1-2. a) Hayini swinga hlamalisi kuva Yesu a tirhise swilo switsongo loko a simeka Xilalelo xa Hosi? b) Hita bula hi swiyenge swihi swa wumunhu la Yesu?

UNGASWI KOTA kuhlamusela leswi yendliwaka hi siku la kukhumbukiwa ka lifu la Yesu? Votala va hina hingaswi kota, hikusa hi siku leli aku yendliwi minchumu ya kukarhata. Kutirhisiwa swilo switsongo leswi vevukaka kuswi khumbuka. Kambe leswo aswi susi lisima la xiyendlakalo lexi. Hikolaho, hingaha tivutisa: “Leswi xiyendlakalo lexi xinga lisima hintamu, hayini kutirhisiwa swilo switsongo?”

² Yesu Kreste a ativiwa hi kudjondzisa mintiyiso ya lisima hi ndlela leyi nabyalaka kuyi twisisa. (Mat. 7:28, 29) Hilaha kufanaka, hambileswi Xilalelo xa Hosi xinga xa lisima swinene, Yesu axi simeke hi ndlela leyi nabyalaka leswaku swihi vevukela kutlangela Xitsundzuxo * xa lifu la yena. Ahi kambisiseni hi wukheta xiyendlakalo lexi swin’we ni leswi Yesu aswi vuleke ni kuswi yendla ka wusiku leli. Leswi switahi pfuna kutwisisa leswaku Yesu i munhu wa kutitsongohata, wa xivindzi ni lirhandzu. Hita djondza tindlela leti hingamu tekelelaka kuyampsa ha tona.

3. Hilaha swi kombisiwaka ha kona ka Matewu 26:26-28, Xilalelo lexi Yesu axi simeke axi nabyale kufikela kwihi, naswona swilo leswi aswi tirhiseke aswi yimela yini?

³ Yesu a ali ni 11 wa vapostola va yena votshembeka loko a simeka  Xitsundzuxo xa lifu la yena. Yena a teke swilo switsongo leswi aswi salile ka nkhuvo wa Paska, kutani aswi tirhisa ka Xilalelo xa Hosi. (Lerha Matewu 26:26-28.) A tirhise pawu lokala comela ni vhinyu leli ali li kona. Yesu a byele vapostola va yena leswaku swilo leswi swa switsongo aswi yimela mirhi wa yena lowu hetisekeke ni ngati yakwe leyi aatayi nyikela hikolaho ka vona. Vapostola ava hlamalanga hi ndlela leyi xiyendlakalo lexi axi vevukile ha yona. Hayini?

4. Xilayo lexi Yesu axi nyikeke Marta xihi pfunisa kuyini kutwisisa xivangelo lexi yendleke Yesu a tirhisa swilo switsongo ka Xilalelo?

⁴ Khumbuka leswi humeleleke ka lembe lawunharu la ntirho wa Yesu wa kuchumayela, loko a yendzela vanghanu va yena — Lazaru, Marta na Mariya. Loko se va tshame hansi, Yesu a sungule kuva djondzisa. Hambileswi Marta a ali kona, a akhomeke hintamu hi kusweka swakudla swa swinyingi leswaku a tsakisa muyendzi wa vona. Loko Yesu a xiye leswo, hi lirhandzu amu pfunile kuvona leswaku akunga na xilaveko xa kululamisela swilo swa kutala. (Luka 10:40-42) Xilayo lexi axi nyikeke Marta, axi tirhisile ka yena n’winyi loko a simeka xiyendlakalo xa kukhumbuka lifu la yena. A yendle hinkwaswo leswaku kutirhisiwa swilo switsongo ka Xilalelo. Xana leswi swihi djondzisa yini hi Yesu Kreste?

5. Kunabyala ka Xilalelo xa Hosi kuhi djondzisa yini hi Yesu naswona leswo swi twananisa kuyini ni Vafilipiya 2:5-8?

⁵ Minkama hinkwayo, Yesu Kreste a kombise kutitsongohata hi marito ni hi swiyendlo. Hi mhaka leyo, ahi hlamali loko himu vona a titsongohata ka siku la yena la wugamu laha misaveni. (Mat. 11:29) Yesu aaswi tiva leswaku aata nyikela wutomi la yena leswaku li va xitlhavelo ni leswaku akungata va ni lifu leli alita va ni lisima hintamu kutlula lifu la yena. Aaswi tiva leswaku Yehovha aatamu pfuxa ni kumu veka leswaku a va Hosi. Kambe hambileswi a ativa swilo hinkwaswo leswi, anga lavanga kuti kokela yingiso lowunga faneliki hi kusimeka xiyendlakalo xa xikulu lexi axita karhata kuxi khumbuka. Matshan’wini ya leswo, a byele vapostola va yena leswaku ava fanele va yendla xiyendlakalo xa kunabyala kan’we hi lembe leswaku vamu khumbuka. (Yoh. 13:15; 1 Kor. 11:23-25) Leswi swi kombisa leswaku Yesu aanga tibyeli. Kunene, swahi tsakisa kutiva leswaku Hosi ya hina leyinga matilweni i munhu wa kutitsongohata. — Lerha Vafilipiya 2:5-8.

6. Hingaxi tekelelisa kuyini xikombiso xa Yesu loko hi ringiwa?

⁶ Hingaku tekelelisa kuyini kutitsongohata ka Yesu? Hi  kuveka swilaveko swa van’wana aphambeni ka swa hina. (Fil. 2:3, 4) Ahi tlheleni ka wusiku la wugamu la Yesu laha misaveni. Hambileswi aaswi tiva leswaku aata fa lifu la kuvava swinene, a akarhateka hi vapostola va yena lava avata sala va ba nkosi hikolaho ka lifu la yena. Hi mhaka leyo, a hete wusiku hinkwalo a li karhi ava djondzisa, ava khutaza ni kuva tiyisa. (Yoh. 14:25-31) Hi kutitsongohata, Yesu a karhateke hintamu hi van’wana kutlula kukarhateka hi yena n’winyi. Xana lexi ahi xikombiso lexinene xa kuxi tekelela?

7. Yesu axi kombise kuyini xivindzi ndzhaku nyana ka loko a simeke Xilalelo xa Hosi?

⁷ Ndzhaku nyana ka loko Yesu Kreste a simeke Xilalelo xa Hosi, a kombise xivindzi xa kuhlamalisa swinene. Hayini hi vula leswo? Hikuva a kombise leswaku a alava kuyendla kurhandza ka B’ava wa yena hambileswi aata hayekiwa mhandzini hi xihehlo xa leswaku angaxi hloniphi Xikwembu. (Mat. 26:65, 66; Luk. 22:41, 42) Yesu a tshame a tshembekile leswaku a vangamisa vito la Yehovha, a nyimelela wuhosi la yena ni kupfula ndlela leswaku vanhu lava hundzukaka va hanya hilaha kunga heliki. Hi kuyendla leswo, a alunghiselela vapostola va yena ka leswi avata langutana na swona amahlweni.

8. a) I yini leswi Yesu aswi byeleke vapostola va yena votshembeka? b) Ndzhaku ka malembe nyana Yesu na a file, vadjondzisiwa va Yesu vaxi kombise kuyini xivindzi xa kufana ni xa yena?

⁸ Yesu Kreste a tlhele a kombisa xivindzi hi kukala anga veki miyanakanyo ya yena ka swikarhato leswi a akumana na swona kambe ayi veka ka swilaveko swa vapostola va yena. Xiyendlakalo xa kunabyala, lexi axi simekeke ndzhaku ka loko Yudasi a humesiwile, axita khumbukisa lava avata va vatotiwa hi mavuyelo lawa avatama kuma hi kuhalatiwa ka ngati ya yena ni nkateko lowu avata va na wona wa kunghena ka ntwanano lowumpsha. (1 Kor. 10:16, 17) Leswaku ava pfuna kutshama va tshembekile akuva va kota kuva na yena amatilweni,  Yesu ava byelile leswi yena na Yehovha avaswi langutelile ka vona. (Yoh. 15:12-15) Yesu a tlhele ava byela hi swikarhato leswi aswitava wela. Ndzhaku ava khutazile leswaku va tekelela xikombiso xa yena, va ‘tiya timbilu’. (Yoh. 16:1-4a, 33) Ndzhaku ka loko kuhundze malembe Yesu na a file, vadjondzisiwa va yena ava hambeta va tekelela xikombiso xa yena xa kuva ni xivindzi. Hambileswi ava xaniseka, ava tiyisana ka swikarhato swo hambanahambana leswi ava hlangana na swona. — Hev. 10:33, 34.

9. Hingaxi tekelelisa kuyini xikombiso xa Yesu xova ni xivindzi?

⁹ Na hina namuntlha hi tekelela xikombiso xa Yesu xa kuva ni xivindzi. Hi xikombiso, swi lava xivindzi kupfuna vamakwerhu lava xanisiwaka hikolaho ka lipfumelo la vona. Minkama yin’wana, vamakwerhu vanga nghenisiwa djele na vanga li na nandzu. Loko leswo swi yendleka, hi fanele hi yendla hinkwaswo leswi hingaswi kotaka leswaku hiva pfuna, kupatsa ni kuva nyimelela. (Filp. 1:14; Hev. 13:19) Hinga kombisa xivindzi nakambe hi kuchumayela na ‘hingachavi nchumu’. (Mint. 14:3) Kufana na Yesu, hi tiyimisele kuchumayela rungula la Mfumu hambiloko van’wana va lwa na hina kumbe vahi xanisa. Kambe, hinga yendla yini loko minkama yin’wana swihi tikela kukombisa xivindzi?

10. I yini leswi hi faneleke hiswi yendla loko hi li kusuhi ni siku la Xitsundzuxo naswona hi mhaka muni?

¹⁰ Lexingahi pfunaka kutiyisa xivindzi xa hina i kuyanakanya hi ntshembo lowu nkutsulo wa Kreste wuhi pfulelaka wona. (Yoh. 3:16; Efe. 1:7) Na kaha sale mavhiki nyana leswaku hi khumbuka lifu la Yesu, hinga kombisa kutlangela a xihiwa xa nkutsulo lexi hi nyikiweke xona hi kudjondza ni kuyanakanyisisa hi tindzimana ta Bibele leti vulavulaka hi swiyendlakalo leswi yelanaka ni lifu la yena. Kuyendla leswo switahi pfuna loko se hi hlangana ka Xilalelo xa Hosi. Hitaswi twisisa hilaha kuheleleke leswi pawu ni vhinyu swi yimelaka swona ni leswi nkutsulo, xihiwa lexinga  pimanisiwiki na nchumu, xihi pfunisaka xiswona. Loko hi twisisa leswi Yehovha na Yesu vahi yendleleke swona ni loko hi twisisa mavuyelo lawa hina ni varhandziwa va hina hima kumaka hikolaho ka nkutsulo, ntshembo wa hina hi wumundzuku wuta ya wu tiya naswona hi xivindzi, hita tiyisela kuya fika amakumu. — Hev. 12:3.

11-12. I yini leswi se hiswi djondzeke kuta fikela laha?

¹¹ Kuta fikela laha, se hiswi vonile leswaku a Xilalelo xa Hosi axihi khumbukisi hi gandzelo leli Yesu ali nyikeleke ntsena kambe xihi djondzisa hi kutitsongohata ni xivindzi xa yena. Swoswi Yesu Kreste i Muprista Lwenkulu, lweyi ahi nyimelelaka ka Yehovha. Hambileswo, aha hambeta a kombisa wumunhu leli la kuhlamalisa. Kunene hamu tlangela swinene hileswi a hambetaka a yendla tano. (Hev. 7:24, 25) Akuva hi kombisa kutlangela ka hina, hi fanele hi khumbuka lifu la yena hilaha ahi leriseke ha kona. (Luk. 22:19, 20) Hi yendla leswo ka siku leli welaka ka 14 ka Nisani. Aku na siku lin’wana ka lembe lelinga ni lisima kutlula leli.

¹² Kambe a Xilalelo xa Hosi xihi djondzisa hi nchumu wun’wana lowu susumeteleke Yesu kuva ahi fela. Phela loko aha li laha misaveni, a dume swinene hi chumu lowu. Hi wihi nchumu wa kona?

13. Tindzimana ta Yohane 15:9 na 1 Yohane 4:8-10 tili lamuselisa kuyini lirhandzu leli Yehovha na Yesu vali kombiseke naswona i vamani lava vuyeliwaka hi lona?

¹³ Yehovha wahi rhandza. Yesu a kombise lirhandzu leli fanaka ka hinkwaswo leswi aaswi yendla hi ndlela leyi hetisekeke. (Lerha Yohane 15:9; 1 Yohane 4:8-10.) Xa lisima ka hinkwaswo, lirhandzu leli humaka mbilwini hi lona limu susumeteleke kunyikela wutomi la yena hikolaho ka hina. Kunga khataliseki leswaku hi vatotiwa kumbe hi va “tinyempfu tin’wana”, ha vuyeliwa hi lirhandzu leli Yehovha na Yesu vahi kombiseke lona hi kunyikela nkutsulo. (Yoh. 10:16; 1 Yoh. 2:2) Hinga vona lirhandzu ni kukhatala loku Yesu anga na kona hi hina ka swilo leswi aswi tirhiseke loko a simeka Xilalelo xa Hosi.

14. Hili vonisa kuyini lirhandzu la Yesu ka ndlela leyi a simekeke Xilalelo xa Hosi ha yona?

¹⁴ Yesu a kombise leswaku aava rhandza valandzeli va yena lava totiweke hi kusimeka xiyendlakalo xa kuvevuka ni lexi tirhisaka swilo swa switsongo. Hi kufamba ka nkama, vadjondzisiwa lava totiweke avata khumbuka lifu la yena kan’we hi lembe, ahansi ka swiyimo swa ku hambanahambana, hambi ni madjele. (Nhla. 2:10) Xana vaswi kotile kuyendla leswo? Ina, vaswi kotile!

15-16. Van’wana vaswi kotise kuyini kukhumbuka lifu la Yesu hambiloko va li ka swiyimo swa kutika?

¹⁵ Kusukela ankameni wa vapostola kuta fikela namuntlha, Vakreste va yendla minzamu leswaku va khumbuka lifu la Yesu. Va landzelela yendlelo leli Yesu ali simekeke hambiloko va li ka swiyimo swa kukarhata. Ahi voneni swikombiso swingaliswingani. Makwerhu Harold King a petiwe ka khotso leli a ali yexe ka lona aChina. Loko a li seniyani, a lave tindlela ta kukhumbuka lifu la Yesu. Axihundleni, a tirhise leswi a ali na swona leswaku a lulamisela pawu ni vhinyu. Hi wukheta, a lave tindlela ta kukalkulara siku leli Xilalelo axi fanele xi yendliwa ha lona. Loko siku li fikile, yena — yena yexe ndzeni ka khotso — a yimbelelile, a khongela, a tlhela a veka nkulumi ya xitsundzuxo.

¹⁶ Hi lexi xikombiso xin’wana. Ntlawa wa vamakwerhu vaxisati lava ava khomiwile va yisiwa ka ndhawu ya tinxanisa hi nkama wa Nyimpi ya Wumbirhi ya misava, va veke wutomi la vona khombyeni leswaku va khumbuka lifu la Yesu. Tani hileswi swilo leswi aswi laveka leswaku kukhumbiwa lifu la Yesu aswi li switsongo, vaswi kotile kuyendla tano hi wutlharhi  leswaku vanga voniwi. Va vule leswi: “Hinkwerhu hi nyimile hi hamba roda. Axikarhi aku ni ximezana lexi axi tlhantekiwe panu ya kubasa. Hi veke pawu ni vhinyu ahenhla ka xona. Hi tirhise motse hikusa ahi chava leswaku loko hi tlhavika ghezi, avataswi tsumbula leswi ahi li karhi hiswi yendla . . . Hi tlhele hi tshembisa Yehovha, B’ava wa hina, leswaku ahita tirhisa ntamu wa hina hinkwawo leswaku hi vangamisa vito la Yena lokwetsima.” Lipfumelo leli kombisiweke hi vamakwerhu lava la hlamalisa! Hali tlangela lirhandzu leli Yesu ali kombiseke hi kuva a simeke xiyendlakalo xa kuvevuka kuxi yendla hambiloko hi li ka swiyimo swa kutika swinene!

17. Hi swihi swivutiso leswi hi faneleke hi tiyendla swona?

¹⁷ Loko siku la Xitsundzuxo li li karhi li tshinela, hi fanele hi tivutisa leswi: “Ningali kombisa kuyini lirhandzu hilaha Yesu ali kombiseke ha kona? Xana ni pimisa hintamu hi swilaveko swa vamakwerhu kumbe ni pimisa hintamu hi swilaveko swa mina ntsena? Xana ni langutele swotala ka vamakwerhu kumbe na pfumela leswaku ku ni swilo leswi va tsandzekaka kuswi yendla? Onge hinkwerhu hinga tekelela Yesu ivi hi kombisana ‘ntwela wusiwana.’ — 1 Pet. 3:8.

18-19. a) Hinga tiyiseka hi yini? b) Hi fanele hi tiyimisela kuyendla yini?

¹⁸ Ahingata khumbuka lifu la Yesu hilaha kunga heliki. Loko Yesu ‘avuya’ hi nkama wa nhlomulo lowu kulu, leswaku ata teka ‘vahlawuriwa va yena’ lavangata va vaha li laha misaveni akuva vaya va na yena atilweni, ahingahata khumbuka lifu la yena. — 1 Kor. 11:26; Mat. 24:31.

¹⁹ Hambiloko lifu la Yesu lingaha tlangeliwi, ha tiyiseka leswaku malandza ya Yehovha amangatayi rivala djondzo ya kutitsongohata, xivindzi ni lirhandzu leli kombisiweke hi Yesu Kreste. Aku na munhu lweyi a tshameke a kombisa wumunhu leli hi ndlela leyi Yesu ali kombiseke ha yona. Ka nkama wolowo, lava tshameke va tlangela lifu la Yesu vata byela lavangata va na va hanya ka nkama wolowo hi tidjondzo leti vati suseke hi kutlangela xiyendlakalo lexi. Kambe leswaku hi vuyeliwa namuntlha, hi fanele hi tiyimisela kutekelela kutitsongohata, xivindzi ni lirhandzu la Yesu. Loko hi yendla tano, ahi tiyisekeni leswaku Yehovha atahi nyika hakelo. — 2 Pet. 1:10, 11.