NHLOKOMHAKA YA DJONDZO 4
Moya Wokwetsima wu Nyikela Wumboni
‘Moya, lowu wuyima ni mimoya ya hina kutiyisa leswaku hi vana va Xikwembu.’ — RHOM. 8:16.
LISIMU 59 Dzunisa Yah!
LESWI HINGATASWI DJONDZA *
Hi Pentekoxta, Yehovha a tchulule moya wa yena wokwetsima ka 120 wa Vakreste hi ndlela yohlamalisa (Vona maparagrafu 1 na 2)
1-2. Kuhumelele yini hi siku la Pentekoxta hi lembe la 33 E.C.?
KUVE hi domingo ni mixo hi siku la pentekoxta ya lembe la 33 E.C. Vadjondzisiwa va kolomuya ka 120 ava tlhanganile ka kwartu la le henhla la yindlo yokarhi aYerusalema. (Mint. 1:13-15; 2:1) Masiku nyana ndzhaku Yesu aava byele leswaku va tshama aYerusalema hikusa avata kuma nyiko yohlawuleka. (Mint. 1:4, 5) Se swi gamise kuyini?
2 “Kutani . . . kutwakala mpfumawulu lowuhumaka tilweni, wufana ni kuhunga ka xidzedze”. Mpfumawulu lowu awu twala ndzeni ka yindlo. Kutani va vona tirimi letifanaka ni “malangavi ya ndzilo” ahenhla ka tinhloko ta vadjondzisiwa naswona hinkwavu “vatala hi Moya Wokwetsima”. (Mint. 2:2-4) Hi ndlela yohlamalisa Yehovha a chulule moya wa yena wokwetsima ka ntlawa lowu. (Mint. 1:8) Hi vona va kusungula kutotiwa hi moya wokwetsima * ni kukuma ntshembo wa kuya fuma na Yesu amatilweni.
KUYENDLEKA YINI LOKO MUNHU A TOTIWA?
3. Hi mhaka muni lava avali kona ka Pentekoxta avanga kanakani swaku va totiwe hi moya wokwetsima?
3 Loko awuli kona ka ntlhanganu lowu vadjondzisiwa va veke na wona aYerusalema, awungataswi kholwa leswinga humelela. Phela nchumu xa kufana ni lirimi la ndzilu axitava xi xikile ka nhloko ya wena, ivi u sungula kuvulavula tirimi to hambanahambana! (Mint. 2:5-12) Awungata kanakana swaku u totiwile hi moya wokwetsima. Kambe se leswo swi vula swaku hinkwavu lava totiweke hi moya wokwetsima, va totiwe hi ndlela yohlamalisa naswona hi nkama wun’we? Ahiswona. Hi mhaka muni hi vula leswo?
4. Kungava leswaku hinkwavu lavanga totiwa hi nkama wa vapostola va totiwe hi nkama wun’we? Tlhamusela.
4 Ahi voneni swaku munhu anga totiwa loko swite yini. Ntlawa lowu wa Vakreste va 120 ahi wona woxe wunga totiwa hi pentekoxta ya lembe la 33 E.C. Hi nkama wun’wana hi siku lolelo, van’wana va 3.000 na vona va totiwile. Vona va totiwe nkama vanga tsakamisiwa. (Mint. 2:37, 38, 41) Kambe ka malembe lamanga landzela, ahi Vakreste hinkwavu vanga totiwa hi nkama vanga tsakamisiwa. Vasamariya va totiwe na se kuhundze nkama nyana na va tsakamisiwile. (Mint. 8:14-17) Kambe kutotiwa ka Korneliyo ni vale kaya ka yena akunga tolovelekanga. Vona va totiwe na vangase tsakamisiwa. — Mint. 10:44-48.
5. Hi kuya hi 2 Vakorinto 1:21, 22, kuyendleka yini loko munhu a totiwa hi moya wokwetsima?
5 Ahi voneni swaku kuyendleka yini loko munhu a totiwa hi moya wokwetsima. Van’wana lava totiweke kusunguleni swiva karhatelile kupfumela swaku Yehovha ava langile. Vona vangaha tivutisa leswi: ‘Hi mhaka muni Xikwembu xi lange mina?’ Kasi van’wana ava titwisi xileswo. Kambe aswina mhaka leswaku munhu a titwisa kuyini. Mupostola Pawulo a hlamusele leswi yendlekaka loko munhu a totiwa. Yena a te: “Mipfumelile ka Kriste, kutani Xikwembu ximifungile * hi Moya Lowokwetsima lowu axitshembisile kuminyika wona. Moya lowu, i xitshembiso xa ndzhaka ya hina leyi hingatayikuma”. (Efe. 1:13, 14) Yehovha a tirhisa moya wa yena wokwetsima akuva apfuna Vakreste volavo kuva vaswi twisisa hi kuhelela swaku ava langile hikakunene. Xileswo, moya wokwetsima i “xitiyiso” lexiva tiyisekisaka swaku vani ntshembo wa kuhanya amatilweni, kunga li laha misaveni. — Lerha 2 Vakorinto 1:21, 22.
6. I yini leswi Mukreste lweyi a totiweke a faneleke aswi yendla leswaku a kuma hakelo ya yena ya kuya matilweni?
6 Loko Mukreste a totiwile, swi vula swaku swi tiyile swaku ata ya matilweni? Inhim, aswi vuli swona. Yena wa tiyiseka swaku a langiwile kuya matilweni. Kambe a fanele a khumbuka marito lawa: ‘Hikolaho, vamakwerhu, hisekelani ngopfungopfu kutiyisa kuvitaniwa ni kuhlawuliwa ka n’wina, hikuva loko miyendla swoswo amingaphariyetiwi miwa ni siku ni lin’we.’ (2 Pet. 1:10) Hambi loko Mukreste se a langiwile kumbe a vitaniwile leswaku aya matilweni, ato kuma hakelo ya yena ntsena loko a tshama a tshembekile. — Filp. 3:12-14; Hev. 3:1; Nhla. 2:10.
MUNHU ASWI TIVISA KUYINI SWAKU A TOTIWILE?
7. Vatotiwa vaswi tivisa kuyini swaku vona va langiwile kuya hanya amatilweni?
7 Kasi munhu aswi tivisa kuyini swaku a langiwile kuya hanya matilweni? A nhlamulu hingayi kuma ka marito lawa Pawulo ama byeleke Varhoma “lavavitaniweke kuva vahlawuliwa”. A te: ‘Hikuva Moya lowu minganyikiwa wona, awumiyendli swikarawa ni kutlhela wumivangela kuchava, kambe miyamukele moya lowu wumiyendlaka vana; lowu hihuwelelaka ha wona hiku: “Aba, Tatana!” Moya, lowu wuyima ni mimoya ya hina kutiyisa leswaku hi vana va Xikwembu.’ (Rhom. 1:7; 8:15, 16) Hi kutirhisa moya wa xona wokwetsima, Xikwembu xiswi yendla swi basa ka vatotiwa swaku vona va langiwile kuya hanya amatilweni. — 1 Tes. 2:12.
8. 1 Yohane 2:20, 27, yiswi kombisa kuyini swaku Vakreste lava totiweke aswi lavi va byeliwa hi van’wana swaku va totiwile?
8 Lava Yehovha ava langeke leswaku va ya matilweni ava yendla vanga kanakani ni katsongo leswaku va ya matilweni. (Lerha 1 Yohane 2:20, 27.) Kuvula ntiyiso, Vakreste lava totiweke va fanele va djondzisiwa hi Yehovha abandleni kufana ni van’wana. Kambe aswi lavi va byeliwa hi munhu leswaku va totiwile, hikusa Yehovha a tirhise matimba ya yena lamakulu kunga moya wa yena wokwetsima kuva aswi yendla swi basa ka vona leswaku va totiwile.
VA ‘PSALIWE KA WUMBIRHI’
9. Hi kuya hi Vaefesa 1:18, i kucinca kwihi kuvaka kona loko munhu a totiwa?
9 Kutala ka malandza ya Xikwembu namuntlha swama karhatela kutwisisa leswi yendlekaka loko munhu a totiwa. Hi mhaka muni? Hi mhaka ava totiwanga. Xikwembu xihi yendlele kuhanya laha misaveni, kunga li matilweni. (Gen. 1:28; Pis. 37:29) Kambe Yehovha a lange van’wana leswaku va ya hanya matilweni. Kutani loko ava tota, hi nkama wolowo a cinca ntshembo wa vona ni mapimiselo ya vona hi kuhelela ivi va sungula kunavela kuya hanya amatilweni. — Lerha Vaefesa 1:18.
10. Swi vula yini ‘kupsaliwa ka wumbirhi’? (Vona ntlhamuselo yale hansi.)
10 Loko Mukreste a totiwa hi moya wokwetsima yena ava a ‘psaliwa ka wumbirhi’. * Yesu a tlhele a kombisa leswaku aswi koteki kutlhamusela hi kuhelela ka munhu wokala anga totiwanga swaku va titwisa kuyini “lavapsaliwaka ka wumbirhi” kumbe “lavapsaliwaka hi Moya.” — Yoh. 3:3-8.
11. Tlhamusela kucinca loku vaka kona loko munhu a totiwa.
11 I kucinca kwihi ka mapimiselo loku Vakreste lava totiweke va vaka na kona? Na vangase totiwa, Vakreste lava avawu tsakela ntshembo wa vona wa kuhanya laha misaveni hi laha kunga heliki. Avawu langutela hi kunavela lokukulu nkama lowu Yehovha angata yendla misava yi va paradeyisi ni kuhelisa wubihi hinkwalu. Swinga yendleka ava pimisa hi leswi aswitava xiswona loko va yamukela maxaka ya vona ni vanghanu va vona loko va pfuxiwa kufeni. Kambe loko va totiwile mapimiselo ya vona ma cincile. Hi mhaka muni? Ava cincanga mapimiselo hi mhaka kukala vangahaswi tsakeli kuhanya hi laha kunga heliki laha misaveni kumbe kuswi vona swinga li swa nchumu. Naswona ava cincanga hi mhaka kukarhala hi kuhlupheka kumbe hi kukarhateka amiyanakanywini. Nakambe ahi swaku va yo vona ingi switava kolwa kuhanya hi laha kunga heliki laha misaveni. Kuhambana ni leswo, Yehovha a tirhise moya wa yena wokwetsima akuva a cinca mapimiselo ya vona ni ntshembo lowu ava li na wona.
12. Hi kuya hi 1 Petro 1:3, 4, Vakreste lava totiweke va titwisa kuyini hi ntshembo wa vona?
12 Munhu lweyi a totiweke angaha tivona anga faneleki kuva ni lunghelo lolelo la lisima. Kambe anga tshuki a kanakana swaku Yehovha amu langile. A tsaka ngopfu a tlhela a khensa loko a pimisa hi ntshembo wa yena wa kuhanya matilweni. — Lerha 1 Petro 1:3, 4.
13. Lava totiweke va titwisa kuyini hi wutomi la vona la laha misaveni?
13 Se leswo swi vula leswaku Vakreste lava totiweke vaswi navela kufa? Mupostola Pawulo a hlamule xivutiso lexi hi kufananisa mirhi wa munhu ni tenda loko a te: ‘Hikuva loko hahali ntsongeni lowu wa hina, hakonya hi kutikeliwa: Ahilavi kulahlekeliwa hi miri lowu wa khale, kambe hilava kuyambala lowumpsha, leswaku leswi swifaka, swimintiwa hi vutomi.’ (2 Kor. 5:4) Vakreste lava ava kolwanga hi kuhanya laha misaveni la ka kuza va lava kufa hi kuhantlisa. Kuhambana ni leswo, vali tsakela wutomi naswona va lava kuli tirhisa siku ni siku kuva va tirhela Yehovha xikan’we ni vanghanu ni maxaka ya vona. Ka xin’wana ni xin’wana lexi vaxi yendlaka, vona va pimisa hi ntshembo wa kuvangama lowu vanga na wona ka nkama lowu taka. — 1 Kor. 15:53; 2 Pet. 1:4; 1 Yoh. 3:2, 3; Nhla. 20:6.
KUNGAVA LESWAKU U MUTOTIWA?
14. Hi swihi swilo leswi kalaka swinga kombisi leswaku munhu a totiwile hi moya wokwetsima?
14 Hi nkama wun’wana swinga yendleka u tivutisa swaku u mutotiwa kumbe awu yena. Loko ku li leswo, pimisa hi swivutiso leswi swa lisima: Uni kunavela lokukulu ka kuyendla kurhandza ka Yehovha? U tivona na u hiseka ngopfu ka ntirho wa kuchumayela? Waswi rhandza kudjondza Bibele ni kuyanakanyisisa hi ‘swihundla leswiyenteke swa Xikwembu?’ (1 Kor. 2:10) U vona swaku Yehovha aku katekisile hi ndlela yohlamalisa ka ntirho wochumayela? Waswi twisisa swaku uni wutihlamuleli lali kulu la kupfuna van’wana kudjondza hi Yehovha? Wa tiyiseka swaku Yehovha aku pfunile ka swilo swotala ka wutomi la wena? Loko nhlamulo ya wena ka swivutiso leswi hinkwaswu kuli ina, swi vula swaku u mutotiwa? Inhim, aswi vuli swona. Hi mhaka muni? Hikusa malandza ya Xikwembu hinkwawu manga titwisa xileswo hambi loko manga totiwanga. Naswona Yehovha anga tirhisa moya wa yena wokwetsima akuva a nyika ntamu mun’wana ni mun’wana wa malandza ya yena akuva a yendla swilo leswi, hambi loko ntshembo wa yena wuli wa kuya matilweni kumbe kuhanya laha misaveni. Kuvula ntiyiso, loko ku li swaku wa tivutisa leswaku u totiwile kumbe awu totiwanga, kukanakana koloko kukombisa leswaku awu totiwanga. Lava langiweke hi Yehovha ava kanakani swaku va totiwile kumbe ava totiwanga! Vona va tiyiseka!
Yehovha a tirhise moya wa yena wokwetsima leswaku a nyika Abrahamu, Sara, Davhida na Yohane Mutsakamisi, ntamu wa kuyendla swilo swa kuhlamalisa, kambe angawu tirhisanga kuva langa leswaku va ya hanya amatilweni (Vona maparagrafu 15 na 16) *
15. Hiswi tivisa kuyini swaku ahi hinkwavu vanga yamukela moya wokwetsima vanga langiwa kuya fuma matilweni?
15 A Bibeleni kuni swikombiso swotala swa vavanuna ni vavasati va lipfumelo lava yamukeleke moya wokwetsima, kambe avanga nyikiwanga ntshembo wa kuhanya matilweni. Davhida ave mun’we wa vona. (1 Sam. 16:13) Moya wokwetsima wumu pfunile kutwisisa swilo leswi yenteke swa Yehovha wutlhela wumu pfuna kutsala swiyenge swokarhi swa Bibele. (Marka 12:36) Hambi leswo, mupostola Petro a vule leswaku Davhida “angatlhantukelanga tilweni”. (Mint. 2:34) Yohane Mutsakamisi a “atatala moya lowokwetsima”. (Luk. 1:13-16) Yesu a vule leswaku akungana munhu lwenkulu kutlula Yohane. Kambe anga vulanga leswaku Yohane a ali mun’we wa lava avataya fuma ka Mfumu wa matilo. (Mat. 11:10, 11) Yehovha a tirhise moya wa yena wokwetsima leswaku a nyika vanhu lava ntamu wa kuyendla swilo swa kuhlamalisa, kambe angawu tirhisanga kuva langa leswaku va ya hanya amatilweni. Se leswo swi vula leswaku ava ni lipfumelo la litsongo kutlula lavanga langiwa kuya fuma amatilweni? Ahi swona. Hikusa aata va pfuxa leswaku va hanya aparadeyisini hi laha kunga heliki kola misaveni. — Yoh. 5:28, 29; Mint. 24:15.
16. Malandza yotala ya Xikwembu ma nyimele hakelo yihi namuntlha?
16 Malandza yotala ya Xikwembu namuntlha laha misaveni ama na ntshembo wakuya hanya amatilweni. Kufana na Abrahamu, Sara, Davhida na Yohane Mutsakamisi ni man’wana yotala yale minkameni ya Bibele, ma ni ntshembo wa kuhanya laha misaveni loko Mfumu wa Xikwembu wuta fuma misava hinkwayu. Hev. 11:10.
17. Hi swihi swivutiso leswi hingataswi hlamula ka djondzo leyi landzelaka?
17 Leswi namuntlha wa siku kunga ni vatotiwa xikarhi ka hina, hingahava ni swivutiso swokarhi. (Nhla. 12:17) Hi xikombiso, loko munhu wokarhi a vula swaku yena i mutotiwa, a fanele a tivonisa kuyini? Loko munhu wokarhi abandleni la wena a dla pawu ni kunwa vhinyu hi siku la Xitsundzuxo, u fanele umu khomisa kuyini? Naswona hita kuyini hi leswi nhlayu ya lava tivulaka vatotiwa yi yaka yi kula? Hi fanele hi vilela hi mhaka leswo? Hita hlamula swivutiso leswi ka djondzo leyi landzelaka.
^ par. 5 Kusukela ka Pentekoxta ya 33 E.C., kuta fikela swoswi, Yehovha a nyike Vakreste van’wana ntshembo wa kuhlamalisa wa kuya fuma ni N’wana wa yena amatilweni. Kutani Vakreste volavo vaswi tivisa kuyini swaku va langiwile? Kuyendleka yini hi munhu lweyi anga langiwa leswaku aya matilweni? Djondzo leyi yita hlamula swivutiso leswi. Yi susiwe ka nhlokomhaka yin’wana ya Murindzi wa Janeiro wa 2016.
^ par. 2 MARITO LAMA HLAMUSELIWEKE: Kutotiwa hi moya wokwetsima: Yehovha a tirhisa moya wokwetsima kuva a langa lavangata fuma na Yesu amatilweni. A tirhisa moya wa yena, kuva ava nyika ntshembo wa nkama lowu taka kumbe “xitshembiso xa ndzhaka.” (Efe. 1:13, 14) Vakreste lava vanga vula swaku moya wokwetsima ‘wuyima ni mimoya ya vona’, kumbe wuswi yendla swi basa swaku va tava ni hakelo yale tilweni. — Rhom. 8:16.
^ par. 5 RITO LELI HLAMUSELIWEKE: Kufungiwa. Kufungiwa loku, kutshama hi laha kunga heliki loko munhu a fa na a tshembekile kumbe loko kusale nkama wutsongo leswaku kusungula nhlomulu lowukulu. — Efe. 4:30; Nhla. 7:2-4; vona “Swivutiso Swa Vahlayi” ka Xihondzo Xo Rindza xa 1 ka Janeiro wa 2007 mapajina 30 na 31.
^ par. 10 Leswaku u kuma ntlhamuselo leyi yengetelekele ya leswaku swi vula yini ‘kupsaliwa ka wumbirhi’, vona Xihondzo Xo Rindza xa 1 ka Abril wa 2009, mapajina 3 kuya ka 6, mapajina 7 kuya ka 11, mapajina 12 kuya ka 13.
LISIMU 20 U Rhumele N’wana Waku Lweyi A Rhandzekaka
^ par. 57 NHLAMUSELO WA XIFANISO: Hambiloko hi pfaleliwile djele hi mhaka ya lipfumelo la hina, kumbe hi chumayela ni kudjondzisa ntiyiso nahi chunsekile, hiwu rindzile nkama lowu hingata hanya laha misaveni hansi ka Mfumu wa Xikwembu.
