HINKWERHU ha kholwa swaku Yehovha hi yena a kongomisaka vanhu va yena, a tlhela ava nyika hinkwaswu leswi vaswi lavaka akuva va tama va va vanghanu va yena a “masikwini ya makumu”. (2 Tim. 3:1) Kambe, swi lava hi yingisa. Hinga fanisa xiyimu xa hina ni lexi Vayisrayele ava li ka xona amananga. Aku ni leswi ava fanele vaswi yendla loko kuchaya mhalamhala.

Yehovha a byele Moxe swaku a hamba timhalamhala timbirhi hi prata. Atita tirhiseliwa leswaku ‘kuhlengeletiwa xitshungu ni kuhahlula matende.’ (Tinhl. 10:2) Vaprista ava fanele va cincacinca machayelo ya timhalamhala hikuya hi leswi va lavaka kuswi byela xitshungu. (Tinhl. 10:3-8) Ni swoswi, vanhu va Xikwembu va kuma nkongomiso hi tindlela ta ku hambanahambana. Ka nhlokomhaka leyi hita vona tindlela tinharhu leti hi kumaka nkongomiso hi tona, hi gama hiti fananisa ni leswi timhalamhala ati tirhisiwa xiswona nkameni wa Vaisrayele. Ya kusungula, hi loko hi rhambiwa leswaku hi ya ka mintlhanganu yayikulu. Ya wumbirhi, hi loko madoda ma rhambiwa leswaku maya djondzisiwa. Ya wunharhu, hi loko hi kuma nkongomiso wa nyuwana.

Loko Yehovha alava swaku “xitshungu hinkwaxu” xi tlhangana ka nyanghwa wa le wuxeni wa tabernakele, vaprista ava chaya timhalamhala timbirhi. (Tinhl. 10:3) Tinxaka hinkwatu leti ati tshama matlhelweni ya tabernakele atiyi twa mhalamhala leyo. Leti ati tshama kusuhi hintamu ni lani aku tlhanganeliwa kona ati hantla ti fika. Kambe leti ati tshama kule aswiti karhatela hikusa ati heta nkama wa wunyingi na ti zama kufika. Hinkwavu lava ava tshama kule ni lava ava tshama kusuhi avaswi lava kutlhangana akuva vata kuma nkongomiso.

Swoswi vanhu va Xikwembu avaha tlhangani ka tabernakele. Kambe va rhambiwa leswaku va ya ka mintlhanganu yayikulu. Mintlhanganu yoleyo i makongresu ni mintlhanganu yin’wana ya kuhlawuleka, lani hi nyikiwaka nkongomiso wa lisima hintamu. Amisaveni hinkwayu, vanhu va Yehovha va djondzisiwa swilo leswi fanaka. Hi mhaka leyo, hinkwavu lava yaka ka mintlhanganu leyo va lumba ndjangu wun’we. Van’wana va tshama kule kutlula van’wana. Kambe hinkwavu lava vaka kona ava tisoli.

Hinga kuyini hi mintlawa yayitsongo leyi tshamaka kule ni lomu mintlhanganu yayikulu yi yendleliwaka kona? Leswi kunga ni teknolojiya, na vona vangaswi kota kuyi vona mintlhanganu leyi. Hi xikombiso, ankama vanga yendzeliwa hi munyimeli wa ntsindza nkulu aBenin, va yendle malulamiselo ya kuva nongonoko wu sixtiriwa a Arlit, kunga doropa leli kumekaka a Deserto de Sahara. Aku ni 21 wa vanhu. Hambi leswi ava li kule hintamu kambe va titwe na va li xikan’we ni lava 44.131 wa vamakwerhu lava ava li ka ntlhanganu lowu. Makwerhu mun’wana a te: “Ni khensa hi mbilu hinkwayu vamakwerhu hileswi mingahi pfuna kuvona  ntlhanganu lowu. Swi kombisa swaku hi kakunene mahi rhandza hi mbilu hinkwayu.”

Loko vaprista va chaya mhalamhala yin’we, leswo aswi kombisa swaku i tixefe ntsena leti ati fanele tiya ka tende la ntlhanganu. (Tinhl. 10:4) Ka ntlhanganu lowo ava yela kuya djondzisiwa hi Moxe kuva vata kota kuyi yendla kahle mintirho ya vona. Loko na wena awo va mun’we wa tixefe, awungataswi tsakela kuva kona ka ntlhanganu lowo, akuva na wena uta pfuneka?

Swoswi madoda ya bandla ahi “swihosana” naswona ama fumi ntlhambi wa Xikwembu lowu mawu hlayisaka. (1 Pet. 5:1-3) Kambe ma yendla hinkwaswu leswi mangaswi kotaka akuva ma risa ntlhambi. Hi mhaka leyo, madoda ma pfumela loko ma rhambiwa akuva ma ya ka xikola lexi xinga yendleliwa wona, kunga xikola xa madoda. Ka xikola lexi, ma djondzisiwa kuva vatirhi va kahle, ni kutiva leswi vangaswi yendlaka loko kuni timhaka abandleni. Leswo swi yendla swaku wona ni bandla hinkwalu va va ni wunghanu lalinene na Yehovha. Hambi loko ungase tshama u ya ka xikola lexi kambe na wena xaku pfuna, hikusa lavanga ya, leswi vangaswi djondza vaswi tirhisa kupfuna bandla hinkwalu.

Minkama yin’wana, vaprista ava chaya mhalamhala leyi a som lakona ali twala ingi lo rhurhumela. Leswo aswi kombisa swaku Yehovha a alava swaku hinkwavu va rhurha. (Tinhl. 10:5, 6) Hambi leswi kurhurha aswi ni ntirho wa wukulu, leswi ava rhurhisa xiswona aswiti komba swaku vanhu va Xikwembu va hlelekile. Kambe minkama yin’wana vanhu avangaswi tsakeli kurhurha. Hi mhaka muni?

Swinga yendleka van’wana ava kwatisiwa hi swaku ava tshamela kurhurha naswona ava rhurha swa kola ni kola. “Minkama yin’wana rhefu ali tshama kusukela nimadlambu liza lixa” kasi minkama yin’wana, ali “tshama masiku mambirhi kumbe wheti kumbe masiku yamanyingi.” (Tinhl. 9:21, 22) Kasi xitshungu xi rhurhe kangaki? Buku la Tinhlayo ndzima 33, li vulavula hi 40 wa tindhawu leyi Vayisrayele vanga tshama ka tona.

Minkama yin’wana Vayisrayele ava kuma ndhawu leyinga ni ndzhuti wa kahle. Leswi ava fambafamba amananga, kunga ndhawu leyi ‘chavisaka swinene’, ava tsaka loko va kuma ndhawu leyi kungani ndzhuti wa wunene. (Det. 1:19) Hi mhaka leyo, avangaswi tsakeli kurhurha hikusa ava pimisa swaku vata kuma ndhawu leyi kalaka yinga tsakisi.

Loko xitshungu xi sungula kurhurha, van’wana ava fanele va lehisa mbilu anze kufika khambi la vona. Hinkwavu avatwa mhalamhala hi nkama wun’we. Kambe aswinga koteki kuva va rhurha hi nkama wun’we. Loko mhalamhala yi chaya aswi kombisa swaku tinxaka leti ati tshama awuxeni ka tabernakele, ati fanele ti rhanga ti rhurha, kunga lixaka la Yuda, Izakara na Zebuloni. (Tinhl. 2:3-7; 10:5, 6) Loko se va rhurhile, vaprista ava tlhela va chaya mhalamhala ka wumbirhi akuva tinxaka leti ati tshama a sul ka tabernakele na tona ti rhurha. Ava tama va yendla leswo anze xitshungu hinkwaxu xi rhurha.

Swinga yendleka na wena swiku karhatela kuyamukela kucinca loku vaka kona ka nhlengeletanu. Kumbe unga tsaki hileswi swilo swi tshamelaka kucinca nkama ni nkama. Hi wun’wani nkama awuswi rhandza leswi swilo aswi yendlisiwa xiswona khale, nasswona awunga naveli swaku swi cinciwa. Loko u titwisa xileswo, swinga yendleka swiku karhatelile kutitwananisa ni kucinca lokunga va kona. Kambe loko hi yamukela kucinca koloko hitaswi vona swaku kahi pfuna naswona Yehovha wahi tsakela.

Ankameni wa Moxe, Yehovha a akongomisa vanhu vavanyingi swinene. Aku ni vavanuna, vavasati ni swivanana. Loko Yehovha a angava hlayisanga, a tlhela ava kongomisa, ina vanga ponanga. Namuntlha, Yehovha wahi kongomisa ka masiku lawa ya wugamu ya kuchavisa. Wahi pfuna swaku hiva vanghanu va yena hi tlhela hi tiyisa lipfumelo la hina. Hi mhaka leyo, hi lava kuyendla hinkwaswu leswi hingaswi kotaka akuva hi yingisa Yehovha kufana ni Vayisrayele lava ava yingisa mhalamhala hi kutshembeka.