NHLOKOMAKA YA DJONDZO 41
Tshama U Tshembekile ka ‘Nhlomulu Lowukulu’
“Rhandzani Yehovha, n’wina hinkwenu va kutshembeka ka yena! Yehovha wava hlayisa la votshembeka”. — PIS. 31:23.
LISIMU 129 Hita Ya Mahlweni Hi Tiyisela
LESWI HINGATASWI DJONDZA *
1-2. a) I mpsini leswi tihosi ta misava tingataswi tivisa kungali khale? b) Hi swihi swivutiso leswi hi faneleke hi kuma tinhlamulu ta swona?
PIMISA hi nkama lowu tihosi ta misava tingata nyikela xitiviso lexi kunga khale na hixi nyimelile, lexinge: “kurhulile aku na xa kukarhata”. Vata tibuma nava pimisa swaku misava yi rhulile naswona yi sirhelelekile. Tihosi ta misava tita lava hi pimisa swaku tona tingaswi kota kulunghisa swikarhatu hinkwaswu swa vanhu. Kambe tita ba hansi! Aku na ndlela ni yin’we leyi tingatayi tirhisa leswaku ti sivela leswingata ta. Hi mhaka muni? Hi mhaka Bibele li profete swaku lowo, “hi wona nkama lowu kuwonheka kungatavawela henhla hi xitshuketa, . . . vangakala vangaponi.” — 1 Tes. 5:3.
2 Ku ni swivutiso swa lisima leswi hi faneleke hi kuma tinhlamulu ta swona, swa kufana ni leswinge: Kuta humelela yini ka ‘nhlomulu lowukulu’? I mpsini leswi Yehovha angataswi nyimela ka hina ka nkama wolowo? Naswona hingati lunghiselelisa kuyini akuva hi kota kutshama nahi tshembekile ka nhlomulu lowukulu? — Mat. 24:21.
KUTA HUMELELA YINI KA ‘NHLOMULU LOWUKULU’?
3. Hikuya hi Nhlavutelo 17:5, 15-18, Yehovha atamu lovisisa kuyini “Babilona Lwenkulu”?
3 Lerha Nhlavutelo 17:5, 15-18. Babilona Lwekulu ata lovisiwa! Hilaha se hiswi voneke ha kona, tihosi ta misava atingeswi koti kutivhikela ka leswingata humelela hi nkama wolowo. Hi mhaka muni? Hikusa ‘Xikwembu xitanghenisa timbilwini ta tona leswaku tiyisa mahlweni makungu ya xona’. Hi wahi makungu wolawo? Makungu ya xona i kuhelisa wukhongeli hinkwalu kupatsa ni Vakreste va Mavunhwa. * Xita yendla swaku makungu ya xona ma va timbilwini ta “timhondzo ta khume” ta “xivandzana xopshuka”. Timhondzo ta khume ti nyimela mimfumu hinkwayu leyi seketelaka “xivandzana” kunga Nhlanganu wa Matiko. (Nhla. 17:3, 11-13; 18:8) Loko mimfumu yoleyo yi hlasela wukhongeli la mavunhwa, kuta va kuli xikombiso xa kusungula ka nhlomulu lowukulu. Swiyandlakalu leswi swa kuchavisa, swita fika na vanhu vangaswi pimisanga naswona swita khumba mun’wani ni mun’wani amisaveni.
4. a) I mpsini leswingaha yendlaka tihosi ta misava ti lovisa Babilona Lwenkulu? b) Lava a va li ka wukhongeli la mavunhwa, swingaha yendleka va kuyini?
4 Ahiswi tivi swaku i mpsini leswingata yendla swaku tihosi ta misava ti lovisa Babilona Lwenkulu. Swinga yendleka va pimisa swaku wukhongeli hinkwalu li kavanyeta kurhula naswona li tshamela kunghenela timhaka ta politika. Kumbe swingaha yendleka va pimisa swaku tinhlengeletanu ta wukhongeli ti ganye hintamu naswona ti ni matshomba yotala. (Nhla. 18:3, 7) Swinga yendleka loko kuhlaseliwa wukhongeli la mavunhwa kunga dlayiwi vanhu hinkwavu lavanga ka lona kambe kuhelisiwa tinhlengeletanu hinkwatu ta lona. Loko tinhlengeletanu toleto ti helisiwile, lava a va li ka tona vata tsumbula leswaku va kanganyisiwile hi varhangeli va tona naswona swingaha yendleka va zama kutihambanisa na tona hi kuhelela.
5. I mpsini leswi Yehovha aswi tshembiseke mayelana ni nhlomulu lowukulu naswona hi mhaka muni?
5 Bibele ali vuli leswaku kulovisiwa ka Babilona Lwenkulu kuta heta nkama muni kambe hina haswi tiva swaku aswingata heta nkama wa kuleha. (Nhla. 18:10, 21) Yehovha a tshembise swaku atama hunguta masiku ya nhlomulu akuva “vahlawuliwa” va yena ni vagandzeli va ntiyiso vata kota kupona. (Marka 13:19, 20) Kambe i mpsini leswi Yehovha angata lava leswaku hiswi yendla loko nhlomulu lowukulu wu sungulile na haha nyimela nyimpi ya Armajedoni?
TAMA U KHOMELELA KA WUGANDZELI LA NTIYISO
6. Hi mhaka muni swinga yenelanga kukala hinga tipatsi ka wukhongeli la mavunhwa?
6 Hilaha se hiswi voneke ka nhlokomhaka leyinga hundza, Yehovha a lava leswaku vagandzeli va yena vanga tipatsi ni wukhongeli la mavunhwa. Kambe kukala hinga tipatsi ni wukhongeli la mavunhwa aswi yenelanga. Hi fanele hi tiyimisela kukhoma switiya ka wugandzeli la ntiyiso. Ku ni tindlela timbirhi ta kuswi yendla leswo. Ahiti kambisiseni.
Hinga tshikeni kuya mintlhanganwini, hambiloko hi kumana ni swiyimu swa kukarhata (Vona paragrafu 7) *
7. a) Hingaswi kotisa kuyini kukhomelela ka minawu ya Yehovha ya kululama? b) Hikuya hi Vaheveru 10:24, 25, hi mhaka muni hi fanele hi tama hi hlangana, naswona hi mhaka muni swi li swa lisima swoswi?
7 Ya kusungula, hi fanele hi hanya hi minawu ya Yehovha ya kululama minkama hinkwayu. Naswona ahinge tshuki hi seketele mahanyelo ya kubiha ya misava leyi. Hi xikombiso, ahingema seketeli mahanyelo yobiha hi tlhelo la masangu, kufana ni loko wanuna a tekana ni wanuna kuloni kumbe wansati a tekana ni wansati kuloni kumbe mahanyelo man’wani ya wugeyi. (Mat. 19:4, 5; Rhom. 1:26, 27) Ya wumbirhi, ahi tameni hi gandzela Yehovha xikan’we tani hi Vakreste. Swoleswo hingaswi yendla kun’wani ni kun’wani lomu swi kotekaka kona, kungahava Ndlwini ya Hina ya Wugandzeli, kaya ka makwerhu kumbe ka ndhawu yin’wani na hi tumbelile. Hambi koba lexi dumaka, ahinge tshiki kuhlangana leswaku hi ngandzela Yehovha. Kuvula ntiyiso, hi fanele hi tama hi hlangana ‘ngopfu ngopfu leswi hivonaka leswaku siku la Hosi [Yehovha] liya litshunela.’ — Lerha Vaheveru 10:24, 25.
8. Hi kwihi kucinca loku kunga ha vaka kona ka rungula la hina ankameni lowu taka?
8 Ka nhlomulu lowukulu swinga yendleka rungula leli hili chumayelaka li cinca. Swoswi, hi chumayela mahungu yotsakisa ya Mfumu naswona hi zama kupfuna vanhu va tiva ntiyiso. Kambe ankameni lowu taka, hita chumayela rungula leli vavaka. Bibele li fanisa rungula lolelo ni marhalani. (Nhla. 16:21) Swingaha yendleka hi chumayela swaku kungali khale misava leyi ya Sathana yita helisiwa hi kuhelela. Ka nkama wolowo, hitaswi tiva swaku i mpsini leswi hingataswi chumayela ni leswaku hitaswi chumayelisa kuyini. Kunga va leswaku hita tama hi chumayelisa xiswoswi hi chumayelisaka xiswona kumbe hita tirhisa tindlela tin’wani? Ahiswi tivi, hitaswi vona ka nkama wa kona. Aswi na mhaka swaku hita va hi chumayelisa kuyini, kambe lexi hixi tivaka hi leswaku hita va ni lunghelo la kuchumayela rungula la Yehovha la kuyavanyisa! — Ezek. 2:3-5.
9. I mpsini leswi tihosi ta misava tingahaswi yendleka loko titwa rungula la hina, kambe hi fanele hi tiyiseka hi yini?
9 Swingaha yendleka rungula la hina li yendla tihosi ta misava tizama kuhi tshikisa kuchumayela. Hi nkama wolowo, hita lava kuseketeliwa hi Yehovha, kufana ni leswi a hi seketelaka ka ntirho wa hina namutlha. Hinga tiyiseka swaku Xikwembu xi ta hi nyika ntamu lowu hiwu lavaka swaku hi kota kuhetisisa kurhandza ka xona. — Miki. 3:8.
TSHAMA NA U LUNGHEKELE SIKU LELI VANHU VA YEHOVHA VANGATA HLASELIWA!
10. Hikuya hi Luka 21:25-28, vanhu votala vata titwisa kuyini hi swilo leswingata humelela ka nhlomulu lowukulu?
10 Lerha Luka 21:25-28. Ka nhlomulu lowukulu, vanhu vata hlamala loko va vona swaku swilo hinkwaswu leswi avaswi tshembile swi mbombile. Ka nkama lowu wa kukarhata kutlula minkama hinkwayu, vanhu vata vaviseka ni kuchava swaku vata dlayiwa. (Sof. 1:14, 15) Hi nkama wolowo, wutomi lita ya li tika ngopfu hambi ka vanhu va Yehovha. Leswi hingata tama hinga seketeli misava, swingaha yendleka hi kumana ni swikarhatu swotala. Swingaha yendleka hi pfumala ni swilo swokarhi leswi hiswi lavaka.
11. a) Hi mhaka muni tihosi ta misava tita lava kuhlasela Timboni ta Yehovha loko wukhongeli la mavunhwa se li helisiwile? b) Hi mhaka muni hinga fanelanga hi chava nhlomulu lowukulu?
11 Swingaha yendleka vanhu lava wukhongeli la vona lingata va li helisiwile va kwata hi kuvona swaku wukhongeli la Timboni ta Yehovha laha li kona. Swoleswo swita pfuxa hasahasa naswona swingaha yendleka vaswi hangalasa ka interneti. Tihosi ta misava ni mufumi wa tona Sathana vatahi nyenya hileswi hingatava haha li kona. Hikusa vata va va tsandzekile kuhelisa wukhongeli hinkwalu amisaveni. Kutani se va ta djikisa matlharhi va komba hina. Ka nkama wolowo tihosi ta misava tita va Goge wa Magoge. * Kutani, tita hlangana leswaku ti yendla hinkwaswu leswi tingaswi kotaka akuva tihlasela vanhu va Yehovha. (Ezek. 38:2, 14-16) Hingaha sungula kukarhateka loko hi pimisa hi swilo leswingata humelela ka nhlomulu lowukulu, ngopfungopfu leswi hi kalaka hingaswi tivi hi kuhelela leswangata humelela. Leswi Yehovha angatahi nyika nkongomiso lowungatahi sirhelela, ha tiyiseka swaku ahingata chava ka nhlomulu lowukulu. (Pis. 34:19) Hitaswi kota ‘kuwololoka hitlakusa tinhloko ta hina’ hikusa haswi tiva swaku ‘kukutsuliwa ka hina kule kusuhi.’ *
12. Nandza lweyi “atshembekeke ni kutlhariha” ahi pfunisa kuyini leswaku hi lunghekela swilo leswingata humelela ka nkama lowu taka?
12 “Mutirhi kumbe nandza lweyi atshembekeke ni kutlhariha” ahi lungiselela leswaku hita kota kutshama nahi tshembekile ka nhlomulu lowukulu. (Mat. 24:45) Swoleswo aswi yendla hi tindlela ta ku hambanahambana, hi xikombiso a tirhise makongresu ya 2016 kuya ka 2018. Tinkulumi leti vekiweke ka makongresu lawa tihi pfunile kuyampsisa wumunhu la hina leswaku hita lunghekela siku la Yehovha lelinga kusuhi. Ahi tlheleni hi bula hi wumunhu lolelo leli lavaka kuyampsisiwa.
TAMA U TIYISA KUTSHEMBEKA, XIVINDZI NI KUTIYISELA KA WENA
Tilungiseleli swoswi leswaku uta pona ka “nhlomulu lowukulu” (Vona maparagrafu 13-16) *
13. Hingaswi kotisa kuyini kutiyisa kutshembeka ka hina ka Yehovha naswona hi mhaka muni hi fanele hi swiyendla swoswi?
13 Kutshembeka. Nhlokomhaka ya kongresu la 2016 ayi ku: “Tshama U Tshembekile Eka Yehovha!” Ka kongresu leli hi djondze swaku loko hi va ni wuxaka la le kusuhi na Yehovha hitaswi kota kutshembeka ka yena. Hi khumbuziwe swaku hingaswi kota kuva kusuhi hintamu na Yehovha loko hi khongela swi suka mbilwini hi tlhela hi djondza Rito la yena hi kuhiseka. Loko hi yendla leswo hita kota kuhlula hambi swikarhatu swaswikulu awuton’wini. Leswi misava ya Sathana yinga kusuhi ni kuhelisiwa, hita kumana ni swikarhatu swaswikulu leswingata ringa kutshembeka ka hina ka Xikwembu ni ka Mfumu wa xona. Swinga yendleka vanhu va tama vahi poyila kumbe vahi hleka. (2 Pet. 3:3, 4) Xivangelo xin’wani lexingata yendla vahi poyila hileswi hi kalaka hinga seketeli misava ya Sathana. Hi fanele hi tiyisa kutshembeka ka hina swoswi akuva hita kota kutshama nahi tshembekile ka nhlomulu lowukulu.
14. a) Kuta cinca yini hi vamakwerhu lava rhangelaka? b) Hi mhaka muni swita lava hi tshembeka ka Yehovha ka nkama wolowo?
14 Ka nhlomulu lowukulu kuta va ni kucinca ka vamakwerhu lava rhangelaka laha misaveni. Kuta fika nkama lowu vatotiwa hinkwavu lavaha liki kona laha misaveni, vangata hlengeletiwa amatilweni leswaku vata katseka ka nyimpi ya Armajedoni. (Mat. 24:31; Nhla. 2:26, 27) Leswo swi vula leswaku Ntlawa Lowu Rhangelaka wuta va wungaha li kona laha misaveni kambe xitshungu lexikulu xita tama xi hlelekile. Vamakwerhu van’wana lava fanelekaka lava lumbaka tinyempfu tin’wana hi vona vangata rhangela. Swita lava hi kombisa swaku ha tshembeka ka Yehovha hi kuva seketela ni kulandza hinkwaswu leswi vahi byelaka swona. Loko hinga yendli leswo ahingata pona.
15. Hi fanele hi yendla yini swaku hi kota kutiyisela naswona hi mhaka muni swi li swa lisima kuva hiswi yendla swoswi?
15 Kutiyisela. Nhlokomhaka ya kongresu la 2017 ayi ku: “U nga karhali!” Kongresu leli lihi pfune kutama hi kota kutiyisela swikarhatu leswi hi kumanaka na swona. Hi djondze leswaku hambiloko swiyimu swi tika hingaswi kota kutiyisela. Swo lava hi tshemba Yehovha ntsena. (Rhom. 12:12) Hinga tshuki hi khohlwa xitshembiso xa Yesu lexinge: “Lweyi angatatiyisela kufika makumu, hi yena lweyi angataponisiwa.” (Mat. 24:13) Ka xitshembiso lexi, hi byeliwa swaku hi fanele hi tshama hi tshembekile hambi hi kumana ni swikarhatu. Loko hi kota kutiyisela ka mindzingo hinkwayu swoswi, lipfumelo la hina lita ya li tiya na nhlomulu lowukulu wungese sungula.
16. I mpsini leswingahi yendlaka hi va ni xivindzi naswona hi fanele hi yendla yini swoswi leswaku hi yengetela xivindzi xa hina?
16 Xivindzi. Nhlokomhaka ya kongresu la 2018 ayi ku: “Vana ni Xivindzi”! Tinkulumi letinga vekiwa ka kongresu leli tihi pfune kukhumbuka swaku kuva ni xivindzi aswi yi hi wuswikoti leli hinga na lona. Kufana ni leswi hi kotaka kutiyisela loko hi tshemba Yehovha hi ta va ni xivindzi xa ntiyiso ntsena loko himu tshemba. Hinga yendla yini swaku hi djondza kutshemba Yehovha? Hi fanele hi djondza Bibele siku ni siku hi tlhela hi yanakanyisisa hi leswi Yehovha ava ponisiseke xiswona vanhu va yena ankameni lowunga hundza. (Pis. 68:20; 2 Pet. 2:9) Loko tihosi ta misava tihi hlasela ka nhlomulu lowukulu, swita lava hi va ni xivindzi naswona himu tshemba hintamu Yehovha. (Pis. 112:7, 8; Hev. 13:6) Loko hi tshemba Yehovha swoswi, hita va ni xivindzi loko hi hlaseliwa hi Goge. *
NYIMELA KUTSHUNXIWA NA U NI KUNAVELA LOKUKULU
Kungali khale Yesu ni masochwa ya yena ya le tilweni va ta helisa valala va Xikwembu ka nyimpi ya Armajedoni! (Vona paragrafu 17)
17. Hi mhaka muni hinga fanelanga hi chava Armajedoni? (Vona xifaniso ka tluka lorhanga.)
17 Hilaha se hiswi voneke ha kona ka nhlokomhaka leyinga hundza, votala va hina hi psaliwe ndzeni ka masiku yawungamu naswona hi ni ntshembo wa kupona ka nhlomulu lowukulu. Nyimpi ya Armajedoni hi yona yingata helisa misava ya Sathana, kambe hina ahi chavi nchumu. Hi mhaka muni? Hi mhaka nyimpi leyi ahi ya hina, i ya Yehovha. (Swi. 1:33; Ezek. 38:18-20; Zak. 14:3) Loko nkama wu fikile, Yehovha ata rhuma Yesu leswaku a rhangela masonchwa ya yena a nyimpini. Yesu ata va ni vatotiwa lava pfuxiweke xikan’we ni tintsumi totala naswona vata lwa na Sathana, madimoni ni masonchwa ya yena ya laha misaveni. — Dan. 12:1; Nhla. 6:2; 17:14.
18. a) I mpsini leswi Yehovha angahi tshembisa swona? b) Nhlavutelo 7:9, 13-17 yihi tiyisekisa kuyini hi leswingata humelela ka nkama lowu taka?
18 Yehovha a tshembise a ku: “Aku na tlhari lelingata yendleliwa kulwa na wena lelingata humelela”. (Esa. 54:17) “Xitshungu lexikulu” xa vagandzeli votshembeka va Yehovha xita huma hi ka nhlomulu lowukulu na xi hanya, naswona xita tama xi tirhela Yehovha. (Lerha Nhlavutelo 7:9, 13-17.) Bibele lihi nyika swivangelo swotala swa kuva hi kholwa leswaku hita ponisiwa ka nkama lowu taka. Haswi tiva swaku “Yehovha wava hlayisa la votshembeka”. (Pis. 31:23) Hinkwavu lava rhandzaka Yehovha vata tsaka loko vamu vona a basisa vito la yena. — Ezek. 38:23.
19. Hi swihi swilo swohlamalisa leswi hingataswi kuma kungali khale?
19 Pimisa hileswi 2 Timotiya 3:2-5 ayita vula swona loko ayi vulavula hi vanhu lavangata hanya amisaveni leyimpsha na vanga hlohloteliwi hi Sathana. (Vona kwadru lelinge: “ Leswi Vanhu Vangata Va Xiswona Ankameni Lowu Taka.”) Makwerhu George Gangas, * lweyi aali mun’we wa Ntlawa Lowu Rhangelaka, a hlamusele mhaka leyi hi ndlela leyi: “Misava ayita va ndhawu yotsakisa loko vanhu hinkwavu ava gandzela Yehovha. Kungali khale hita kuma lunghelo la kuhanya amisaveni leyimpsha.” Hikakunene lowu i ntshembo wohlamalisa wa kuva hi hanya hilaha kungaheliki.
LISIMU 126 Hitekani, Nyimani Mi Tiyile, Mi va ni Matimba
^ par. 5 Hina haswi tiva swaku kungali khale vanhu hinkwavu vata weliwa hi ‘nhlomulu luwukulu’. Kuta humelela yini hi vanhu va Yehovha hi nkama wolowo? I mpsini leswi Yehovha aswi yimeleke ka hina? I mpsini leswi hi faneleke hiswi yendla swoswi leswingatahi pfuna leswaku hi kota kutshama hi tshembekile ka nhlomulu lowukulu? Hita kuma tinhlamulu ta swivutiso leswi ka djondzo leyi.
^ par. 3 MARITO LAMA HLAMUSELIWEKE: Vakreste va Mavunhwa i vanhu hinkwavu lava tivulaka Vakreste kambe va kalaka vanga hanyi hi minawu ya Xikwembu.
^ par. 11 MARITO LAMA HLAMUSELIWEKE: Rito lelinge Goge wa Magoge (kumbe Goge) li nyimela ntlawa wa matiko lowungata hlangana leswaku wu hlasela vanhu va Yehovha ka nhlomulu lowukulu.
^ par. 11 Leswaku u kuma leswi yengetelekeke mayelena ni leswi swingata yendleka loko Armajedoni yingase sungula, vona ndzima 21 ka buku leyinge: Mfumu Wa Xikwembu Wa Fuma! (hi Xitsonga) Akuva u kuma leswi yengetelekeke mayelana ni kuhlasela ka Goge wa Magoge ni leswi Yehovha angataswi yendla leswaku a sirhelela vanhu va yena ka nkama wa Armajedoni, vona ndzima 17 na 18 ka buku leyinge: A Adoração Pura de Jeová É Restaurada!
^ par. 16 Ka kongresu la 2019 leyinga ni nhlokomhaka leyinge: ‘Lirhandzu Ali Heli’! Hi tiyisekisiwa swaku hingaswi kota kutshama na hi sirhelelekile loko hi tshemba Yehovha Musirheleli wa hina lweyi ahi rhandzaka. — 1 Kor. 13:8.
^ par. 19 Vona nhlomhaka leyinge: “Mintirho Yakwe Ya N’wi Landzela” ka Xihondzo Xo Rindza xa 01 ka Dezembro wa 1994.
^ par. 65 NHLAMUSELO WA SWIFANISO: Ntlawa nyana wa Timboni ta Yehovha na wu khoma mintlhanganu akhwatini hi xivindzi hi nkama wa nhlomulu lowukulu.
^ par. 67 NHLAMUSELO WA SWIFANISO: Xitshungu lexikulu xa vagandzeli va Yehovha votshembeka xi huma na xi ponile ka nhlomulu lowukulu naswona na xi tsakile.
