1. I yini leswi Yehovha ahi pfumelelaka kuswi yendla?

YEHOVHA ahi pfumelela kulanga leswi hi lavaka kuhanyisa xiswona. Ahi djondzisa kuyendla swiboho swa swinene, naswona loko hi yendla swiboho leswimu tsakisaka, wahi pfuna leswaku swilo swihi fambela kahle. (Pis. 119:173) Loko hi tirhisa leswi hiswi djondzaka aBibeleni, hi yendla swiboho swa kahle. — Hev. 5:14.

2. Hi xihi xikarhato lexi hingaha kumanaka na xona loko hi yendla xiboho?

² Hambiloko hi yendle xiboho xa kahle, minkama yin’wana swingahahi tikela kuxi hetisisa. Ahi voneni swikombiso swokarhi: Makwerhu wokarhi waxinuna lweyi waha liki mumpsha a yendla xiboho xa kulerha Bibele hinkwayu, ivi a sungula kuyi lerha mavhiki nyana a gama a tshika. Makwerhu waxisati a yendla xiboho xa kuva mupfuli wa ndlela wa nkama hinkwawu kumbe phayona kambe a tshamela ku cincacinca siku leli anga boha kusungula hi lona. Ntlawa wa madoda wu yendla xiboho xa kuyendla mayendzo ya wurisi ka vamakwerhu abandleni kambe kuhundza tiwheti na vangaseswi yendla. Swiyimo leswi hinkwaswu swi hambanile kambe swi fana hi xilo xokarhi. Hinkwavu va yendle swiboho kambe avaswi hetisisanga. Aminkameni ya vapostola, Vakreste vale Korinto ava ni xikarhato lexi fanaka. Ahi voneni leswi hingaswi djondzaka ka vona.

3. Hi xihi xiboho lexi Vakorinto vangaxi yendla, kambe kuhumelele yini?

³ Hi lembe la 55 aminkameni ya vapostola, Vakreste vale Korinto va yendle xiboho xalisima. Va tive leswaku vamakwavu vale Yerusalema ni vale Yudeya ava hlupheka futshi ava li wusiwanini naswona mabandla man’wana ama hlenga male leswaku vatava pfuna. Leswi Vakorinto ava ni timpsalu va tlhela va hanana, va yendle xiboho xa kupfuna vamakwavu. Hi mhaka leyo va vutise mupostola Pawulo swaku avatava pfunisa kuyini. Ava byele leswi ava fanele vaswi yendla, a tlhela a rhumela Tito leswaku a ya pfuneta kuhlengeleta minyikelo. (1 Kor. 16:1; 2 Kor. 8:6) Loko se kuhundze  tiwheti nyana Pawulo a tsumbule swaku Vakorinto ava humesanga minyikelo leyi ava tshembise kuyi yendla. Vuyelo la kona, kuve leswaku aswi kotekanga kuva minyikelo ya vona yi famba hi nkama wun’we ni minyikelo ya mabandla man’wana. — 2 Kor. 9:4, 5.

4. Ka buku la 2 Vakorinto 8:7, 10, 11, Pawulo a pfune Vakorinto akuva va yendla yini?

⁴ Vakorinto va yendle xiboho xa kahle naswona Pawulo ava bumabumelile hileswi ava ni lipfumelo la kutiya ni leswi ava tiyimisele kupfuna van’wana. Kambe a kulaveka leswaku ava pfuna kuva va hetisisa xiboho xa vona. (Lerha 2 Vakorinto 8:7, 10, 11.) Leswinga humelela swihi djondzisa swaku hambi hi Vakreste lava tshembekaka, minkama yin’wana swingahava tikela kuhetisisa swiboho swa vona.

5. Hi swihi swivutiso leswingata hlamuliwa?

⁵ Kufana ni Vakorinto na hina swingahahi tikela kuhetisisa swiboho leswi hiswi yendlaka. Hi mhaka muni? Hikusa ahi hetisekanga, minkama yin’wana hingaha tibyela swaku leswi hingaswi boha hitaswi yendla hi nkama wun’wana. Kumbe minkama yin’wana kungaha humelela swilo swa kukala hingaswi nyimelanga, ivi hi gama hingaswi koti kuhetisisa swiboho swa hina. (Ekl. 9:11; Rhom. 7:18) Hinga yendla yini leswaku hi kambisisa xiboho lexi hinga tshama hixi yendla ni kuvona swaku swa fanela kuxi cinca kumbe aswi fanelanga? Naswona hinga tiyisekisisa kuyini swaku xiboho lexi hixi yendleke haxi hetisisa?

6. Hi mhaka muni minkama yin’wana swi lava hi cinca swiboho leswi hiswi yendleke?

⁶ Swiboho swin’wana swa lisima leswi hiswi yendleka ahingeswi cinci. Hi xikombiso hita tama hi namarhela xiboho xa hina xa kugandzela Yehovha naswona hita tama hi tshembeka ka lweyi hinga chada na yena. (Mat. 16:24; 19:6) Kambe swiboho swin’wana swingaha lava kucinciwa. Hi mhaka muni? Hikusa swiyimo swa cinca. Se i mpsini swingahi pfunaka kuyendla swiboho swa kahle?

7. Hi fanele hi khongela hi kombela yini naswona hi mhaka muni?

⁷ Khongela u kombela wutlharhi. Yehovha a byele Yakobo leswaku a tsala leswi: “Loko mun’we wa n’wina apfumala vutlhari, aakombele ka Xikwembu, lexinyikaka vanhu hinkwavu hi timpsalu”. (Yak. 1:5) Ka swilo swin’wana, hinkwerhu hingaha ‘pfumala vutlhari’. Hi mhaka leyo, kombela Yehovha aku pfuna loko u lava kuyendla swiboho kumbe kuswi cinca. Yehovha ataku pfuna leswaku uyendla swiboho hi wutlhari.

8. I mpsini leswi hi faneke hiswi kambisisa na hingase yendla swiboho?

⁸ Kambisisa kahle. Kambisisa Bibele ni mabuku ya nhlengeletanu naswona bula ni vanhu lava u tshembaka swaku vataku pfuna. (Swi. 20:18) I swa lisima kurhanga hi kukambisisa kahle na hingase yendla swiboho swa kufana ni kucinca ntirho, kurhurha, ni kulanga djondzo leyingatahi pfuna kukuma male ya kuva hi kota kutihlayisa na hi tama hi tirhela Yehovha.

9. Hi mhaka muni swili kahle kukambela lexihi susumetelaka loko hi lava kuyendla xiboho?

⁹ Kambela leswiku susumetelaka. Xalisima ngopfu ka Yehovha ahi leswi hiswi yendlaka kambe hi leswi swihi susumetelaka. (Swi. 16:2) A lava hi tshembeka ka swilo hinkwaswu. Hi mhaka leyo loko hi yendla swiboho hi fanele hi tshembeka naswona hi sungula hi kukambela leswihi susumetelaka. Loko hinga yendli leswo switahi karhatela kuhetisisa swiboho leswi hiswi yendleke. Hi xikombiso, makwerhu waxinuna lweyi waha liki mumpsha angaha teka xiboho xa kuva mupfuli wa ndlela wa nkama hinkwawu. Kambe hi kufamba ka nkama a tsandzeka kutlhanganisa mawora lama lavekaka ka ntirho lowu ivi a sungula kukala angahaswi tsakeli kuya ansin’wini. Swinga yendleka a atibyela swaku leximu yendlaka a nghenela ntirho lowu hileswi a rhandzaka  Yehovha. Kambe swingaha yendleka lexi aximu susumetela ngopfu aku li kulava kutsakisa vapsali va yena kumbe munhu mun’wana.

10. Kulaveka yini leswaku munhu a kota kucinca?

¹⁰ Pimisa hi munhu lweyi a djondzeliwaka Bibele lweyi a lavaka kutsika kudzaha, ivi a sungula hi kunyima nyana kuringana vhiki kumbe mavhiki mambirhi kambe swimu karhatela lakakuva a tlhela a sungulisa kudzaha. Kambe hi kufamba ka nkama aswi kota kutsika fole. Phela kurhandza Yehovha ni kulava kumu tsakisa hiswona swingamu pfuna kutsika kudzaha. — Kol. 1:10; 3:23.

11. Hi mhaka muni hi fanele hiswi tiva kahle leswi hi lavaka kuswi fikelela?

¹¹ Tiyiseka hileswi u lavaka kuswi yendla. Loko uswi tiva kahle leswi u lavaka kuswi fikelela switaku vevukela kuswi hetisisa. Hi xikombiso, swingaha yendleka u tiyendlele xiboho xa kulerha Bibele siku ni siku. Kambe loko unga tiyendleli xiyimiso swingahaku tikela kuxi hetisisa. * Madoda ya bandla mangaha yendla xiboho xa kuyendzela vamakwerhu nkama ni nkama leswaku vava pfuna ni kuva tiyisa, kambe hi kufamba ka nkama va hluleka kuhetisisa xiboho xa vona. Leswaku va kota kuswi hetisisa ava fanele va tivutisa leswi: “Kungava leswaku hima tsalile mavito ya vamakwerhu lava hi lavaka kuva yendzela? Kungava leswaku se hiwu vekisile nkama lowu hingatava yendzela hi wona?”

12. I mpsini leswi hingaha bohekaka kuswi yendla naswona hi mhaka muni?

¹² Yendla leswinga matimbeni ya wena. Hinkwerhu ahi na nkama, ntamu kumbe makotelo ya kuyendla hinkwaswu leswi hiswi lavaka. Hi mhaka leyo hi fanele hi yendla leswinga matimbeni ya hina hi tlhela hi ringanisela. Nakambe loko swilaveka hingaha cinca xiboho xa hina lexi hi vonaka swaku ahingehe swikoti kuxi hetisisa. (Ekl. 3:6) Ahinge se u kambisise xiboho lexi ungaxi yendla, u tlhela u lunghisa lomu swi lavekaka kona naswona u tiyimiselile kuxi hetisisa. Swoswi vona 5 wa swilo leswingaku pfunaka kuhetisisa xiboho xa wena.

13. Ungawu kumisa kuyini ntamu wa kuhetisisa swiboho swa wena?

¹³ Khongela u kombela matimba ya kuswi hetisisa. Xikwembu xitaku nyika “matimba ya kuyendla” ni kuhetisisa swiboho swa wena. (Filp. 2:13, NM) Kombela Yehovha aku nyika ntamu hi kutirhisa moya wa yena wokwetsima. Tama u khongela hambiloko u vona ingi swikhongelo swa wena aswi hlamuliwi. Yesu a te: “Kombelani [moya wokwetsima], mitanyikiwa”. — Luka 11:9, 13.

14. Tshinya la nawu lelinga ka Swivuriso 21:5, lingaku pfunisa kuyini kuhetisisa swiboho swa wena?

¹⁴ Yendla mpulani. (Lerha Swivuriso 21:5.) Leswaku u hetisisa ntirho wun’wana ni wun’wana lowu uwu sunguleke u fanele u yendla mpulani u tlhela u landzela leswi uswi pulaneke. Hi kufanana, loko u yendla xiboho xokarhi u fanele u tsala swilo leswi ungataswi yendla kuva uxi hetisisa. Loko ntirho lowu u lavaka kuwu yendla wu karhata, u fanele uwu yava hi swiyenge ivi uwu yendla hi kutsongokutsongo. Nkama lowu u hetaka xiyenge ha xin’we utaswi vona swaku se u yendle ntirho wotala. Pawulo a byele Vakorinto leswaku va veka swokarhi hi tlhelo “hi siku rosungula ra vhiki” leswaku vata nyikela hi swona, kungali kuva va sungula kuhlenga loko se a fikile. (1 Kor. 16:2) Loko hi yava ntirho hi swiyenge swaswitsongo, swingahi pfuna kuvona leswaku hingaswi kota kuwu hetisisa.

15. Loko se u yendle mpulani u fanele u yendla yini?

¹⁵ Kutsala leswi ungaswi pulana, swinga yendla leswaku swiku vevukela kuswi hetisisa.  (1 Kor. 14:40) Hi xikombiso ntlawa wa madoda wuni nkongomiso wa kulanga doda lin’we leswaku li tsala leswi vaswi bohaka ni kutlhela li tsala lavangataswi hetisisa ni leswaku vafanele vaswi hetisisa siku muni. Loko madoda malandza nkongomiso lowu, switama vevukela kuhetisisa leswi maswi boheke. (1 Kor. 9:26) Na wena unga yendla leswi fanaka loko u tiyendlela swiboho swa wena. Hi xikombiso unga tsala swilo leswi u lavaka kuswi yendla siku ni siku naswona u fanele u sungula hi leswi swinga swa lisima. Loko u yendla leswi, switaku vevukela kuhetisisa swiboho leswi uswi yendleke kupatsa ni kuhetisisa swilo swin’wana.

16. I mpsini leswi u faneleke uswi yendla loko u lava kuhetisisa xiboho xa wena naswona Varhoma 12:11 yili yini hi mhaka leyi?

¹⁶ Tirha hi matimba. Swi lava u tirha hi matimba kuva u hetisisa ntirho lowu uwu sunguleke. (Lerha Varhoma 12:11.) Pawulo a byele Timotiya leswaku a tama a ‘tinyiketela’ kuva mudjondzisi wa kahle a tlhela a “tiya” kumbe kutiyisela. Na hina hingama tirhisa marito lawa ya Pawulo loko hi lava kuyendlela Yehovha ntirho wun’wana ni wun’wana. — 1 Tim. 4:13, 16.

17. Buku la Vaefesa 5:15, 16 lingahi pfunisa kuyini loko hi hetisisa swiboho swa hina?

¹⁷ Tirhisa nkama wa wena hi wutlharhi. (Lerha Vaefesa 5:15, 16.) Tivekeli nkama lowu ungataswi hetisisa ha wona leswi ungaswi boha naswona unga cinci. Unga tibyeli swaku utaswi yendla loko xiyimo xita yampsa, hikusa swinga yendleka xinga yampsi. (Ekl. 11:4) Tivoneli leswaku swilo leswi kalaka swinga pheli swiku dlela nkama ni ntamu lowu awuta yendla swilo swa lisima. (Filp. 1:10) Loko swi koteka, swi yendli hi nkama lowu ungataka unga phazamisiwi hi munhu naswona byela van’wana swaku vangaku hingeleti. Swingo yini loko wo tima foni kumbe u hlamula ma mesaje hi nkama wun’wana? *

18-19. I mpsini leswingaku pfunaka kuhetisisa swiboho swa wena hambiloko u kumana ni swikarhato?

¹⁸ Pimisa hi vuyelo la kona. Vuyelo la swiboho swa wena li fana ni ndhawu yokarhi leyi u lavaka kuya ka yona. Loko uswi lava hikakunene kufika ka ndhawu yoleyo, uta tama u famba hambiloko u boheka kucinca ndlela. Hi kufanana, loko hi pimisa hi vuyelo la swiboho swa hina ahingata godola loko hi kumana ni swikarhato. — Gal. 6:9.

¹⁹ Kuyendla swiboho swa kahle swa karhata, kambe lexi karhataka ngopfu i kuswi hetisisa. Kambe Yehovha angahi pfuna hi kuhi nyika wutlharhi ni ntamu leswaku hi hetisisa swiboho swa hina.