1-2. a) Yehovha a titwisa kuyini loko a vona vanhu votala va khumbuka lifu la Yesu? (Vona xifaniso lexinga ka tluka lorhanga la revhixta leli.) b) Hita hlamula xivutiso xihi ka djondzo leyi?

PIMISA hi ndlela leyi Yehovha a titwaka ha yona loko a vona vanhu va timiliyoni amisaveni hinkwayo va tlhangana leswaku va khumbuka lifu la Yesu. Hambileswi kunga vanhu votala, Yehovha a nyikela yingiso ka mun’wana ni mun’wana lweyi a vaka kona. Hi xikombiso, wava vona lava kombisaka kutshembeka ka yena hi kuva kona ka Xitsundzuxo hambileswi va xanisiwaka swinene hileswi vanga Vakreste. Van’wana ava hlaleli minhlangano hinkwayo kambe vaxi nyika lisima hintamu Xitsundzuxo naswona va yendla hinkwaswo leswaku va va kona. Van’wana lava Yehovha a nyikelaka yingiso ka vona hi lava kunga khambi losungula va va kona ka Xitsundzuxo kumbexana hileswi va navelaka kutiva ndlela leyi hi khumbukaka lifu la Yesu ha yona.

² Kunene, Yehovha a tsaka swinene loko a vona vanhu votala va khumbuka lifu la Yesu. (Luk. 22:19) Kambe hambileswi swimu tsakisaka kuvona vanhu votala va hlalela Xitsundzuxo, leximu tsakisaka hintamu i kuvona leswiva susumetelaka kuyendla leswo. Phela Yehovha a khatala swinene hi swivangelo leswi susumetalaka vanhu kuva kona ka xiyendlakalo lexi xa lisima. Ka djondzo leyi, hita hlamula xivutiso lexinge: Hayini hi lwela kuva kona ka minhlangano hinkwayo leyi Yehovha ahi lulamiselaka yona vhiki lin’wana ni lin’wana kupatsa ni Xitsundzuxo?

3-4. a) Hayini hi ya minhlanganwini? b) Kuva kona ka hina aminhlanganwini kukombisa yini hi hina? c) Hikuya hi 1 Vakorinto 11:23-26, hayini hi fanele hi va kona ka Xitsundzuxo?

³ Xivangelo xa xikulu lexihi yendlaka hi ya minhlanganwini hileswi minhlangano yi yendlaka xiyenge xa kugandzela Yehovha. Xin’wanyana, hileswi Yehovha a tirhisaka minhlangano leswaku ahi djondzisa.  Vanhu va kutibyela va pimisa leswaku ava fanelanga va djondzisiwa nchumu. (3 Yoh. 9) Kambe kuhambana na vona, hiswi lava hi mbilu hinkwayo kudjondzisiwa hi Yehovha ni hi nhlengeletano ya yena. — Esa. 30:20; Yoh. 6:45.

⁴ Kuva kona ka hina aminhlanganwini kukombisa leswaku ha titsongohata ni leswaku hi tilulamisele kudjondzisiwa. Ha hlangana leswaku hi khumbuka lifu la Yesu kunga li hileswi kunga nhlangano wa lisima ntsena kambe hileswi hi lavaka kutitsongohatela xileriso xa Yesu lexinge: “Tshamani mi li karhi miyendla leswi minkama hinkwayo leswaku minikhumbuka.” (Lerha 1 Vakorinto 11:23-26.) A Xitsunzuxo xa lifu la Yesu xi tiyisa ntshembo wa hina hi wumundzuku ni kuhi khumbukisa leswaku Yehovha wahi rhandza. Kambe, hikolaho ka leswi Yehovha aswi tivaka leswaku hita lava kukhutaziwa minkama hinkwayo, ahi lulamisele minhlangano ya vhiki ni vhiki naswona a navela leswaku hi va kona ka yona. Kutitsongohata ka hina kuhi yendla hinga lovhi minhlanganwini ni kutlhela kuhi yendla hi tinyika nkama vhiki ni vhiki wa kuyi lulamisela.

5. Hayini lava titsongohataka va pfumela xirhambo xa Yehovha?

⁵ Yehovha a rhamba vanhu leswaku va ta ka yena naswona votala lava titsongohataka vaxi pfumela xirhambo xa yena. (Esa. 50:4) Minkama yin’wana, va rhanga hi kuta ka Xitsundzuxo ivi ndzhaku va sungula kuhlalela minhlangano leyin’wanyana hinkwayo. (Zak. 8:20-23) Hina se i nga khale na hi li ntiyisweni xikan’we na vona ha djondzisiwa ni kukongomisiwa hi Yehovha, “mupfuni ni muponisi [wa hina]”. (Pis. 40:17) Xana xi kona xa kutsakisa — kumbe lexinga xa lisima hintamu — kutlula kuyamukela xirhambo xa kudjondzisiwa hi Yehovha na Yesu, N’wana wa yena lweyi amu rhandzaka swinene? — Mat. 17:5; 18:20; 28:20.

6. Kutitsongohata kumu pfunise kuyini wanuna mun’wana leswaku a va kona ka Xitsundzuxo?

⁶ Malembe hinkwawo, hi yendla minzamu hilaha hinga kotaka ha kona ya kurhamba vanhu leswaku va va kona ka Xitsundzuxo. Votala lava titsongohataka va vuyeliwile hi kuva va yamukele xirhambo xa hina. Hi xikombiso, malembendzhaku wanuna mun’wana a rhambiwile leswaku a ya ka Xitsundzuxo kambe a vule leswaku aangataswi kota kuva kona. Hambileswo, makwerhu lweyi amu rhambeke a hlamalile loko amu vona a Salão do Reino hi siku la Xitsundzuxo. Wanuna lweyi a hlamalisiwe swinene hi ndlela ya xinghana leyi a khomiweke ha yona. Ndzhaku ka Xitsundzuxo, a sungule kuhlalela minhlangano ya vhiki ni vhiki. Kuvula ntiyiso, ayo lovha minhlangano yinharhu ka lembe hinkwalo leli landzeleke. I yini lexi susumeteleke wanuna lweyi kuhlalela minhlangano hinkwayo? Hileswi a atitsongohata. Siku lin’wana, makwerhu lweyi amu rhambeke a vule leswi: “Ahi kutitsongohata ka wanuna lweyi.” Kunene, i Yehovha lweyi a kokeke wanuna lwiyani leswaku a nghena nhlengeletanwini. Lexi tsakisaka, wanuna lweyi se i muchumayeli lweyi a khuvuliweke. — 2 Sam. 22:28; Yoh. 6:44.

7. Leswi hiswi djondzaka aminhlanganwini ni leswi hiswi lerhaka Bibeleni swihi pfunisa kuyini kutitsongohata?

⁷ Leswi hiswi djondzaka aminhlanganwini swahi pfuna leswaku hi titsongohata. Hi mhaka leyo, loko kaha sale mavhiki nyana leswaku siku la Xitsundzuxo li fika, minhlangano ya hina yita vulavula hintamu hi Yesu ni hi kutitsongohata loku aku kombiseke hi kunyikela wutomi la yena hi mhaka ya hina. Xin’wana lexihi pfunaka kutitsongohata i rungula leli hili lerhaka aBibeleni. Hikolaho, aswita va swinene ku loko se kusale masiku matsongo leswaku hi khumbuka lifu la Yesu, hi tinyika nkama wa kudjondza rungula la Bibele leli vulavulaka hi swiyendlakalo leswi yelanaka ni lifu ni kupfuxiwa ka yena. Phela Leswi  hiswi djondzaka aminhlanganwini ni le kulerheni ka hina ka Bibele swihi yendla himu tlangela hintamu Yesu hileswi ahi feleke. Swi tlhela swihi susumetela kutekelela kutitsongohata ka yena ni kuyendla kurhandza ka Yehovha, hambiloko swingahi vevukeli. — Luk. 22:41, 42.

8. Yesu axi kombise kuyini xivindzi?

⁸ Hinkwerhu hi zama kutekelela xivindzi xa Yesu. Pimisa hi xivindzi lexi axi kombiseke loko kusale masiku nyana leswaku a dlayiwa. Aaswi tiva leswaku valala va yena avatamu bukutela, vamu xanisa ni kumu dlaya. (Mat. 20:17-19) Kambe hambileswi aswi tiva hinkwaswo leswo, anga chavanga kulangutana ni lifu. Loko a li kusuhi ni kukhomiwa hi valala va yena, a byele vadjondzisiwa va yena a ku: “Sukani miyima, ahifambeni! Langutani, lweyi anixengaka a le kusuhi.” (Mat. 26:36, 46) Naswona loko xitshungu lexi axi tamele matlharhi xi fikile leswaku ximu khoma, a tinyikelile a tlhela a kombela masonchwa leswaku ma tshika vadjondzisiwa va yena va famba. (Yoh. 18:3-8) Xivindzi lexi xa hlamalisa hakunene! Namuntlha, Vakreste lava totiweke kupatsa ni lava va tinyimpfu letin’wana va lwela kutekelela xikombiso xa Yesu xa xivindzi. Hi ndlela yihi?

9. a) Hayini kuya minhlanganwini swingaha lavaka xivindzi? b) Xivindzi xa hina xiva khumbisa kuyini vamakwerhu lavanga madjele?

⁹ Swingaha lava xivindzi leswaku hi hlalela minhlangano hinkwayo, ngopfungopfu loko hi tlhangana ni swiyimo swa kutika. Vamakwerhu van’wana va langutana ni swikarhato swa mavabyi, kuhela ntamu kumbe kuvaviseka hikolaho ka swiyimo swokarhi. Van’wana va poyiliwa va tlhela va xanisiwa hi maxaka kumbe hi mimfumu. Kambe hambileswi va kumanaka ni swiyimo hinkwaswo leswi, ava lovhi minhlangano. U pimisa leswaku lavanga madjele hikolaho konyimelela lipfumelo la vona va titwisa kuyini loko va twa leswaku vamakwerhu ava tshiki kuya minhlanganwini hambiloko swiyimo swi tika? (Hev. 13:3) Kunene swi tiyisa lipfumelo la vona ni kuva nyika xivindzi xa kuhambeta va tshama va tshembekile. Mupostola Pawulo a tshame a titwa hi ndlela leyi fanaka. Loko a li djele aRoma, a atsaka hintamu loko a twa leswaku vamakwerhu lavanga handle ava hambeta va tshama va tshembekile ka Yehovha. (Filp. 1:3-5, 12-14) Swi tikomba inge loko a li kusuhi ni kumesiwa kumbe ndzhaku nyana ka loko a humesiwile, a tsalele Vaheberu. Ka papila lelo, a khutaze Vakreste lavayani votshembeka leswaku va ya ‘mahlweni va rhandzana kukota vamakwavu’ ni kunga tshiki kuhlangana. — Hev. 10:24, 25; 13:1.

10-11. a) Hi fanele hi rhamba vamani leswaku va va kona ka Xitsundzuxo? b) Hikuya hi Vaefesa 1:7, i yini lexihi susumetelaka kuva rhamba?

¹⁰ Hi kombisa xivindzi loko hi rhamba maxaka, vatirhikuloni ni vayakelani leswaku va va kona ka Xitsundzuxo. Kasi hayini hiva rhamba? Hileswi hiswi tlangelaka hintamu leswi Yehovha na Yesu vahi yendleleke swona. Swihi khumba swinene la kakuva hiswi lava hi mbilu hinkwayo kurhamba van’wana leswaku na vona va va kona ka Xitsundzuxo. Hi navela leswaku na vona va vuyeliwa ka “timpsalu [letingahifaneliki] ta Xikwembu” leti xihi kombiseke tona hi kuhi lulamisela nkutsulo. — Lerha Vaefesa 1:7; Nhla. 22:17.

 ¹¹ Loko hi kombisa xivindzi hi kunga pfumeleli nchumu leswaku xihi sivela kuva kona minhlanganwini, hi kombisa xiphemu xin’wana xa wumunhu la Yehovha na Yesu, lexi hawumbirhi la vona vaxi kombisaka hi ndlela leyi hlamalisaka.

12. a) Minhlangano ya hina yili tiyisa kuyini lirhandzu leli hinga na lona hi Yehovha na Yesu? b) 2 Vakorinto 5:14, 15 yihi khutaza leswaku hi yendla yini akuva hi tekelela Yesu?

¹² Lirhandzu leli hinga na lona hi Yehovha na Yesu lihi susumetela kuva kona minhlanganwini. Leswi hiswi djondzaka loko se hi li minhlanganwini swi yendla leswaku lirhandzu leli liya li kula. Aminhlanganwini hi khumbukisiwa hi leswi Yehovha na Yesu vahi yendleleke swona. (Rhom. 5:8) Xitsundzuxo xihi pfuna kutwisisa kahle wukulu la lirhandzu leli vali kombiseke hambi ka lavangali twisisiki lisima la nkutsulo. Leswo swihi susumetela kulwela kutekelela wumunhu la Yesu ka wutomi la hina la siku ni siku. (Lerha 2 Vakorinto 5:14, 15.) Handle ka leswo, hi susumeteleka kudzunisa Yehovha hileswi ahi lulamiseleke nkutsulo. Yin’we ya tindlela ta kuyendla leswo i kuhlanganyela ka minhlangano hi kunyikela tinhlamulo leti humaka mbilwini.

13. Hingali kombisa kuyini lirhandzu leli hinga na lona hi Yehovha na Yesu? Hlamusela.

¹³ Hinga kombisa leswaku hamu rhandza swinene Yehovha ni N’wana wa yena Yesu hi kutiyimisela kutshika xin’wana ni xin’wana lexingaha lavekaka hikolaho ka vona. Hi xikombiso, ahi pfumeleli nchumu xihi tshikisa kuva kona minhlanganwini. Mabandla manyingi ma ni minhlangano ya xikarhi ka vhiki nimadlambu, kunga nkama lowu votala va kumekaku na va karhalile. Yin’wanyana minhlangano yi khomiwa hi mahelovhiki, kunga nkama lowu vanyingi va lavaka kuhumula. Xana Yehovha wayi vona minzamu leyi hiyi yendlaka leswaku hi va kona minhlanganwini hambiloko hi karhalile? Kunene wayi vona! Kuvula ntiyiso, lirhandzu leli anga na lona hi hina la kula loko a vona leswaku hi yendla minzamu hinkwayo akuva hi va kona minhlanganwini. — Marka 12:41-44.

14. Hi xihi xikombiso lexinene lexi Yesu ahi vekeleke xona amhakeni ya kukombisa lirhandzu leli yanakanyelaka van’wana?

¹⁴ Yesu ahi vekele xikombiso lexi kulu hi kukombisa lirhandzu leli yanakanyelaka van’wana. A kombise lirhandzu lelo hi kutiyimisela kufela vadjondzisiwa va yena ni kuveka swilaveko swa vona amahlweni ka swa yena. Hi xikombiso, hambileswi a akarhalile a tlhela a karhateka hintamu ka wusiku leli anga fa hi lona, a hete nkama na a  bulisana ni vadjondzisiwa va yena, ava djondzisa swilo swa lisima leswi aswitava pfuna kutshama va hitekile. (Luk. 22:39-46) Matshan’wini ya kunyimela kutirheliwa, a atshamela kupimisa hi leswi yena aataswi yendlela van’wana. (Mat. 20:28) Loko lirhandzu leli hinga na lona hi Yehovha ni vamakwerhu li li likulu, hita yendla hinkwaswo leswaku hi va kona ka Xilalelo xa Hosi ni ka minhlangano leyin’wana yi khomiwaka vhiki ni vhiki.

15. I vamani lava hi tikarhatelaka ngopfu kuva pfuna?

¹⁵ Hi lumba ntlawa wun’we ntsena wa Vakreste lavanga ndjangu lowu rhandzanaka naswona haswi tsakela kutirhisa nkama wa hina hilaha hinga kotaka ha kona leswaku hi rhamba van’wana akuva va tipatsa na hina. Hambiswilitano, hi tikarhatela hintamu kupfuna “vapfumelikulorhi” lava va tshikeke kuchumayela kumbe kuta minhlanganwini. (Gal. 6:10) Hinga kombisa leswaku hava rhandza hi kuva khutaza leswaku va ta minhlanganwini, ngopfungopfu ka Xitsundzuxo. Kufana na Yehovha na Yesu, ha tsaka loko hi vona makwerhu lweyi a tshikeke kuchumayela ni kuta minhlanganwini a tlhelela ka Yehovha, Murisi ni B’ava wa hina wa lirhandzu. — Mat. 18:14.

16. a) Hi yihi ndlela leyi hingayi tirhisaka leswaku hi khutaza van’wana? b) Hayini lowu wu li nkama wa wunene wa kuyankanyisisa hi marito lama kumekaka ka Yohane 3:16?

¹⁶ Ka mavhiki lama landzelaka, rhamba vanhu votala hilaha unga kotaka ha kona leswaku va ta ka Xitsundzuxo xa lifu la Yesu Kreste lexingata yendliwa hi madlambu ya Wawuntlhanu wa 19 ka Abril wa 2019. (Vona kwadru lelinge “ Xana Uta Va Rhamba?”) Ka lembe leli landzelaka, ahi yendleni hinkwaswo leswi hingaswi kotaka leswaku hi va kona ka minhlangano hinkwayo leyi Yehovha ahi lulamiselaka yona. Xikombiso xa hina amhakeni leyi xita khutaza van’wana. Leswi magamu ma yaka ma tshinela, kuva kona minhlanganwini swi ya swi va swa lisima swinene. Minhlangano yitahi pfuna leswaku hi titsongohata, hi va ni xivindzi ni kukombisa lirhandzu. (1 Tes. 5:8-11) Onge hinkwerhu hinga kombisa, hi mbilu ya hina hinkwayo, ndlela leyi hi titwaka ha yona hi Yehovha na Yesu hi lirhandzu leli vahi kombiseke lona. — Lerha Yohane 3:16.