1-2. a) Hlamusela leswaku i yini xingahi pfunaka kutiyiselela swikarhato swa siku ni siku. b) Hita vona yini ka djondzo leyi?

KUNGAVA leswaku u tshama u khumbuka ndzingo wokarhi lowu u kumaneke na wona ivi u pimisa leswi: “Naswi tiva leswaku aningataswi kota kuwu hlula hi ntamu wa mina.” Votala va hina hi tshama hi titwisa xileswo. Swinga yendleka u tiyisele mavabyi ya kukarhata kumbe lifu la munhu lweyi umu rhandzaka. Loko u pimisa hi ndzingo wa kona, waswi vona leswaku u kote kutiyisela siku ni siku hileswi moya wokwetsima wa Yehovha wuku nyikeke “matimba lamakulu” lama tlulaka lama tolovelekeke. — 2 Kor. 4:7-9.

² Naswona hi lava moya wokwetsima akuva wuhi pfuna kukala hinga hlohloteliwe hi misava leyobiha ya Sathana. (1 Yoh. 5:19) Kuyengela ka leswo, hi lava ntamu wa kulwa ni “mimoya leyobiha”. (Efe. 6:12) Swoswi hita bula hi tindlela timbirhi leti moya wokwetsima wungahi pfunaka ha tona ka swikarhato leswi hinkwaswu. Hita gama hi vona leswi hi faneleke hiswi yendla akuva hi vuyeliwa ngopfu hi matimba ya moya wokwetsima.

3. Yehovha angahi pfunisa kuyini leswaku hi kota kutiyisela swikarhato?

³ Moya wokwetsima wa Xikwembu wuhi pfuna hi kuhi nyika ntamu wa kutama hi tirhela Yehovha hambiloko hi kumana ni swikarhato. Hambi leswi a akumana ni swikarhato, mupostola Pawulo aaswi kota kuyendla ntirho lowu a anyikiwe wona hileswi a apfuniwa hi “matimba ya Kriste”. (2 Kor. 12:9) Ka liyendzo la yena lawumbirhi la wumisiyonariyo, Pawulo a atirha hintamu ka ntirho wa kuchumayela nakambe a atlhela a yendla ntirho wun’wana leswaku a kota kutixavela swa kutihanyisa. A tshame aKorinto, akaya ka Akila na Prisika lava ava li vayendli va matende. Leswi Pawulo na yena aawu tiva ntirho lowu, masiku man’wana a atirha na vona. (Mint. 18:1-4) Moya wokwetsima wu yendle leswaku Pawulo a va ni ntamu wa kutiyendlela swokarhi leswaku a kota kutihanyisa ni kutlhela a kota kuhetisisa ntirho wa yena wa kuchumayela.

4. Hi kuya hi 2 Vakorinto 12:7b-9, Pawulo a akarhatiwa hi yini?

 ⁴ Lerha 2 Vakorinto 12:7b-9. Ka marito lawa, Pawulo a avula yini loko a ku a karhatiwa hi “muntwa nyameni”? I ntiyiso swaku loko akuli wena unga tlhaviwa hi muntwa ka nyama ya wena awuta twa kuvava ngopfu. Hi mhaka leyo Pawulo a avula swaku swikarhato leswi a ali na swona aswi vava kufana ni kutlhaviwa hi muntwa. A tlhele aswi fanisa ni “ntsumi ya Sathana” leyi ayi tshamela kumu ‘himetela’. Swinga yendleka swikarhato swa Pawulo leswi aswi fana ni muntwa anyameni aswinga vangiwi hi Sathana ni madimona ya yena hi kukongoma. Kambe mimoya yobiha yingava yi vone “muntwa” wa Pawulo ivi yi yengetela kuvava loku a akutwa. Pawulo a yendle yini?

5. Yehovha aswi hlamulise kuyini swikhongelo swa Pawulo?

⁵ Akusunguleni Pawulo a alava leswaku Yehovha a susa “muntwa” lowu a ali na wona anyameni. Yena hi yexe a te: ‘Nikhongelile Hosi [Yehovha] kanharhu hi mhaka ya xilo xoxo, leswaku xisuka ka mina.’ Kambe hambi leswi Pawulo a akhongela, a muntwa awu sukanga ka nyama ya yena. Kungava leswaku leswo aswi vula swaku Yehovha aanga hlamuli swikhongelo swa Pawulo? Aswinga vuli swona. Kuvula ntiyiso, Yehovha aswi hlamulile swikhongelo swa yena. Angamu suselanga xikarhato lexi a ali na xona, kambe amu nyike ntamu akuva a kota kutiyisela. Yehovha a te: “Matimba ya mina mahetiseka laha kunga ni kutsana kona.” (2 Kor. 12:8, 9) Kambe hi kupfuniwa hi Xikwembu, Pawulo aswi kotile kutshama na a tsakile a tlhela ava ni kurhula. — Filp. 4:4-7.

6. a) Yehovha angaswi hlamulisa kuyini swikhongelo swa hina? b) Hi swihi switshembiso leswinga ka tindzimana leti kombisiweke ka paragrafu leswiku nyikaka ntamu?

⁶ Kufana na Pawulo, kungava leswaku u tshama u khongela ka Yehovha u kombela leswaku aku susela xikarhato xokarhi? Swinga yendleka u khongele kanyingi swi suka mbilwini kambe xikarhato xa kona xinga suki kumbe xi tama xi kula. Kungava leswaku leswo swi kuyendle u pimisa leswaku Yehovha angahaku tsakeli? Loko kuli leswo, khumbuka xikombiso xa Pawulo. Leswi Yehovha anga hlamula swikhongelo swa Pawulo, tiyiseka leswaku ni swa wena ataswi hlamula! Swinga yendleka anga susi xikarhato xa wena kambe hi kutirhisa moya wa yena wokwetsima ataku nyika ntamu leswaku u kota kutiyisela. (Pis. 61:3, 4) Minkama yin’wana ungaha titwa na u ‘tlumbiwile,’ kambe Yehovha angataku tshika. — 2 Kor. 4:8, 9; Filp. 4:13.

7-8. a) Moya wokwetsima hingawu fanisisa kuyini ni moya lowu hungaka alwandle? b) Petro awu hlamuselisise kuyini moya wokwetsima?

⁷ Hi yihi ndlela yin’wana leyi moya wokwetsima wungahi pfunaka hi yona? Phela moya wokwetsima hingawu fanisa ni moya lowu hungaka alwandle. Hambiloko lwandle li kwatile, maboti mangaswi kota kufika lomu ma yaka kona na ma sirhelelekile hi kupfuniwa hi moya loko wu kongoma lomu maboti ma yaka kona. Hi kufanana, moya wokwetsima wungahi pfuna kutama hi tirhela Yehovha hambiloko hi kumana ni swikarhato hiza hiya nghena amisaveni leyimpsha.

⁸ Leswi aali muphasi wa tihlampfi, mupostola Petro a ativa swotala hi maboti. Swinga yendleka kuve leswo swingamu yendla a hlamusela leswi moya wokwetsima wu tirhisaka xiswona hi kutirhisa xikombiso xa kuyelana ni maboti. A tsale leswi: ‘Hikuva kuhava rito ni rin’we ra vaprofeta leriteke hi kutitwa ka munhu, kambe vanhu lavahuhuteliweke hi Moya Wokwetsima, vavulile leswihumaka ka Xikwembu.’ Phela rito la Xigrika leli hundzuluxeliweke liva “kuhuhuteliwa”, hi kukongoma li vula “kususumetiwa”. — 2 Pet. 1:21.

9. I mpsini leswi Petro a alava swaku vanhu va pimisa swona loko a ku vatsali va Bibele a va “huhuteliwe” hi moya wokwetsima?

⁹ Kuta yini ka mimpimiso ya wena, loko u twa rito leli Petro ali tirhiseke lelinge: “kususumetiwa”? Rito leli fanaka la Xigrika li tirhisiwe hi Luka,  Mutsali wa buku ya Mintirho loko a hlamusela boti leli a li ‘kokiwa’ hi moya. (Mint. 27:15) Mutivi mun’wana wa Bibele a vule leswaku loko Petro a ku vatsali va Bibele a va “susumetiwa” hi moya wokwetsima, a atirhisa marito lawa amata yendla vanhu va pimisa hi boti loko li li matini. Petro a vule leswaku kufana ni leswi boti li kokiwaka hi moya liza liya fika lomu liyaka kona, vatsali va Bibele ni vaprofeta a va susumetiwa hi moya wokwetsima leswaku va yendla ntirho wa vona. Mutivi wa Bibele lweyi se hi vulavuleke hi yena a tlhele a vula swaku vatsali va Bibele a va fana ni maboti lawa magwimbiweke maseyila ya wona. Ava lunghekele kuyendla ntirho lowu moya wokwetsima awuva kongomisa kuwu yendla. Yehovha a yendle xiyenge xa yena hi kuva nyika moya wokwetsima. Kasi vatsali va Bibele na vona va yendle xiyenge xa vona hi kuyendla ntirho wa vona na va landza nkongomiso wa moya wokwetsima.

10-11. Nyikela xikombiso xa swilo swimbirhi leswi hi faneleke hiswi yendla leswaku hi tiyiseka swaku moya wokwetsima wahi kongomisa.

¹⁰ I ntiyiso swaku namuntlha wa siku Yehovha angaha tirhisi moya wokwetsima leswaku a pfuna vanhu va tsala Bibele. Hambileswo, Yehovha aha tama a tirhisa moya wa yena wokwetsima leswaku a kongomisa vanhu va yena. I mpsini leswingatahi tiyisekisa leswaku hi kongomisiwa hi moya wokwetsima? Hi fanele hi tiyiseka leswaku hi yendla xiyenge xa hina. Hingaswi yendlisa kuyini leswo?

¹¹ Pimisa hi xifananiso lexi. Akuva mufambisi wa boti a pfuniwa hi moya a fanele a yendla swilo swimbirhi. Xosungula, a fanele a veka boti laha moya wu baka kona. Phela boti alingeyi ndhawu loko linga li matini laha moya wu baka kona. Xawumbirhi, a fanele a gwimba maseyila leswaku ma tala hi moya. Loko o kala angaswi yendli leswo, boti alingata famba hambiloko moya wu ba. Hi ku fanana, hingaswi kota kutama hi tirhela Yehovha ntsena loko hi pfuniwa hi moya lowo kwetsima. Leswaku moya wokwetsima wuhi pfuna hi fanele hi yendla swilo swimbirhi. Xa kusungula, hi fanele hi yendla mintirho leyi moya wokwetsima wu kongomisaka vagandzeli va Yehovha akuva vayi yendla. Xawumbirhi, hi fanele hi yendla mintirho yoleyo hi laha hinga kotaka ha kona. (Pis. 119:32)  Loko hi yendla leswo, moya wokwetsima wutahi nyika ntamu wa kutirhela Yehovha na hi tshembekile hiza hi ya nghena amisaveni leyimpsha.

12. I mpsini leswi hingataswi kambisisa swoswi?

¹² Kufikela swoswi se hi bule hi tindlela timbirhi leti moya wokwetsima wungahi pfunaka ha tona namuntlha. Moya wokwetsima wuhi nyika ntamu wu tlhela wuhi pfuna kutshama na hi tshembekile loko hi kumana ni mindzingo. Naswona wuhi kongomisa ni kuhi pfuna kuyendla ntirho lowu Yehovha a lavaka leswaku hiwu yendla kuva hita kuma wutomi lelinga heliki. Swoswi hita kambisisa 4 wa swilo leswi hi faneleke hiswi yendla akuva hi kota kupfuniwa hi moya wokwetsima.

13. Hi kuya hi 2 Timotiya 3:16, 17, Matsalwa mangahi pfunisa kuyini, naswona i mpsini leswi hi faneleke hiswi yendla?

¹³ Xa kusungula, djondza Rito la Xikwembu. (Lerha 2 Timotiya 3:16, 17.) Rito la Xigrika leli hundzuluxeliweke li ku “mahuhuteliwe hi Xikwembu”, hi kukongoma li vula swaku “ma hefemuleliwe hi Xikwembu”. Xikwembu xi tirhise moya wa xona leswaku xi nghenisa mimpimiso ya xona ka vatsali va Bibele. Loko hi lerha Bibele hi tlhela hi pimisa hileswi hiswi lerhaka, hi pfumelela marito ya Xikwembu leswaku manghena ka mimpimiso ni ka timbilu ta hina. Swoleswo swihi yendla hi cinca wutomi la hina, hi hanya hi kupfumelelana ni kurhandza ka Yehovha. (Hev. 4:12) Kambe leswaku hita vuyeliwa ngopfu hi matimba ya moya wokwetsima hi fanele hi tinyika nkama wa kudjondza Bibele siku ni siku, hi tlhela hi pimisa hi leswi hingaswi djondza. Loko hi yendla leswo, Rito la Xikwembu lita khumba mavulavulelo ya hina ni leswi hiswi yendlaka.

14. a) Hi mhaka muni hinga vulaka swaku moya wa Yehovha wukona aminhlanganweni ya hina ya Wukreste? b) Hinga yendla yini leswaku hi vuyeliwa ngopfu hi matimba ya moya wokwetsima loko hi li aminhlanganwini?

¹⁴ Xawumbirhi, kugandzela Yehovha xikan’we. (Pis. 22:22) Moya wa Yehovha wukona aminhlanganweni ya hina ya Wukreste. (Nhla. 2:29) Hi mhaka muni hi vula leswo? Hikusa loko hi nhlangana ni vamakwerhu leswaku hita gandzela Yehovha ha khongela hi kombela moya wokwetsima, hi yimbelela tinsimu leti sekeliweke aMatsalweni hi tlhela hi yingisela tinkulumi ta Bibele leti vekiwaka hi vamakwerhu vaxinuna lava kongomisiwaka hi moya wokwetsima. Vamakwerhu vaxisati na vona va pfuniwa hi moya wokwetsima akuva va lunghiselela ni kuhetisisa swiyenge swa vona. Leswaku moya wokwetsima wuhi pfuna hi fanele hi ya minhlanganwini na hi lunghiselelile akuva hita kota kuhlamula. Xileswo, loko hi li aminhlanganwini hi tinyimisele kukongomisiwa hi moya wokwetsima kufana ni maboti lama gwimbiweke maseyila ya wona.

15. Moya lowokwetsimma wungahi pfunisa kuyini loko hi li nsin’wini?

¹⁵ Xawunharhu, kuchumayela. Loko hi tirhisa Bibele loko hi li nsin’wini, hi pfumelela moya wokwetsima swaku wuhi pfuna ka ntirho wa hina wa kuchumayela. (Rhom. 15:18, 19) Leswaku moya wokwetsima wuku pfuna, u fanele u va kona ka ntirho wochumayela nkama ni nkama u tlhela u titoloveta kutirhisa Bibele minkama hinkwayu loko swikoteka. Lexingaku pfunaka kuyampsisa mabulu ya wena ni vanhu loko u li nsin’wini, i kutirhisa swikombiso swa mabulu leswi kumekaka ka Xibukwana xa Minhlangano ya Mahanyelo ni Ntirho.

16. Hinga yendla yini hi kukongoma leswaku hi kuma moya wokwetsima?

¹⁶ Xawumuni, khongela ka Yehovha. (Mat. 7:7-11; Luk. 11:13) Xalisima ngopfu lexi hingaxi yendlaka leswaku hi kuma moya wokwetsima, i kuwu kombela hi kukongoma ka Yehovha hi xikhongelo. Axikona lexinga yendlaka leswaku swikhongelo swa hina swinga fiki ka Yehovha kumbe kuhi sivela leswaku hinga yamukeli moya wa yena wokwetsima. Moya wokwetsima wungahi pfuna hambiloko hi pfaleliwile djele naswona hambi Sathana angeswi koti kuwu sivela. (Yak. 1:17)  Hinga khonghelisa kuyini leswaku hi kuma moya wokwetsima? Leswaku hi hlamula xivutiso lexi ahi kambisiseni xifananiso lexinga tsaliwa ka buku ya Luka ntsena, lexi vulavulaka hi xikhongelo. *

17. Hi djondza yini mayelana ni xikhongelo ka xifananiso xa Yesu lexinga ka Luka 11:5-9, 13?

¹⁷ Lerha Luka 11:5-9, 13. Xifananiso xa Yesu xihi djondzisa leswi hi faneleke hiwu kombelisa xiswona moya wokwetsima. Ka xifananiso lexi, wanuna lweyi a akombela a kume leswi aaswi lava ‘hikuva a asindzisa kumbe kuphikelela.’ Anga chavanga kuya kombela ka munghanu wa yena hambileswi se aku li wusiku hintamu. Yesu a avula yini loko a ku xifananiso lexi xingahi djondzisa swokarhi hi xikhongelo? Yena a te: ‘Kombelani, mitanyikiwa; lavani, mitaswikuma; gongondzani, mitapfuleliwa’. Hi djondza yini ka mhaka leyi? Leswaku hi kota kupfuniwa hi moya wokwetsima hi fanelele hi khongela hiwu kombela hi ku phindhaphindha.

18. Hi kuya hi xifananiso xa Yesu, hi mhaka muni hi tiyiseka swaku Yehovha atahi nyika moya wokwetsima?

¹⁸ Xifananiso xa Yesu xi tlhela xihi pfuna kuvona swaku hi mhaka muni Yehovha ahi nyika moya wokwetsima. Wanuna lwiyani wa xifananiso a alava kukombisa malwandla ka lweyi angamu yendzela. A alava kumu nyika swakudla hambileswi anga fika ni wusiku kambe a angana nchumu xa kumu nyika. Yesu a vule swaku muyakelani wa yena aze amu nyika swakudla hileswi anga phikelela kukombela. I mpsini leswi Yesu a alava kuhi djondzisa swona hi mhaka leyi? Leswi munhu lweyi akalaka anga hetisekanga angaswi kota kupfuna muyakelani wa yena hi leswi anga tama a phikelela, hinga tiyiseka swaku B’ava wa hina wale matilweni atahi nyika moya wokwetsima loko hi phikelela himu kombela. Hi mhaka leyo ha tiyiseka swaku Yehovha ataswi hlamula swikhongelo swa hina loko himu kombela moya wa yena wokwetsima. — Pis. 10:17; 66:19.

19. Hi mhaka muni hi tshemba leswaku hingaswi kota kutiyisela hambiloko Sathana a tama ahi hlasela?

¹⁹ Ha tshemba leswaku hingaswi kota kutiyisela hambiloko Sathana a tama ahi hlasela. Hi mhaka muni? Hikusa moya wokwetsima wungahi pfuna hi tindlela timbirhi. Ya kusungula, kuhi nyika ntamu wa kutiyisela loko hi ni swikarhato. Yawumbirhi, i ntamu lowu wuhi pfunaka kutama hi tirhela Yehovha hiza hi ya nghena amisaveni leyimpsha. Ahi tiyimiseleni kutama hi vuyeliwa ngopfu hi matimba ya moya wokwetsima!