“Oho Yehovha, xana nitakombela kupfuniwa kufikela siku muni, kambe ungayingisi? Xana nitakombela leswaku uniponisa ka madzolonga kufikela siku muni, kambe ungayendli nchumu?” (Habakuku 1: 2, 3) Wolawo i marito ya Habakuku, wanuna wotshembeka lweyi a atsakeliwa hi Xikwembu. Xana marito lawo ma kombisa leswaku a anga na lipfumelo? A swi tano. Xikwembu xi tiyisekise Habakuku leswaku se Axi veke nkama lowu axi ta helisa kuhlupheka ha wona. — Habakuku 2:2, 3.

Loko wena kumbe munhu lweyi umu rhandzaka a li kuhluphekeni, swi vevukile kupimisa leswaku Xikwembu xi hlwela kuyendla swokarhi kumbe kuvula leswaku axi fanele xi nghenela mhaka na toho suka. Kambe Bibele lahi tiyisa: “Hosi ayihlweli kuyendla lesvi yingatshembisa svona, hilaha van’wana vatwisisaka ‘kuhlwela’ hakona, kambe yilehisa mbilu hikolaho ka n’wina; ayilavi lesvaku ni mun’we wa n’wina alahleka, kambe yi lava lesvaku hinkwavu vata kuhundzukeni.” — 2 Petro 3:9.

Swi le kusuhi! Yesu a profete leswaku lixaka lokarhi alita vona swilo leswi aswita kombisa leswaku hi hanya masikwini ya “kuhela ka minkarhi”. (Matewu 24: 3-42) Kuhetiseka ka wuprefeta la Yesu amasikwini ya hina kukombisa leswaku Xikwembu xi le kusuhi ni kululamisa swiyimo swa misava. *

Kambe xana Xikwembu xitaku helisisa kuyini kuhlupheka hinkwaku? Nkama lowu Yesu a ali lani misaveni, a tirhise matimba ya Xikwembu leswaku a susa swikarhato swa lava avali kuhluphekeni. Vona swikombiso swokarhi.

Timhangu ta Ntumbuluku: Loko Yesu ni vapostola vakwe vali karhi va tlulela lwandle la Galileya hi boti, kuhumelele xidzedze lexi axi lava kumbombomelisa boti leli ava li ka lona. Hambiswilitano, Yesu a kombise leswaku yena ni Tatana wa yena vangaswi kota kulawula ntumbuluku. (Vakolosa 1:15, 16) Hi kukongoma Yesu a te: “Miyela uku n’tse!” Kuhumelele yini? “Mheho yiva yimiyela, kuva ni kurhula lokukulu.” — Marka 4: 35-39.

Mavabyi: Yesu a ativiwa swinene hi wuswikoti la yena la kuhanyisa lava ava fe matihlo, swilima, lava ava ni mavabyi ya kuwa, nhlokonho, kumbe mavabyi man’wana. “Aahanyisa hinkwavu lavavabzaka”. — Matewu 4:23, 24; 8:16; 11:2-5.

Tindlala: Yesu a tirhise matimba lawa a nyikiweke hi Tatana wa yena leswaku a yendla swakudla leswi aswili switsongo swinene swiva swotala. Kutsaliwe leswaku eka wutirheli ya yena, a dlise vanhu votala swinene makhambi mambirhi. — Matewu 14:14-21; 15:32-38.

Lifu: Leswaku Yehovha a ni matimba yohelisa lifu, swi kombisiwe hi leswi Yesu a pfuxeke vanhu vanharhu aku feni. Mun’wana wa lava vapfuxiweke, se a ani mune wa masiku a file. — Marka 5: 35-42; Luka 7: 11-16; Yohane 11: 3-44.