1-2. Hayini Yesu a akarhatekile?

KA SIKU la yena lawugamu laha misaveni, Yesu a akarhatekile. A kusale nkama wutsongo leswaku a xanisiwa ni kudlayiwa hi vanhu vokala nawu. Kambe lexi aximu vilelisa, akunga li leswi a ali kusuhi ni kufa ntsena kambe hileswi aamu rhandza swinene B’ava wa yena naswona a alava kumu tsakisa. Yesu aaswi tiva leswaku loko a tshama a tshembekile ka ndzingo lowu aata kumana na wona, aata pfunisa kubasiseni ka vito la Yehovha. Nakambe Yesu aava rhandza swinene vanhu naswona aaswi tiva leswaku kuva va kota kuhanya hilaha kunga heliki aswita lava leswaku a tshama a tshembekile anze a fa.

² Hambileswi Yesu a akarhatekile swinene, yena a ani kurhula. A byele vapostola a ku: “Niminyika kurhula ka mina”. (Yoh. 14:27) Yena a ani “kurhula ka Xikwembu”, kunga kurhula loku taka hi kuva ni wuxaka la le kusuhi swinene na Yehovha. Kurhula ka muxaka lowu kumu pfune leswaku anga vileli. — Filp. 4:6, 7.

3. Hita vona yini ka djondzo leyi?

³ Anga kona ni mun’we ka hina lweyi angata xanisiwa kufana na Yesu. Hambileswo, hinkwavu lava vamu landzelaka vata xanisiwa. (Mat. 16:24, 25; Yoh. 15:20) Hi mhaka leyo, kufana na Yesu na hina hingaha titwa hi karhatekile minkama yin’wana. Kutani hinga yendla yini leswaku hinga vileli la kakuva hi lahlekeliwa hi kurhula ka miyanakanyu? Ahi kambisiseni swilo swinharhu leswi Yesu aswi yendleke loko a hetisisa ntirho wa yena wa kuchumayela ivi hi vona leswaku hingamu tekelelisa kuyini loko hi tlhangavetana ni mindzingo.

4. I mpsini leswi kombisaka leswaku Yesu ama tirhisile ka yena n’winyi marito lama kumekaka ka 1 Vatesalonika 5:17 ka siku la yena lawugamu laha misaveni?

⁴ Lerha 1 Vatesalonika 5:17. Yesu a khongele kanyingi ka  siku la yena lawugamu laha misaveni. Loko a komba vadjondzisiwa va yena ndlela leyi ava fanele va khumbuka ha yona lifu la yena, a khongelele pawu ni vhinyu. (1 Kor. 11:23-25) Na angase suka andhawini leyi va tlangeleke kona a paxkwa, a khongelile swin’we ni vadjondzisiwa va yena. (Yoh. 17:1-26) A nkama lowu yena ni vadjondzisiwa va yena va fikeke Antshaveni ya Mawolivhera, hi wusiku lolelo Yesu a khongelile hi ku phindhaphindha. (Mat. 26:36-39, 42, 44) Naswona marito ya wugamu lawa ama vuleke na angase fa, ama vule na a li karhi a khongela. (Luk. 23:46) Yesu a khongelele xin’wana ni xin’wana lexi yendlekeke ka siku la yena lawugamu laha misaveni.

5. Hayini vapostola va tsandzekile kuva ni xivindzi?

⁵ Xin’we xa leswi pfuneke Yesu leswaku a kota kutiyisela loko a kumana ni mindzingo kuve kutshamela kukhongela ka B’ava wa yena a kombela leswaku amu pfuna. Kasi vadjondzisiwa va yena avaswi kotanga kuva ni xivindzi loko va kumana ni mindzingo hikuva va tsandzekile kutama va khongela ka wusiku lelo. (Mat. 26:40, 41, 43, 45, 56) Loko hi kumana ni mindzingo, hita kota kutshama hi tshembekile ntsena loko hi tekelela xikombiso xa Yesu hi kutshama ‘hili karhi hi khongela’. I yini leswi hingaswi kombelaka ka swikhongelo swa hina?

6. Xana lipfumelo lingahi pfunisa kuyini leswaku hi tama hi va ni kurhula?

⁶ Loko hi khongela, hinga kombela Yehovha leswaku a ‘hiyengetela kupfumela’. (Luk. 17:5; Yoh. 14:1) Lexingata yendla hi lava lipfumelo, hi leswaku Sathana ata ringa hinkwavu lava landzelaka Yesu. (Luk. 22:31) Xana a lipfumelo litahi pfunisa kuyini kuva ni kurhula hambiloko hi tlhangavetana ni swikarhato swa kulandzelelana? Loko se hi yendlile  hinkwaswu leswi hingaswi kotaka leswaku hi kota kuhlula swikarhato swa kona, lipfumelo la hina ka Yehovha litahi pfuna kutshika kuvilela hikusa haswi tiva leswaku yena atahi nyika ndlela ya kuyampsa ya kuhuma ka swikarhato leswo hi nkama lowu faneleke. Hi ni kurhula atimbilwini ni le miyanakanywini hileswi hi tshembaka leswaku Yehovha a tiva tindlela ta kuyampsa totlhantlha swikarhato swa hina kutlula hina. — 1 Pet. 5:6, 7.

7. U djondze yini ka xikombiso xa Roberto?

⁷ Xikhongelo xahi pfuna kuhlayisa kurhula ka miyanakanyu hambiloko hi kumana ni swikarhato swihi na swihi. Ahi voneni xikombiso xa Roberto, doda lotshembeka, leli swoswi linga ni kolomuya ka 80 wa malembe. Lona li li: “Marito manga ka Vafilipiya 4:6, 7 mani pfunile naswona maha tama mani pfuna leswaku ni kota kulangutana ni mindzingo yinyingi awuton’wini. Ni kumane ni swikarhato swa timale naswona naha tshame ni nyima kutirha tani hi doda abandleni swa nkama nyana.” I yini leswi pfunaka Roberto leswaku a tama a va ni kurhula ka miyanakanyu? Yena a li: “Loko ni sungula kuvilela, ni tekela kukhongela. Ni tsumbule leswaku loko ni khongela hi ku phindhaphindha na swi suka mbilwini, kurhula ka mina kuya kukula.”

8. Hilaha swi kombisiweke ha kona ka Yohane 8:29, i yini xin’wana lexi axi yendla Yesu a va ni kurhula ka miyanakanyu?

⁸ Lerha Yohane 8:29. Yesu a ani kurhula ka miyanakanyu hambiloko a xanisiwa hikusa aaswi tiva leswaku kutiyisela ka yena ka kutshembeka aku tsakisa B’ava wa yena. A atama a yingisa hambiloko swingamu vevukeli. Aamu rhandza swinene B’ava wa yena naswona kuyendla  kurhandza ka Yehovha aku li nchumu wa lisima swinene awuton’wini la yena. Na angase ta laha misaveni, a ali mutirhi wa Xikwembu lweyi anga ni wuswikoti. (Swi. 8:30) Naswona a nkama lowu a ali laha misaveni, a ahisekela kudjondzisa vanhu hi B’ava wa yena. (Mat. 6:9; Yoh. 5:17) Kuyendla ntirho lowu swimu yendle a tsaka hintamu. — Yoh. 4:34-36.

9. Kutshama hi khomekile antirhweni wochumayela swingahi pfunisa kuyini leswaku hi va ni kurhula ka miyanakanyu?

⁹ Hinga tekelela Yesu hi kuyingisa Yehovha ni kuva ni ‘swotala swoswi yendla antirhweni wa Hosi’. (1 Kor. 15:58) Loko hi ‘tinyiketela’ hintamu antirhweni wa hina wochumayela, hita va ni langutelo lelinene hi swikharato swa hina. (Mint. 18:5) Hi xikombiso, vanhu lava hiva chumayelaka va kumana ni swikharato swaswi kulu kutlula swa ka hina. Hambiswilitanu, loko va djondza hi ta Yehovha va tlhela va hanya hi leswi va swi djondzaka va kota kuhanya wutomi loyampsa va tlhela va tsaka. Loko hiva vona va titwisa xileswi, ha tiyiseka ka leswaku Yehovha atahi hlayisa. Kutani kutiva leswo swihi yendla hi va ni kurhula ka miyanakanyu. Leswo swi yendlekile ka Makwerhu mun’wana waxisati lweyi awuton’wini la yena hinkwalu a atitwa anga pfuni chumu a tlhela a va ni gome. A li: “Loko ni khomekile hi ntirho wa kuchumayela mbilu ya mina ya rhula yi tlhela yi tsaka. Leswo swi koteka hikuva loko ni chumayela ni titwa ni li kusuhi na Yehovha.”

10. U djondze yini ka xikombiso xa Brenda?

¹⁰ Ahi voneni xikombiso xin’wana xa makwerhu waxisati lweyi vito la yena anga Brenda. Yena ni n’wana wa yena waxisati va ni mavabyi ya kukarhata swinene. Brenda anga na ntamu mirhini naswona anga fambi. Hi mhaka leyo, a boheka kufamba hi xikarinyana xa maroda. Loko aswi kota a chumayela hi munti ni munti kambe minkama yotala a chumayela hi kutsala mapapila. Yena a li: “Kutwisisa leswaku mavabyi ya mina amangata hanyisiwa ka misava leyi swini pfunile leswaku ni hisekela ntirho wa mina wa kuchumayela. Phela loko ni chumayela, ani pimisi hi mavabyi ya mina kambe ni pimisa hi ndlela leyi ninga pfunaka ha yona lava niva chumayelaka. Leswo swi tlhela swini pfuna kutshamela kupimisa hi ntshembo lowu ninga na wona hi wumundzuku.”

11-13. a) Xana vapostola swin’we ni van’wana vaswi kombise kuyini leswaku a va li vanghanu va ntiyiso ka Yesu? b) Vanghanu lava Yesu a ali na vona vamu yendle a titwisa kuyini?

¹¹ A nkama hinkwawu lowu Yesu awu heteke na a chumayela, vapostola va yena votshembeka va tikombise va li vanghanu va ntiyiso ka yena. Vona va ve muxaka wa vanghanu lava buku la Swivuriso li vulaka leswi ha vona: “Ku ni munghanu lweyi anamarhelanaka ngophu kutlula ni makwavu.” (Swi. 18:24) Yesu aava nyika lisima vanghanu votanu. Kufambeni ka wutirheli la yena, anga kona ni mun’we ka vamakwavu lweyi a pfumeleke ka yena. (Yoh. 7:3-5) Swilo swi fike lakakuva va pimisa leswaku a ahlanya. (Marka 3:21) Leswi vapostola va yena ava hambanile ni vanhu lava, Yesu aswi kotile kuva byela ka wusiku la yena lawugamu a ku: “Hi n’wina lava mitiyiseleke na mina miringweni ya mina.” — Luk. 22:28.

¹² Vapostola va Yesu ava tshuka vamu khunguvanyisa. Kambe aanga tshameli kulanguta swihoxo swa vona hikusa aaswi tiva leswaku va pfumela ka yena. (Mat. 26:40; Marka 10:13, 14; Yoh. 6:66-69) Ka wusiku la yena lawugamu na angase dlayiwa, a byele vavanuna lava votshembeka a ku: “Nimivulile vanghanu, hikuva nimitivisile hinkwaswu leswi niswitweke ka Tatana wa mina.” (Yoh. 15:15) Handle  kokanakana, vanghanu va Yesu vamu khutazile swinene. Leswi vangamu pfunisa xiswona swimu ka ntirho wa yena wa kuchumayela swimu yendle a tsaka swinene. — Luk. 10:17, 21.

¹³ Handle ka vapostola, Yesu a ani vanghanu van’wana, vaxinuna ni vaxisati, lavamu seketeleke ka ntirho wochumayela hi kumu pfuna hi tindlela tin’wana. Van’wana vamu rhambile leswaku a ya makaya ya vona leswaku aya dla na vona. (Luk. 10:38-42; Yoh. 12:1, 2) Van’wana va yendzile na yena va tlhela va yavelana na yena swilo swa vona. (Luk. 8:3) Yesu a ve ni vanghanu lava ava lava avamu pfuna hikusa avaswi tiva leswaku na yena aatava pfuna. Yena aanga nyimeli leswaku vanghanu va yena va yendla swa kutlula leswi aswi li matimbeni ya vona. Hambileswi Yesu a ahetisekile, aava khensa vanghanu va yena vokala kuhetiseka hikolaho ka leswi avamu pfuna. Handle kokanakana, vamu pfunile leswaku a tama a va ni kurhula ka miyanakanyu.

14. Hinga yendla yini leswaku hi va ni vanghanu lavanene?

¹⁴ Vanghanu lavanene vatahi pfuna leswaku hi tshama hi tsembekile ka Yehovha. Naswona ndlela leyinene ya kuva ni vanghanu lavanene i kuva hina hi va mughanu lwenene. (Mat. 7:12) Hi xikombiso, Bibele lihi khutaza leswaku hi tikarhatela kupfuna van’wana, ngopfungopfu lava ‘vapfumalaka’. (Efe. 4:28) Xana u tiva munhu abandleni la wena lweyi ungamu pfunaka? Xana ku ni vamakwerhu lava tsandzekaka kuhuma kaya hileswi va gugeke kumbe va vabyaka? Xana awungeva pfuni hi kuva yela bazara? Xana unga pfuna ndjangu lowunga ni swikarhato swa timale hi kuva nyika swakudla? Loko uswi kota kutirhisa a site la jw.org^® ni JW Library^®, xana ungava pfuna van’wana abandleni  la wena leswaku na vona va kota kuswi tirhisa? Loko hi khomeka swinene hi kupfuna van’wana, na hina hita tsaka swinene. — Mint. 20:35.

15. Vanghanu va hina vangahi pfunisa kuyini loko hi langutana ni swikarhato?

¹⁵ Vanghanu va hina vangahi pfuna loko hi tlhangavetana ni swikarhato ni kuhi pfuna kuhlayisa kurhula ka hina ka miyanakanyu. Kufana na Elihu, lweyi a yingiseke Yobo loko a vulavula hi leswi aswimu karhata, vanghanu va hina vatahi yingisa loko hi li karhi hi phofula leswi hi titwisaka xiswona. (Yobo 32:4) Ahi rindzeli leswaku vanghanu va hina vahi yendlela swiboho, kambe hi kombisa wutlharhi hi kuyingisela ndzayu ya Bibele leyi vahi nyikaka yona. (Swi. 15:22) Naswona kufana na Hosi Davhida, lweyi hi kutitsongohata a pfumeleke kupfuniwa hi vanghanu va yena, ahingata tibyela ivi hi yala kupfuniwa hi vanghanu va hina kuvi haswi lava. (2 Sam. 17:27-29) Hakunene, vanghanu votanu i xihiwa lexi taka hi ka Yehovha. — Yak. 1:17.

16. Hikuya hi Vafilipiya 4:6, 7, hi yihi ndlela yin’we ntsena leyi hinga kumaka kurhula ha yona? Hlamusela.

¹⁶ Lerha Vafilipiya 4:6, 7. Hayini Yehovha ahi byela leswaku hita kuma kurhula ka yena “ha Yesu Kreste”? Hikuva ntsena loko hi twisisa xiyenge lexi Yesu anga na xona ka xikongomelo xa Xikwembu, hi kona hingata kota kuva ni kurhula amiyanakanywini ni le mbilwini. Hi xikombiso, hikolaho ka nkutsulu swidjoho swa hina swinga rivaleliwa. (1 Yoh. 2:12) Swahi thova mbilu kutiva leswi, ahi swo? Tani hi Hosi ya Mfumu wa Xikwembu, Yesu ata helisa kuxaniseka hinkwaku loku vangiwaka hi Sathana ni misava ya yena. (Esa. 65:17; 1 Yoh. 3:8; Nhla. 21:3, 4) Leswo hakunene swihi nyika ntshembo wa kutsakisa! Hambileswi Yesu ahi nyikeke ntirho lowunga vevukiki, a na hina, wahi pfuna ka masiku lawa yawugamu ya mafambiselo lawa ya swilo. (Mat. 28:19, 20) Kutiva leswi swahi tiyisa nhlana! Kutitwa hi chavelelekile, kuva ni ntshembo, ni kuva ni xivindzi i swa lisima swinene leswaku hi kota kuva ni kurhula ka miyanakanyu.

17. a) Xana Vakreste vangaswi kotisa kuyini kuhlayisa kurhula ka miyanakanyu? b) Hilaha swi tshembisiweke ha kona ka Yohane 16:33, i yini leswi hingaswi kotaka kuswi yendla?

¹⁷ Kutani, unga yendla yini leswaku u va ni kurhula ka miyanakanyu hambiloko u tlhangavetana ni mindzingo ya kukarhata? Ungaswi kota hi kutekelela leswi Yesu aswi yendleke. Xosungula, khongela, khongela, khongela naswona unga tshiki kukhongela. Xa wumbirhi, yingisa Yehovha naswona chumayela hi kuhiseka hambiloko swi karhata. Xa wunharhu, kombela vanghanu va wena vaku pfuna loko u kumana ni mindzingo. Kutani kurhula ka Xikwembu kuta hlayisa miyanakanyu ya wena ni mbilu ya wena naswona kufana na Yesu, uta kota kuhlula ndzingo wun’wana ni wun’wana lowu ungata kumana na wona. — Lerha Yohane 16:33.