“A siku leli prima wa mina angani holovisa nimu tlimbe nkolo, ani lava kumu dlaya.” — Paulo.

“Loko ni li kaya ni hantla ni kwata. Hambi hi minchumu ya kukala yinga li ya nchumu yani nyenyetsa. Loko ni kwatile, hinkwaswu leswi niswi kumaka no dlaya hambi hi swibya kumbe mabrinkedu.” — Marcos.

Swinga yendleka hingali na xikwatisani kufana na Marcos na Paulo kambe minkama yin’wana hinkwerhu ha tsandzeka kutikhoma. Leswo swi vangiwa hi xidjoho lexi hingaxi kuma ka Adamu. (Rhom. 5:12) Vanhu va kufana na Paulo na Marcos avaswi koti kutikhoma. Van’wana swava karhatela kulawula mimpimiso ya vona. Hi xikombiso va tshamela kupimisela swilo swa kuchavisa leswiva hetaka ntamu. Van’wana swava karhatela kutikhoma ka swilo swa kufambisana ni masangu, byala ni kudzaha.

Lava kalaka vangaswi koti kutikhoma ka leswi vaswi pimisaka, ka leswi vaswi yendlaka ni leswi vaswi navelaka va wonha wutomi la vona. Hingaswi kotisa kuyini kukala hinga wonhi wutomi la hina? Hi fanele hi lwela kutikhoma. Ahi voneni 3 wa swivutiso leswingatahi pfuna kutwisisa mhaka leyi: (1) I yini kutikhoma? (2) Hi mhaka muni swili swa lisima kutikhoma? (3) Hingaswi kotisa kuyini kuva ni wumunhu leli la Wukreste? (Gal. 5:22, 23) Hita gama hi vona leswi hingaswi yendlaka loko minkama yin’wana hingaswi koti kutikhoma.

Munhu lweyi a tikhomaka anga yendli hinkwaswu leswi aswi pimisaka. Kuhambana ni leswo, wa tikhoma kuva anga vuli swilo leswingata kwatisa Yehovha.

Yesu ahi kombile swaku i yini kutikhoma. Bibele li li: ‘Loko arhuketeliwa anga tlheliselanga hi kurhuketela, loko vamu xanisa anga hlayanga swaku ata tirihisela kambe aswi tshikele mavokweni ya lweyi a yavanyisaka hi kululama.’ (1 Pet. 2:23) Yesu a tikhomile a nkama valala va yena vangamu hamba xihlekiso va gama vamu gongondzela amhandzini. (Mat. 27:39-44) Naswona a tlhele a tikhoma a nkama vafundhisi vanga zama kumu phasa hi kumu vutisa swivutiso swaswinyingi. (Mat. 22:15-22) Ahi vekele xikombiso xaxinene xa kutikhoma a nkama Vayuda ava lava kumu ba hi maribye; anga zanga a holovisana na vona, ayo “tumbela kutani a huma tempeleni.” — Yoh. 8:57-59.

Na hina hingaswi kota kutekelela xikombiso xa Yesu. Mupostolo Petro a te: ‘Mi vitaneliwe swona hikusa Kriste na yena, a twile kuvaviseka hikolaho ka n’wina amu boxela ndlela leswaku mitamu landzela.’ (1 Pet. 2:21) Hambileswi hi kalaka hinga hetisekanga, hingaswi kota kuxi tekelela kahle xikombiso xa Yesu xa kutikhoma. Hi mhaka muni swi li swa lisima leswo?

Hi fanele hi tikhoma kuva hi tsakisa Yehovha. Hambi yova ni malembe yamanyingi na hi tirhela Yehovha hi kutshembeka, loko hingaswi koti kutikhoma ka mavulavulelo ya hina ni swiyendlo swa hina, hingaha luzekeliwa hi wuxaka la hina na yena.

Pimisa hi Moxe, munhu lweyi “aarhulile ngopfu kutlula vanhu hinkwavo amisaveni.” (Tinhl. 12:3) Moxe a hete malembe na a lehisa mbilu nkama Vayisrayele ava ngurangura. Kambe siku lin’wana angaswi kotanga kutikhoma, a kwate hintamu a nkama vanga sungula kukhala hi mhaka ya kupfumala mati. Ava bongelile a ku: “Twanani, swoswi, n’wina vaxandzuki! Xana milava leswaku himihumesela mati ka ribye leli?” — Tinhl. 20:2-11.

Hi siku lelo Moxe angaswi kotanga kutikhoma. Angamu dzunisanga Yehovha hi leswi angava nyika mati hi singita. (Pis. 106:32, 33) Hi mhaka leyo, Yehovha angamu pfumelelanga kuva a nghena atikweni la xitshembiso. (Tinhl. 20:12) Swi tikomba ingaku Moxe a tisole wutomi la yena hinkwalu hileswi a kalaka angaswi kotanga kutikhoma. — Det. 3:23-27.

Hi djondza yini ka mhaka leyi? Hambiloko kuli khale hi li ka ntiyiso ahi fanelenga hi hlundzukela lava vahi kwatisaka kumbe lava va lavaka kulayiwa. (Efe. 4:32; Kol. 3:12) I ntiyiso swaku loko hiya hi guga swiya swihi karhatela kulehisa mbilu kambe hinga khohlwi leswinga humelela Moxe. Ahi fanelanga hi nchimisa vito la hina hi mhaka ya kukala hingaswi koti kutikhoma. Se hinga yendla swaku hi kota kutikhoma?

Khongela u kombela moya wa kukwetsima. Hi mhaka muni? Hi mhaka kutikhoma i handzu wa moya wa kukwetsima naswona Yehovha a nyika moya wa kukwetsima lavamu kombelaka. (Luk. 11:13) Hi kutirhisa moya wa kukwetsima Yehovha atahi yendla hiswi kota kutikhoma. (Filp. 4:13) Ata tlhela ahi npfuna swaku hiva ni lirhandzu; loko hi rhandza vanhu hitaswi kota kutikhoma. — 1 Kor. 13:5.

Tshika leswingaku yendlaka u tsandzeka kutikhoma. Hi xikombiso unga sixtiri swilo leswinga ka interneti kumbe kun’wana leswi kombisaka mahanyelo ya kubiha. (Efe. 5:3, 4) Kuvula ntiyiso hi fanele hi tshika hinkwaswu leswingahi yendlaka hi navela kuyendla swilo swaku biha. (Swi. 22:3; 1 Kor. 6:12) Hi xikombiso, munhu lweyi a kalaka angaswi koti kutikhoma ka swilo swa masangu angahaswi vona swi yampsa kukala  anga lerhi mabuku kumbe kusixtira mafilmi lawa ma vulavulaka hi swa lirhandzu.

Minkama yin’wana swingahahi karhatela kuyendla leswo. Kambe loko hi yendla hinkwaswu leswi hingaswi kotaka, Yehovha atahi nyika ntamu lowu hiwu lavaka kuva hi kota kutikhoma. (2 Pet. 1:5-8) Atahi pfuna kutikhoma ka leswi hiswi pimisaka, hiswi vulaka ni leswi hiswi yendlaka. Xin’wana lexihi kholwisaka hi leswi Marcos na Paulo lava hinga vulavula hi vona akusunguleni vaswi kotile kudjondza kutikhoma. Hi xikombiso makwerhu mun’wana loko a fambisa movha a atolovela kukwatela vamotorixta van’wana a tlhela ava holovisa. Awu hlulise kuyini mukhuva lowo? A li: “Ni khongele hintamu ka Yehovha siku ni siku naswona ni djondze tinhlokomhaka leti ati vulavula hi kutikhoma ni tlhela ni vekisa tindzimana ta Bibele ka nhloko leti atitani pfuna ka mhaka leyi. Hambileswi ninga ni malembe na ni lwa, mixo wun’wana ni wun’wana ni tibyela swaku ni fanele ni tikhoma naswona swoswi ni hantla ni suka kaya kuva ninga voni ingaku van’wana voni hlwelisa.”

Minkama yin’wana swahi karhatela kutikhoma. Loko leswo swiyendleka hingaha dana hambi kukhongela ka Yehovha. Kambe hi kona swi lavekaka hintamu kuva hi khongela hi kombela Yehovha ahi pfuna. Hi mhaka leyo, tekela kukhongela ka Yehovha kombela kurivaleliwa, u kombela swaku aku pfuna u tlhela u tinyimisela kukala ungaha phindi xihoxo xolexo. (Pis. 51:9-11) Unga pimisi swaku Yehovha angataswi twa swikhongelo swa wena. (Pis. 102:17) Mupostolo Yohane ahi khumbukisa swaku ngati ya N’wana wa Xikwembu ‘ya hi basisa ka swidjoho hinkwaswu.’ (1 Yoh. 1:7; 2:1; Pis. 86:5) Khumbuka swaku Yehovha a byela vanhu va yena swaku va rivalelana nkama ni nkama. Hi mhaka leyo hinga tiyiseka swaku na hina atahi rivalela. — Mat. 18:21, 22; Kol. 3:13.

Yehovha anga tsakanga a nkama Moxe a kalaka angaswi kotanga kutikhoma amananga. Hambileswo, amu rivalelile funtsi Bibele loko li vulavula hi Moxe li li i wanuna wa kutshembeka lweyi hi faneleke himu tekelela. (Det. 34:10; Hev. 11:24-28) Yehovha angamu pfumelelanga Moxe swaku a nghena ka tiko la xitshembiso, kambe atamu pfuxa swaku a hanya wutomi la kukala linga heli aparadesini. Na hina hinga hanya wutomi la kukala linga heli loko hi yendla hinkwaswu leswi hingaswi kotaka swaku hi tikhoma. — 1 Kor. 9:25.