1. Hi mhaka muni hi fanele hi gandzela Yehovha ntsena?

HI FANELE hi gandzela Yehovha ntsena hikusa hi yena angahi yendla naswona i munyiki wa wutomi. (Nhla. 4:11) Kambe ku ni mhaka. Hambi loko himu rhandza Yehovha hi tlhela himu hlonipha, swilo swin’wana swingaha sungula kuva swa lisima ngopfu awuton’wini la hina ive swihi sivela kugandzela yena ntsena. Hi fanele hi twisisa leswaku swoleswo swinga yendlekisa kuyini. Kambe ahi sunguleni hi kuvona leswi kugandzela Yehovha ntsena swi vulaka swona.

2. Hi kuya hi Eksoda 34:14, hita yendla yini loko hi gandzela Yehovha ntsena?

² Ka Bibele, kugandzela Yehovha ntsena swi vula kumu rhandza swi suka mbilwini. Hi va hi gandzela Yehovha ntsena loko hi tinyiketela ka yena hi kuhelela. Ahinge pfumeleli munhu kumbe nchumu xihi tshikisa kurhandza Yehovha hi mbilu hinkwayu. — Lerha Eksoda 34:14.

3. Hi mhaka muni hi ni swivangelo leswi twalaka swa kutinyiketela ka Yehovha?

³ Hi ni swivangelo leswi twalaka swa kutinyiketela ka Yehovha. Hi mhaka muni hi vula leswo? Hi vula leswo hikusa akuva hi tinyiketela ka Yehovha hi sungula hi kudjondza hi yena, hi tiva wumunhu la yena, hi tiva leswi aswi rhandzaka ni leswi aswi nyenyaka hi tlhela na hina hi titwisa xileswi yena a titwisaka xiswona. Nakambe hi tinyiketela ka Yehovha hileswi hi twisisaka swikongomelo swa yena hi tlhela hiswi seketela. Naswona ha tsaka hileswi ahi nyikaka mukhandlu wa kuva vanghanu va yena. (Pis. 25:14) Hinkwaswu leswi hiswi djondzaka hi muvumbi wa hina swihi yendla hi va kusuhi na yena. — Yak. 4:8.

4. a) I mpsini leswi Sathana aswi tirhisaka akuva ahi yendla hingamu rhandzi hi kuhelela Yehovha? b) Hita bula hi yini ka nhlokomhaka leyi?

⁴ Sathana hi yena a lawulaka misava leyi. A yendla leswaku swilo leswi hiswi lavaka swi va swona swa lisima ngopfu awuton’wini la hina naswona a lava hi tsandzeka kubalekela kunavela ka hina kobiha. (Efe. 2:1-3; 1 Yoh. 5:19) Xikongomelo xa yena i kuhi yendla hi  rhandza swilo swin’wana kutlula Yehovha. Hita vona tindlela timbirhi leti Sathana ati tirhisaka. Ya kusungula, a zama kuhi yendla hi rhandza male kutlula mpimu. Ya wumbirhi, a hlohlotela kutihungata hi swilo swokala swinga pheli.

5. Hi mhaka muni hi fanele hi tivonela leswaku hinga sunguli kurhandza male kutlula mpimu?

⁵ Hi ntumbuluku, hinkwerhu ka hina hi lava kuva ni swakudla swa kahle, mpahla ya yinene ni munti wa kutshamiseka. Kambe hi fanele hi tivonela leswaku hinga sunguli kurhandza male kutlula mpimu. Vanhu votala namuntlha hi “lava rhandzaka ngopfu male” ni swilo leswi yingaswi xavaka. (2 Tim. 3:2) Yesu aaswi tiva leswaku valandzeli va yena vanga tshuka va sungula kurhandza male. Hi mhaka leyo a te: “Aku na munhu lweyi angakotaka kutirhela tihosi timbirhi; hikuva atavenga yin’we, arhandza leyin’wana. Mingekoti kutirhela Xikwembu na Mamona kumbe lifuwu.” (Mat. 6:24) Munhu lweyi a gandzelaka Yehovha kuve a heta nkama wa wunyingi na a zama kuganya, swi fana ni loko a tirhela tihosi timbirhi. Munhu yelweyo anga gandzeli Yehovha ntsena.

6. Hi djondza yini ka leswi Yesu aswi byeleke bandla la Lawudokiya?

⁶ Akuheleni ka nguva ya vapostola, vanhu van’wana ka bandla la Lawudokiya, ava tibuma va ku: ‘Hi fuwile nakona hi vafuwi, ahi pfumali nchumu’. Kambe Yehovha na Yesu ava va vona na va li ‘vatsandzeki ni vaxaniseki ni swisiwana ni swifamahlo ni leswaku avayambalanga nchumu.’ Yesu angava layanga hi leswi ava ganyile kambe ava laye hi leswi ava rhandza male kutlula mpimu, lakakuva swi wonha ni wuxaka la vona na Yehovha. (Nhla. 3:14-17) Loko hi vona leswaku hi sungule kurhandza male kutlula mpimu, hi fanele hi cinca mapimisela ya hina hi xihantla. (1 Tim. 6:7, 8) Loko ho kala hingaswi yendli leswo, hita sungula kurhandza swilo swin’wana, naswona Yehovha angeli yamukeli wugandzeli la hina hikusa yena “i Xikwembu lexi lavaka kugandzeliwa xona ntsena.” (Det. 4:24)  Swinga yendlekisa kuyini kuva male yi va ya lisima awuton’wini la hina?

7-9. U djondza yini ka leswinga humelela doda lin’wana leli vitaniwaka David?

⁷ Vona xikombiso xa David, doda lin’wana la Estados Unidos leli tirhaka hi kutiyimisela. Yena a vule leswaku a ali mutirhi wa kutinyiketela. A komponi leyi a atirha ka yona yimu nyike xikhundla yi tlhela yimu yengetela muholo, naswona a atekiwa tani hi mun’we wa lava avawu tiva kuyampsa ntirho lowu a awu yendla atikweni hinkwalu. Yena a te: “Ka nkama lowo ani pimisa leswaku lowo akuli nkateko wa Yehovha.” Kambe kungava leswaku hikakunene hi Yehovha angamu katekisa?

⁸ Hi kutsongokutsongo, David a sungule kuvona leswaku ntirho wa yena awuli karhi wu dlaya wuxaka la yena na Yehovha. Yena a li: “Loko ni li aminhlanganwini ni loko ni li ansin’wini ani tshamela kupimisa hi swikarhatu leswi ani li naswona antirhweni. Hambi leswi ani hola male ya yinyingi ni sungule kukarhateka ambilwini naswona wukati la mina a li tsekatseka.”

⁹ David aswi vonile leswaku a afanele a yendla xiboho xa leswi swinga swa lisima awuton’wini la yena. Yena a li: “Ni yendle xiboho xa kulunghisa xiyimo xa mina.” David a alava kucinca matirhelo ya yena, naswona a bule ni mulungu wa yena hi mhaka leyi. Kuhumelele yini? David a hlongoliwile antirhweni. Kambe a yendle yini? Yena a li: “Hi mundzuku wa kona ni tsale petição la kutirha tani hi mupfuli wa ndlela wa nkama nyana kumbe phayona la kupfunisa.” Leswaku va kota kutiwundla, David ni nsati wa yena va sungule kuyendla ntirho wa kubasisa. Hi kufamba ka nkama ave mupfuli wa ndlela wa nkama hinkwawu kumbe phayona la nkama hinkwawu, naswona nsati wa yena na yena a game a nghenela ntirho lowu. Vanhu vanyingi vawu tekela hansi ntirho wa kubasisa lowu David ni nsati wa yena vawu yendlaka. Kambe vona avana mhaka ni leswaku va yendla ntirho wa kutshamisa kuyini.  Hambi leswi male leyi va holaka yona swoswi yinga yitsongo hintamu loko yi fananisiwa ni leyi ava hola khale, ya yenela kuhakela leswi vaswi lavaka hweti ni hweti. Va lava kurhangisa Yehovha, naswona vaswi vona leswaku hikakunene Yehovha wava hlayisa lava rhangisaka swilaveko swa Mfumu. — Mat. 6:31-33.

10. Hingayi vhikelelisa kuyini mbilu ya hina?

¹⁰ Hambi loko hi li swisiwana kumbe hi ganyile, hi fanele hi vhikela mbilu ya hina. Hingaswi yendlisa kuyini leswo? Hi fanele hi tivonela leswaku hinga sunguli kurhandza lifuwu, naswona hinga pfumeleli ntirho wa hina wuva wa lisima kutlula kugandzela Yehovha. Hingaswi tivisa kuyini leswaku hi rhandza ntirho kutlula Yehovha? Hi leswi swivutiso swin’wana leswi u faneleke u tivutisa swona: ‘Ni tshamela kupimisa hi ntirho loko ni li minhlanganwini ni loko ni li kuchumayeleni? Ni tshamela kukarhateka hi leswaku ni tava ni male leyi yenelaka ankameni lowu taka? Kungava leswaku male ni swilo leswi Ningana swona swi yendla wukati la mina li tsekatseka? Ningaswi kota kuyendla ntirho lowu vanyingi vawu delelaka, akuva nita kota kutirhela Yehovha nkama lowu yengetelekeke?’ (1 Tim. 6:9-12) Loko hi pimisa hi swivutiso leswi, hi fanele hi khumbuka leswaku Yehovha wahi rhandza, naswona ka lava va gandzelaka yena ntsena a yendle xitshembiso lexinge: “Ningakala ningakutshiki, kumbe kukucukumeta, ni siku ni rin’we.” Hi mhaka leyo, Pawulo a tsale swaku: “Mingafumiweni hi male kuhanyeni ka n’wina.” — Hev. 13:5, 6.

11. Swilo leswi munhu a tihungataka ha swona swingamu khumbisa kuyini?

¹¹ Yehovha a lava leswaku wutomi la hina li tsakisa naswona kuhungata swingahi yendla hi tsaka. Kuvula ntiyiso Yehovha a li: “Akuna swa kuyampsa ka munhu kutlula kuva a dla, a nwa ni kutsaka hi ntirho wa yena wa kutika. Ni twisise swaku leswi na swona swi ta hi ka Xikwembu”. (Ekl. 2:24) Kambe kuheta nkama wa wunyingi na hi hungata hi swilo swa misava leyi, swingahi wonha. Swingaha yendla leswaku hinga vi ni mahanyelo la manene naswona hi sungula kurhandza swilo leswi Yehovha aswi nyenyaka.

12. Hi kuya hi 1 Vakorinto 10:21, 22, hi mhaka muni hi fanele hi tivonela loko hi langa leswi hi hungataka ha swona?

¹² Hi lava kugandzela Yehovha ntsena. Hi mhaka leyo, ahi lavi kudla “mezeni wa Hosi [Yehovha]” hi tlhela hi dla “mezeni wa madimoni.” (Lerha 1 Vakorinto 10:21, 22.) Loko mi dla xikan’we ni munhu wokarhi, swi kombisa leswaku mi vanghanu. Loko hi langa kuhungata hi swilo leswi kombisaka kulwa, wunyanga, kutikhoma kobiha ka swa masangu, kumbe  mahanyelo man’wana lama fambisanaka ni kunavela kobiha, swi fana ni loko hi dla ni valala va Yehovha kumbe kudla swakudla leswinga swekiwa hi vona. Vuyelo la kona hi leswaku hita tivavisa hi tlhela hi wonha wuxaka la hina na Yehovha.

13-14. Hikuya hi Yakobo 1:14, 15, kombisa swaku hi mhaka muni hi fanele hi tivonela loko hi langa leswi hi hungataka hi swona.

¹³ Swilo leswi hi hungataka hi swona swi fanisa kuyini ni swakudla? Loko hi li kudleni, hinga langa leswi hiswi petaka anon’wini wa hina. Kambe loko ho za hiswi minta, ahingehe langi leswi swakudla leswo swingata yendla swona ndzeni ka hina. Swakudla swa kahle swingahi yendla hiva ni lihanyu la kahle. Kambe swakudla leswinga liki kahle swingahahi vabyisa. Swinga yendleka hinga tekeli kuswi vona hi nkama wolowo, kambe hitaswi vona hi kufamba ka nkama.

¹⁴ Hi kufanana, loko haha langa leswi hingata hungata hi swona swi fana ni loko hi langa leswi hiswi petaka ka mimpimiso ya hina. Kusukela kolano, leswi hinga langa kuhungata hi swona swita khumba mapimiselo ya hina ni leswi hi titwisaka xiswona. Loko hi hungata hi swilo leswinene hita tsaka. Kambe loko hi hungata hi swilo swobiha, switahi vavisa. (Lerha Yakobo 1:14, 15.) Swinga yendleka hinga tekeli kuswi vona swaku leswi hi hungataka hi swona swahi vavisa. Kambe hi kufamba ka nkama switati komba. Hi mhaka leyo, Bibele lihi basopisa li ku: ‘Mingatshukeni mitixisa: Xikwembu axivungunyiwi; xin’wana ni xin’wana lexi munhu axibyalaka, atatshovela xona; lweyi abyalaka swa kutsakisa ntumbulukwini wa yena wa nyama, atatshovela swa kubola leswihumaka ka ntumbuluku wa yena wolowo.’ (Gal. 6:7, 8) I swa lisima hintamu akuva hi balekela kuhungata hi swilo leswi Yehovha aswi nyenyaka! — Pis. 97:10.

15. Hi yihi nyiko leyi Yehovha a lavaka leswaku hi tiphina ha yona?

¹⁵ Vanhu votala lava gandzelaka Yehovha vaswi tsakela kuhlalela JW Broadcasting^® kumbe xitichi xa hina xa televhizori hi kutirhisa interneti. Makwerhu mun’wana lweyi a vitaniwaka Marlyn a vule leswi: “JW Broadcasting yini pfune ngopfu leswaku ni va munhu lweyi a tsakeke naswona ninga hlalela hinkwaswu leswi kombisiwaka hikusa hinkwaswu swa pfuna. Loko ni ni xivundza kumbe ni hela ntamu, ni hlalela tinkulumi letini tiyisaka kumbe nongonoko wa wugandzeli la nimixo. Leswo swini yendla ni titwa ni li kusuhi na Yehovha ni nhlengeletanu ya yena. Lunghiselelo la JW Broadcasting li cince wutomi la mina hi kuhelela.” Kungava leswaku na wena wayi londzola nyiko leyi, leyi taka hi ka Yehovha? Handle ka nongonoko lowu humesiwaka hweti ni hweti, ka JW Broadcasting, hi kuma minongonoko yotala leyi yingiseliwaka ni leyi hlaleliwaka kupatsa ni mavhidiyo ya tinsimu leti tiyisaka, leti ungati hlalelaka u thlela u tiyingisela nkama wun’wana ni wun’wana.

16-17. Hi mhaka muni hi fanele hi pima nkama lowu hiwu hetaka nahi hungata naswona hingaswi yendlisa kuyini?

¹⁶ Hi fanele hi tivonela ka muxaka wa swilo leswi hi hungataka hi swona hi tlhela hi tivonela ka nkama lowu hiwu hetaka nahi hungata. Loko hinga tivoneli, nkama lowu hiwu hetaka hi kuhungata wutava wunyingi kutlula nkama lowu hiwu hetaka na hi tirhela Yehovha. Vanhu votala swava karhatela kupimela nkama loko va hungata. Makwerhu mun’wana wa 18 wa malembe lweyi a vitaniwaka Abigail, a te: “kuhlalela televhizori swini pfuna kuwisa minkarhalo loko dlambu li pela. Kambe loko ninga tivoneli ningaha heta nkama wa kuleha na ni hlalela televhizori.” Makwerhu mun’wana lweyi waha liki mumpsha lweyi a vitaniwaka Samuel a te: “Minkama yin’wana ni hlalela mavhidiyo yotala yokoma ka interneti. Ni sungula hi kuhlalela vhidiyo lin’we kambe nigama ni tsumbula swaku se ni hete 3 kumbe 4 wa mawora na ni hlalela mavhidiyo.”

 ¹⁷ Ungaswi kotisa kuyini kupima nkama lowu uwu hetaka na u hungata? Xa kusungula: U fanele u tiva leswaku u heta nkama muni na u hungata. Ringeta kutsala mawora hinkwawu lawa uma hetaka hi vhiki na u hungata. Tsala ka kalendariyu swaku u heta mawora mangaki na u hlalela televhizori, na u li ka internet kumbe na utha gemi ka foni ya wena. Loko u vona leswaku u heta nkama wa wunyingi hintamu, zama kuhlela leswi ungatawu tirhisisa xiswona nkama wa wena. Sungula hi vekela swilo swa lisima nkama wa swona, ivi u yendla xiboho xa leswaku uta heta nkama muni na u hungata. Kutani kombela Yehovha akuva aku pfuna kunamarhela leswi uswi boheke. Loko u yendla leswo, u tava ni nkama ni ntamu wa kutiyendlela djondzo ya wena ya Bibele, wugandzeli la ndjangu, kuya minhlanganwini ni kutirhela Yehovha ansin’wini. Naswona uta tsaka nkama lowu u hungataka hi kutiva swaku u rhangise Yehovha.

18-19. Hingaswi kombisa kuyini leswaku hi tinyiketele ka Yehovha hi kuhelela?

¹⁸ Loko a hete kutsala hi ta kuhela ka misava ya Sathana ni paradeyisi leyi taka, mupostola Petro a te: ‘Hikolaho varhandziwa, leswi milanguteleke swilo leswi, tikarhateni leswaku Xikwembu ximikuma na mingali na xivati ni xisandzu, kambe ximikuma na mili ni kurhula.’ (2 Pet. 3:14) Loko hi yingisa marito lawa, hi tlhela hi yendla hinkwaswu leswi hingaswi kotaka akuva hi hanya ni kugandzela Yehovha hi ndlela leyi ayi tsakelaka, hi kombisa leswaku hi tinyiketeli hi kuhelela ka yena.

¹⁹ Sathana ni misava ya yena vata tama va zama kuhi yendla hi rhangisa swilo swin’wana awuton’wini la hina, kuhambana ni kurhangisa Yehovha. (Luk. 4:13) Hambi ho kumana ni swikarhatu ahingata pfumelela nchumu kumbe munhu, ahi tshikisa kugandzela Yehovha. Hi tiyimisele kunyika Yehovha leswi swi fanelaka yena ntsena, kunga kutinyiketela kohlawuleka.