U tivonisa kuyini? U munhu lweyi a khensaka? Hinkwerhu hi fanele hi pimisa hi xivutiso lexi. Bibele li vule leswaku aminkameni ya hina, vanhu ava tava “lavanga khensiki”. (2 Tim. 3:2) Swinga yendleka u tshame u kumana ni vanhu lava pimisaka swaku vona va fanele va nyikiwa swilo hi vanhu van’wana. Nakambe loko va nyikiwile avaswi voni na swi vileleka kukhensa. Swinga yendleka u pfumela swaku aswi tsakisi kuva ni vanhu va kutshamisa xileswo.

Kuhambana ni leswo, vanhu va Yehovha va byeliwa leswaku ‘vadjondza kukhensa’. Hi mhaka leyo hi fanele hi khensa ka swilo ‘hinkwaswu’. (Kol. 3:15; 1 Tes. 5:18) Kuvula ntiyiso, ha pfuneka loko hiva vanhu lava khensaka. Ahi voneni swaku hi mhaka muni.

Xin’we xa swivangelo leswihi yendlaka hi lava kudjondza kukhensa, hi leswaku swihi pfuna kuva hi titwa kahle. Loko munhu a khensa loko anyikiwe swilo, swiyendla a titwa kahle naswona ni lweyi a khensiwaka ata titwa kahle ngopfu. Hi mhaka muni kukhensa swi tsakisa hina ni lava hiva khensaka? Hi xikombiso, ahinge munhu wokarhi hi kuswi rhandza a tinyika nkama wa kukuyendlela swilo swokarhi hileswi aswi vonaka naswiku fanela. Hi kuyendla leswo a kombisa swaku ani mhaka na wena naswona loko u vona minzamu hinkwayu leyi ayi yendleke, swinga kuyendla u titwa kahle. Ha kholwa swaku na Rhuti a titwise xileswo loko Boazi amu yendlele swilo swa swinene. Aswi kanakanisi swaku Rhuti a tsake hintamu loko a vona swaku kuni munhu lweyi anga ni mhaka na yena. — Rhuti 2:10-13.

I swa lisima naswona swa fanela kuva hi khensa Xikwembu. Aswi kanakanisi swaku minkama yin’wana wa pimisa hi swilo leswi Yehovha a tshamelaka kuhi nyika swona akuva hi tiyisa wunghanu la hina na yena ni swilo leswi ahi nyikaka swona leswaku hi kota kuhanya. (Det. 8:17, 18; Mint. 14:17) Kambe kuhambana ni kupimisa nyana hi swilo leswinene leswi taka hi ka Xikwembu, tinyiki nkama wa kuyanakanyisisa hi swilo swotala swohlamalisa leswi Xikwembu xihi yendlelaka swona. Loko u yanakanyisisa hi kuhanana ka muvumbi wa wena, switaku yendla umu khensa naswona uta tiyiseka swaku waku rhandza nakambe ani mhaka na wena. — 1 Yoh. 4:9.

Hinga gameleni ka kuyanakanyisisa ntsena hi swilo leswi Yehovha ahi yendleleke swona, hi fanele hi tlhela himu khensa. (Pis. 100:4, 5) Hi laha tintivi tin’wana tivuleke hakona, “kukombisa moya wa kukhensa i swa lisima kuva vanhu tsaka.”

Xivangelo xin’wana xihi yendlaka hi lava kudjondza kukhensa, hi mhaka kukhensa swi tiyisa wunghanu. Anga kona lweyi a kalaka angaswi lavi kukhensiwa. Loko umu khensa hi mbilu hinkwayu munhu lweyi angaku yendlela swilo leswinene, wunghanu la wena na yena la kula. (Rhom. 16:3, 4) Handle ka leswo, vanhu lava khensaka vaswi kota kupfuna van’wana. Va vona wunene leli va yendleliwaka lona kutani na vona va yendlela van’wana leswinene. Impela, loko u pfuna van’wana na wena uta tsaka. Swi fana ni leswi Yesu angaswi vula loko a ku: “Kunyika swa tsakisa ngopfu kutlula kunyikiwa.” — Mintirho 20:35.

Robert Emmons, mun’we wa va diretori va ntlawa lowu kambisisaka mhaka ya kukhensa aUniversidade la California, a vule leswi: “Kuva hiva vanhu lava khensaka swi lava hiswi twisisa swaku hinkwerhu haswi lava kupfuniwa hi vanhu van’wana. Nkama wun’wana hi hina hiva nyikaka swokarhi kasi nkama wun’wana hi hina hi nyikiwaka.” Mhaka hi leswaku akuva hi tama hi hanya  haswi lava kupfuniwa ni kuseketeliwa hi vanhu van’wana. Hi xikombiso, vangahi nyika swakudla kumbe murhi loko hi vabya. (1 Kor. 12:21) Munhu lweyi anga ni moya wa kukhensa, waswi tlangela hintamu leswi vanhu van’wana vamu yendlelaka swona. Se wena ke, waswi tolovela kukhensa van’wana loko vaku yendlela swilo leswinene?

Xivangelo xin’wana xihi yendlaka hi lava kudjondza kukhensa, hi leswaku swihi pfuna kuvona swilo leswinene kungali swobiha. Hi mhaka leyo, mimpimiso ya wena yinga tirha inge i xisefo. Loko u li munhu lweyi a khensaka, mimpimiso ya wena yita vona swilo leswinene ivi yiku sivela kupimisa hi leswo biha. Nakambe leswo swita kupfuna kuvona swilo swa kahle kunga li swikarhatu leswi u kumanaka na swona ntsena. Loko uya u kombisa moya wa khensa, uta tshamela kuvona swilo leswinene leswingataku pfuna kutama uva munhu lweyi a khensaka. Loko u lwela kukombisa moya wa kukhensa awuton’wini, switaku pfuna kuva u yendla leswi mupostola Pawulo angaswi vula loko a ku: “Titsakeleni Hosini masiku hinkwawu”. — Filp. 4:4.

Loko u kombisa moya wa kukhensa switaku pfuna kuva unga tshameli kupimisa swilo swa kubiha. Phela aswinge koteki uva munhu lweyi a khensaka u tlhela hi nkama wa wun’we uva munhu lweyi anga ni xikwatisana, xiviti ni kukweleta van’wana. Vanhu lava khensaka ava talisi kurhandza ngopfu mali. Vaswi tlangela leswi vanga na swona, hi mhaka leyo ava tshameli kulavetela swin’wana. — Filp. 4:12.

Tani hi Mukreste, waswi twisisa swaku Sathana alava kuku heta ntamu hi mhaka ya swikarhatu leswi u kumanaka na swona ka masiku lawa ya wugamu. Loko u tshamela ku tikhalakhala Sathana ata tsaka. Loko uni moya lowu, switaku karhatela kuchumayela mahungu yo tsakisa naswona a vanhu avangeku yingisi. Phela kukhensa swi fambisana ni mihandzu ya moya wokwetsima, kupatsa ni kutsaka hi swilo leswinene leswi Xikwembu xihi nyikaka swona ni lipfumelo ka switshembiso swa xona hinkwaswu. — Gal. 5:22, 23.

Tani hi mugandzeli wa Yehovha, handle ka kukanakana wa pfumelelana ni leswi nhlokomhaka leyi yingaswi vula hi moya wa kukhensa. Kambe waswi twisisa swaku kukombisa moya wa kukhensa aswo titela hi swoxe. Hambi leswo, unga heli ntamu. Ungaswi kota kukombisa moya wa kukhensa ni kutshama na u li na wona. Ungaswi yendlisa kuyini? Siku ni siku lava nkama wa kupimisa hi swilo leswinene awuton’wini la wena leswi unga khensaka hi mhaka ya swona. Loko u tinyika nkama wa kupimisa hi leswi, switaku vevukela kuva ni moya wa kukhensa. Leswo switaku yendla u tsaka hintamu kutlula lava tshamelaka kupimisa hi swikarhatu swa vona swa wutomi. Kutshamela kupimisa hi swilo leswinene leswi Xikwembu ni vanhu van’wana vaku yendlelaka swona, switaku yendla u tshama na u tsakile. Loko swi koteka, yendla hi kuswi tsala. Ka papela la kona ungaha tsala swilo swimbirhi kumbe swinharhu leswingaku yendla u tsaka ka siku lolelo.

Lavanga djondza mhaka ya kukombisa moya wa kukhensa va vula swaku “kutshamela kukhensa van’wana swingaha cinca leswi mimpimiso ya hina yi tirhisaka xiswona ivi swihi yendla hi titwa kahle awuton’wini.” Munhu lweyi a khensaka a tshama na a tsakile. Hi mhaka leyo, pimisa hi swilo hinkwaswu swa swinene leswi unga na swona, tsaka hi swona u tlhela u khensa minkama hinkwayu. Handle ka leswo u fanele u lwela ku khensa “Yehovha, hikusa i munene”. Ina, kombisa kukhensa ka swilo ‘hinkwaswo’. — 1 Tikro. 16:34; 1 Tes. 5:18.