NHLOKOMHAKA YA DJONDZO 17
“Nimivulile Vanghanu”
‘Nimivulile vanghanu, hikuva nimitivisile hinkwaswu leswi niswitweke ka Tatana wa mina.’ — YOH. 15:15.
LISIMU 20 U Rhumele N’wana Waku Lweyi A Rhandzekaka
LESWI HINGATASWI DJONDZA *
1. Hinga yendla yini akuva hi sungula wunghanu ni munhu?
MINKAMA yotala, akuva hi yaka wunghanu lalikulu ni munhu, a nchumu xa kusungula lexi hi faneleke hi xiyendla i kuheta nkama na yena. Loko hi bulelana leswi hiswi pimisaka ni leswi hi titwisaka xiswona, wunghanu la hina la kula. Kambe minkama yin’wana aswi vevuki kuva vanghanu va Yesu. Hi mhaka muni?
2. Hi xihi xikarhato xa kusungula lexi hi kumanaka na xona?
2 Xikarhato xa kusungula hi leswaku ahise tshama himu vona Yesu. Hambi hi Vakreste vanyingi lavanga hanya ka nkama wa vapostolo ava zanga vamu vonile Yesu. Kambe mupostolo Petro a te: ‘Ni loko mingasimuvona, mamu rhandza; hambi ni swoswi mingamuvoniki, mapfumela ka yena’. (1 Pet. 1:8) Leswo swi kombisa swaku swa koteka kuva vanghanu va Yesu hambi leswi hi kalaka hingase tshama hi muvona.
3. Hi xihi xikarhato xa wumbirhi lexi hi kumanaka na xona?
3 Xikarhato xawumbirhi hi leswaku ahingeswi koti kuvulavula na Yesu. Loko hi hamba xikhongelo hi vulavula na Yehovha. I ntiyiso swaku hi tirhisa vito la Yesu, kambe ahi vulavuli na yena. Futshi Yesu angaswi lavi kuva hi khongela ka yena. Hi mhaka muni? Hi mhaka kuhamba xikhongelo i ku gandzela, naswona Yehovha a lava hi gandzela yena ntsena. (Mat. 4:10) Kambe hingaswi kombisa swaku hamu rhandza Yesu.
4. Hi xihi xikarhato xawunharhu, naswona hita bula hi yini ka djondzo leyi?
4 Xikarhato xa wunharhu lexi hinga na xona hi leswaku Yesu a tshama matilweni. Hi mhaka leyo ahingeswi koti kuva na yena. Kambe hingamu tiva Yesu nahinga zanga hi tshama na yena. Ka djondzo leyi, hita bula hi 4 wa minchumu leyingahi pfunaka kutiyisa wunghanu la hina na Yena. Kusungula ahi voneni swaku hi mhaka muni swi li swa lisima kuva hi yendla wunghanu la le kusuhi na Yesu.
HI MHAKA MUNI HI FANELE KUVA VANGHANU VA YESU?
5. Hi mhaka muni hi fanele hi va vanghanu va Yesu? (Vona kwadru lelinge: “ Kuva Munghanu wa Yesu swi Yendla Uva Munghanu wa Yehovha” ni lelinge: “ Kuva ni Mavonelo Lamanene hi Ntirho wa Yesu.”)
5 Leswaku hi va ni wuxaka lelinene na Yehovha, hi fanele hi va vanghanu va Yesu. Hi mhaka muni? Pimisa hi swivangelo leswimbirhi. Xa kusungula Yesu a byele vadjondzisiwa va yena a ku: “Tatana hi yexe wa mirhandza. Amirhandza hikuva minirhandzile”. (Yoh. 16:27) A tlhele a ku: “Aku na munhu lweyi ataka ka Tatana, loko kungali ha mina.” (Yoh. 14:6) A kulava kuva munghanu wa Yehovha na unga li munghanu wa Yesu swi fana ni zama kunghena ka yindlu na unga tirhisi xipfalu. Yesu a tirhise xifananiso lexo loko a vula swaku yena i “nyangwa ya tinyimpfu.” (Yoh. 10:7) Xivangelo xa wumbirhi hi leswaku Yesu a tekelele wumunhu la Papayi wa yena hi kuhelela. A byele vadjondzisiwa va yena a ku: “Lweyi anivoneke, avonile Tatana”. (Yoh. 14:9) Hi mhaka leyo, hi djondza swaku Yehovha a tshamise kuyini hi kudjondza hi wutomi la Yesu. Loko hi ya hi djondza hi Yesu hita ya himu rhandza. Naswona loko lirhandzu la hina hi Yesu liya li kula hita ya himu rhandza hintamu Yehovha.
6. I yini xin’wana xihi yendlaka hi lava kuva vanghanu va Yesu? Tlhamusela.
6 Leswaku Yehovha a yingisa swikhongelo swa hina hi fanele hi va vanghanu va Yesu. Leswo swi vula swaku aswi yenelanga kuvula swaku “hi vito la Yesu” loko hi gamisa xikhongelo. Swi vula kuva hiswi twisisa leswi Yehovha amu tirhisisaka xiswona kuva a hlamula swikhongelo swa hina. Yesu a byele vapostolo a ku: ‘Hinkwaswu leswi miswikombelaka hi vito ra mina, nitaswiyendla’. (Yoh. 14:13) Hambi leswi kunga Yehovha ntsena a yingisaka ni kuhlamula aswikhongelo swa hina, a tirhisa Yesu leswaku a yendla leswi aswi lavaka. (Mat. 28:18) Na Yehovha angase hlamula swikhongelo swa hina, a rhanga hi kuvona swaku hiswi yingisile leswi Yesu angahi djondzisa swona. Hi xikombiso, Yesu a te: ‘Loko mirivalela vanhu swidjoho swa vona, Tatana wa n’wina wa le tilweni atamirivalela na n’wina; kambe loko mingarivaleli van’wana, Tatana wa n’wina na yena angakala angamirivaleli swidjoho swa n’wina.’ (Mat. 6:14, 15) Hakunene i swa lisima kukhoma van’wa kufana ni leswi Yehovha na Yesu vahi khomisaka xiswona!
7. Nkutsulu wuta pfuna vamani?
7 Leswaku nkutsulu wuhi pfuna kulaveka hi va vanghanu va Yesu. Hiswi tivisa kuyini? Hiswi tiva hi mhaka ya leswi Yesu anga nyikela ‘vutomi la yena hikolaho ka vanghanu.’ (Yoh. 15:13) Swita lava swaku vagandzeli va Yehovha lavanga hanya khale na Yesu angese ta laha misaveni, va djondza hi Yesu va tlhela vamu rhandza. Hambi hi vanhu va kutshembeka va kufana na Abrahamu, Sara, Moxe na Rahabi, lavanga hanya khale na Yesu angese ta laha misaveni, swita lava kuva va djondza hi Yesu leswaku va kuma wutomi lelinga heliki. — Yoh. 17:3; Mint. 24:15; Hev. 11:8-12, 24-26, 31.
8-9. Hi kuya hi Yohane 15:4, 5, kuva vanghanu va Yesu swihi pfunisa kuyini, naswona hi mhaka muni swi li swa lisima?
8 Ha tsaka hi kutirha na Yesu ka ntirho wa kuchumayela ni kudjondzisa mahungu ya kutsakisa ya Mfumu wa Xikwembu. Yesu a ali mudjondzisi a nkama lowu a ali lani misaveni. Loko a tlhelele matilweni, Yesu nhloko ya bandla, a tame a rhangela ntirho wa kuchumayela ni kudjondzisa. Waku vona loko u tikarhata akuva u pfuna vanhu leswaku va tiva yena ni Papayi wa yena. Kuvula ntiyiso, ahingeswi koti kuyendla ntirho lowu loku hinga pfuniwi hi Yehovha na Yesu. — Lerha Yohane 15:4, 5.
9 Bibele li djondzisa swaku akuva hi tsakisa Yehovha hi fanele hi tshama na hi rhandza Yesu. Ahi voneni 4 wa swilo leswi hingaswi yendlaka akuva hi va vanghanu va Yesu.
UNGA YENDLA YINI AKUVA UVA MUNGHANU WA YESU?
Ungava munghanu wa Yesu hi kuva u 1) mu tiva kalhe, 2) tekelela mapimisela ya yena ni leswi angaswi yendla, 3) seketela vamakwavu va Kreste ni 4) kutirhisana ni lava rhangela abandlenir (Vona maparagrafu 10 kuya ka 14) *
10. Hi fanele hi sungula hi kuyendla yini leswaku hi va vanghanu va Yesu?
10 (1) Tiva Yesu. Hinga tiva Yesu hi kulerha mabuku ya Matewu, Marka, Luka, na Yohane. Loko hi yanakanyisisa hi leswi Bibele liswi vulaka hi Yesu, hita sungula kumu rhandza hi tlhela himu hlonipha hi kuvona leswi anga hanyisanisa xiswona ni vanhu. Hi xikombiso, hambi leswi Yesu a ali Murhangeli wa vadjodzisiwa va yena, angava yendlanga swikarawa. Kambe ava byele leswi a aswi pimisa ni leswi a atitwisa xiswona. (Yoh. 15:15) Loko vadjondzisiwa va yena va twa kuvava na yena a aswi twa. (Yoh. 11:32-36) Hambi hi valala va Yesu avaswi vona swaku lava avamu yingisa ava va vanghanu va Yena. (Mat. 11:19) Loko hi tekelela leswi Yesu anga hanyisa xiswona ni vadjondzisiwa va yena, hita ya hi hanyisana kahle ni van’wana, hi tlhela hi tsaka, naswona hita ya himu rhandza hintamu Yesu.
11. Hi xihi nchumu xa wumbirhi lexi hi faneleke hixi yendla akuva hi va vanghanu va Yesu naswona hi mhaka muni swi li swa lisima?
11 (2) Pimisa u tlhela u yendla swilo kufana na Yesu. Loko hiya himu tiva kahle Yesu hi tlhela hi pimisa kufana na yena, hita ya hi va vanghanu va yena. (1 Kor. 2:16) Hingamu tekelelisa kuyini Yesu? Pimisa hi xikombiso lexi. Yesu a atshama hi kupimisa swaku angava pfunisa kuyini van’wana kunga li kutitsakisa. (Mat. 20:28; Rhom. 15:1-3) Leswi a apimisisa xileswi, a atikarhata a tlhela a rivalela van’wana. A anga kahluli a kwata hi leswi vanhu avaswi vula hi yena. (Yoh. 1:46, 47) A anga veketeli xiviti ka leswi vanhu vanga tshama vamu yendlela. (1 Tim. 1:12-14) Yesu a te: ‘Hinkwavu vatativa leswaku mi vajondzisiwa va mina, loko mirhandzana.’ (Yoh. 13:35) Tivutise leswi: “Namu tekelela Yesu hi kulwela kuyendla kurhula ni vamakwerhu?”
12. Hi xihi nchumu xa wunharhu lexi hi faneleke hixi yendla akuva hi va vanghanu va Yesu naswona hingaswi yedlisa kuyini?
12 (3) Seketela vamakwavu va Kreste. Yesu a vona leswi hiswi yendlaka vatotiwa kufana ni loko hi yendlela yena. (Mat. 25:34-40) A xa lisima hintamu lexi hi faneleke hixi yendla kuva hi seketela vatotiwa, i kuva hi chumayela ni kudjondzisa vanhu mahungu ya kutsakisa ya Mfumu hi kuhiseka, kunga ntirho lowu Yesu angahi rhuma wona. (Mat. 28:19, 20; Mint. 10:42) Vatotiwa vango kota kuyendla ntirho lowu wa kuchumayela amisaveni hinkwayu ntsena loko va pfuniwa hi “tinyempfu tin’wana”. (Yoh. 10:16) Loko u li mun’we wa tinyempfu tin’wana, a nkama u chumayelaka u kombisa swaku u rhandza Yesu ni vatotiwa.
13. Hingama tirhisisa kuyini marito ya Yesu lawa manga ka Luka 16:9?
13 Xin’wana lexi hingaxi yendlaka leswaku hi va vanghanu va Yehovha na Yesu i kunyikela male akuva yi seketela ntirho wa kuchumayela. (Lerha Luka 16:9.) Hi xikombiso, hingaha humesa male akuva yi pfunisa ka ntirho wa kuchumayela amisaveni hinkwayu, leswi patsaka ni kuchumayela ka tindhawu ta le kule, kuyaka ni kuhlayisa tiyindlu ta kugandzela ka tona, ni kupfuna lavanga weliwa hi timhangu. Hinga tlhela hi humesa male leswaku kuxaviwa leswi lavekaka abamdleni ni kupfuna lava va pfumalaka. (Swi. 19:17) Loko hi yendla leswo hitava hi pfuna vamakwavu va Kreste.
14. Hi kuya hi Vaefesa 4:15, 16, hi xihi nchumu xawu-4 lexi hi faneleke hixi yendla akuva hi va vanghanu va Yesu?
14 4) Seketela nhlengeletanu ya Yehovha. Hita ya hi va vanghanu va Yesu loko hi tiveka hansi ka lava Yehovha angava veka kuva vahi kongomisa. (Lerha Vaefesa 4:15, 16.) Hi xikombiso, swoswi hi zama kuti tirhisa kahle Tiyindlu ta Mfumu. Leswaku kuyendleka leswo, ku ni mabandla lawa manga patsana kutlhela kuyengeteliwa materitoriyu. Leswi swi yendle swaku kupopariwa male ya nhlengeletanu. Kambe leswi swi yendle leswaku vachumayeli van’wana va boheka kutitwananisa ni swiyimu. Swingaha yendleka vachumayeli lavo ava tolovelanile ni vamakwerhu va bandla lelo hi malembe ni malembe. Kambe swoswi va kombeliwa kuya ka bandla lin’wana. Yesu a tsaka hintamu loko vadjondzisiwa volavo va kutshembeka va tirhisana ni nhlengeletano.
KUVA VANGHANU VA YESU HILAHA KUNGA HELIKI
15. Ka nkama lowu taka, lirhandzu la hina hi Yesu lita kulisa kuyini?
15 Vakreste lava totiweke hi moya wa kukwetsima va ni ntshembo wa kuva na Yesu hilaha kunga heliki ni kufuma na yena ka Mfumu wa Xikwembu. Vata va na Yesu hikakunene, vamu vona, va bula na yena va tlhela va hanya na yena. (Yoh. 14:2, 3) Yesu ata tlhela a pfuna lavanga ni ntshembo wa kuhanya laha misaveni. Hambi leswi vangata kala vangamu voni Yesu, a nkama lowu vangata tikhorisa hi wutomi leli Yehovha na Yesu vava nyikaka lona, vata ya vamu rhandza Yesu. — Esa. 9:6, 7.
16. Hita kuma yini hi kuva vanghanu va Yesu?
16 Loko hi pfumela kurhambiwa hi Yesu leswaku hi va vanghanu va yena, hita katekisiwa hintamu. Hi xikombiso haswi vona swaku swoswi wahi rhandza a tlhela ahi seketela. Hi ni mukhandlu wa kuhanya hilaha kunga heliki. A xa lisima kutlula inkwaswu, wunghanu la hina na Yesu lihi nyika mukhandlu wa kuma nchuma xa lisima kutlula hinkwaswu, kunga wunghanu lale kusuhi na Yehovha, Papayi wa Yesu. Swa tsakisa kuva vanghanu va Yesu!
LISIMU 130 Hi Lava Kuva Lava Rivalelaka
^ par. 5 Vapostolo va ve vanghanu va Yesu hi mhaka leswi vanga heta malembenyana nava bula ni kutirha na yena. Yesu waswi lava swaku na hina hi va vanghanu va yena. Kambe kuhambana ni vapostolo, hina hini swikarhato hi faneleke hi lwa na swona akuva hi va vanghanu va Yesu. Ka nhlokomhaka leyi hita bula hi swikarhato swa kona ni leswi hingaswi yendlaka akuva hi yaka wunghanu la kahle na Yesu.
^ par. 55 NTLHAMUSELO WA XIFANISO: (1) Ka wugandzeli la ndjangu, hinga djondza hi wutomi la Yesu ni ntirho wa yena wa kuchumayela. (2) Abandleni hinga lwela kuyendla kurhula ni van’wana. (3) Loko hi tirha hi kuhiseka ka ntirho wa kuchumayela, hi seketela vatotiwa. (4) Hinga pfumelelana ni swiboho swa madoda loko mabandla ya hina ma patsiwa ni man’wana.
