, mapoweziya kumbe swithokozelo ni ntirhu wa mavoko ya hina. Wuswikoti hinkwalu leli liswi veka rivaleni leswaku hina vanhu hi hambane swinene ni swivumbiwa leswin’wana hinkwaswu.

Se, tivutisi: Xana Xikwembu axita yendla munhu hi ndlela leyi, xi tlhela ximu nyika wuswikoti lelinga pimiwangiki la kuhlakulela ni kuyampsisa wumunhu la yena kuve ato hanya malembe nyana tsena? Ntiyisu wa mhaka hi lowu: Xikwembu xi nyike vanhu wumunhu lohlamalisa ni wuswikoti hinkwalu leli leswaku vati khorisa hi wutomi lelingaheliki kola misaveni.

Vanyingi va vula leswaku Xikwembu axihi vumbelanga kuhanya hilaha kungaheliki laha misaveni. Va vula leswaku laha misaveni ho hundza naswona Xikwembu xihi veke laha leswaku xi vona lweyi a fanelekaka kuya hanya atilweni na xona hilaha kungaheliki. Kambe, loko leswo akova ntiyisu, xana aswigata lava kuvula leswaku Xikwembu hi xona xi vangaka wubihi hinkwalu leli yendlekaka amisaveni namuntlha? Leswo aswita hambana ni leswi Bibele liswi vulaka hi wumunhu la Xikwembu. Loko li vulavula hi xona, Bibele li li: ‘Hikuva tindlela ta xona hinkwatu ti lulamile. Xikwembu xa kutshembeka,  lexingaliki na wuhomboloki, xilulamile naswona axi na xisandzu.’ — Deteronoma 32:4.

Bibele lihi byela hi kukongoma makungu lawa Xikwembu axi li na wona hi misava ka maritu lamange: “Loko kuli matilu, wona i ya Yehovha, kambe misava ayinyike vana va vanhu.” (Tipisalema 115:16) Ina, Yehovha a alava leswaku misava yi va ndhawu ya kusaseka, kaya la vanhu hilaha kungaheliki. Hikolaho, a aveke hinkwaswu leswi hiswi lavaka ka yona leswaku hi tsakela wutomi hilaha kungaheliki. — Genesa 2:8, 9.

“Loko kuli matilu, i ya Yehovha, Kambe misava ayi nyike vana va vanhu.” — Tipisalema 115:16

Bibele li tlhela li hlamusela hi kukongoma makungu lawa Xikwembu axi li na wona hi vanhu. Xi byele ndjangu wa kusungula xi ku: “Psalananani miyandza; mifuma . . . xivumbiwa xin’wana ni xin’wana lexihanyaka lexifambafambaka amisaveni.” (Genesa 1:28) Adamu na Eva avatati khorisa hi kuhlayisa kaya la vona ni kucinca misava hinkwayu yiva Paradeyisi! Kunene, kunavela ka Xikwembu akuli ka leswaku vona kun’we ni vana va vona va hanya misaveni, hayi tilweni.

Se hiza hi fa hi mhaka muni? Bibele li komba leswaku ku ni xivumbiwa xin’we atilweni lexi xandzukeke. Hi kufamba ka nkama, xivumbiwa lexi xi vitaniwe Sathana Diyavulosi. Xona xi ringete kuhonha makungu ya Xikwembu aEdeni. Hi ndlela yini?

Sathana a hlohlotele vapsali va hina vosungula, Adamu na Eva, leswaku na vona va xandzukela Xikwembu. Loko Sathana ava byele leswaku Xikwembu axiva fihlela swilo leswinene — nfanelo ya kuva vona vati hlawulela leswinga swinene ni leswi hoxeke — na vona va hlawule kuxandzukela Xikwembu. Xana live lihi vuyelu la xiboho lexi vaxi yendleke? Va file, hilaha Xikwembu axiva byele ha kona, naswona va lahlekeliwe hi mukhandlu wa kuhanya hilaha kungaheliki aparadeyisini amisaveni. — Genesa 2:17; 3:1-6; 5:5.

Kuxandzuka ka Adamu na Eva kukhumbe wutomi la vanhu hinkwavu kutafikela namuntlha. Bibele li li: “Kutani-ke, kufana ni leswi kujoha kungheneke misaveni hi munhu ali mun’we, na rona rifu ringhenile hikolaho ka kujoha, hi mukhuva wolowo rifu ri tlulele vanhu hinkwavu, hikuva hinkwavu vajohile.” (Varhoma 5:12) Xikwembu ‘axi kunguhatanga’ lifu la vanhu hi ndlela yokarhi leyi hingayi twisisiki. Kambe, hi fa hikolaho ka leswi xidjoho xa vapsali va hina vosungula, kupatsa ni vuleyo la xona kunga lifu, swihi tluleleke hinkwerhu.

Kuxandzuka ka Adamu aku honhanga makungu ya Xikwembu hi misava ni vanhu. Wululami ni lirhandzu la xona leli hetisekeke swimu susumetele kulava ndlela ya kuhi chunsa ka wukarawa la xidjoho ni lifu. Mupostola Pawulo a vule leswi: “Hikuva hakelo ra xijoho i rifu, kambe nyiko leyinyikiwaka ntsena, leyihumaka ka Xikwembu, i vutomi lebzingaheliki, ha Yesu Kriste Hosi ya hina.” (Varhoma 6:23) Hi lirhandzu, Xikwembu xi nyikele “hi n’wana wa xona wa mun’we, leswaku hinkwavu lava vapfumelaka ka yena vangalovi, kambe vava ni vutomi lebzingaheliki.” (Yohane 3:16) Hi kuswirhandza, Yesu ati nyikelile leswaku ahi fela. Hi ndlela yoleyo, ahi kutsulile ka xidjoho xa Adamu. *

Kungalikhale, Xikwembu xita hetisisa kungu la xona la kucinca misava hinkwayu yiva paradeyisi. Xana waswi lava kuhanya ka yona? Loko uswi lava, landza maritu ya Yesu lamange: “Nghenani hi nyangwa lowu wokhuma, hikuva nyangwa lowuyisaka kuloveni wuyanamile, ni ndlela leyi yiyaka kona, yiyanamile, kutani lavanghenaka hi yona vatele. Kasi nyangwa lowuyisaka vuton’wini wukhumile svinene, ni ndlela leyi yiyaka kona yikamanile svinene, kutani lava vayikumaka avatalanga.” (Matewu 7:13, 14) Ina, phela wumundzuku la wena li le mandleni ya wena. Se, uta yendla yini?