1-2. a) Hi tihi tindlela leti Yehovha ati tirhisaka leswaku a vulavula ni vanhu? b) Hita djondza yini ka djondzo leyi?

YEHOVHA awaswi rhandza kuvulavulisana na hina. Ankameni lowu hundzeke, a tirhise vaprofeta, tintsumi, ni N’wana wa yena Yesu Kreste leswaku a byela vanhu mimpimiso ya yena. (Amosi 3:7; Gal. 3:19; Nhla. 1:1) Namuntlha, a vulavula na hina hi kutirhisa Rito la yena kunga Bibele. Ahi nyike lona leswaku hi kota kudjondza hi mimpimiso ya yena ni kutwisisa mayendlela ya yena ya swilo.

² A nkama lowu Yesu a ali laha misaveni, Yehovha a vulavulile na a li matilweni makhambi manharhu. Ahi voneni leswi aswi vuleke ka makhambi wolawo hi tlhela hi vona leswi hingaswi djondzaka ka marito ya kona ni leswaku mangahi vuyelisa hi yini.

3. Hilaha swi kombisiweke hakona ka Marka 1:9-11, i yini leswi Yehovha aswi vuleke loko Yesu a ali karhi a khuvuliwa, naswona swi kombisa yini?

³ Ka Marka 1:9-11 hi kuma khambi losungula lani Yehovha a vulavuleke hi le matilweni. (Yi lerhi.) Yena a te: “Wena u N’wananga lweyi arhandzekaka, lweyi nimutsakelaka”. Hakunene Yesu a khumbekile swinene loko a twa B’ava wa yena ali karhi a vula marito lama kombisaka leswaku wamu rhandza naswona wamu tshemba! Marito ya Yehovha ma tiyisekise swilo swinharhu swa lisima hi Yesu. Xosungula, Yesu i N’wana wa yena. Xa wumbirhi, Yehovha wamu rhandza N’wana wa yena. Xa wunharhu, Yehovha wamu tsakela N’wana wa yena. Ahi kambisiseni hi wuyenti swilo leswinharhu, ha xin’we xin’we.

4. Loko Yesu a khuvuliwa a ve N’wana wa Xikwembu hi ndlela leyimpsha hi ndlela yihi?

⁴ “Wena u N’wananga.” Hi marito lawa, Yehovha a kombise leswaku N’wana wa yena lweyi a rhandzekaka Yesu, a asungule kuva ni wuxaka la limpsha na yena. A nkama lowu Yesu aangase ta laha misaveni, yena se a ali N’wana wa Xikwembu. Kambe loko a khuvuliwa a ve N’wana wa Xikwembu hi ndlela ya nyuwani.  A totiwile hi moya lowo kwetsima kutani a ve ni ntshembo wa kutlhelela matilweni leswaku a va Hosi a tlhela a va Muprista Lwenkulu lweyi a vekiweke hi Xikwembu. (Luk. 1:31-33; Hev. 1:8, 9; 2:17) Hi mhaka leyo, loko Yesu ali karhi a khuvuliwa, B’ava wa yena a ali ni swivangelo leswi twalaka swa kuvula a ku: “Wena u N’wananga”. — Luka 3:22.

5. Hingaxi tekelelisa kuyini xikombiso xa Yehovha xa kukombisa lirhandzu ni kukhutaza van’wana?

⁵ “Wena u . . . lweyi arhandzekaka.” A xikombiso lexinene xa Yehovha xa kukombisa lirhandzu ni kukhutaza N’wana wa yena xihi komba ntikelo wa kulavetela mukhandlu wa kukhutaza van’wana. (Yoh. 5:20) Ha tsaka swinene loko munhu wokarhi ahi komba lirhandzu ni loko ahi bumabumela hikolaho ka swilo leswinene leswi hiswi yendleke. Hi kufanana, vamakwerhu abandleni ni swirho swa ndjangu wa hina swita tsaka swinene loko hiswi komba lirhandzu ni kuswi khutaza. Loko hi bumabumela van’wana, hi tiyisa lipfumelo la vona hi tlhela hiva pfuna kutirhela Yehovha hi kutshembeka. Ngopfungopfu vapsali va fanele va bumabumela vana va vona. Loko va yendla leswo swi huma mbilwini va tlhela vava komba lirhandzu, vana vata tiyisa wuxaka la vona na Yehovha.

6. Hi swihi swivangelo leswi hinga na swona swa kutshemba Yesu?

⁶ “Wena u . . . lweyi nimutsakelaka.” Marito lawa ma komba leswaku Yehovha a atiyiseka leswaku Yesu aata yendla kurhandza ka yena hi kutshembeka. Leswi Yehovha amu tshembaka ngopfu N’wana wa yena, na hina hinga tiyiseka hilaha kuheleleke leswaku Yesu ata hetisisa hi kutshembeka switshembiso hinkwaswu swa Yehovha. (2 Kor. 1:20) Loko hi yanakanyisisa hi ndlela leyi Yesu a yendleke kurhandza ka B’ava wa yena hi kutshembeka ha yona, na hina hita susumeteleka kumu tekelela. Hitaswi twisisa leswaku hilaha Yehovha a atshemba Yesu ha kona, wa tshemba leswaku  malandza ya yena tani hi ntlawa mata ya mahlweni ma landzela xikombiso xa N’wana wa yena. — 1 Pet. 2:21.

7. Hikuya hi Matewu 17:1-5, kuve ka xiyendlakalu xihi laha Yehovha a vulavuleke hi le tilweni naswona a te yini?

⁷ Lerha Matewu 17:1-5. A khambi la wumbirhi laha Yehovha a vulavuleke hi le tilweni kuve nkama lowu Yesu anga “hundzuliwa.” Yesu a arhambe Petro, Yakobo na Yohane leswaku va khwela na yena ka ntshava leyi tlakukeke. Loko va fikile, ku ve ni xivono xohlamalisa swinene. Ngohe ya Yesu yi vangamile ni swiyambalu swa yena swi hundzuke leswobasa. Kuhumelele swivumbiwa swimbirhi, leswi aswi fanekisela Moxe na Eliya, lava va sunguleke kubula na Yesu hi ta kufa ni kupfuxiwa ka yena. Hambileswi vapostola lavaya va vanharhu “avakhomiwile hi vurhongo”, loko va sisimukile vaxi vonile xivono lexi xohlamalisa. (Luka 9:29-32) Ndzhaku ka leswo, va finengetiwe hi rhefu leli ali vangama kutani va twa rito la Xikwembu li li karhi li huma ka rhefu. Hilaha Yehovha a ayendlile ha kona loko Yesu a khuvuliwa, a kombise leswaku wamu rhandza ni kumu tsakela N’wana wa yena hi kuvula a ku: ‘Lweyi i N’wananga lweyi nimurhandzaka, lweyi nimutsakelaka’. Kambe ka khambi leli, Yehovha a yengetele a ku: “muyingiseni.”

8. Xana xivono xa kuhundzuliwa ka Yesu ximu khumbe njhani Yesu ni vadjondzisiwa va yena?

⁸ Xivono lexi xi kombise kuvangama ni matimba lawa Yesu aata va na wona tani hi Hosi ya Mfumu wa Xikwembu. Handle kokanakana, xivono lexi ximu khutazile Yesu xi tlhela ximu tiyisa nhlana leswaku a kota kulangutana ni kuxaniseka ni lifu lovava leli aata kumana na lona. Xivono lexi xi tlhele xi tiyisa lipfumelo la vadjondzisiwa va yena. Leswo swiva pfunile leswaku va lunghekela kulangutana ni miringu leyi ava ta kumana na yona leswaku va kota kuhetisisa ntirho lowu ava fanele vawu yendla. Loko se kuhundze kolomuya ka 30 wa malembe, mupostola Petro a vulavule hi xivono lexi xa kuhundzuliwa. Hi kuyendla leswo, a kombise leswaku xivono lexi axaha hanya amiyanakanywini ya yena. — 2 Pet. 1:16-18.

9. Hi swihi switsundzuxo leswi tirhaka leswi Yesu angaswi nyika vadjondzisiwa va yena?

⁹ “Muyingiseni!” Yehovha aswi veke livaleni leswaku a lava hi yingisa marito ya N’wana wa yena hi tlhela hima landza. I yini leswi Yesu aswi vuleke nkama aha li laha misaveni? A vule swilo swinyingi swa lisima leswi hi faneleke hiswi landza. Hi xikombiso, hi lirhandzu a djondzise valandzeli va yena tindlela ta kuchumayela mahungu lamanene a tlhela ava tsundzuxa hi ku phindhaphindha hi xilaveko xa kuva va tshama va rindzile. (Mat. 24:42; 28:19, 20) Yesu a tlhele ava khutaza leswaku va tikarhata hi matimba leswaku va yendla kurhandza ka Yehovha ni kuva vanga karhali. (Luk. 13:24) Ava kombe lisima la kuva va rhandzanana, va tama va va ni wun’we ni kuhlayisa swileriso swa yena. (Yoh. 15:10, 12, 13) Switsundzuxo leswi Yesu anga nyika vadjondzisiwa va yena aswi tirha hikakunene! Swona swa tirha ni namuntlha hilaha aswi tirha ha kona nkama lowu angaswi nyikela ha wona.

10-11. Hingaswi kombisa kuyini leswaku hamu yingisa Yesu?

¹⁰ Yesu a te: “Mani na mani lweyi anga wa ntiyiso, ayingisa rito ra mina.” (Yoh. 18:37) Hi kombisa leswaku hamu yingisa Yesu loko hi “lehiselana mbilu ni kurivalelana hi ku ntshunxeka”. (Kol. 3:13; Luk. 17:3, 4) Handle ka leswo, hi kombisa leswaku hi yingisa rito la yena hi kuchumayela hi kuhiseka “hi nguva leyinene, ni hi nguva ya ku karhateka”. — 2 Tim. 4:2.

¹¹ Yesu a te: “Tinyimpfu ta mina tiyingisa rito ra mina”. (Yoh. 10:27) Valandzeli va Kreste va kombisa leswaku va yingisa Yesu kungali hi kunyikela  yingiso ka marito ya yena ntsena, kambe ni hi kuma landza. Vona ava kavanyetiwi hi ‘kuvilela hi swa vutomi’. (Luk. 21:34) Kuhambana ni leswo, vaswi teka swi li swa lisima hintamu swinene kulandza swileriso swa Yesu hambiloko swiyimu swi karhata. Kutala ka vamakwerhu va karhi va tiyisela miringo yotika, leyi katsaka kuhlaseliwa hi valala va vanhu va Xikwembu, wusiwana lalikulu ni timhangu ta ntumbuluku. Ka hinkwaswu leswo, hambi swo yini, vona va hambeta va tshembeka ka Yehovha. Yesu a nyika vamakwerhu lava a xitiyisekiso lexi: “Lweyi ayamukeleke milawu ya mina, kutani ayihlayisa, hi yena lweyi anirhandzaka; kutani lweyi anirhandzaka, atarhandziwa hi Tatana wa mina; na mina nitamurhandza, niva nitipfuletela ka yena.” — Yoh. 14:21.

12. Hi yihi ndlela yin’wana leyi hinga kombisaka ha yona leswaku hamu yingisa Yesu?

¹² Ndlela yin’wana leyi hinga kombisaka ha yona leswaku hamu yingisa Yesu i kutirhisana ni lava ava vekeke leswaku vahi rhangela. (Hev. 13:7, 17) Hi kutirhisa vona, Xikwembu xi cince swilo swotala ka nhlengeletanu ya xona. Hi xikombiso, swoswi hi ni switirho swa swimpsha leswi hi khutaziwaka kuswi tirhisa loko hi chumayela ni tindlela ta nyuwana tochumayela ha tona. Nhlanganu wa xikarhi ka vhiki wu cincile. Ndlela leyi hi yakaka, hi pfuxetaka hi tlhela hi hlayisa ma Salão do Reino na yona yi cincile. Kunene, hawu tlangela nkongomiso wa lirhandzu ni lowu kambisisiweke kahle. Loko hi yendla hinkwaswu leswi hingaswi kotaka leswaku hiwu landzela, Yehovha atahi katekisa.

13. Hi wahi mavuyelo lawa hima kumaka loko hi yingisa Yesu?

¹³ Ha vuyeliwa loko hi yingisa swilo hinkwaswu leswi Yesu ahi djondziseke swona. Yesu a tshembise valandzeli va yena leswaku tidjondzo ta yena atitava rhulisa mbilu. A te: “Mimoya [ya n’wina] yitakuma kuwisisiwa hikuva mpingu wa mina wawolova ni ndzhwalu wa mina wavevuka.” (Mat. 11:28-30) Rito la Xikwembu, leli katsaka 4 wa Tiyevangheli leti vulavulaka hi wutomi ni ntirho wochumayela lowu Yesu awu hetisiseke, lahi pfuna leswaku hi tlhariha naswona lahi nyika ntamu wa kuhambeta hi tirhela Yehovha. (Pis. 19:7; 23:3) Yesu a te: “Vatsaka lavayingisaka Rito la Xikwembu ive vahanya hi lona.” — Luk. 11:28, NM.

14-15. a) Hikuya hi Yohane 12:27, 28, kuhumelele yini ka khambi la wunharhu leli Yehovha a vulavuleke ha lona hi le tilweni? b) Hayini marito lawa Yehovha ama vuleke mamu chavelelile ma tlhela mamu tiyisa Yesu?

¹⁴ Lerha Yohane 12:27, 28. Buku la Yohane  li hlamusela leswi yendlekeke ka khambi la wunharhu leli Yehovha a vulavuleke hi le tilweni. Loko kaha sale masiku nyana leswaku a dlayiwa, Yesu a ye aYerusalema leswaku aya tlangela Paxkwa la yena lawugamu. Hikolaho ka leswi a akarhatekile, a khongelile a ku: “Tatana, dzunisa vito ra wena!” Yehovha axi hlamulile xikhongelo lexi hi kuvula hi le tilweni a ku: “Niridzunisile, nitoyengeta niridzunisa.”

¹⁵ Yesu a akarhatekile hikusa aaswi tiva leswaku a afanele a tshama a tshembekile ka Yehovha. Aaswi tiva leswaku aata fa lifu lakuvavisa swinene. (Mat. 26:38) Kambe lexi aximu karhata hintamu swinene aku li kudzunisiwa ka vito la B’ava wa yena. Hikolaho ka leswi aata hehliwa hi swilo swa mavunhwa, a akarhateka loko a pimisa hi ndlela leyi mafela ya yena amata yendla leswaku vito la B’ava wa yena li nchimisiwa. Kutani marito lawa ama tweke mamu tiyisile ma tlhela mamu chavelela! Mamu nyike matimba lawa aama lava ya kutiyisela leswi aata langutana na swona. Mamu tiyisekisile leswaku vito la Yehovha alita dzunisiwa. Hambileswi swi tikombaka ingaku kuve Yesu ntsena lweyi ama twisiseke marito lawa, Yehovha a kombise leswaku a lava hinkwerhu hima tiva hi kuma tsala Bibeleni. — Yoh. 12:29, 30.

16. Hayini minkama yin’wana hingaha tshukaka hi karhateka hi kunchimisiwa ka vito la Yehovha?

¹⁶ Kufana na Yesu, na hina hingaha karhateka hi ndlela leyi vito la Yehovha li nchimisiwaka ha yona. Swinga yendleka hi khomiwa hi ndlela yobiha kumbe hi karhateka hileswi vanhu va hangalasaka mavunhwa hi nhlengeletanu ya  Yehovha. Hingaha vaviseka loko hi pimisa hi ndlela leyi mavunhwa lawa ma nchimisaka ha yona vito la Yehovha. Loko hi tshuka hi titwa hi ndlela leyi, ahi khumbukeni marito lawa Yehovha ama vuleke leswaku a chavelela ni kutiyisa Yesu. Hinga karhatekeni hintamu hi kunchimisiwa ka vito la Yehovha kumbe ka nhlengeletanu ya yena. Ahi tiyisekeni leswaku “kurhula ka Xikwembu lokutlulaka kutwisisa hinkwaku, kutahlayisa timbilu ta [hina] ni miyanakanyu ya [hina] ka Yesu Kriste.” (Filp. 4:6, 7) Minkama hinkwayu Yehovha atali dzunisa vito la yena. Hi kutirhisa Mfumo wa yena, ata susa swilo hinkwaswu leswi Sathana ni misava ya yena vaswi vangelaka vanhu va Yena. — Pis. 94:22, 23; Esa. 65:17.

17. Hi kuyelana ni buku la Esaya 30:21, Yehovha a vulavulisa kuyini na hina namuntlha?

¹⁷ Yehovha waha ya mahlweni a vulavula na hina namuntlha. (Lerha Esaya 30:21.) Kambe matshan’wini ya kuvulavula hi le tilweni hilaha a yendleke ha kona ka Yesu, a tirhisa Rito la yena, kunga Bibele, leswaku ahi kongomisa. A tlhela a tirhisa “mulanguteli lweyi atshembekeke” lweyi hi kukongomisiwa hi moya lowo kwetsima, a khatalelaka malandza ya Yena hi kuma phamela swakudla swa moya. (Luk. 12:42) Namuntlha, hi ni mabuku yotala ni marungula yotala ka ma site ya hina, lawa man’wana ya wona ma kumekaka hi mavhidiyo ni hi ndlela ya kumaha hi kuyingisela. Swakudla hinkwaswu leswi swihi pfuna kutiyisa lipfumelo la hina.

18. Marito lawa Yehovha ama byeleke Yesu mangali tiyisa kuyini lipfumelo la wena ni kuku nyika xivindzi?

¹⁸ Hingama rivaleni marito lawa Yehovha ama vuleke hi le tilweni loko N’wana wa yena aha li laha misaveni! Onge mangahi tiyisekisa leswaku aku na nchumu lexi Yehovha angaxi voniki ni leswaku swilo hinkwaswu leswi Sathana ni misava ya yena yobiha vaswi vangaka swita helisiwa. Ahi tiyimiseleni kuyingisa rito la Yehovha. Loko hi yendla leswo, hitaswi kota kutiyisela swikarhato swihi ni swihi leswi hi kumanaka na swona namuntlha ni leswi hingahata kumanaka na swona ka nkama lowu taka. Ungama rivali marito lawa: ‘Swafanela leswaku mitiyisela, akuva mitakota kuyendla kurhandza ka Xikwembu, mitayamukela leswi xingamitshembisa swona.’ — Hev. 10:36.