1. Timboni ta Yehovha leti kombisiweke ka paragrafu leli ti kukombise kuyini kutshembeka ka tona ka Yehovha?

TIMBONI TA YEHOVHA tinharhu ti kumana ni swiyimo leswi landzelaka: (1) Ntombhi yin’wana yi le xikolweni loko prisori a tivisa leswaku hinkwavu va boheka kuhlanganyela ka xiyendlakalo xokarhi. Hikolaho ka leswi yiswi tivaka leswaku xiyendlakalo lexi xa lwisana ni kurhandza ka Yehovha, ntombhi leyi yi byela prisori hi ndlela leyi kombaka xihlonipho leswaku ayingataswi kota kuva kona. (2) Mumpsha mun’wana lweyi hi ntumbuluku anga ni tingana, loko ali karhi a chumayela hi yindlo ni yindlo a tsumbula leswaku ka yindlo leyi landzelaka kutshama kolega wa yena wa xikola lweyi a tshameke a poyila Timboni ta Yehovha. Hambileswo, anga pfumeleli leswaku kuchava kumu sivela kuchumayela ka yindlo yoleyo. Hi mhaka leyo a ya mahlweni ivi a gongondza xipfalo xa kona. (3) Wanuna mun’wana a tirha hintamu leswaku a kota kuwundla ndjangu wa yena. Kambe siku lin’wana mulungu wa yena amu kombela leswaku a yendla nchumu lexi biheke kumbe lexi lwisanaka ni minawu ya tiko. Hambileswi aswi tivaka leswaku angaha lahlekeliwa hi ntirho, wanuna lweyi a hlamusela mulungu wa yena leswaku a fanele a tshembeka ni kuyingisa minawu ya Xikwembu hikuva hi leswo Xikwembu xiswi languteleke ka vanhu lavaxi gandzelaka. — Rhom. 13:1-4; Hev. 13:18.

2. Hita hlamula swivutiso swihi naswona hayini?

² Uswi xiyile leswi pfuneke vamakwerhu lava kuyendla xiboho lexinene? Swinga yendleka u pimise hi swilo swotala swofana ni xivindzi ni kunavela kuyendla leswi lulameke. Kambe xaxikulu ka hinkwaswu i kutshembeka. Vamakwerhu lavanharhu va kombise kutshembeka ka vona ka Yehovha. Va yalile kutlula minawu ya Xikwembu. Kutshembeka hi kona kuva susumeteleke kuyendla xiboho lexinene. Kunene Yehovha a tibumile hileswi va tshembekeke ka yena. Na hina hinga yendla leswaku Yehovha a tibuma hi hina. Leswaku hi kota kuyendla tano, ka djondzo leyi hita hlamula swivutiso leswi landzelaka: Swi vula yini kutshembeka? Hayini hi fanele hi tshembeka? I yini lexingatahi  pfuna kutiyimisela kutshama hi tshembekile ka masiku ya kukarhata lawa hi hanyaka ka wona?

3. a) Swi vula yini kutshembeka? b) I swikombiso swihi leswihi pfunaka kutwisisa ntlhamuselo wa rito ‘kutshembeka’?

³ Xana malandza ya Xikwembu ma kukombisa kuyini kutshembeka? Hi kurhandza Yehovha hi mbilu leyi heleleke. Lirhandzu leli hi lona lima susumetelaka kuyendla hinkwaswu leswi tsakisaka Yehovha. Ahi kambisiseni ntlhamuselo wa rito leli hi wuyenti. Marito man’wana lama tirhisiwaka Bibeleni leswaku ma tlhamusela rito “kutshembeka” i “kukala xinga limalanga, lexi kalaka xinga li na xivati kumbe lexi heleleke”. Hi xikombiso, Vayisrayele ava nyikiwe nawu wa kunyikela swiharhi tani hi magandzelo ka Yehovha. Kambe leswaku Yehovha a yamukela magandzelo ya vona, ava fanele va nyikela swiharhi leswi kalaka swinga limalanga. * (Lev. 22:21, 22) Avanga pfumeleliwi kunyikela swiharhi leswi feke matihlo, leswi tshovekeke nenge kumbe leswi vabyaka. Ka Yehovha, kunyikela xiharhi lexi kalaka xinga limalanga aswi li swa lisima swinene. (Mal. 1:6-9) Leswi swihi yendla hi twisisa swivangelo leswi yendlaka Yehovha a lava leswaku hi nyikela minchumu leyi heleleke. Hambi hina vanhu hi rhandza minchumu leyi heleleke. Hi xikombiso, loko hi lava kuxava nchumu, kungaha va mihandzu, buku kumbe xitirho xokarhi, ahi hlawuli lexi boxekeke kumbe lexi swiyenge swin’wana swa xona swinga tirhiki kahle. Hi lava lexinga kahle hi matlhelo hinkwawu. Hi leswi Yehovha na yena aswi nyimeleke ka hina. A lava leswaku hi tshembeka ka yena ni kumu rhandza hilaha kuheleleke.

4. a) Hi fanele hi va lava hetisekeke leswaku hi tshembeka? Hlamusela. b) Hikuya hi Tipisalema 103:12-14, i yini leswi Yehovha aswi nyimeleke ka hina?

⁴ Xana leswi swi lava kuvula leswaku hi fanele hi va lava hetisekeke akuva hi tshembeka? Nikatsongo. Hinkwerhu ahi hetisekanga naswona hi yendla swihoxo swotala. Hikolaho, ahi fanelanga hi pimisa leswaku hi fanele hi va lava hetisekeke akuva hi tshembeka. Vona swivangelo swimbirhi. Xosungula, Yehovha anga tshameli kuveka tihlo ka swihoxo swa hina. Rito la yena lahi tiyisekisa: “Loko awolanguta swihoxo, Oh Yah, i mani lweyi aatakota kunyima amahlweni ka wena, Oh Yehovha? (Pis. 130:3) Yehovha waswi tiva leswaku ahi hetisekanga, hi tshamela kudjoha. Hikolaho, a tiyimisele kuhi rivalela. (Pis. 86:5) Xawumbirhi, Yehovha waswi tiva leswi hi kotaka kuswi yendla. Hi mhaka leyo, anga nyimeli ku hi yendla nchumu lexi axi tivaka leswaku ahingexi koti. (Lerha Tipisalema 103:12-14.) Se hingaswi kotisa kuyini kuva lava heleleke hi tlhela himu tirhela na hinga na xivati kuve ahi hetisekanga?

5. Leswaku hi kota kutshembeka hayini hi fanele hi rhandza Yehovha?

⁵ Lirhandzu hi lona lihi pfunaka kuva hi tshembeka. Hi fanele himu rhandza Yehovha hi tlhela hi tinyiketela ka yena hilaha kuheleleke. Loko hi kombisa lirhandzu lotano hambiloko hi kumana ni mindzingo, hi kombisa leswaku ha tshembeka ka yena. (1 Tikro. 28:9; Mat. 22:37) Ahi tlheleni hi bula nyana hi vamakwerhu vanharhu lava kombisiweke ka paragrafu lakusungula. I yini lexiva susumeteleke kuyendla xiboho lexinene? Xana ntombhi liyani ayo kala yingaswi rhandzi kuhungata? Xana jaha leli chumayelaka laha kutshamaka kolega wa lona wa xikola lotsakela kukhomisiwa tingana? Swi li yini hi mulumuzana lwiyani a yaleke kutsakisa mulungu wa yena? Xana okala angahawu lavi ntirho? Haswi tiva leswaku nhlamulu ya swivutiso leswi i nikatsongo. Kuhambana ni leswo, hinkwavu vaswi tiva leswi Yehovha aswi pimisaka hi xiyimu lexi va langutanaka na xona naswona va lava kumu tsakisa. Hikolaho ka leswi vamu rhandzaka, vamu rhangisa ka swiboho leswi vaswi yendlaka. Hi kuyendla leswi, va kombisa kutshembeka ka yena.

6. a) Hayini hi fanele hi tshembeka? b) I yini lexi yendleke Adamu na Eva va hluleka kutshama va tshembekile?

⁶ Hayini hi fanele hi tshembeka? Hi mhaka ya  leswi Sathana a tlhontlheke Yehovha ni hileswi a tlhelaka a tlhontlha mun’wana ni mun’wana wa hina. Ntsumi leyi tshikeke kuyingisa Xikwembu yi tiyendle Sathana, leswi vulaka “Mukaneti” loko yi vule mavunhwa le ka jaradi la Edeni. Yi ringete kunchimisa vito la Yehovha hi kuvula leswaku Yehovha i munhu lweyi a biheke mbilu, lweyi a pimisaka hi yena ntsena ni Mufumi lweyi a kanganyisaka. Lexi vavisaka, Adamu na Eva va nyime na Sathana ivi na vona va tshika kuyingisa Xikwembu. (Gen. 3:1-6) Wutomi leli ava hanya lona ka jaradi la Edeni aliva nyika mukhandlu wotala wa kutiyisa lirhandzu leli ava li na lona hi Yehovha. Kambe aswi vanga tano. A nkama lowu Sathana ava tlhontlheke hi wona, lirhandzu leli ava li na lona hi Yehovha se alingaha helelanga. Leswi humeleleke ka jaradi la Edeni swi pfuxe xivutiso lexi axi fanele xi hlamuliwa: Xana akuta va ni vanhu lava avata tshembeka ka Yehovha hileswi vamu rhandzaka? Hi marito man’wana, xana vanhu vangaswi kota kutshama va tshembekile? Xivutiso lexi xi tlakukile ni le ka Yobo.

7. a) Yehovha a atitwisa kuyini hi kutshembeka ka Yobo? b) Sathana a atitwisa kuyini hi kutshembeka ka Yobo?

⁷ Yobo a hanye amasikwini lawa Vayisrayele ava li aGibita. Hi nkama wolowo, akunga li na munhu lweyi a atshembekile kufana na yena. Kufana na hina, Yobo aanga hetisekanga naswona a ayendla swihoxo. Hambileswo, Yehovha aamu rhandza hileswi a atshembekile ka yena. Swi tikomba ingaku Sathana a atshame a byela Yehovha leswaku aku na munhu lweyi anga tshamaka a tshembekile ka yena. Hi mhaka leyo, Yehovha a hlamule Sathana hi kumu kombeta Yobo. Wutomi la Yobo aliswi veka rivaleni leswaku Sathana a ali muhembi! Hikolaho, Sathana a kombele Yehovha leswaku amu pfumelela kuringa Yobo. Tani hileswi aamu tshemba nandza wa yena Yobo, Yehovha a pfumelele Sathana leswaku amu ringa. — Lerha Yobo 1:8-11.

8. I tindlela tihi leti Sathana ati tirhiseke leswaku a hlasela Yobo?

⁸ Sathana a ni mona naswona i mudlayi. A yendle leswaku Yobo a lahlekeliwa hi swilo hinkwaswu leswi  a ali na swona, a dlaya malandza ya yena ni kunchimisa vito la yena. A hlasele ndjangu wa yena a tlhela a dlaya 10 wa vana lava Yobo aava rhandza swinene. Ndzhaku, a hlasele Yobo hi kumu yendla a va ni marhumba ka mirhi wa yena hinkwawu lawa ama vavisa swinene. Nsati wa yena a sungule kukarhateka a tlhela a vaviseka la kakuva a kombela Yobo leswaku a tshika kutshembeka ka yena, a rhuka Xikwembu leswaku a fa. Hambileswi na yena aaswi navela kufa, a hambete a tshama a tshembekile ka Yehovha. Loko a vona leswo, Sathana a cince mab’ela. A tirhise vavanuna vanharhu lava ava li vanghanu va Yobo. Vamu pfuxelile kambe matshan’wini ya kumu chavelela, vamu solile hi marito ya kutlhava swinene. Vamu byele leswaku Xikwembu hi xona axi vanga hinkwaswu leswi aswimu humelela ni leswaku axinga na mhaka ni kutshembeka ka yena. Va ve ni xixinya xa kubyela Yobo leswaku a ani mbilu yobiha ni leswaku a afaneliwa hi hinkwaswu leswi aswi li karhi swimu humelela! — Yobo 1:13-22; 2:7-11; 15:4, 5; 22:3-6; 25:4-6.

9. Hambiloko swimu tikela, i yini lexi Yobo a kalaka angaxi yendlanga?

⁹ Xana Yobo a yangulise kuyini loko a kumana ni swikarhato hinkwaswu leswi? Hinga rivali leswaku Yobo aanga hetisekanga. Hi kutwa kuvava, a vule swilo leswi hi kufamba ka nkama a tisoleke ha swona. Matshan’wini ya kuvula leswaku Yehovha a lulamile, makhambi yotala a vule leswaku hi yena lweyi a alulamile. (Yobo 6:3; 13:4, 5; 32:2; 34:5) Kambe hambiloko a li ka xiyimu xa kutika swinene, Yobo a tshame a tshembekile. Angama kholwanga marito lamanga vuliwa hi vanghanu va yena va mavunhwa. A te: “Aningetshuki nimivule lavalulameke! Aningelitshiki wutshembeki la mina kufikela loko nifa!” (Yobo 27:5) Marito lawa ma kombisa leswaku Yobo a atiyimisele kutshama a tshembekile kunga khataliseki leswi aswitamu humelela. Na hina hingaswi kota kukombisa kutshembeka kotano.

10. Xana u katsekisa kuyini ka mhaka leyi Sathana ayi pfuxeke loko a ringa Yobo?

¹⁰ Xana u katsekisa kuyini ka mhaka leyi Sathana ayi pfuxeke loko a ringa Yobo? Phela Sathana a vula leswaku wena awumu rhandzi Yehovha, uta tshika kumu tirhela leswaku u hanyela kurhandza ka wena ni leswaku awungata tshama u tshembekile ka yena. (Yobo 2:4, 5; Nhla. 12:10) U titwisa kuyini hi swihehlo leswo? Swaku vavisa, ahi swona? Kambe pimisa hi leswi: Yehovha aku tshemba hintamu la kakuva a pfumelela Sathana aku ringa leswaku uta va ni mukhandlu wa kukomba kutshembeka ka wena ka yena. Waswi tiva leswaku utaswi kota kutshama u tshembekile ivi u kombisa leswaku Sathana i muhembi. Handle ka leswo, a tshembisa leswaku ataku pfuna. (Hev. 13:6) Xana aswiku tsakisi kutiva leswaku Xikwembu Lexi Tlakukeke ka wuyako hinkwalu xaku tshemba? Ha tiyiseka leswaku swaku tsakisa. Se waswi vona leswaku hayini swi li swa lisima kutshama hi tshembekile ka Yehovha? Kutshembeka ka hina kuswi veka rivaleni leswaku Sathana i muhembi. Kutlhela kukombisa leswaku hi seketela vito ni wuhosi la B’ava wa hina Yehovha. Se xivutiso hi lexi: I yini leswi hingaswi yendlaka akuva kutshembeka ka hina kutshama kutiyile?

11. Xikombiso xa Yobo xingahi pfunisa kuyini?

¹¹ Ka “masiku ya makumu” lawa hi hanyaka ka wona, Sathana a ya a hlasela hintamu malandza ya Yehovha. (2 Tim. 3:1) Se i yini leswi hingaswi yendlaka leswaku hi tiyisa kutshembeka ka hina? Xikombiso xa Yobo xingahi pfuna amhakeni leyi. Phela se a akombise kutshembeka ka yena makhambi manyingi na angese ringiwa. Ahi voneni swilo swinharhu leswi hingaswi djondzaka ka yena loko swi ta ka mhaka ya kutiyisa kutshembeka ka hina.

12. a) I yini lexi pfuneke Yobo kuhlakulela lirhandzu ni xihlonipho hi Yehovha? b) Kufana na Yobo, hinga yendla yini leswaku hi tiyisa kutshembeka ka hina?

¹² Hikolaho ka leswi a ahlamalisiwa hi swilo hinkwaswo leswi Yehovha aswi yendleke, lirhandzu la yena hi Xikwembu li ye mahlweni li kula. A atirhisa nkama wa yena leswaku a yanakanyisisa  hi ntumbuluku wa Yehovha. (Lerha Yobo 26:7, 8, 14.) A ahlamala loko a pimisa hi misava, matilo, marhefu, ni kudzindza ka tilo. Hambileswi aaswi twisisa leswaku aanga tivi swotala hi leswi Yehovha aswi tumbuluxeke, switsongo leswi aaswi tiva aswimu yendla a hlonipha hintamu Yehovha. A vule leswi: “Nihlayise marito ya xona [Xikwembu]”. (Yobo 23:12) Yobo a ahlamala loko a pimisa hi leswi ntumbuluku awumu djondzisa swona hi Yehovha. Leswo swi yendle leswaku a hlonipha a tlhela a navela kuyendla kurhandza ka B’ava wa yena. Xana li ve lihi vuyelo hi kuva a hlakulele xihlonipho lexi? Kutiyimisela ka yena kohambeta a tshembeka ka Yehovha aku kula. Na hina hi fanele hi yendla leswi fanaka. Leswi hiswi tivaka hi ntumbuluku swi tlula leswi Yobo aaswi tiva. Hi ni Bibele lelihi pfunaka kutiva wumunhu la Yehovha hi wuyenteleli. Hinkwaswu leswi hingataswi djondza ka Bibele ni ka ntumbuluku swita yendla timbilu ta hina ti hlamala hi leswi hingataswi tiva hi Yehovha. Leswo switahi susumetela kumu hlonipha. Se kuta yendleka yini loko xihlonipho lexi hinga na xona hi yena xi kula? Lirhandzu la hina hi Yehovha lita kula naswona hita navela kumu yingisa. Kunavela ka hina kohambeta hi tshama hi tshembekile ka yena na kona kuta kula. — Yobo 28:28.

13-14. Hikuya hi Yobo 31:1, Yobo aswi kombise kuyini leswaku a ayingisa Yehovha naswona hingaxi tekelelisa kuyini xikombiso xa yena?

¹³ Kuyingisa ka Yobo ka xin’wana ni xin’wana kumu pfunile leswaku a tshama a tshembekile ka Yehovha. Yobo aaswi tiva leswaku akuva munhu a tshembeka ka Yehovha a afanele amu yingisa. Kuvula ntiyiso, xin’wana ni xin’wana lexi hixi yingisaka xi tiyisa kutiyimisela ka hina kotshama hi tshembekile. Yobo a ayendla hinkwaswu leswaku a yingisa Yehovha ka xin’wana ni xin’wana. Hi xikombiso, a ani wuxiyaxiya ka ndlela leyi aava khoma ha yona vavasati. (Lerha Yobo 31:1.) Tani hileswi a achadile, aaswi tiva leswaku swi hoxile kunyikela yingiso ka wansati mun’wana hi ndlela leyi kombaka kumu tsakela. Namuntlha, hi hanya ka misava leyi yihi kucetelaka kuvona timhaka ta masangu hi ndlela leyi hoxeke. Loko hi chadile kufana na Yobo, xana hi yendla hinkwaswu leswaku hinga languti vavasati van’wana hi ndlela leyi kombaka kuva tsakela? Hi yendla hinkwaswu leswaku hinga languti swifaniso swa vanhu lava kalaka vanga yambalanga  nchumu kumbe leswihi susumetelaka kutsakisa kunavela ka hina ka timhaka ta masangu hi ndlela leyi hoxeke? (Mat. 5:28) Loko hi tikhoma siku ni siku, hita tiyisa kutshembeka ka hina ka Yehovha.

¹⁴ Yobo a ayingisa Yehovha hi kuva ni vonelo la yena hi swilo leswi vonekaka. Aaswi tiva leswaku kutshemba swilo leswi vonekaka aswitamu yendla a wela xidjoheni ivi a khatisiwa hi Yehovha. (Yobo 31:24, 25, 28) Na hina namuntlha hi hanya ka misava leyi swilo leswi vonekaka swi vekiwaka phambeni ka hinkwaswu. Kambe loko hi yingisa Yehovha hi kuvona male ni swilo leswi vonekaka hilaha Yehovha aswi vonaka ha kona, hita tiyisa kutiyimisela ka hina kotshama hi tshembekile ka Yehovha. — Swi. 30:8, 9; Mat. 6:19-21.

15. a) I ntshembo wihi lowu pfuneke Yobo kutshama a tshembekile? b) Kuveka ntshembo lowu Yehovha ahi nyikaka wona amiyanakanywini switahi pfuna hi yini?

¹⁵ Kuveka miyanakanyo ya yena ka ntshembo lowu a ali na wona wa leswaku Yehovha atamu katekisa swimu pfunile kutshama a tshembekile. Yobo aaswi tiva leswaku Yehovha aku nyika lisima kutshembeka. (Yobo 31:6) Hambileswi a ali ka swiyimu swa kukarhata, Yobo a atshemba leswaku hi wugamu aata katekisiwa hi Yehovha. Ntshembo lowu hi wona wumu pfuneke leswaku a hambeta a tshembeka. Yobo a katekisiwe hintamu hi Yehovha hileswi a tshameke a tshembekile hambileswi aanga hetisekanga! (Yobo 42:12-17; Yak. 5:11) Naswona amisaveni leyimpsha, ahata va ni minkateko yayikulu. Swi li yini hi wena? Wa kholwa hilaha kuleleke leswaku Yehovha ata katekisa kutshembeka ka wena? Yehovha anga cincanga. (Mal. 3:6) Loko hinga rivali leswaku ata katekisa kutshembeka ka hina, ntshembo wa kutsakisa lowu ahi nyikaka wona hi wumundzuku wuta tshama wu hanya atimbilwini ta hina. — 1 Tes. 5:8, 9.

16. Hayini hi fanele hi tiyimisela kutshama hi tshembekile?

¹⁶ Tiyimisele kutshama u tshembekile minkama hinkwayu. Hambiloko minkama yin’wana u titwa ingaku hi wena ntsena u tshamaka u tshembekile, unga godoli hikusa awu wexe. Ka nkama lowu taka, utaswi vona leswaku awunga li wexe hikusa uta va xikarhi ka timiliyoni ta vanhu lava hlayisaka kutshembeka ka vona. Uta tlhela u katsiwa ka longoloko wa vavanuna ni vavasati va lipfumelo lava hambiloko va langutane ni lifu vaswi koteke kutshama va tshembekile. (Hev. 11:36-38; 12:1) Kufana na Yobo, onge hinkwerhu hinga tiyimisela kutshama hi tshembekile hikuva loko hi tshembeka hi yisa kudzuneka ka Yehovha!