1. I yini swa kutsakisa leswi Bibele lihi byelaka hi Yehovha?

AWUTA tsaka loko vanhu van’wana avoku yavanyisa hi kuya hi xikhumbha xa wena, kara la wena kumbe hi kuya hi leswaku u lalile kumbe u kulukile? Devhi awungata tsaka. Swa tsakisa kutiva swaku Yehovha angahi yavanyisi hi kuya hi leswi vanhu vahi vonisaka xiswona. Hi xikombiso, loko Samuwele a vona vana va Yese, a angaswi voni leswi Yehovha aaswi vona ka vona. Yehovha a abyele Samuwele swaku mun’we wa vana va Yese a atava hosi a Israyele. Kambe aku tava mani? A nkama anga vona Eliyabu, n’wana wa mukulu wa Yese ate: “Kunene lweyi hi yena Mutotiwa wa Yehovha.” Eliyabu a asasekile lakakuva Samuwele a pimise swaku hi yena a alangiwe kuva hosi. Kambe Yehovha a byele Samuwele a ku: “Unga languti kulanguteka ka yena ni kuleha ka yena, hikuva nimu bakanyile.” Hi djondza yini ka mhaka leyi? Yehovha a tlhele a ku: “Hikuva ndlela leyi munhu avonaka ha yona ahi ndlela leyi Xikwembu xi vonaka ha yona, hikuva munhu avona leswi vonekaka matihlweni, kambe Yehovha avona leswinga ndzeni ka mbilu.” — 1 Samuwele 16:1, 6, 7.

2. Hi kuya hi Yohane 7:24, hi mhaka muni hinga fanelanga hi yavanyisa vanhu hi kuya hi leswi hiva vonisaka xiswona? Yendla xikombiso.

² Leswi hi kalaka hinga hetisekanga, hi tsutsumela kupimisa swa kubiha hi van’wana hi kuya hi leswi hiva vonisaka xiswona. (Lerha Yohane 7:24.) Kambe ahinge tivi hinkwaswu ka munhu hi kumu vona ntsena. Hi xikombiso, hambi hi dotori lweyi anga ni malembe ni malembe na a tirha, angeswi tivi swaku munhu a vabya hi yini hi kumu languta ntsena. Kambe a fanele amu yingisela kahle loko amu byela leswi anga tshama a vabya hi swona ni leswi a titwisaka xiswona swona swoswi. Minkama yin’wana dotori angaha kombela swaku a hamba Raio-X, akuva a tiva leswi yendlekaka ndzeni ka mirhi wa yena. Loko o kala anga yendi  leswo, angamu nyika murhi wa kukala wunga li wona. Hi kufanana, ahingeva tivi vamakwerhu hi kuva languta ntsena. Hi fanele hi zama kutwisisa leswi vanga tshamisa xiswona. Ahingeswi tivi leswinga ka mbilu ya munhu. Hi mhaka leyo, ahinge tshuki himu tiva kufana ni leswi Yehovha amu tivisaka xiswona. Kambe hinga yendla yini leswaku hi tekelela Yehovha?

3. Swikombiso swale Bibeleni leswi hingata djondza ha swona ka nhlokomhaka leyi, switahi pfunisa kuyini kutekela Yehovha?

³ Yehovha ava khomisa kuyini vamakwerhu? Wava yingisela. A twisisa swiyimu swa vona hinkwaswu ni leswinga tshama swiva humelela. Ava komba timpsalu. A nkama hi kambisisaka leswi Yehovha anga kombisisa xiswona timpsalu ka Yonasi, Eliya, Agara na Lota, ahi voneni leswi hingamu tekelelisaka xiswona Yehovha loko hi hanyisana ni vamakwerhu.

4. I mpsini swingahahi yendlaka hi pimisa swa kubiha hi Yonasi?

⁴ Leswi hi kalaka hingamu tivi kahle Yonasi, hingaha pimisa swaku a anga tshembeki. A arhumiwe hi Yehovha kuya chumayela rungula la wuyavanyisi aNinivha. Kuhambana ni kuyingisa Yehovha, Yonasi a balekile aya ka ndhawu yin’wana, “kule na Yehovha.” (Yon. 1:1-3) Loko a kuli wena awuta tlhela umu rhuma? Devhi awungataswi yendla leswo. Kambe Yehovha a ani swivangelo swa kutlhela amu rhuma. — Yon. 3:1, 2.

5. Hi djondza yini hi Yonasi ka marito ya yena manga ka Yonasi 2:1, 2, 9?

⁵ Ka xikhongelo xa yena, Yonasi a kombise swaku a ali munhu wa kutshamisa kuyini. (Lerha Yonasi 2:1, 2, 9.) Aswi kanakanisi swaku Yonasi a khongele ka kunyingi ka Yehovha. Xikhongelo lexi angaxi yendla na a li ndzeni ka nhlampfi, xihi komba swaku a angali munhu wa kutshamela kubaleka swiyavelo. Marito ya yena mahi pfuna kuvona swaku aali munhu wa kutiveka hansi, wa kutlangela naswona a atinyimisele kuyingisa Yehovha. Hi mhaka leyo, aswi kanakanisi leswi Yehovha a kalaka anga khomelelanga ka xihoxo xa yena. Kambe a hlamule xikhongelo xa yena a tlhela a tama amu tirhisa kuva muprofeta.

6. Hi mhaka muni hi fanele hi yingisela kahle na hingase vulavula?

⁶ Akuva hiva yingisela kahle van’wana, kulaveka hi tiveka hansi hi tlhela hi lehisa mbilu. Kuni 3 wa swivangelo swihi yendlaka hi vula leswo. Xa kusungula: Ahingata tsutsumela kupimisa swa kubiha hi van’wana. Xawumbirhi: Hita twisisa leswi va titwisaka xiswona ni leswiva yendlaka va yendla swilo hi ndlela yokarhi. Leswo switahi pfuna kuva komba timpsalu.  Xawunharhu: Loko himu tshika a vulavula, hingamu nyika ni nkama wa kuva a tikambisisa. Minkama yin’wana, loko munhu angase byela mun’wana hi leswi a titwisaka xiswona swamu karhatela kutitwisisa. (Swi. 20:5) Doda lin’wana la Asia li li: “Ni khumbuka siku ninga phazama ni vulavula na ninga sungulanga hi kumuyingisela makwerhu mun’wana waxisati. Nimu byele swaku a afanele a yampsisa tinhlamulu ta yena amintlhanganwini. Kambe hi kufamba ka nkama ni tsumbule swaku aswimu karhatela kulerha lakakuva a afanele a tikarhata hintamu akuva akota kuhlamula.” Leswi swi komba swaku i swa lisima kuva doda lin’wana ni lin’wana li rhanga hi “kuyi tiva kahle mhaka” na lingasemu pfuna makwerhu. — Swi. 18:13.

7. U djondza yini ka leswi Yehovha angamu khomisa xiswona Eliya?

⁷ Vamakwerhu van’wana swava karhatela kuvulavula hi leswi va titwisaka xiswona hi mhaka ya leswingava humelela wuton’wini, ndhawuku kumbe matshamelo ya vona. Hinga yendla yini akuva va tshunxeka kuhi byela leswi va titwisaka xiswona? Khumbuka leswi Yehovha angamu pfunisa xiswona Eliya loko a baleka Yezabele. Swi teke masiku manyingi akuva Eliya a byela Yehovha leswi a atitwisa xiswona. Yehovha amu yingiselile, a gama amu nyika ntirho wa lisima leswaku awu yendla. (1 Tiho. 19:1-18) Swinga teka nkama kuva vamakwerhu va tshunxeka kuvulavula na hina. Kambe loko se va yendle leswo hi kona swingatahi wolovela kuva twisisa kahle. Loko hi lehisa mbilu kufana na Yehovha, vatahi tshemba. Hi mhaka leyo, loko se va lunghekile kuhi byela leswi va titwisaka xiswona hi fanele hiva yingisela kahle.

8. Hi kuya hi Genesa 16:7-13, Yehovha amu pfunise kuyini Agara?

⁸ Agara, mutirhi wa Sarai a tiphuntisile a nkama angava nsati wa Abrama. Akume nyimba, a gama a sungula kuyeyisa Sarai hi leswi a anga na vana. Mhaka leyi yi kulile yiza yi fika laha Sarai angamu hlongola. (Gen. 16:4-6) Leswi hi kalaka hinga hetisekanga hingaha pimisa swaku Agara a kume leswi aswimu fanela. Kambe Yehovha angaswi vonisanga xileswo. A rhume ntsumi yiya ka Agara. Loko yimu kumile yimu pfunile kuva a cinca mapimiselo ya yena ya kubiha yi tlhela yimu katekisa. Agara aswi tsumbulile swaku Yehovha a amu vona ni leswaku a axi twisisa xiyimu xa yena. Leswo swimu hlamalisile a za a ku: “U Xikwembu lexi vonaka. . . . Xana ningava ni vone lweyi ani vonaka laha hakunene?” — Lerha Genesa 16:7-13.

9. Yehovha a vone yini ka Agara?

⁹ Yehovha a vone yini ka Agara? Yehovha a amu tiva kahle Agara naswona aaswi tiva leswingamu humelela. (Swi. 15:3) Agara a ali Mugibita lweyi a atshama ka munti wa Muheberhu. Swinga yendleka minkama yin’wana a ativona na a li yexe ka tiku leliyani, a tlhela a xuva kaya ka yena ni maxaka ya yena. Phela a anga li yena yexe nsati wa Abrama. Kuve ni nkama lowu malandza man’wana ya kutshembeka ya Yehovha ama ni vavasati va kutlula mun’we. Kambe leswo akunga li kurhandza ka Yehovha kusukela kusunguleni. (Mat. 19:4-6) Hi mhaka leyo aswi hlamalisi leswi ka mindjangu leyi kunga ni vavasati va kutlula mun’we kunga ni kunyenyana ni wukwele. Hambi leswi Yehovha a anga nyimeleli Agara hi mhaka leswi a kalaka angamu hloniphanga Sarai, hinga tiyiseka swaku Yehovha a axi twisisa xiyimu xa Agara ni leswi a atitwisa xiswona.

10. Hinga yendla yini leswaku hiva tiva kahle vamakwerhu?

¹⁰ Hinga tekelela Yehovha hi kuva hiva twisisa vamakwerhu. Lwela kuva tiva kahle vamakwerhu. Bula na vona amintlhanganwini na yingase sungula ni loko yi hela. Famba na vona kuchumayeleni. Loko swi koteka va rhambi leswaku  miya dla swin’we. Loko u yendla leswo, uta tsumbula swaku vamakwerhu lava u pimisaka swaku va ni mona, ahi swona, vo va ni tingana ntsena. Lava a wu pimisa swaku va rhandza male, a va tsonani, lava xwelaka mintlhanganwini, swova karhatela kusuka kaya hi leswi va kanetiwaka. (Yobo 6:29) Hambi leswo, ahi lavi kuva “vahlevi” lava fambaka va vulavula timhaka ta van’wana. (1 Tim. 5:13) Hambi leswo, leswaku hiva twisisa kahle vamakwerhu, i swinene kutiva swiyimu swa vona ni leswinga tshama swiva humelela.

11. Hi mhaka muni madoda ma fanele mava tiva kahle vamakwerhu?

¹¹ Ngopfungopfu madoda ma fanele mava tiva kahle vamakwerhu. Pimisa hi xikombiso xa Artur lweyi anga mudjikelezi. Yena ni doda lin’wana va pfuxele makwerhu mun’wana lweyi a atikomba na a ni tingana. Makwerhu Artur a li a nkama vanga yamu pfuxela va tsumbule swaku ahaku feliwa hi nuna. Hambi leswi a akumana ni swikarhato leswo hinkwaswu, a pfune vana va yena vambirhi va tintombhi leswaku va djondza ntiyiso va tlhela va gandzela Yehovha hi kutshembeka. Swoswi angaha voni kahle naswona a pfana a teliwa hi mavabyi ya kurhateka ka miyanakanyu. Kambe hambi leswo, wamu rhandza Yehovha naswona ani lipfumelo. Va tsumbule swaku vanga djondza swa swinyingi ka makwerhu lweyi. (Filp. 2:3) Mudjikelezi lweyi a atekelela xikombiso xa Yehovha. Yehovha wava tiva vagandzeli va yena va kutshembeka naswona waku twa kuvava loku vaku twaka. (Ekso. 3:7) Madoda lawa mava tivaka kahle vamakwerhu mangaswi kota kahle kuva pfuna.

12. Makwerhu Yip Yee swimu pfunise kuyini akuva a tive makwerhu mun’wana abandleni?

¹² Loko uva tiva kahle vamakwerhu hambi hi lava vaku nyenyentsaka, uta ya u sungula kuva rhandza u tlhela uva twela wusiwana. Hi xikombiso makwerhu Yip Yee wa Asia a li: “Makwerhu mun’wana abandleni, a ni pongo loko a vulavula. Ani pimisa swaku anga na xihlonipho. Kambe a nkama ninga famba na yena kuchumayeleni, ni tsumbule swaku a atolovela kupfuna vapsali va yena kuxaviseni ka tihlampfi a bazara. Se aswi lava a tlakusa rito akuva a vitanela makliyenti.” Yip Yee a tlhele a ku: “Ni djondze swaku ni fanele niva tiva kahle vamakwerhu.” Swi lava hi tikarhata leswaku hiva tiva kahle vamakwerhu. Kambe loko hi landza matshinya ya minawu a Bibele ya kuva hi yendla vamakwerhu va titwa na va chunsekile kuvulavula na hina, hita tekelela Yehovha lweyi a rhandzaka “vanhu hinkwavu”. — 1 Tim. 2:3, 4; 2 Kor. 6:11-13.

13. Hi kuya hi Genesa 19:15, 16, tintsumi ti yendle yini ankama Lota anga hamba mihoni naswona hi mhaka muni?

¹³ Ka nkama wa kukarhata awuton’wini la yena, Lota ave ni mihoni ka kulandza swileleto leswi Yehovha angamu nyika swona. Tintsumi timbirhi timu yendzelile akuva timu byela swaku yena ni ndjangu wa yena va huma a Sodoma. Hi mhaka muni ava fanele va huma? Tintsumi ti te: “Hi ta helisa ndhawu leyi”. (Gen. 19:12, 13) Mundzuku wa kona ni mixo Lota ni ndjangu wa yena avahali kaya. Se tintsumi ti tlhele timu byela leswaku va huma. Kambe a tame a “hamba mihoni”. Hingaha pimisa swaku Lota a anga na mhaka ni leswi Yehovha a amu byela swona naswona a anga yingisi. Hambi leswo, Yehovha anga tshikanga kuzama kumu ponisa. “Hikusa Yehovha a amu twela wusiwana”, tintsumi ti khome Lota ni ndjangu wa yena hi mavoko tiva humesa handle ka doropa. — Lerha Genesa 19:15, 16.

14. Hi mhaka muni Yehovha a kombe Lota timpsalu?

¹⁴ Yehovha a ani swivangelo swa kutwala swaku komba Lota ntwelawusiwana. Swingaha yendleka swimu karhatelile kuhantlisa a suka hi mhaka ya leswi a achava vanhu va doropa la Sodoma. A ku ni khombo lin’wana. Swinga yendleka Lota a akhumbuka tihosi timbirhi letinga wela swihloveni swa madaka ka nambu lowu awu li kusuhi na vona. (Gen. 14:8-12) Leswi a ali mulumuzana a akarhateka hi kuhlayiseka ka ndjangu wa yena. Handle ka leswo, leswi Lota a aganyile, swingaha yendleka a karhatekile hi yindlu ya kusaseka leyi a ali na yona a Sodoma. (Gen. 13:5, 6) I ntiyiso ka leswaku aku na swivangelo swa kutwala leswi aswita yendla Lota a tsandzeka kuyingisa Yehovha. Kambe Yehovha anga pimisanga hi swihoxo swa Lota ntsena naswona a amu vona na a li munhu wa kululama. — 2 Pet. 2:7, 8.

15. Kuhambana ni kupimisa swa kubiha hi van’wana hi mhaka leswi vaswi yendlaka, hi fanele hi yendla yini?

¹⁵ Hinga pimiseleni swa kubiha hi van’wana hi mhaka ya leswi vaswi yendlaka, kambe ahi zameni kutwisisa leswi va titwisaka xiswona. Leswo swi tshama swi yendlekela Veronica, makwerhu mun’wana wa Europa. A li: “A ku ni makwerhu lweyi a atshame ingi a ni mona. Minkama yin’wana ani chava ni kumu tshindzekela.  Kambe ni game ni pimisa leswi, ‘Loko ano va yena, anitamu lava munghanu.’ Hi mhaka leyo, ni sungule kumu vutisa swaku a atitwisa kuyini. Kutani ani byela leswi a atwisa xiswona. Swoswi namu tiva kuyampsa kutlula khale.”

16. Hi mhaka muni hi fanele hi khongela akuva hi kombisa timpsalu?

¹⁶ A kuna munhu lweyi angahi twisisaka hi kuhelela kutlula Yehovha. (Swi. 15:11) Hi mhaka leyo, hi fanele himu kombela leswaku ahi pfuna kuva hi vona van’wana kufana ni leswi yena ava vonisaka xiswona hi tlhela himu kombela kuva ahi djondzisa kuva komba timpsalu. Anzhela, makwerhu mun’wana waxisati a pfuniwe hi xikongelo akuva a ya a kombisa timpsalu. Aku ni makwerhu mun’wana waxisati lweyi aswimu karhatela kuhanyisana na yena. Anzhela a li: “Aswitani wolovela kuva ni solasola makwerhu ni gama ni huma ka yena. Kambe ni kombele Yehovha akuva ani pfuna kumu twisisa.” Yehovha amu hlamulise kuyini xikhongelo xa yena? Anzhela a li: “Siku lin’wana hi fambe xikan’we kuchumayeleni hi gama hi bula nkama wa kuleha. Nimu yingisele hi lirhandzu. Swoswi nimu rhandza hintamu naswona ni lava kutama nimu pfuna.”

17. Hi fanele hi tinyimisela kuyendla yini?

¹⁷ Ahi fanelanga hi langa vamakwerhu lava hingatava kombaka timpsalu. Hinkwavu ka vona va kumana ni swikarhato swa kufana ni leswi Eliya, Agara, na Lota vanga kumana na swona. Minkama yinyingi, swikarhato swa kona vayo tivangela hi voxe. Kuvula ntiyiso, hinkwerhu ka hina hi tshama hi tivangela swikarhato. Hi mhaka leyo, swa twala leswi Yehovha ahi kombelaka leswaku hi twelana wusiwana. (1 Pet. 3:8) Loko hi yingisa Yehovha, hi tiyisa wun’we la hina leli kombisaka swaku hi ndjangu wun’we amisaveni hinkwayu. Ahi tinyimiseleni kuyingisela van’wana, hiva twisisa hi tlhela hi kombisa timpsalu ka vamakwerhu.