1-2. a) Nyikela xikombiso lexi kombaka leswaku vanhu va lava kuchaveleliwa naswona vaswi kota kuchavelela van’wana. b) Hi yihi ndlela yin’wana leyi vana va vavisiwaka ha yona?

HI NTUMBULUKU, hina vanhu haswi lava kuchaveleliwa naswona haswi kota kuchavelela van’wana. Hi xikombiso, loko xin’wanana xi tivavisa akutlangeni, xi tsutsuma xi ya ka mamani wa xona na xi rila. Hambileswi anga dahiki xilondza xa xona, yena waxi chavelela. Angahaxi vutisa hi leswi humeleke, axi sulasula minhloti na axi babababa kumbe kubandicha xilondza xa xona. Kungase hundza nkama wa kuyini, xin’wanana xa miyela naswona xingaha tlhela xi sungula kutlanga. Hi kufamba ka nkama xilondza na xona xa hola.

² Kambe minkama yin’wana vana va vavisiwa hi ndlela leyi hlomulaka mbilu swinene. Van’wana va pfinyiwa kan’we kumbe makhambi yotala. Leswi swi pfuxa xilondza lexinga holiki. Minkama yin’wana, lweyi a khomeke n’wana hi ndlela leyi angaha khomiwa a tlhela a khatisiwa. Kasi minkama yin’wanyana, swinga tikomba ingaku anga yendliwi nchumu. Hambi a tekela kukhatisiwa kumbe anga khatisiwi, xilondza lexi axi pfuleke ka n’wana lwiyani swinga yendleka xinga holi naswona xi tama ximu vavisa hambiloko se a kulile.

3. Hikuya hi 2 Vakorinto 1:3, 4, Yehovha a navela yini naswona hi swihi swivutiso leswi hingataswi hlamula ka djondzo leyi?

³ I yini leswinga pfunaka makwerhu lweyi a tshameke a pfinyiwa naswona waha karhatekaka hambileswi se anga mukulu? (Lerha 2 Vakorinto 1:3, 4.) Yehovha a navela leswaku malandza ya yena ma rhandziwa ma tlhela ma chaveleliwa. Hi mhaka leyo, djondzo leyi yita hlamula swivutiso swinharhu: 1) Hayini lava pfinyiweke loko vaha li vatsongo vangaha lavaka kuchaveleliwa? 2) I mani lweyi angatava chavelela? 3) Vanga chavelelisiwa kuyini?

4-5. a) Hayini swi li swa lisima kutwisisa leswaku vana va hambanile ni lava kulu? b) I yini leswi humelelaka hi n’wana loko a pfinyiwa?

⁴ Van’wana lava tshameke va pfinyiwa loko vaha li vatsongo vangaha lava kuchaveleliwa hambiloko se va kulile. Hi mhaka muni? Leswaku hi twisisa swivangelo swa kona hi fanele hi khumbuka leswaku ndlela leyi vana va yangulaka ha yona loko va khomiwa hi ndlela ya kubiha yi hambanile ni ya lava kuleke. Tiponto leti landzaka titahi pfuna kuyi twisisa kahle mhaka leyi.

⁵ Vana va tolovela kutshemba ni kuva vanghanu va lava vava hlayisaka. Loko kutshembana loku ni wunghanu leli swi li kona, va titwa va sirhelelekile naswona swi yendla leswaku va tshemba mun’wana ni mun’wana lweyi ava rhandzaka. (Pis. 22:9) Lexi vavisaka hi leswaku vana vanyingi va pfinyiwa hi maxaka kumbe vanghanu lava vava tshembaka. Leswi swi yendla leswaku hambiloko se va kulile swiva tikela kutshemba vanhu van’wana.

6. Hayini kupfinya vana swi bihile naswona swiva vavisa?

⁶ Vana avaswi koti kutisirhelela naswona kuva pfinya swi bihile naswona swava vavisa. Kuyendla timhaka ta masangu ni vana swingava vavisa swinene hikusa vaha li vatsongo naswona timhaka ta masangu ti fanele ti yendliwa hi vanhu vambirhi lava chadeke. Swingava yendla va tivona vanga pfuni nchumu, vangava tshembi vanhu ni kulanguta timhaka ta masangu hi ndlela leyi hoxeke.

7. a) Hayini swinga karhati kuva munhu a kangayisa a tlhela a pfinya n’wana? b) Hi lihi vuyelo la mavunhwa lawa vana vangaha byeliwaka wona?

⁷ Vana avaswi koti kukambisisa timhaka, kuyendla swiboho kumbe kuvona khombo na laha li kule ivi vali baleka. (1 Kor. 13:11) Hi mhaka leyo, swamu vevukela munhu kuva kanganyisa ivi ndzhaku ava khoma hi ndlela yobiha. Lava yendlaka leswi va tolovela kuhembela vatsongwana. Vangahava byela leswaku timhaka ta masangu axikarhi ka munhu wamukulu ni xin’wanana i xikombiso xa leswaku va rhandzana kumbe vamu byela leswaku ava fanelanga va byela munhu leswaku vona va yendle timhaka ta masangu ni munhu wamukulu hikusa anga kona lweyi angatava kholwa kumbe kuva pfuna. Minkama yin’wana vangaha byela ntsongwana leswaku i nandzu wa yena kuva va yendle timhaka ta masangu na yena. Mavunhwa lawa manga khumba ndlela leyi n’wana a vonaka swilo ha yona naswona hambiloko se a kulile swingahamu tikela kutwisisa leswaku hinkwaswu leswi i mavunhwa. Manga yendla a titwa nandzu a tlhela a pimisa leswaku angataswi kota kuva ni vanghanu hambi kuva munghanu wa Xikwembu.

8. I yini lexihi kholwisaka leswaku Yehovha anga chavelela lava vavisiweke?

⁸ Leswi se hi buleke hi swona swihi pfuna kutwisisa leswaku hayini lava pfinyiweke va lava kuchaveleliwa hambiloko se va kulile. Phela, leswiva humeleleke swi bihe swinene. Swi kombisa leswaku hi hanya ka masiku ya wugamu lawa ka wona ‘vanhu vapfumalaka lirhandzu’ naswona ‘lavobiha  . . . vangatayaka mahlweni vayengeteleka kubiha.’ (2 Tim. 3:1-5, 13) Makungu ya Sathana ma bihe swinene naswona lexi vavisaka i kuvona vanhu va yendla swilo leswi yena aswi lavaka. Hambileswo, Yehovha a ni ntamu lowu tlulaka wa Sathana ni wa hinkwavu lava yendlaka kurhandza ka yena. Waswi vona hinkwaswu leswi Sathana aswi yendlaka. Mbilu ya yena yi li foo loko ahi vona hi hlupheka. Leswo swimu susumetela kuhi chavelela. Kunene, swahi thova mbilu kutirhela Yehovha, ‘Xikwembu lexi kuchavelela hinkwaku kuhumaka ka xona [ni lexi] xihichavelelaka maxangwini hinkwawu ya hina’. Leswo swi yendla leswaku na  hina ‘hikota kuchavelela lavanga maxangwini ya tinxakaxaka, hivachavelela hi kuchavelela loku na hina hinyikiweke kona hi Xikwembu.’ (2 Kor. 1:3, 4) A xivutiso lexi sekelekaka hi lexi: I vamani lava Yehovha ava tirhisaka leswaku va chavelela van’wana?

9. Hikuya hi marito ya Hosi Davhida lama kumekaka ka Tipisalema 27:10, i yini leswi Yehovha angataswi yendla hi vatsongwana lavanga hlayisiwangiki kahle hi vapsali?

⁹ Lava va kalaka vanga sirheleliwanga hi vapsali va vona kumbe lava pfinyiweke hi maxaka kumbe hi vanghanu va lava kuchaveleliwa swinene. Davhida a atshemba leswaku Yehovha aatamu chavelela minkama hinkwayu. (Lerha Tipisalema 27:10.) A akholwa leswaku Yehovha aata va papayi wa hinkwavu lavanga sirheleliwangiki hi vapsali. Xana Yehovha aswi yendlisa kuyini leswo? A tirhisa malandza ya yena ya kutshembeka. Vamakwerhu abandleni vanga fanisiwa ni ndjangu wa hina. Hi xikombiso, wa khumbuka nkama lowu Yesu anga vula leswaku lava ava gandzela Yehovha na yena a va li vamamani ni vamakwavu va yena? — Mat. 12:48-50.

10. I yini leswi Mupostola Pawulo aswi yendleke?

¹⁰ Ahi voneni xikombiso lexihi pfunaka kutwisisa leswaku hayini bandla li fanisiwa ni ndjangu. Mupostola Pawulo a ali doda leli ali rhandza li tlhela li tirhela vamakwerhu. Ahi vekele xikombiso lexinene a tlhela ahi khutaza leswaku hixi tekelela hikusa yena a atekelela Kreste. (1 Kor. 11:1) Vona ndlela leyi Pawulo a tlhamuseleke ha yona ntirho wa yena tani hi doda: ‘Hihanyisane na n’wina hi moya wa timpsalu, kukotisa mamana lweyi ahlayisaka swinene vana va yena.’ (1 Tes. 2:7) Madoda manga tekelela xikombiso xa Pawulo hi kukombisa timpsalu loko ma tirhisa Bibele leswaku ma chavelela van’wana.

11. I yini lexi kombisaka leswaku ahi madoda ntsena lawa manga chavelelaka van’wana?

¹¹ I madoda ntsena lama faneleke ma chavelela lava pfinyiweke? Ihim. Hinkwerhu hi ni mfalelo yoyendla tanu. (1 Tes. 4:18) Vamakwerhu vaxisati lavanga ni lipfumelo leli tiyeke vanga seketela vamakwerhu van’wana vaxisati  lava lavaka kuchaveleliwa. Hi kuyendla leswo, vata va va tekelela Yehovha, lweyi aBibeleni a tifanisaka ni mamana lweyi a chavelelaka n’wana wa yena leswaku a kombisa muxaka wa kuchavelela loku a kunyikelaka. (Esa. 66:13) Bibele li ni swikombiso swa vavasati lava chaveleleke vanhu lava a va li kukarhatekeni. (Yobo 42:11) Yehovha a tsaka swinene loko a vona vamakwerhu vaxisati va chavelela vavasatikuloni lavanga kuhluphekeni! Minkama yin’wana, madoda mangaha kombela makwerhu waxisati axihundleni leswaku a chavelela makwerhu wokarhi waxisati abandleni lweyi anga ka xiyimu lexi. *

12. I yini leswi hinga fanelangiki hiswi yendla?

¹² Loko hi pfuna kumbe hi chavelela makwerhu, ahi fanelanga himu vutisa swilo leswi anga laviki kubula hi swona. (1 Tes. 4:11) Se i yini leswi hingaswi yendlaka? Ahi kambisiseni 5 wa swilo leswi Bibele lihi khutazaka kuswi yendla leswaku hi pfuna van’wana.

13. a) Hikuya hi 1 Tihosi 19:5-8, i yini leswi ntsumi ya Yehovha yiswi yendleleke Muprofeta Eliya? b) Hingaxi tekelisa kuyini xikombiso xa ntsumi ya Yehovha?

¹³ Yendla xokarhi leswaku u pfuna lweyi anga kuhluphekeni. Loko a li karhi a baleka lava ava lava kumu dlaya, Eliya a hele ntamu swinene la kakuva a kombela Yehovha leswaku amu dlaya. Yehovha a rhumele ntsumi ya matimba swinene leswaku yiyamu chavelela. Ntsumi liyani yi nyike Eliya leswi aaswi lava ka nkama lowuyani. Yimu nyike swakudla swa ku kufumela yi tlhela yimu rhamba hi lirhandzu leswaku a dla. (Lerha 1 Tihosi 19:5-8.) Rungula leli lihi pfuna kutwisisa leswaku aswi lavi minchumu yinyingi leswaku hi pfuna vamakwerhu lava lavaka kuchaveleliwa. Swilo switsongo swofana ni kuva fonela, kuva tsalela mensaji, kuva tsalela papila, kuva nyika xihiwa kumbe kuva swekela swa yenela. Swoleswo ntsena switava pfuna kuvona leswaku hi ni mhaka na vona naswona hava rhandza. Loko swingahi vevukeli kubula na vona hi ndlela leyi va titwaka ha yona, hinga kombisa leswaku hi ni mhaka na vona hi kuva yendlela swilo swa kufana ni leswi.

14. Rungula la Eliya lihi djondzisa yini swin’wana?

¹⁴ Yendla leswaku lava va twisiweke kuvava va titwa va sirhelelekile naswona va chavelelekile. Ahi tlheleni hi bula hi leswinga yendlekela Eliya. Hi kutirhisa singita, Yehovha a nyike Eliya matimba ya kukhwela ntshava ya Horebe. Swinga yendleka Eliya a titwe a sirhelelekile ka ntshava leyi, laha Yehovha a atshame a yendla ntwananu ni vanhu va yena malembendzhaku. Swinga yendleka a pimise leswaku aangahata kumiwa hi lava avamu hlongolisa. Rungula leli lihi djondzisa yini? Lihi djondzisa leswaku loko hi lava kuchavelela lava pfinyiweke kusungula hi fanele hiva pfuna kutitwa va sirhelelekile. Hi xikombiso, madoda ma fanele ma khumbuka leswaku hambileswi van’wana vanga titwaka va tshunxekile kubula na vona a Salão do Reino, van’wana swingava tikela.

15-16. Swi vula yini kuva muyingisi lwenene?

¹⁵ Vana muyingiseli lwenene. Bibele lahi khutaza: “Mun’wana ni mun’wana aahantlise kutwa, ahlwela kuvulavula, ahlwela kukariha.” (Yak. 1:19) Xana hi vayingiseli lavanene? Phela kuyingisela munhu ahi kumu cuvuka ntsena ivi hi ku zwee hinga vuli nchumu. Hi xikombiso, a nkama lowu Eliya anga tiphofula ka Yehovha, amu byela leswi a atitwisa xiswona, Yehovha amu yingiselile. Hi kuyendla leswi, aswi kotile kuvona leswaku Eliya a achava, a atitwa a li yexe naswona a apimisa leswaku ntirho lowu aamu yendlele wona awunga li wa nchumu. Ndzhaku ka kuva amu yingiselile, hi lirhandzu amu pfunile leswaku a cinca ndlela leyi a atitwa hi yona. Leswo hi  swona kunga kuyingisa hi kakunene. — 1 Tiho. 19:9-11, 15-18.

¹⁶ Hingawu kombisa kuyini ntwelawusiwana loko hi yingisela makwerhu lweyi anga karhi a tiphofula? Hi wutlharhi hingaha vula marito nyana kuva himu komba leswaku hi rila na yena. Hingaha ku: “Ni rila na wena. Anga kona lweyi a faneliwaka hi leswi!” Minkama yin’wana hingahamu yendla swivutiso akuva hi tiyiseka leswaku hiswi twisise kahle leswi aswi vuleke. Hingaha ku: “Ungani hlamusela nyana . . . ” kumbe “aniku twisisanga kahle nkama unga ku . . . awu lava kuvula swaku . . . ?” Swivutiso swa kufana ni leswi swita komba makwerhu leswaku hamu yingisela naswona hi lwela kutwisisa ndlela leyi a titwaka ha yona. — 1 Kor. 13:4, 7.

17. Hayini hi fanele hi lehisa mbilu hi tlhela hi ‘hlwela kuvulavula’?

¹⁷ Loko hi yingisela makwerhu lweyi anga karhi a tiphofula, hi fanele ‘hihlwela kuvulavula’. Ahi fanelanga himu tsemerhisa leswaku himu laya. Kuhambana ni leswo, hi fanele himu lehisela mbilu. Leswo hi leswi Yehovha aswi yendleke loko Eliya a tiphofula ka yena. Nkama lowu Eliya a tiphofuleke ha wona, a atwa kuvava swinene naswona a akarhatekile. Hi nkama wun’wana, ndzhaku ka loko Yehovha amu tiyisile, Eliya a tlhele a byela Yehovha leswi aamu phofulele swona kusunguleni. (1 Tiho. 19:9, 10, 13, 14) Leswi swihi djondzisa leswaku minkama yin’wana makwerhu lweyi anga kukarhatekeni angaha navela kuphofula leswi anga na swona mbilwini. Kufana na Yehovha, hi lava kumu lehisela mbilu. Matshan’wini ya kumu byela leswi a faneleke aswi yendla, hi lava kumu komba ntwelawusiwana. — 1 Pet. 3:8.

18. I yini leswi hingaswi vulaka loko hi khongela ni lweyi anga kukarhatekeni naswona hi mhaka muni?

¹⁸ Khongela ni lweyi anga kukarhatekeni swi huma mbilwini. Lweyi anga kukarhatekeni angaha titwa anga pfuni nchumu la kakuva a twa ni tingana ta kukhongela ka Yehovha. Hi mhaka leyo, hingamu chavelela hi kukhongela na yena. Ka xikhongelo lexi hixi yendlaka, hingaha phata vito la yena. Hingaha byela  Yehovha ndlela leyi hina ni bandla himu rhandzaka ha yona hi tlhela himu kombela leswaku a rhulisa mbilu ya yena a tlhela amu chavelela. Swikhongelo swa kutasi swi ni ntamu swinene. — Yak. 5:16.

19. I yini leswi hingaswi yendlaka leswaku hi kota kuvula marito lama chavelelaka?

¹⁹ Vula marito lama chavelelaka. Rhanga hi kupimisa ungase vulavula. Marito lamanga pimisiwangiki kahle ma vavisa kasi marito lama cheliweke munyu ma hanyisa. (Swi. 12:18) Hi mhaka leyo, khongela ka Yehovha, umu kombela aku pfuna kuvula marito lama chavelelaka ni lama thovaka mbilu. Naswona loko swi koteka, tirhisa Bibele loko u chavelela van’wana. Phela, aku na marito lamanga ni ntamu swinene kutlula lama kumekaka Bibeleni. — Hev. 4:12.

20. Van’wana lava tshameke va khomiwa hi ndlela yobiha hi tlhelo la masangu va titwisa kuyini naswona i yini leswi hingava khumbukisaka swona?

²⁰ Vamakwerhu van’wana, kungaha va vaxinuna kumbe vaxisati, lava tshameke va pfinyiwa, vangaha pimisa leswaku va nchimile, ava pfuni nchumu naswona anga kona lweyi angava rhandzaka. Hinkwerhu haswi tiva leswaku leswo ahi ntiyiso! Hi mhaka leyo, ahi tirhiseni Bibele akuva hiva khumbukisa leswaku vona i va lisima swinene amatihlweni ya Yehovha. (Vona kwadru lelinge “ Matsalwa Lama Chavelelaka”.) Wa khumbuka leswi Yehovha aswi yendleke khambi leli Daniyele a heleke matimba a tlhela a karhateka? Hi kutirhisa ntsumi, amu tiyisile hi kumu byela leswaku yena i wa lisima swinene. (Dan. 10:2, 11, 19) Na hina hinga tiyisa vamakwerhu hi kuva khumbukisa leswaku vona i va lisima ka Yehovha.

21. a) Kuta humelela yini hi hinkwavu lava yendlaka swa kubiha kambe vanga hundzuki? b) Hi fanele hi tiyimisela kuyendla yini hi lava khomiwaka hi ndlela yobiha?

²¹ Loko hi chavelela van’wana, hiva yendla vanga rivali leswaku Yehovha wava rhandza ni leswaku a lulamile. Hambiloko van’wani vangaswi tivi, Yehovha wamu tiva mun’wana ni mun’wana lweyi a pfinyiweke. Hi nkama lowu faneleke, atava khatisa vadjohi lavanga hundzukiki. (Tinhl. 14:18) Kambe, nahaha nyimela nkama lowu, ahi yendleni hinkwaswu leswi hingaswi kotaka leswaku hi chavelela lava pfinyiweke. Hinga rivaleni: Yehovha ata susa kuvaviseka ni kuhlupheka hinkwaku loku vangiwaka hi Sathana ni misava ya yena. Kungali khale, swilo swobiha leswihi humelelaka namuntlha “aswingehetekhumbukiwa. Hambi mbilwini aswingeheti.” Xana aswihi thovi mbilu kutiva leswi? — Esa. 65:17.