Ka rungula lelinga ka Deteronoma 22:25-27, aku vulavuliwi hi kukambisisa leswaku hi mani angani nandzu, hikusa se aswi tiviwa swaku lweyi angani nandzu i wanuna. Nawu lowu awu basisa mhaka ya leswaku wansati aanga na nandzu. Ahi voneni mhaka leyi hi wuyentelelo.

Na ungase fika ka tindzimana leti kuvulavuliwa hi wanuna lweyi a fambelanaka masangu ni wansati lweyi a tshembisiweke “adoropeni”. Hi kuyendla leswo, wanuna a ani nandzu hi mhaka wansati lweyo a avoniwa ingi hi loko se a chadile. Kuvuliwa yini hi wansati? leswi a ‘kalaka anga banga nyandha a doropeni’, a ani nandzu wa kumbuyeta hikusa loko a abe nyadha, van’wana avata mutwa ivi vamu lamulela. Hi mhaka leyo, hi vambirhi ka vona ava ni nandzu. — Det. 22:23, 24.

Nawu lowu landzaka awu vulavula hi xiyimu xin’wana. Wona wu li: “Kambe, loko wanuna lweyi a kume ntombhi leyi se yinga tshembisana ni mun’wana anhoveni agama ayi khoma ayi pfinya, yena wanuna lweyi hi yena a faneleke a fa. Ntombhi unga tshuki uyi khumba. Ayi yendlanga xidjoho xa kufaneliwa hi lifu. Mhaka leyi yi fana niloko munhu a dumela munhu mun’wana amu dlaya. Hikusa ayi kume anhoveni, naswona ntombhi leyi yi bile nyandha, kambe akungana munhu wa kuyi lamulela.” — Det. 22:25-27.

Ka xiyimu lexi, vayavanyisi avamu tshemba lweyi wansati. Hi mhaka muni? Ava tshemba leswaku a ‘a bile nyandha, kambe akungana munhu wa kumu lamulela.’ Xileswo a angana nandzu wa kumbuyeta. Kambe wanuna aani nandzu wa kupfinya ni kumbuyeta hikusa ‘amu khomile amu pfinya’, wansati lweyi a atshembisiwile.

Hambileswi nawu lowu awu vulavula ngopfu hi kupfumala nandzu ka wansati, kambe wu tlhela wu kombisa leswaku wanuna aani nandzu wa kupfinya ni kumbuyeta. Hinga tiyiseka hi leswaku vayavanyisi ava ‘lavisisa mhaka, vayi kambisisa va tlhela vayi vutisisa hi kuhelela’ ivi va fikelela makumu hi laha nkongomiso wa nawu wa Xikwembu, lowu axiwu nyikele hi ku phindhaphindha awu vula hi kona. — Det. 13:14; 17:4; Ekso. 20:14.