1-2. a) Hikuya hi Vaefesa 6:16, hi mhaka muni hi lava “xisirhelelo” lexikulu xa lipfumelo? b) Hi swihi swivutiso leswingata hlamuliwa?

KUNGAVA leswaku u na xona “Xisirhelelo” lexikulu xa lipfumelo? (Lerha Vaefesa 6:16.) Aswi kanakanisi leswaku u na xona! Kufana ni leswi xisirhelelo xi vhikelaka mirhi wa musonchwa, lipfumelo la wena liku vhikela ka swilo swobiha swa misava leyi swa kufana ni mahanyelo yobiha, kulwa ni swilo swin’wana leswi kalaka swinga fambisani ni minawu ya Xikwembu.

² Leswi hi hanyaka ‘amasikwini ya makumu’, lipfumelo la hina lita tama li ringiwa hi ndlela yokarhi. (2 Tim. 3:1) Ungaxi kambelisa kuyini xisirhelelo xa wena xa lipfumelo akuva u tiyiseka leswaku xi tiyile? Naswona unga yendla yini leswaku lipfumelo la wena li tshama na li tiyile? Ahi voneni tinhlamulu ta swivutiso leswi.

3. Masonchwa ama fanele ma yendla yini hi swisirhelelo swa wona naswona hi mhaka muni?

³ Aminkameni ya Bibele masonchwa ama tirhisa swisirhelelo leswi aswi lemiwa xikhumba. Ama fanele maswi policha hi mafurha leswaku xikhumba xinga wonheki ni leswaku nsimbi ya xona yinga furujari. Loko musonchwa a tsumbula leswaku xisirhelelo xa yena xi wonhekile, a afanele a hantla axi lunghisa leswaku a tshama na a lunghekele nyimpi. Xikombiso lexi xinga tirhisa kuyini ka lipfumelo la hina?

4. Hi mhaka muni u fanele u xi kambela kahle xisirhelelo xa wena xa lipfumelo naswona ungaswi yendlisa kuyini leswo?

⁴ Kufana ni masonchwa ya khale u fanele u xi kambela kahle xisirhelelo xa wena xa lipfumelo akuva u tshama na u lunghekele kuya nyimpini. Leswi hinga Vakreste hile nyimpini naswona valala va hina va katsa ni mimoya leyobiha. (Efe. 6:10-12) Akuna munhu lweyi angaku hlayiselaka xisirhelelo xa wena xa  lipfumelo. Kambe ungaswi tivisa kuyini leswaku lipfumelo la wena litava na li tiyile loko u langutana ni mindzingo? Xa kusungula, u fanele u khongela u kombela kupfuniwa hi Xikwembu. U gama u tirhisa Bibele leswaku liku pfuna kutivonisa xileswi Xikwembu xiku vonisaka xiswona. (Hev. 4:12) Bibele li li: “Tshemba Yehovha hi mbilu ya wena hinkwayo, naswona ungatiseketeli ka kutwisisa ka wena n’winyi.” (Swi. 3:5, 6) Swoswi pimisa hi xikarhato xokarhi lexi wahaku vaka na xona ka wutomi la wena ni leswi uswi yendleke leswaku u kota kuxi hlula. Hi xikombiso, u tshama u va ni xikarhato xa timale? Swinga yendleka u khumbuke xitshembiso xa Yehovha lexinga ka Vaheveru 13:5, lexinge: “Ningakala ningakutshiki, kumbe kukucukumeta, ni siku ni rin’we.” Kungava leswaku xitshembiso lexi, xiku yendle u tiyiseka leswaku Yehovha ataku pfuna? Loko kuli leswo, swi vula leswaku uxi hlayisa kahle xisirhelelo xa wena xa lipfumelo.

5. I mpsini leswi ungaswi tsumbulaka loko u kambela lipfumelo la wena?

⁵ Swinga yendleka u hlamalisiwa hi leswi ungaswi kumaka loko u kambela lipfumelo la wena. Ungaha tsumbula leswaku u heti nkama wa kuleha na ungaswi tivi leswaku ali tiyanga. Hi xikombiso, ungaha tsumbula swaku li wonhiwile hi mhaka kuvilela kutlula mpimu, mavunhwa kumbe kuhela ntamu. Loko xiyimo xi tshamise xileswo, unga yendla yini leswaku u vhikela lipfumelo la wena akuva linga tame li wonheka?

6. Hi swihi swilo swin’wana leswi kalaka swinga bihanga kuvilela hi swona?

⁶ Minkama yin’wana aswi bihanga kuvilela. Hi xikombiso, swi kahle kuvilela hi kulava kutsakisa Yehovha na Yesu. (1 Kor. 7:32) Loko hi yendla xidjoho xaxikulu, hingaha vilela hi kulava kulunghisa wuxaka la hina ni Xikwembu. (Pis. 38:18) Swin’wana leswingahahi vilelisaka i kulava kutsakisa lweyi hinga chada na yena, kuhlayisa ndjangu, maxaka ni kupfuna vamakwerhu.  — 1 Kor. 7:33; 2 Kor. 11:28.

7. Hi kuya hi Swivuriso 29:25, hi mhaka muni hinga fanelanga hi chava vanhu?

⁷ Kuvilela kutlula mpimu kunga dlaya lipfumelo la hina. Hi xikombiso, hingaha tshamela kuvilela hi swakudla kumbe mpahla. (Mat. 6:31, 32) Kuvilela koloko kungahi yendla hi sungula kutshamela kupimisa hi lifuwu ivi hi sungula kurhandza male. Loko hiswi pfumelela leswo, lipfumelo la hina lita hohloka naswona wuxaka la hina na Yehovha lita fa. (Marka 4:19; 1 Tim. 6:10) Xin’wana xingahi yendlaka hi tshamela kuvilela hintamu i kukarhateka hileswi van’wana vaswi pimisaka hi hina. Hingaha sungula kuchava ngopfu kuhlekiwa kumbe kuxanisiwa hi vanhu kutlula kuchava kukwatisa Yehovha. Leswaku hi tivhikela ka ntlhamu lowu, hi fanele hi kombela Yehovha ahi nyika lipfumelo ni xivindzi leswaku hinga chavi vanhu kumbe kukarhateka hileswi vaswi pimisaka hi hina. — Lerha Swivuriso 29:25; Luk. 17:5.

8. Hi fanele hi kuyini loko vahi hembela?

⁸ Sathana “tatana wa mavunhwa”, a tirhisa vanhu va yena akuva va hangalasa mavunhwa hi Yehovha ni hi vamakwerhu. (Yoh. 8:44) Hi xikombiso, vanhu lava dukeke va luka mavunhwa hi nhlengeletanu ya Yehovha va tlhela vama hangalasa ka televhizawu, ka interneti ni ka tindhawu tin’wana. Mavunhwa wolawo i yin’wana ya “mimpaxwa . . . leyipfurhaka” ya Sathana. (Efe. 6:16) Hi fanele hi kuyini loko vanhu vokarhi vahi byela mavunhwa wolawo? Ahi fanelanga hiva yingisa. Kambe hi mhaka muni hinga fanelanga hiva yingisa? Hikusa hi ni lipfumelo ka Yehovha naswona hava tshemba vamakwerhu. Kuvula ntiyiso,  ni kuyangulana ahi yangulani ni vanhu lava dukeke, futshi ahina xivangelo xa kuvulavula na vona kumbi kutwa mavonelo ya vona.

9. Kuhela ntamu swingahi khumbisa kuyini?

⁹ Kuhela ntamu kunga yendla leswaku lipfumelo la hina linga tiyi. Kambe loko hi kumana ni swikarhato hingaha titwa na hi hele ntamu. Hi mhaka leyo ahi fanelanga hiswi tekela hansi swikarhato swa hina. Kambe ahi fanelanga hi tshamela kupimisa hiswona nkama ni nkama hikusa loko hi yendla leswo, hita khohlwa swilo hinkwaswu swa lisima leswi Yehovha ahi tshembiseke swona. (Nhla. 21:3, 4) Kuhela ntamu swingahi yendla hi godola lakakuva hi tlhela hi tshika kutirhela Yehovha. (Swi. 24:10) Kambe swoleswo aswi fanelanga swi humelela ka hina.

10. Hinga djondza yini ka papila leli tsaliweke hi makwerhu wokarhi waxisati?

¹⁰ Ahi voneni leswi makwerhu mun’wana waxisati wale Amerika aswi yendlaka leswaku a hlayisa lipfumelo la yena na ali karhi atendera nuna wa yena lweyi a vabyaka hintamu. Ka papila leli anga tsalela aBetele a te: “Xiyimo xa hina xa karhata naswona minkama yin’wana xi hetana ntamu, kambe a tshembo wa hina wu tiyile. Ni khensa hi mbilu hikwayu swilo hinkwaswu leswi Yehovha ahi nyikaka swona leswaku hi tiyisa lipfumelo la hina ni kuhi nyika xivindzi. Haswi tsakela kutiyisiwa ni kuchaveleliwa. Kuvula ntiyiso hi swona swihi pfunaka kutama hi tirhela Yehovha hi tlhela hi tiyisela mindzingo ya Sathana.” Ka marito ya makwerhu lweyi hi djondza swaku hingaswi kota kuhlula hambiloko hi langutana ni mindzingo! Kambe hingaswi kotisa kuyini? Khumbuka leswaku swikarhato swa wena i mindzingo leyi taka hika Sathana. Tshemba leswaku Yehovha ataku chavelela naswona khensa swakudla swa moya leswi ahi nyikikaka swona.

11. Leswaku hi kambela lipfumelo la hina hi fanele hi tivutisa swivutiso swihi?

¹¹ Kungava leswaku kuni lomu lipfumelo la wena li lavaka kutiyisiwa kona? Ka tiwheti nyana letinga hundza, uswi kotile kukala unga vileli kutlula mpimu? Uswi kotile kukala unga phikizani ni vanhu lava dukeke kumbe kuyingisela mavunhwa lawa vama hangalasaka? Naswona kungava leswaku uswi kotile kuhlula kutitwa na u hela ntamu? Loko kuli swaku  uswi kotile, lipfumelo la wena li tiyile. Kambe hi fanele hi tivonela hikusa Sathana angaha tirhisa mintlhamu yin’wana leswaku a lwa na hina. Swoswi ahi voneni wun’we wa kona.

12. Kunga yendleka yini loko ho rhandza lifuwu?

¹² Kurhandza Lifuwu swinga yendla leswaku lipfumelo la hina linga tiyi hi tlhela hinga yendli swotala ka ntirho wa Yehovha. Mupostola Pawulo a te: ‘Loko nyimpi yahalwiwa, aku na nhenha leyi yiyaka yiyatirha swa le kaya kumbe kutiyendlela bindzu, hikuva kunavela ka yona lokukulu i kutsakisa lweyi ayirhambeke kuyalwa nyimpi yakona.’ (2 Tim. 2:4) Kuvula ntiyiso, masonchwa yale Rhoma amanga pfumeleliwi kuyendla mintirho yin’wana. Akuta yendleka yini loko sonchwa lotshuka li tlula nawu lowu?

13. Hi mhaka muni sonchwa alinga fanelanga li tiyendlela bindzu?

¹³ Pimisa hi mhaka leyi. Ahinge kuni ntlawa wokarhi wa masonchwa lowu ternaraka hi swipada ni nimixo kambe sonchwa lin’we ali yi kuternareni. Li pfuka li ya bazara a kuxaviseni. Ni madlambu, masonchwa man’wana malunghiselela matlhari ma tlhela ma lota swipada swa wona kambe lona li lunghiselela swakudla leswi lingataswi xavisa hi mundzuku wa kona. Loko nimixo kofika valala vava hlasela na vangaswi nyimelanga, hi lihi sonchwa leli ali tava li lunghekele kulwa ivi li tsakisa ndhuna ya lona? Loko wena awu li ka nyimpi leyi, awuta lava kugamakana na mani? Awuta lava kugamakana ni masonchwa lawa ama ternara kumbe ni leliya ali heta nkama lili kuxaviseni?

14. I mpsini leswinga swalisima ka hina tani hi masonchwa ya Kreste?

¹⁴ Hina hi fana ni masonchwa lawayani ya kahle. A xalisima ngopfu ka hina i ku tsakisa varhangheli va hina kunga Yehovha na Yesu. Swoleswo i swalisima hintamu kutlula swilo hinkwaswu leswi hingaswi kumaka ka misava ya Sathana. Hi fanele hi tiyiseka swaku hi ni nkama ni ntamu wa kutirhela Yehovha hi tlhela hi hlayisa xisirhelelo xa hina xa lipfumelo kupatsa ni matlhari lawa Yehovha ahi nyikaka wona.

15. Pawulo ahi basopise ka yini naswona hi mhaka muni?

 ¹⁵ Hi fanele hi tshama na hi pfule matihlo! Hi mhaka muni? Hikusa mupostola Pawulo a te: “lavanavelaka rifuwo” vangaha hambukisiwa ivi “vatshika vupfumeli”. (1 Tim. 6:9, 10) Rito lelinge ‘hambukisiwa’ li kombisa leswaku hingaha karhateka hi kulwela kukuma swilo swaku ahi na xilaveko xa swona, ivi hi sungula ‘kunavela leswotala leswingapfuniki nchumu’. Kuhambana ni kupfumelela kunavela koloko kukula ka timbilu ta hina, hi fanele hi khumbuka swaku Sathana hi yena aku tirhisaka leswaku a yendla lipfumelo la hina linga tiyi.

16. Rungula linga ka Marka 10:17-22, li fanele lihi yendla hi pimisa hi swivutiso swihi?

¹⁶ Ahinge hi ni male yayinyingi leyi hingati xavelaka swilo swotala hi yona. Kungava leswaku aswitava swi hoxile kuxava swilo leswi hiswi navelaka kambe hinga liki ni xilaveko xa swona? Aswi bihanga hi kukongoma. Kambe pimisa hi swivutiso leswi landzelaka: Loko hi ni makotelo ya kuxava swilo swokarhi, kungava leswaku hitawu kuma ntamu ni nkama wa kuswi hlayisa? Kungava leswaku hingaha sungula kuswi rhandza kutlula mpimu? Kungava leswaku lirhandzu leli hinga na lona hi swilo swa hina litahi yendla hi fana ni djaha leliya linga yala xirhambu xa Yesu xa kutirhela Xikwembu hilaha kuyengetelekeke? (Lerha Marka 10:17-22.) Swa yampsa hi tihanyela wutomi la kuwolova, nahi tirhisa nkama ni ntamu wa hina hi tirhela Xikwembu!

17. I mpsini leswi hi kalaka hinga fanelanga hiswi khohlwa?

¹⁷ Hinga khohlweni leswaku hi le nyimpini naswona hi fanele hi tshama na hi lunghekele kulwa siku lin’wana ni lin’wana. (Nhla. 12:17) Vamakwerhu abandleni avangeswi koti kuhi rhwalela xisirhelelo xa hina xa lipfumelo. Hi fanele hi tirhwalela hi hoxe.

18. Hi mhaka muni masonchwa ya khale ama khoma switiya swisirhelelo swa wona?

¹⁸ Aminkameni ya khale, loko musonchwa a kombisa xivindzi anyimpini a ahloniphiwa. Kambe aswi danisa loko a muka kaya na anga na xisirhelelo. Mutivi wa matimu wa Murhoma lweyi a vitaniwaka Tacitus a tsale leswi: “Loko musonchwa o tshuka a lahlekeliwa hi xisirhelelo xa yena, leswo aswimu khomisa tingana letikulu.” Hi mhaka leyo, masonchwa ama fanele ma khoma switiya swisirhelelo swa wona.

19. Hingaswi kotisa kuyini kukhoma switiya ka xisirhelelo xa hina xa lipfumelo?

¹⁹ Hi khoma switiya swisirhelelo swa hina swa lipfumelo hi kuva kona ka minhlanganu ya Wukreste nkama ni nkama ni kubula ni vanhu hi vito la Yehovha ni Mfumu wa yena. (Hev. 10:23-25) Xin’wana i kudjondza Bibele siku ni siku hi tlhela hi khongela ka Yehovha hi kombela swaku ahi pfuna kutirhisa leswi hiswi djondzaka. (2 Tim. 3:16, 17) Loko hi yendla leswo akuna tlharhi la Sathana lelingata hi yendla hinga kumi wutomi lelinga heliki. (Esa. 54:17) ‘Xisirhelelo xa hina’ xa lipfumelo xitahi vhikela. Hita tama hi tirha hi xivindzi ni vamakwerhu naswona hita hlula ka nyimpi leyi hiyi lwaka siku ni siku ya kutiyisa lipfumelo la hina. Nakambe, xalisima kutlula hinkwaswu hi leswaku hita tsaka hintamu hileswi hi seketeleke Yesu loko a hlula Sathana ni vanhu va yena. — Nhla. 17:14; 20:10.