1. I mpsini leswi Yehovha angaswi yendlaka leswaku a hetisisa xikongomelo xa yena?

YEHOVHA anga va xin’wani ni xin’wani leswaku a hetisisa xikongomelo xa yena. Hi xikombiso minkama yin’wani a ve Mudjondzi, Mutiyisi ni Muchumayeli wa mahungu yotsakisa. (Esa. 48:17; 2 Kor. 7:6; Gal. 3:8) Kambe minkama yin’wani a tirhisa vanhu kuva va hetisisa a swikongomelo swa yena. (Mat. 24:14; 28:19, 20; 2 Kor. 1:3, 4) Yehovha angaha nyika mun’wani ni mun’wani wa hina wutivi ni ntamu lowu lavekaka leswaku hi kota kuhetisisa kurhandza ka yena. Hikuya hi matwisiselo ya vanhu votala lava djondzekeke, hinkwaswu leswi swa fambisana ni hlamuselo wa vito la Yehovha.

2. a) Hi mhaka muni minkama yin’wani hingaha kanakanaka swaku Yehovha wahi tirhisa? b) Hita kambisisa yini ka nhlokomhaka leyi?

² Hinkwerhu haswi navela kutirhisiwa hi Yehovha leswaku a hetisisa kurhandza ka yena, kambe van’wani vangaha kanakana swaku wa va tirhisa hi kakunene. Hi mhaka muni? Hi mhaka a va swikoti kumu yendlela hinkwaswu leswi a va navela kumu yendlela swona, hi mhaka ya ntanga, swiyimu ni wuswikoti la vona. Kasi van’wani va pimisa leswaku leswi vamu yendlelaka swona Yehovha swoswi swa yenela naswona aswi bohi kuva va yengetela ntirho wa vona. Ka djondzo leyi, hita vona leswi Yehovha angahi pfunisaka xiswona a kuva hi hetisisa xikongomelo xa yena. Hita gama hi kambisisa swikombiso swa le Bibeleni swa malandza ya yena yaxinuna ni yaxisati lawa ama pfuneke ma navela kuyendla ntirho wa yena ni kuma nyika ntamu. Hi wugamu, hita vona swaku hingamu pfumelelisa kuyini Yehovha ahi tirhisa.

3. Hikuya hi Vafilipiya 2:13 Yehovha angahi pfunisa kuyini kuva hi navela kuyendla ntirho wokarhi?

³ Lerha Vafilipiya 2:13. * Yehovha angaswi kota kuhi pfuna hi navela kuyendla ntirho wokarhi. Kambe angaswi yendlisa kuyini leswo? Hi xikombiso hingaha tsumbula swaku ku ni munhu wokarhi aBandleni lweyi a lavaka kupfuniwa kumbe ku ni ntirho wokarhi lowu u faneleke wu yendliwa. Kumbe madoda mangaha lerha papila leli taka hi Betele leli vulaka swaku kulaveka vanhu lavanga pfunisaka ka ndhawu yokarhi. Leswo swingahi yendla hi tivutisa swaku hinga pfunetisa kuyini? Kumbe swingaha yendleka hi nyikiwe ntirho wokarhi lowu tikaka naswona ahiswi tivi swaku hingaswi kota kuwu hetisisa. Kumbe loko hi heta kulerha tindzimana tokarhi ta Bibele swingaha yendleka hi tivutisa swaku hingaswi tirhisisa kuyini leswi hiswi djondzeke kuva hi pfuna van’wani. Yehovha angehi sindzisi kuyendla swilo leswi hi kalaka hingaswi lavi kambe loko a vona swaku hi pimisa hi kupfuna van’wani angahi yendla hi hetisisa leswi hiswi pimisaka.

4. Yehovha angaku nyikisa kuyini ntamu wa kuyendla ntirho wokarhi?

⁴ Yehovha angahi nyika ntamu wa kuyendla ntirho wokarhi. (Esa. 40:29) Kambe angaswi yendlisa kuyini? Hikuhi nyika moya wa yena wokwetsima leswaku wuhi pfuna kuyampsisa wuswikoti la hina. (Ekso. 35:30-35) Yehovha angaha tirhisa nhlengeletanu ya yena kuva ahi djondzisa kuyendla mintirho yokarhi. Loko ungaswi tivi kahle kuyendla ntirho wokarhi, kombela vaku pfuna. Naswona unga chavi kukombela Yehovha B’ava wa hina wa le matilweni lweyi a hananaka, akuva aku nyika “matimba lamakulu”, lama tlulaka lama tolovelekeke. (2 Kor. 4:7; Luk. 11:13) Bibele li ni swikombiso swa leswi Yehovha aswi yendleke kuva a djondzisa vavanuna ni vavasati hi kuva nyika ntamu ni kuva yendla va tsakela kuhetisisa kurhandza ka yena. A nkama hi kambisisaka swikombiso leswi, pimisa hi leswi Yehovha angaku tirhisisaka xiswona kufana na vona.

5. Hi djondza yini ka leswi Yehovha angamu tirhisisa xiswona Moxe ni ka nkama lowu anga langa kumu tirhisa ha wona akuva a ponisa vanhu va yena?

⁵ Yehovha a yendle leswaku Moxe a va muponisi wa Vaisrayele. Kambe aswi yendle nkama muni? Angaswi yendlanga nkama lowu Moxe a atiwa a faneleka hi leswi a ‘adjondzisiwe vutlhari hinkwabyu bya Vagibita’. (Mint. 7:22-25) Yehovha a tirhise Moxe ntsena loko se amu djondzise kuva munhu wa kurhula ni kutiveka hansi. (Mint. 7:30, 34-36) Yehovha a yendle leswaku Moxe a va ni xivindzi xa kuvulavula ni hosi ya matimba kutlula hinkwatu letinga tshama tiva kona aGibita. (Ekso. 9:13-19) Hinga djondza yini ka leswi Yehovha angamu tirhisisa xiswona Moxe ni ka nkama lowu anga langa kumu tirhisa ha wona? Hi djondza leswaku Yehovha a tirhisa lava lwelaka kumu tekelela ni lava va tshembelaka ka yena. — Filp. 4:13.

6. Hi djondza yini ka leswi Yehovha amu tirisiseke xiswona Barzilayi akuva a pfuna Hosi Davhida?

⁶ Loko kuhundze malembe yotala, Yehovha a tirhise Barzilayi leswaku a pfuna Hosi Davhida. Nkama lowu Davhida a abaleka n’wana wa yena Absalomu, yena ni lava aali na vona ava twa ndlala naswona ava karhalile va tlhela va va ni torha. Barzilayi lweyi se a agugile hi nkama wolowo, xikan’we ni lava ava li na yena va veke wutomi la vona akhombyeni leswaku va ya pfuna Davhida. Barzilayi anga pimisanga leswaku Yehovha a angahatamu tirhisa hi leswi se a agugile. Kuhambana ni leswo, hi kuswi rhandza a tirhise leswi aali na swona leswaku a pfuna malandza ya Yehovha lawa ama lava kupfuniwa.  (2 Sam. 17:27-29) Hi djondza yini ka leswo? Hi djondza swaku hambiloko hi gugile kumbe hi li vampsha, Yehovha angahi tirhisa akuva hi pfuna vamakwerhu lava pfumalaka, lava tshamaka kusuhi na hina kumbe ka matiko man’wana. (Swi. 3:27, 28; 19:17) Hambiloko hingaswi koti kuya hiyava pfuna hi kukongoma, hingaha humesa minyikelo ya kuseketela ntirho wa misava hinkwayu leyingata tirhiseliwa kupfuna vamakwerhu lavanga ni xilaveko. — 2 Kor. 8:14, 15; 9:11.

7. Yehovha amu tirhisise kuyini Simiyoni naswona hi mhaka muni leswo swihi tiyisa?

⁷ Yehovha a tshembise Simiyoni, wanuna wokarhi lweyi a agugile lweyi a atshama aYerusalema swaku a angata fa na angase muvona Mesiya. Xitshembiso lexi ximu tiyise hintamu Simiyoni hileswi a ani malembe yotala na a nyimela Mesiya. Yehovha amu katekisile hi mhaka lipfumelo ni kutiyisela ka yena. Siku lin’wana “hi kulerhisiwa hi moya” a yile atempeleni naswona a vone Yesu na ali xibebetani. Hi nkama wolowo, Yehovha a tirhise Simiyoni akuva a profeta hi xin’wanana lexi axita va Kreste. (Luk. 2:25-35) Hambi leswi angafa na Yesu angase sungula ntirho wa yena wa la misaveni, Simiyoni a tsakile hileswi Yehovha angamu tirhisa, naswona ka nkama lowutaka ata kuma minkateko yotala. Amisaveni leyimpsha, wanuna lweyi wotshembeka ata vona vanhu hinkwavu laha misaveni na va katekisiwile loko se kufuma Yesu. (Gen. 22:18) Na hina ha tsaka hi lunghelo lin’wana ni lin’wana leli Yehovha ahi nyikaka lona ka ntirho wa yena.

8. Yehovha angahi tirhisisa kuyini kufana na Barnaba?

⁸ Ankameni wa vapostola, wanuna wa timpsalu lweyi a avitaniwa Yosefa a atiyimisele kutirhisiwa hi Yehovha. (Mint. 4:36, 37) Swinga yendleka vapostola vamu chule swaku hi Barnaba, leswi vulaka “Lweyi atiyisaka van’wana” hi mhaka leswi a ativiwa hi kuchavelela van’wana. Hi xikombiso, loko Sawulo a ve Mukreste, vamakwerhu votala avamu chava hileswi a ativiwa hi kuxanisa lava ava kholwa ka Yesu. Kambe Barnaba a yile ka Sawulo ayamu pfuna ni kumu chavelela. Swinga yendleka Sawulo a khense ngopfu kutiyisiwa koloko. (Mint. 9:21, 26-28) Hi kufamba ka nkama madoda ya Yerusalema ama lava kuchavelela vamakwerhu lava ava tshama kule, aAntiyoka wa Siriya. Kungava leswaku avata rhuma mani? Akuna mun’wana handle ka Barnaba! Hi byeliwa leswaku Barnaba a yile kutani “avakhongotela hinkwavu kunamarhela Hosi ni kuyichivirikela hi mbilu”. (Mint. 11:22-24) Hi kufanana, namuntlha Yehovha angahi pfuna leswaku hi tiyisa vamakwerhu. Hi xikombiso, angahi pfuna leswaku hi chavelela lava feliweke hi varhandziwa va vona. Angahahi susumetela leswaku hi yendzela ni kufonela munhu lweyi a vabyaka kumbe lweyi a karhatekeke amoyeni akuva himu byela marito ya kumu chavelela. Kungava leswaku utamu pfumelela Yehovha akuva aku tirhisa kufana na Barnaba? — 1 Tes. 5:14.

9. Hi djondza yini ka leswi Yehovha amu pfuniseke xiswona Vasily akuva ava murisi lwenene wa ntlhambi wa Xikwembu?

⁹ Yehovha a pfune makwerhu mun’wana lweyi a vitaniwaka Vasily leswaku a kota kuva murisi lwenene wa ntlhambi wa Xikwembu. Loko Vasily a sungula kutirha tani hi doda a ani 26 wa malembe. Yena a achava hikusa a apimisa leswaku angana wuswikoti la kupfuna vamakwerhu abandleni, ngopfungopfu lava ava kumana ni swikarhato. Hambi leswo, a pfuniwe hi madoda lawa se akuli khale na ma tirha ni hi Xikola xa Wutirheli la Mfumu. Vasily a yendle hinkwaswu leswi angaswi kota akuva a kuyampsisa. Hi xikombiso, a tsale swilo swaswitsongo leswi a afanele a yampsisa ka swona. Hi katsongokatsongo a aya a yampsisa ka swilo leswi ivi kuchava ka yena kuya ku pumbeka. Swoswi a li: “Leswi aswi ni chavisa ka nkama lowuyani swoswi swani tsakisa. Loko Yehovha ani pfuna kukuma tsalwa la kahle la kuchavelela makwerhu wokarhi abandleni swani tsakisa hintamu.” Vamakwerhu vaxinuna, loko mi tekelela xikombiso  xa Vasily naswona mi pfumelela Yehovha akuva ami tirhisa, atami nyika wuswikoti la kuva mi yendla swilo swotala abandleni.

10. I mpsini leswi Abigayeli angaswi yendla naswona u djondza yini ka xikombiso xa yena?

¹⁰ Davhida ni vavanuna lava aali na vona ava lava kupfuniwa nkama a va baleka Hosi Sawulo. Vavanuna lava ava li na Davhida va ye ka Muyisrayele mun’we lweyi a aganyile lweyi a vitaniwaka Nabali va ya kombela swa kumiyeta nyoka. Lexingava yendla vanga chavi kumu yela hileswi ava sirhelela ntlhambi wa yena akhwatini. Kambe leswi Nabali a angana mhaka ni van’wana angava nyikanga nchumu. Leswo swimu kwatise ngopfu Davhida lakakuva a lava kudlaya Nabali ni vavanuna hinkwavu va kaya ka yena. (1 Sam. 25:3-13, 22) Kambe, Abigayeli nsati wa Nabali lweyi a asasekile a tlhela a tlhariha a kombise xivindzi hi kuya ka Davhida aya khisama ivi amu kombela leswaku angati kokeli nandzu wa ngati hi kudlaya Nabali ni vavanuna lava a atshama na vona. Hi lirhandzu, amu kombele leswaku mhaka leyi ayi tshikela Yehovha. Marito ya Abigayeli ya kutiveka hansi ni swiyendlo swa yena swa wutlhari swi khumbe mbilu ya Davhida, naswona leswo swimu yendle a vona leswaku wansati lweyi a arhumeliwe hi Yehovha. (1 Sam. 25:23-28, 32-34) Abigayeli alweli kuva ni wumunhu leli alitamu yendla a va wa lisima ka Yehovha. Hi kufanana, vamakwerhu vaxisati lavanga ni lirhandzu ni wutlhari vanga tirhisiwa hi Yehovha akuva va yaka mindjangu ya vona ni kutiyisa van’wana abandleni. — Swi. 24:3; Tito 2:3-5.

11. I mpsini leswi vana vaxisati va Xalumu vaswi yendleke naswona i vamani namuntlha va va tekelelaka?

¹¹ Loko se kuhundze malembe yotala, vana vaxisati va Xalumu va ve van’wana ka lava Yehovha angava tirhisa leswaku va pfunisa ka kupfuxeta muru wa Yerusalema. (Neh. 2:20; 3:12) Hambi leswi papayi wa vona aali hosana, ava tiyimisele kuyendla ntirho lowo wotika lowu awutava veka ngozini. (Neh. 4:15-18) Avanga fani ni vavanuna lava ava tekiwa vali va lisima va le Tekowa, lava kalaka vanga “ti tisanga tinhamu ta vona” antirhweni. (Neh. 3:5) Pimisa hi ntsako lowu vana va vaxisati va Xalumu vanga va na wona a nkama ntirho wa kuyaka wunga hela hi 52 wa masiku ntsena. (Neh. 6:15) Ni namuntlha, vamakwerhu vaxisati va tinyikela hi kuswi rhandza akuva va yendlela Xikwembu ntirho wohlawuleka, wa kufana ni kuyaka ni kulunghisa tindhawu leti tirhiseliwaka wugandzeli la Yehovha. Leswaku ntirho wu famba kahle, kulaveka vamakwerhu vaxisati lavanga ni wuswikoti, kuhiseka ni kutshembeka.

12. Yehovha angahi tirhisisa kuyini kufana na Tabita?

¹² Yehovha a susumetele Tabita leswaku atolovela kuyendla “mintirho leyinene, arhandza ni kunyika”, ngopfungopfu leswaku a pfuna vafelakazi. (Mint. 9:36) Leswi aali munhu wa timpsalu ni kuhanana, vanhu vanyingi va rilile nkama anga fa. Kambe va tsake ngopfu ankama mupostola Petro angamu pfuxa. (Mint. 9:39-41) Hi djondza yini ka xikombiso xa Tabita? Hi djondza leswaku aswina mhaka swaku hi vatsongo kumbe hi vakulu, hi vavanuna kumbe hi vavasati, hinkwerhu ka hina hingaswi kota kupfuna vamakwerhu. — Hev. 13:16.

13. Yehovha amu tirhisise kuyini makwerhu mun’wana lweyi a vitaniwaka Ruti naswona makwerhu lweyi a game a vula yini?

¹³ Makwerhu mun’wana waxisati lweyi a vitaniwaka Ruti, a anavela kunghena ka ntirho wa wumisionariyu kambe aani tingana. A nkama ahali mutsongo a famba hi munti ni munti a phakela matratado, naswona aanga hlweli loko a nghena ka munti. Yena a te: “Aniwu rhandza ntirho lowu hikakunene.” Kambe lexi aximu karhateka akuli kuvulavula ni vanhu a makaya ka vona ni kuva byela hita Mfumu wa Xikwembu. Hambi leswi a ani tingana, loko a tlhanganise 18 wa malembe ave mupfuli wa ndlela wa  nkama hinkwawu kumbe phayona. Hi 1946 a ye ka Xikola xa Bibele xa Giliyadi, ivi hi kufamba ka nkama aya tirhela a Havaí ni Japão. Yehovha amu tirhisile ngopfu akuva a chumayela ka matiko man’wana. Loko se kuhundze kolomu ka 80 wa malembe na ali ka ntirho lowu a vule leswi: “Yehovha hi yena ani tiyisaka nkama hinkwawu. Yena ani pfunile kuhlula tingana ta mina. Na kholwa swaku Yehovha anga tirhisa mun’wana ni mun’wana lweyi a tshembelaka ka yena.”

14. Hikuya hi Vakolosa 1:29, hi fanele hi yendla yini akuva hi tirhisiwa hi Yehovha?

¹⁴ Kusukela ka khale, Yehovha a tirhisa malandza ya yena hi tindlela ta ku hambanahambana. I mpsini leswi angataku yendla u va swona? Swi le ka wena leswaku u tiyimisele kufikela kwini kumu tirhela. (Lerha Vakolosa 1:29.) Loko u tiyimisela kutirhisiwa hi Yehovha, angahaku yendla u va muchumayeli wa kuhiseka, mudjondzisi wa kahle, muchaveleli lwenene, mutirhi lweyi anga ni wuswikoti, munghanu wa ntiyiso kumbe aku yendla swin’wana leswi lavekaka akuva a hetisisa kurhandza ka yena.

15. Hi kuya hi 1 Timotiya 4:12, 15, i mpsini leswi vamakwerhu vaxinuna lavaha liki vampsha va faneleke vaswi kombela ka Yehovha?

¹⁵ Swili yini hi n’wina vamakwerhu vaxinuna maha liki vampsha? Kuni xilaveko xa xikulu xa vavanuna lavanga ni ntamu akuva vata pfunisa ka mintirho yokarhi abandleni tani hi vapfunisi va madoda. Ka mabandla yotala madoda i manyingi kutlula vapfunisi va madoda. Aswita va kahle loko vamakwerhu vaxinuna lavaha liki vampsha va tinyiketela kuyendla mintirho leyi yengetelekeke abandleni. Minkama yin’wana vamakwerhu vokarhi vaxinuna va tibyela leswi: “Na yeneliseka hi kuva muchumayeli ntsena.” Loko na wena u titwisa xileswo, kombela Yehovha aku pfuna leswaku u navela kufanelekela kutirha tani hi mupfunisi wa madoda naswona aku nyika wuswikoti la kuyendla hinkwaswu ungaswi kotaka leswaku umu tirhela. (Ekl. 12:1) Wena wa laveka leswaku uta pfunisa! — Lerha 1 Timotiya 4:12, 15.

16. Hi fanele himu kombela yini Yehovha naswona hi mhaka muni?

¹⁶ Yehovha anga yendla leswaku u va leswi yena aswi lavaka akuva a hetisisa kurhandza ka yena. Kutani mu kombele leswaku aku pfuna u navela kumu tirhela a tlhela aku nyika ni ntamu. Hambi u li mukulu kumbe u li mutsongo, tirhisa nkama wa wena, ntamu ni swilo leswi ungana swona swa kufana ni wuswikoti kumbe male akuva u tirhela Yehovha swoswi. (Ekl. 9:10) Loko u kuma lunghelo la kuyendlela Yehovha ntirho wokarhi, unga tsutsumeli kuyala hi kupimisa leswaku awungeswi koti kuwu yendla. Hikakunene, i lunghelo kuyendla hinkwaswo leswi hingaswi kotaka leswaku hi dzunisa B’ava wa hina wa lirhandzu lweyi a faneliwaka hi kudzunisiwa!