1. I mpsini leswi hinkwerhu hiswi navelelaka maxaka ya hina?

“KUSUKELA loko ni djondze ntiyiso ani navela swaku maxaka ya mina hinkwawu mava na mina aParadeyisini.” Kuvule makwerhu mun’wami wa xisati lweyi hingatamu vitana Paulina. * Ayangetela a ku: “Ngopfungopfu nuna wa mina Wilson ni xifanyani xa hina ani navela swaku hinkwerhu hi tirhela Yehovha xikan’we.” Kungava leswaku uni maxaka lawa ma kalaka mangamu tirheli Yehovha? Kufana na Pawulina, swinga yendleka na wena u navela swaku na wona ma tirhela Yehovha.

2. Hi swihi swivutiso leswi hingata bula hi swona ka djondzo leyi?

² I ntiyiso swaku ahingata sindzisa maxaka ya hina kuyamukela mahungu yotsakisa, kambe hingaswi kota kuva pfuna kupimisa hi leswi Bibele liswi vulaka ni kuva vaswi tirhisa. (2 Tim. 3:14, 15) Hi mhaka muni hi fanele hi chumayela maxaka ya hina? Hi mhaka muni hi fanele hi zama kutwisisa leswi va titwisaka xiswona? Hingama pfunisa kuyini maxaka ya hina leswaku ma rhandza Yehovha? Naswona vamakwerhu abandleni vanga pfunetisa kuyini?

3. Hi kuya hi 2 Petro 3:9, hi mhaka muni hi fanele hi chumayela maxaka ya hina?

³ Kungali khale Yehovha a ta helisa wubihi hinkwalu amisaveni. Ntsena lavangani “kutinyimisela lokunene ka wutomi lelinga heliki [NM]” hi vona vangata pona. (Mint. 13:48) Hina hi  heta nkama wotala ni ntamu wa hina nahi chumayela vanhu votala lava hikalaka hingava tivi lava tshamaka kusuhi na hina. Kutani hi lava kuchumayela ni maxaka ya hina leswaku na wona mata kota kutirhela Yehovha. B’ava wa hina wa lirhandzu Yehovha “angalavi leswaku ni mun’we . . . alahleka kumbe a lova, kambe alava leswaku hinkwavu vata kuhundzukeni.” — Lerha 2 Petro 3:9.

4. Hi xihi xihoxo lexi hi talisaka kuxi yendla loko hi chumayela maxaka ya hina?

⁴ Loko hi chumayela rungula la Mfumu, hi fanele hi khumbuka swaku kuni machumayelelo ya manene ni lama hoxeke. Hi xikombiso, loko hi chumayela vanhu lava hi kalaka hingava tivi hi vulavula kahle na vona, kambe loko se hi vulavula ni maxaka ya hina a hiva feleli.

5. I mpsini leswi hi faneleke hiswi khumbuka loko hi lava kuchumayela maxaka ya hina?

⁵ Votala va hina ha tisola hileswi hinga vulavulisa xiswona loko hi chumayela maxaka ya hina naswona haswi navela kuyampsisa. Mupostola Pawulo a laye Vakreste a ku: “Kuvulavula ka n’wina akuve lokunene, loku kunandzihaka masiku hinkwawu, mitativa hilaha mifanelaka kuhlamula mun’wana ni mun’wana hakona.” (Kol. 4:5, 6) Swi kahle kukhumbuka marito lawa loko hi vulavula ni maxaka ya hina. Loko hinga yendli leswo, kuhambana ni kuva pfuna hi tova tshova timbilu.

6-7. Kombisa swaku hi mhaka muni swili swa lisima kuva Mukreste a yanakanyela loko lweyi anga chada na yena anga tirheli Yehovha.

⁶ Va kombi ntwelawusiwana. Pawulina lweyi se hinga vulavula ha yena a te: “Aku sunguleni leswi ani lava kubula hiswona ni nuna wa mina akuli Xikwembu ni Bibele ntsena. Aningamu bulisi hi swilo swin’wani.” Hambileswo, Wilson nuna wa Pawulina a anga tivi  swotala hi Bibele naswona a angaswi twisisi leswi Pawulina a avulavula hi swona. Ka yena, aswo fana ni loko Pawulina o otshamela kuvulavula hita kereke ntsena. A avona onge wukhongeli la nsati wa yena lini khombo naswona lomu kanganyisa.

⁷ Pawulina a atalisa kuheta nkama wa wunyingi na ali minhlanganwini, a nsin’wini, kumbe ka swifestani ni vamakwerhu hi mahelo vhiki. Yena a li: “Minkama yin’wana loko Wilson a fika kaya a akuma swaku akuna munhu naswona a atitwa ali ni xivundza”. Hi mhaka leyi, swa twala leswi Wilson a axuva nsati ni n’wana wakwe. A angava tivi vanhu lava nsati wa yena a aheta nkama na vona naswona a aswi tikomba onge Pawulina a ateka vanghanu va yena vali va lisima ku tlula yena. Hi mhaka leyo, Wilson a chavisele Pawulina a ku atamu tshika. U vona swaku Pawulina a afanele a yendla yini leswaku swilo leswi hinkwaswu swinga humeleli?

8. Hi kuya hi 1 Petro 3:1, 2, i ncini lexi talisaka ku khumba maxaka ya hina?

⁸ Vana xikombiso lexinene. Hi xitalu leswi khumbaka maxaka ya hina hileswi hiswi yendlaka kungali leswi hiswi vulaka. (Lerha 1 Petro 3:1, 2.) Hi kufamba ka nkama Pawulina ayi twisisile mhaka leyi. Yena a li: “A niswi tiva swaku Wilson wani rhandza funtshi a anga lavi kuni tshika, kambe leswi angani chavisela ni sungule kuvona swaku ani fanele ni tirhisa leswi Yehovha aswi vulaka hi wukati. Handle ka ku tshamela kumu chumayela ani fanele nimu koka hi mintirho ya mina leyinene.” Pawulina a tshike kusindzisa Wilson kubula hi Bibele naswona a sungule kubula na yena hi swilo swin’wani leswi humelelaka siku ni siku. Wilson a vule swaku nsati wa yena a zame kuva munhu worhula naswona n’wana wa vona se a ani xihlonipho. (Swi. 31:18, 27, 28) Wilson a sungule kuvona leswi Bibele aliwu  khumbisa xiswona ndjangu wa yena ivi a sungula kupimisa ni kutirhisa leswi Rito la Xikwembu liswi vulaka. — 1 Kor. 7:12-14, 16.

9. Hi mhaka muni hi fanele hi tiyisela loko hi pfuna maxaka ya hina?

⁹ Unga karhali kuva pfuna. Yehovha a hi vekele xikombiso hikusa a “hambeta” a nyika vanhu mukhandlu wa kutwa mahungu yotsakisa leswaku vata kuma wutomi. (Yer. 44:4) Naswona mupostola Pawulo a byele Timotiya leswaku a afanele a tiyisela loko a pfuna vanhu van’wani. Hi mhaka muni? Hi mhaka loko a yendla leswo, a ata tiponisa yena ni kutlhela a ponisa lava avatamu yingisa. (1 Tim. 4:16) Hama rhandza maxaka ya hina, hi mhaka leyo hi lava va tiva ntiyiso wa Rito la Xikwembu. Hi kufamba ka nkama, marito ni swiyendlo swa Pawulina swi pfune ndjangu wa yena. Swoswi Pawulina ali a tsake ngopfu hileswi yena ni nuna wa yena va tirhelaka Yehovha xikan’we. Ha wumbhirhi kavona vatirha tanihi maphayona ya nkama hinkwawu naswona Wilson se i doda la bandla.

10. Hi mhaka muni hi fanele hi lehisa mbilu?

¹⁰ Lehisa mbilu. Loko hi teka xiboho xa kuyingisa Yehovha hi kutwananisa mahanyelo ya hina ni minawu ya yena, maxaka ya hina swingahama tikela kuhi twisisa. Hi xitalu, xa kusungula lexi va rhangaka va xivona hi leswaku ahaha ngheneli ka swa politika ni ka minkhuvo ya wukhongeli. Maxaka man’wani mangaha sungula kuhi kwatela. (Mat. 10:35, 36) Hambi leswo a hi fanelanga hi pimisa leswaku avangehe cinci. Loko hingaha zami kuva pfuna kutwisisa leswi hiswi kholwaka, hitava hiva yavanyisile onge hiloko hiku ava faneliwi hi kukuma wutomi lelinga heliki. Yehovha anga zanga ahi nyika ntirho wa kuyavanyisa vanhu, kambe ntirho wolowo awu nyike Yesu. (Yoh. 5:22) Loko hi tama hi lehisa mbilu, swingaha yendleka maxaka ya hina hiwugamu mahi yingisa loko hima chumayela. — Vona a kwadru lelinge “ Tirhisa a Site la Hina Leswaku u Djondzisa.”

11-13. Hi djondza yini ka leswi Alise angava khomisa xiswona vapsali va yena?

¹¹ Kombisa lirhandzu kambe unga tshiki maxaka ya wena ma kucincisa xiboho. (Swi. 15:2) Vona xikombiso xa Alise, lweyi a atshama kule ni vapsali va yena loko a djondza ntiyiso. Vapsali va yena avanga kholwi swaku Xikwembu xi kona naswona ava nghene hi nhloko ka politika. Alise a vone swili swa lisima kuhantla ava byela swilo hinkwaswu swa kahle leswi aswi djondzeke. Yena a li: “Loko wo hlwela kubyela maxaka ya wena hi leswi uswi kholwaka ni leswi uswi yendlaka, switava kwatisa hintamu loko vataswi tiva.” Alise a yendle nkambisiso hi timhaka tokarhi leti atita tsakisa vapsali va yena ta kufani ni lirhandzu ivi ava tsalela mapapila ava byela leswi Bibele liswi vulaka hi timhaka toleto, atlhela a vutisa ni mavonelo ya vona. (1 Kor. 13:1-13) A khense vapsali va yena hileswi vangamu wundla va tlhela vamu hlayisa naswona ava nyike tinyiko. Loko aya ayava pfuxela a apfuna mamani wa yena ka mintirho hinkwayu ya le kaya. Akusunguleni, vapsali va yena avanga tsaki loko ava byela leswi aswi djondzeke.

¹² Loko Alise ali kaya ni vapsali va yena a adjondza Bibele siku ni siku. Yena a li: “Kuyendla leswo swi pfune mamani kuvona swaku kudjondza Bibele i swa lisima ka mina”. Papayi wa Alise a yendle xiboho xa kudjondza Bibele leswaku ata kota kutwisisa swaku hi mhaka muni n’wana wa yena a cincile ni kukuma swa kuswi sola ka Bibele. Kutani, Alise a li: “Nimu nyike Bibele ni tlhela nimu tsalela swokarhi ka lona.” Kuve ni vuyelo lihi? Papayi wa Alise anga kumanga nchumu xa kuxi sola ka Rito la Xikwembu, kuhambana ni leswo akhumbiwe hintamu hileswi angaswi djondza.

 ¹³ Hi fanele kuvani musa kambe hi ringanisela hambi loko hi kumana ni swikarhatu. (1 Kor. 4:12b) Hi xikombiso Alise a tiyiselile loko a kanetiwa hi mamani wakwe. Yena a li: “Loko ni tsakamisiwile mamani a te ‘ni xiphunta.’” I mpsini leswi Alise angaswi yendla? A li: “A ni tshikanga kuvulavula hi wukhongeli la mina kambe hi xihlonipho niva byele swaku ni tiyendlele xiboho xa kuva mun’we wa Timboni ta Yehovha naswona aninge cinci. Ni byele mamani swaku nimu rhandza ngopfu ivi hi wumbirhi ka hina hi sungula kurila, nigama nimu swekela swakudla leswi aswi rhandzaka. Kusukela kolano mamani aswi vonile swaku Bibele lini cincile niva munhu wa kuyampsa.”

14. Hi mhaka muni hinga fanelanga hi pfumelela maxaka ya hina mahi cincisa xiboho xa hina xa kutirhela Yehovha?

¹⁴ Swingaha teka nkama a kuva maxaka ya hina ma twisisa lisima la kuva hi tirhela Yehovha. Hi xikombiso mamani wa Alise a tlhele a rila loko n’wana wa yena a teka xiboho xa kuphayona, handle ka kuya ka ntirho lowu avamu lavele wona. Kambe Alise anga tsekatsekanga. Yena a li: “Loko u pfumelela maxaka ya wena ma kucincisa xiboho xokarhi, minkama hinkwayu mata lava kukucincisa swiboho swa wena. Kambe, loko uvani musa utlhela utiya loko u vulavula ni maxaka ya wena, van’wani vangaha kuyingisa.” Leswi hi leswi swinga humelela Alise. Vapsali va yena hi vambirhi se i maphayona ya nkama hinkwawu naswona papayi wa yena i doda.

15. Hi kuya hi Matewu 5:14-16 na 1 Petro 2:12, “mintirho . . . leyosaseka” ya van’wani yingama pfunisa kuyini maxaka ya hina?

¹⁵ Yehovha a tirhisa “mintirho . . . leyosaseka” ya vanhu va yena leswaku a koka vanhu vata ka yena. (Lerha Matewu 5:14-16;  1 Petro 2:12.) Loko lweyi u chadeke na yena angali Mboni ya Yehovha, kungava leswaku wava tiva vamakwerhu va le bandleni? Pawulina lweyi hi buleke ha yena akusunguleni, a arhamba vamakwerhu a kaya ka yena akuva nuna wa yena Wilson atava tiva. Wilson a li a khumbuka leswi makwerhu wokarhi angamu pfunisa xiswona kutwisisa swaku Timboni ti tshamise kuyini. Yena a li: “Makwerhu yelweyo siku leli a angayi ntirhweni ate kaya hita hlalela a bola. Kutani ni vhela ni swivona swaku na yena ‘i munhu kufana na mina’”.

16. Hi mhaka muni hi fanele hi rhamba maxaka ya hina leswaku mata aminhlanganwini?

¹⁶ Ndlela yin’wani ya kahle ya kupfuna maxaka ya hina i kuva rhamba leswaku vava kona aminhlanganwini. (1 Kor. 14:24, 25) Wilson a sungule kuya minhlanganwini hi siku la xitsundzuxu, hikusa a ahuma hile ntirhweni naswona minhlanganu ya kona ayinga lehanga. Yena a li: “Aningaswi twisisi leswi aswi vulavuliwa kambe ani hlamalisiwa hi vanhu va kona. Va tile vatani hoyozela vatlhela vani qhevula hi voko. Ni vhele niswi vona swaku avani xoweta swihuma mbilwini.” A kuni vamakwerhu vambhirhi lava avali nuna na nsati lava ava kombisa timpsalu ka Pawulina, ava pfuna yena ni n’wana wa yena aminhlanganwini ni le nsin’wini. Kutani hi wugamu, Wilson a teke xiboho xa kutwisisa swotala hi wukhongeli la Pawulina kutani a kombele makwerhu lwiya wa xinuna leswaku a djondza na yena Bibele.

17. I mpsini leswi hi kalaka hinga fanelanga hi titwa nandzu ha swona nakambe hi mhaka muni hinga fanelanga hi tibyela swaku maxaka ya hina amangehe cinci?

¹⁷ Hina hi navela swaku maxaka ya hina ma tirhela Yehovha xikan’we na hina. Kambe hambi loko ho zama hilaha hinga kotaka ha kona kuva pfuna leswaku va tirhela Yehovha, swingaha yendleka vanga pfumeli. Loko swoleswo swi humelela a hi nandzu wa hina. Kuvula ntiyiso, ahi fanelanga hi sindzisa munhu kupfumela leswi hina hiswi kholwaka. Kambe loko maxaka ya wena maswi vona swaku kutirhela Yehovha swiku yendla u tsaka, na wona mangaswi navela. Va patsi ka swikhongelo swa wena. Vulavula na vona hi xihlonipho. Naswona ungava godoleli! (Mint. 20:20) Tiyiseka leswaku Yehovha a tayi katekisa minzamu ya wena. Naswona loko maxaka ya wena ma kuyingisa, mata ponisiwa!