Swa tikomba swaku aanga vulavuli hi djondzo leyo. Diyavulosi angamu byelanga Eva swaku loko a dla handzu lowu Xikwembu axiwu tsimbisa, moya wa yena (lowu van’wana va pimisaka swaku awu fi) awuta ya hanya kun’wani kambe kufa mirhi wa yena. Hi kutirhisa nyoka, Sathana a vule swaku loko Eva a dla handzu ange tshuki afa. A alava kumu yendla a pimisa swaku aata tama ahanya wutomi la kutsakisa amisaveni na anga lavi kupfuniwa hi Xikwembu. — Gen. 2:17; 3:3-5.

Leswi djondzo ya mavunhwa ya leswaku moya awu fi yi kalaka yinga sungulanga aEdeni, se yi sungulise kuyini? Ahiswi tivi kahle. Leswi hiswi tivaka i swaku wugandzeli la mavunhwa li helisiwile ka ndhambi ya Nowa. Leswi kunga pona Nowa ni ndjangu wa yena ntsena, lava avali vagandzeli va ntiyiso, akungaha salanga munhu lweyi aata djondzisa tidjondzo ta mavunhwa.

Hi mhaka leyo, djondzo leyi ya kunga fi ka moya wa munhu leyinga kona namuntlha, yita va yi sungule loko se kuhundze ndhambi ya Nowa. A nkama Xikwembu xinga yendla leswaku kuva ni tirimi totala aBabele naswona xiva “hangalasa amisaveni yinkwayu”, aswi kanakanisi swaku vanhu va fambe ni djondzo leyi ya kunga fi ka moya wa munhu. (Gen. 11:8, 9) Hambileswi hi kalaka hingawu tivi nkama lowu djondzo leyi ya mavunhwa yinga sungula hi wona, ha tiyiseka swaku “tatana wa mavunhwa” kunga Sathana Diyavulosi hi yena anga sungula djondzo leyi naswona swamu tsakisa kuyi hangalasa hinkwaku. — Yoh. 8:44.