1-2. a) Xana marito ya Esaya 41:10 mamu khumbise kuyini makwerhu Yoshiko? b) I vamani lavanga vuyeliwaka hi marito lama kumekaka ka Esaya 41:10?

YOSHIKO, makwerhu waxisati lweyi a tshameke a tshembekile ka Yehovha, a byeliwe hi dotori wa yena leswaku aata fa ndzhaku ka tiwheti nyana. Xana a hlamulise kuyini loko a byeliwa mahungu lawa ya kuchavisa? Yoshiko a khumbuke ndzimana ya Bibele leyi aayi rhandza swinene. Ndzimana ya kona i Esaya 41:10. (Yi lerhi.) Na a rhulile, a hlamusele dotori wa yena leswaku aanga chavi hikusa Yehovha a akhome voko la yena. * Marito ya kuchavelela lama kumekaka ka ndzimana leyi ma pfune makwerhu Yoshiko kutshemba Yehovha hi kuhelela. Na hina hinga rhula mbilwini ni kuchaveleliwa hi marito lawa loko hi kumana ni miringo ya kukarhata swinene. Akuva hi twisisa ndlela leyi marito lawa mangahi chavelelaka ha yona, ahi kambisiseni xivangelo lexi yendleke Yehovha a rhuma Esaya kuma tsala.

² Akusunguleni, Yehovha a rhume Esaya kutsala marito lama kumekaka ka Esaya 41:10 leswaku a chavelela Vayuda lava avata yisiwa awuhlongeni le Babilona. Hambileswo, Yehovha a yendle leswaku ma hlayisiwa akuva kunga vuyeliwi Vayuda lava avata yisiwa wuhlongeni ntsena kambe kuvuyeliwa ni malandza ya yena hinkwawo lama hanyeke ndzhaku ka vona kupatsa na hina. (Esa. 40:8; Rhom. 15:4) Namuntlha, hi hanya ka “minkama ya kukarhata” swinene. Hi mhaka leyo, marito ya Esaya mahi chavelela hintamu swinene. — 2 Tim. 3:1.

3. a) Hi swihi switshembiso leswi kumekaka ka ndzimana ya lembe ya 2019? b) Hayini hiswi lava switiyisekiso leswi?

³ Ka djondzo leyi, hita vulavula hi switshembiso swinharhu swa Yehovha leswi tiyisaka lipfumelo la hina leswi kumekaka  ka Esaya 41:10: (1) Yehovha ata va na hina, (2) yena i Xikwembu xa hina naswona (3) atahi pfuna. Haswi lava switiyisekiso * leswi swa Yehovha hikuva kufana na Yoshiko, hi langutana ni miringo awuton’wini la hina. Swilo leswi yendlekaka amisaveni swihi yendla hi hlupheka hintamu swinene. Van’wana va hina hi tiyiselela tinxanisa leti vangiwaka hi mimfumu leyi kulu ya misava. Ahi kambisiseni switshembiso leswi swinharhu ha xin’we xin’we.

4. a) Hi xihi xitiyisekiso xa kusungula lexi hingataxi kambisisa? (Vona nhlamuselo ya le hansi.) b) Hi tihi tindlela leti Yehovha a kombisaka ha tona leswaku wahi rhandza? c) Xana u titwisa kuyini hi marito wolawo?

⁴ Kusungula, Yehovha ahi tiyisekisa hi marito lawa: “Ungachavi, hikusa ni na wena.” * Yehovha ahi komba leswaku a na hina hi kunyikela yingiso ka hina ni kuhi komba lirhandzu loyenta. Xiya tindlela leti a kombisaka ha tona leswi a titwisaka xiswona hi hina: “Uve wa lisima amatihlweni ya mina, uxiximiwile, naswona nakurhandza.” (Esa. 43:4) Aku na nchumu ni xin’we ka wuyako hinkwalo, lexinga yendlaka Yehovha a tshika kukombisa lirhandzu la yena ka lava vamu tirhelaka. Kutshembeka ka yena a kutsekatsekisiwi hi nchumu. (Esa. 54:10) Lirhandzu la yena swin’we ni xinghanu lexi anga na xona, swihi yendla hi va ni xivindzi. Yena atahi sirhelela hilaha a sirheleleke ha kona munghanu wa yena Abramu (Abrahamu). Yehovha amu byele leswi: ‘Ungachavi Abramu. Ni xivhikelo xa wena.’ — Gen. 15:1.

5-6. a) Hiswi tivisa kuyini leswaku Yehovha a lava kuhi pfuna kuhlula swikarhato? b) Xikombiso xa Yoshiko xihi djondzisa yini?

⁵ Haswi tiva leswaku Yehovha a lava kuhi pfuna kuhlula miringo leyi hi kumanaka na yona. Hiswi tivisa kuyini? Xitshembiso lexi axi yendlaka xahi tiyisa: ‘Loko utsemakanya amatini, nitava na wena. Niloko utsemakanya minambu, ayingeku mbhonyi. Loko ufamba andzilweni, ungepshi; hambi langavi alingekuhisi.’ (Esa. 43:2) Xana marito lawa ma lava kuvula yini?

 ⁶ Yehovha anga tshembisi kususa swikarhato leswi hi kumanaka na swona. Hambileswo, a tshembisa leswaku angata tshika ‘minambu’ ya swikarhato yihi heta ntamu la kakuva hi tshika kumu tirhela kumbe kutshika ‘ndzilo’ wa miringo wuhi hlakata. Kuhambana ni leswo, ata va na hina, ahi pfuna ‘kuhundza’ swikarhato leswo. Ataswi yendlisa kuyini leswo? Atahi pfuna kususa kuchava loku hingaha vaka na kona leswaku hambiloko swoboha ku hi fa, hita tshama hi tshembekile ka yena. (Esa. 41:13) Yoshiko, lweyi hi vulavuleke hi yena akusunguleni, awu twile mpfuno wa Yehovha. Ntombhi ya yena yi te: “Ndlela leyi mamana a arhule ha yona ayihi hlamalisa. Himu vonile Yehovha amu nyika kurhula ka le mbilwini. Mamana a avulavula hi Yehovha ni switshembiso swa yena ka vadotori ni timbabyikuloni kufikela siku leli anga fa hi lona.” Xana xikombiso xa Yoshiko xihi djondzisa yini? Loko hi tshemba marito ya Yehovha lamange “Nitava na wena”, na hina hita va ni xivindzi xa kutiyisela miringo.

7-8. a) Hi xihi xitiyisekiso xa wumbirhi lexi hingataxi kambisisa naswona xi lava kuvula yini? b) Hayini Yehovha a khutaze Vayuda kunga vileli? c) I marito wahi lama kumekaka ka Esaya 46:3, 4 lawa ma rhuliseke mbilu ya vanhu va Xikwembu?

⁷ Vona xitiyisekiso xa wumbirhi lexi kumekaka ka buku la Esaya: “Ungavileli, hikusa ni Xikwembu xa wena.” Xana marito lawa ma lava kuvula yini? Hi Xiheberu, a rito leli hundzuluxeliweke li va ‘kuvilela’ ka ndzimana leyi lingaha hlamusela munhu lweyi a tshamelaka kucuvuka ndzhaku hileswi a chavaka leswaku munhu kumbe nchumu xokarhi xamu landzelela leswaku ximu vavisa. Handle ka leswo, lingaha hlamusela kuchava loku munhu anga na kona loko a kumana ni xiyimo xokarhi xa kuchavisa.

⁸ Hayini Yehovha a byele Vayuda lava avata va mahlonga aBabilona leswaku vanga vileli? Hi mhaka ya leswi aaswi tiva leswaku Vababilona avata chava. Avata chava yini? Loko 70 wa malembe ya wuhlonga aBabilona ma li kusuhi ni kuhela, Vababilona avata hlaseliwa hi masonchwa ya matimba swinene ya Meda-Peresiya. Yehovha aata tirhisa masonchwa lawa akuva a chunsa vanhu va yena ka wuhlonga la le Babilona. (Esa. 41:2-4) Loko Vababilona ni matiko man’wana va twa leswaku masonchwa ya Vameda ni Vaperesiya ma le kutshineleni, avata ringisa kutiyisana hi kubyelana va ku: “Tiyani nhlana.” Avata yendla swifaniso swa swinyingi na va pimisa leswaku switava sirhelela. (Esa. 41:5-7) Kambe kuhambana na vona, Yehovha a arhulisa mbilu ya Vayuda hi kuvula a ku: “Wena . . . Israyele [kuhambana ni matiko man’wana], u nandza wa mina . . . Ungavileli, hikusa ni Xikwembu xa wena.” (Esa. 41:8-10) Xiya leswaku Yehovha a te: “Ni Xikwembu xa wena.” Hi kutirhisa marito lawa,Yehovha a ali karhi a tiyisa malandza ya yena leswaku manga vileli — yena a ali Xikwembu xa vona naswona vona ava li vanhu va yena. Ava byele leswi: “Nitakurhwala . . . nikuhuluxa.” Kunene, marito lawa mava khutazile ni kuva chavelela Vayuda lavayani. — Lerha Esaya 46:3, 4.

9-10. Hayini hinga fanelanga hi vilela? Kombisa.

⁹ Namuntlha, vanhu va vilela hintamu hikolaho ka leswi xiyimo xa misava xi yaka mahlweni xi biha swinene. I ntiyiso leswaku na hina ha khumbiwa hi swikarhato leswi fanaka. Hambileswo, ahi fanelanga hi vilela hikuva Yehovha wahi tiyisa: “Ni Xikwembu xa wena.” Hayini marito lawa ma rhulisa timbilu ta hina?

¹⁰ Pimisa hi xikombiso lexi: Jim na Ben va ndzeni ka vhiyawu lelinga karhi li tsekatseka li ya hala ni hala. Loko leswo swi li karhi swi yendleka, mufambisi wa vhiyawu a tivisa vanhu  hinkwavo a ku: “Hi kombela mi tsimba mabhandi ya n’wina. Vhiyawu la hina lita tsekatseka swa nkama nyana.” Jim a sungula kukarhateka. Hiloko ndzhaku nyana mufambisi a tlhela a ku: “Minga vileleni. Mina lweyi ni vulavulaka na n’wina hi mina mufambisi wa vhiyawu leli.” Hambiloko a twa marito lawa, Jim wa karhateka naswona anga tiyiseki hi leswi aswi twaka. Kambe loko a languta tlhelweni, a xiya leswaku Ben anga vileli nikutsongo. Hiloko amu vutisa: “Hayini u tikomba unga karhatekanga?” Ben a n’wayitela ivi amu hlamula a ku: “Hikuva nimu tiva kahle mufambisi wa vhiyawu leli. I papayi wa mina!” A gama a tlhantekela a ku: “Ni tshike niku byela nyana switsongo hi papayi wa mina. Na tiyiseka leswaku loko se umu tiva kahle ni kutiva ndlela leyi a fambisaka hi yona, na wena awungata karhateka.”

11. Xifaniso xa Jim na Ben xihi djondzisa yini?

¹¹ Xana xikombiso lexi xihi djondzisa yini? Kufana na Ben, ahi vileli hikuva himu tiva kahle Papayi wa hina, Yehovha. Haswi tiva leswaku atahi pfuna kutiyiselela hambi swiyimo swa kutika swinene leswi hi kumanaka na swona ka masiku lawa ya wugamu. (Esa. 35:4) Hamu tshemba Yehovha. Hi mhaka leyo, hambileswi misava tshamaka yi karhatekile, mbilu ya hina yi tshama yi rhulile. (Esa. 30:15) Hinga tekelela xikombiso xa Ben hi kupfuna van’wana leswaku na vona va tshemba Yehovha. Loko va yendla leswo, Yehovha atava seketela hambi vokumana ni xikarhato xa kutshamisa kuyini.

12. a) Hi xihi xitiyisekiso xa wunharhu lexi hingataxi kambisisa? b) Rito lelinge “voko” la Yehovha li lava kuvula yini?

¹² Vona xitshembiso xa wunharhu lexi Yehovha axi yendleke hi kutirhisa Esaya: “Nitakutiyisa, ina, nitakupfuna.” Esaya se aaswi kombisile leswaku Yehovha aata tiyisa vanhu va yena hi kuvula marito lawa: “Yehovha Hosi Leyi Lawulaka atata hi matimba, naswona  atafuma hi voko la yena.” (Esa. 40:10) Makhambi manyingi, a rito “voko” Bibeleni li hlamusela matimba. Hikolaho, loko Bibele li vula leswaku “[Yehovha] atafuma hi voko la yena” li lava kuhi pfuna kutwisisa leswaku yena i Mufumi lweyi anga ni matimba. A ku na munhu lweyi anga ni matimba ya kutlula ya yena. Ka nkama lowu hundzeke, ama tirhisile leswaku a seketela ni kunyimelela vanhu va yena. Ni namuntlha wahama tirhisa leswaku a sirhelela ni kutiyisa malandza ya yena hinkwawo lawa mamu tshembaka. — Det. 1:30, 31; Esa. 43:10.

13. a) I ka xiyimo xihi lexi Yehovha a tshembisaka kuhi tiyisa hintamu? b) Hi xihi xitshembiso lexihi tiyisaka ni kuhi nyika ntshembo?

¹³ Yehovha a tshembisa ‘kuhitiyisa’ ngopfungopfu loko hi xanisiwa hi valala va hina. Ka matiko man’wana, valala va hina va yendla hinkwaswo leswi vangaswi kotaka akuva va nyimisa ntirho wa hina wochumayela kumbe kutsimbisa mintirho hinkwayo ya nhlengeletano. Kambe hambiloko leswo swi yendleka, ahi karhateki hintamu hikusa Yehovha wahi tshembisa: “Aku na tlhari lelingatayendleliwa kulwa na wena lelingatahumelela”. Xitshembiso lexi xahi tiyisa ni kuhi yendla hi va ni ntshembo. (Esa. 54:17) Hambileswo, xitshembiso lexi xihi khumbukisa swilo swinharhu swa lisima.

14. Hayini swingahi hlamalisi loko hi hlaseliwa hi valala?

¹⁴ Xa kusungula, tani hi leswi hinga valandzeli va Kreste, ahiswi tiveni leswaku hita nyenyiwa. (Mat. 10:22) Yesu a profetile leswaku vadjondzisiwa va yena avata xanisiwa hintamu amasikwini ya wugamu. (Mat. 24:9; Yoh. 15:20) Xa wumbirhi, wuprofeta la Esaya liswi kombisile leswaku valala va hina avangatahi nyenya ntsena kambe avata tirhisa matlharhi hinkwawo leswaku vahi hlasela. Matlharhi lawa mangaha patsa mavunwa lawa vama vulaka hi hina kumbe kuhi xanisa kunene hi ndlela ya tihanyi. (Mat. 5:11) Yehovha angatava sivela valala va hina kuhi hlasela. (Efe. 6:12; Nhla. 12:17) Hambileswo, ahi fanelanga hi chava. Hi mhaka muni?

15-16. a) Hi wihi nchumu wa wunharhu lowu hi faneleke hiwu khumbuka naswona Esaya 25:4, 5 yiwu tiyisekisa kuyini nchumu wolowo? b) Esaya 41:11, 12 yi li yini hi magamu ya valala va hina?

 ¹⁵ Xa wunharhu, Yehovha a vule leswaku ‘Aku na tlhari lelingatayendleliwa kulwa na hina lelingatahumelela’. Kufana ni khumbi lelihi sirhelelaka ka xidzedze xa xikulu swinene, Yehovha atahi sirhelela ka ‘wukarhi la lava va tihanyi’. (Lerha Esaya 25:4, 5.) Valala va hina avangata tshuka va humelela. — Esa. 65:17.

¹⁶ Yehovha a tlhela ahi tiyisa hi kuhi byela leswingata humelela ka lava ‘vahikarihelaka’. (Lerha Esaya 41:11, 12.) Kunga khataliseki ndlela leyi valala vanga lwaka hi yona na hina kumbe ximusi lexi vangahaxi pfuxaka, wugamu la vona la fana. Hinkwavo lavanga valala va vanhu va Xikwembu “vatalovisiwa”.

17-18. a) Kudjondza Bibele kungaku pfunisa kuyini leswaku u ya umu tshemba Yehovha? Nyikela xikombiso. b) Kuyanakanyisisa hi ndzimana ya lembe ya 2019 kutaku pfunisa kuyini?

¹⁷ Loko hi ya himu tiva kahle Yehovha, hita ya himu tshemba. Kutani, hinga yendla yini leswaku himu tiva kahle? Aku na ndlela yin’wana handle ka kudjondza Bibele hi wukheta ni kuyanakanyisisa hi leswi hiswi djondzaka. Bibele li ni rungula lotala leli kombisaka ndlela leyi Yehovha a sirheleleke ha yona vanhu va yena ka nkama lowu hundzeke. Rungula leli lihi yendla hi tshemba leswaku na hina, Yehovha atahi khatalela.

¹⁸ Vona xikombiso xa kusaseka lexi Esaya axi tirhisaka akuva a kombisa ndlela leyi Yehovha ahi sirhelelaka ha yona. A vitana Yehovha tani hi murisi naswona vanhu va yena ava vitana tinyimpfu. Twana leswi aswi vulaka hi Yehovha: “Hi voko la yena atahlengeleta swinyimpfana ivi aswiveka xifuveni.” (Esa. 40:11) Xana loko hi twa marito lawa, lama vulavulaka hi kuva Yehovha ahi veka xifuveni xa yena hi voko la yena la matimba, ahi titwi hi sirhelelekile hi tlhela hi rhula? Hikolaho, leswaku hi rhula mbilwini hambiloko hi kumana ni swikarhato, nandza wotshembeka ni wotlhariha a hlawule buku ya Esaya 41:10 leyinge “ungavileli, hikusa ni Xikwembu xa wena” leswaku yi va ndzimana ya lembe ya 2019. Anakanyisisa hi marito lawa ma thovaka mbilu. Mataku tiyisa loko u kumana ni swikarhato aphambeni.