MUKAMBISISI wa ta maxelo a kambela xifaniso xokarhi lexi kombisaka swaku maxelo mata va ma tshamise kuyini. Kutani a vona leswaku kuta xidzedze lexikulu, xi kongoma lomu kutshamaka vanhu votala ngopfu. Leswi a karhatekaka hi mhaka leyi, a yendla hinkwaswu leswi angaswi kotaka leswaku a tivisa vanhu na nkama waha pfumela.

Hi kufanana, swoswi Yehovha a tivisa vanhu hinkwavu lava tshamaka misaveni leswaku kuta “xidzedze” lexikulu lexi chavisaka kutlula swidzedze hinkwaswu leswinga tshama swiva kona. Aswi yendlisa kuyini leswo? Naswona hi mhaka muni hi tiyiseka leswaku a tivisa vanhu na nkama waha li kona? Leswaku hi kuma tinhlamulu ahi kambeleni leswi Yehovha aswi yendleke akuva a basopisa vanhu ankameni lowunga hundza.

Aminkameni ya Bibele, makhambi yotala Yehovha a asungula hi kutivisa vanhu loko kuta “xidzedze” kumbe loko a lava kuyavanyisa vanhu lava kalaka vanga yingisi minawu ya yena hi maxivomu. (Swi. 10:25; Yer. 30:23) Ka xiyimu xin’wani ni xin’wani a asungula hi kubasopisa vanhu vakona na kaha sale nkama wotala naswona aava byela leswi ava fanele vaswi yendla akuva vata kota kupona. (2 Tiho. 17:12-15; Neh. 9:29, 30) Leswaku a pfuna vanhu kuva va cinca, a atirhisa malandza ya yena yotshembeka ya laha misaveni leswaku ma tivisa wuyavanyisi la yena ni kubyela vanhu leswaku va fanele va ncinca hi xihantla. — Amosi 3:7.

Nowa i mun’we wa lava Yehovha angava tirhisa leswaku va tivisa vanhu hi ta wuyavanyisi la yena. Kuringana malembe yotala a abyela vanhu hi xivindzi swaku misava hinkwayu yita lovisiwa hi ndhambi. Aswi lava xivindzi kuchumayela vanhu va le nkameni wa yena hikusa a va ni mahanyelo ya kubiha naswona a va ni tihanyi. (Gen. 6:9-13, 17) Nowa a atshamela kuva byela leswi ava fanele vaswi yendla akuva vata pona ka ndhambi, hi mhaka leyo a vitaniwe ‘Mudjondzisi kumbe muchumayeli wa leswolulama’. — 2 Pet. 2:5.

Hambileswi Nowa a yendleke leswi angaswi kota akuva a pfuna vanhu va le nkameni wa yena, vona avanga na mhaka ni rungula la Xikwembu naswona avanga kombisi lipfumelo. Vuyelo la kona hileswaku va file loko Ndhambi “yifika, kutani yivakhukhuza hinkwavu.” (Mat. 24:39; Hev. 11:7) Anga kona ni mun’we lweyi aata sola ivi a vula swaku Xikwembu axiva tivisanga na nkama waha li kona.

Minkama yin’wana Yehovha a abasopisa vanhu na kuyo sala nkama nyana wawutsongo leswaku “xidzedze” kumbe wuyavanyisi la yena li sungula. Hambileswo, a atiyiseka swaku nkama wakona wa yenela akuva vanhu lava va lavaka kupona va cinca. Hi xikombiso, a nkama aalava kutisa makhombo ya 10 a sungule hi kutivisa Vagibita na makhombo ya kona mangase fika. Ka khambi lin’wana, loko a lava kutisa khombo lawu-7 a rhumele Moxe na Aroni leswaku va ya tivisa Faro ni malandza ya yena swaku akuta ta mpfula yayikulu ya marhalani naswona ayita wonhetela. Kutani, leswi mpfula ya marhalani ayita na hi siku leli landzelaka, kungava leswaku nkama lowu awu salile awuta yenela akuva va kuma ndhawu ya kutumbela ka yona? Bibele li li: “Mutirhi mun’wana ni mun’wana wa Faro, lweyi a chavaka rito la Yehovha, a tisa vatirhi ni swifuyo swa yena ndlwini hi kuhantlisa, kambe hinkwavu lava kalaka vanga yingisanga rito la Yehovha va tshike vatirhi ni swifuyo swa vona handle amasin’wini.” (Ekso. 9:18-21) Hikakunene, Yehovha a nyikele switiviso swotala naswona lavangaswi tekela nhlokweni ava luzanga swilo swotala kufana ni lava kalaka vanga yingisanga.

Faro ni malandza ya yena, na vona va basopisiwile na khombo lawu-10 lingase fika kambe hi kuphunta ka vona, ava yingisanga. Hi mhaka leyo, vana va vona va madjaha va mativula va file. Swoleswo aswi vava ngopfu. (Ekso. 11:4-10; 12:29) Phela, avata ve vaswi kotile kuyingisa kaha li ni nkama, hikusa Moxe a tekele kubyela Vayisrayele mayelana ni khombo  leli ali li kuteni ni leswi ava fanele vaswi yendla leswaku mindjangu ya vona yi pona. (Ekso. 12:21-28) Kambe i vangaki lavanga yingisa leswi Moxe angaswi vula? Swinga yendleka aku ni Vayisrayele lava tlulaka 3 milhões kupatsa ni ntlawa wun’wana lowukulu wa vanhu vo hambanahambana va matiko man’wana lava van’wana ka vona ava li Vagibita. Hinkwavu va ponile loko Yehovha a tisa wuyavanyisi la yena ivi va suka atikweni la Gibita. — Ekso. 12:38.

Hilaha hiswi voneke ha kona ka swikombiso leswi, minkama hinkwayu Yehovha a nyika vanhu nkama lowu yenelaka loko a lava kutisa wuyavanyisi. (Det. 32:4) Hi mhaka muni Yehovha a yendla swoleswo? Mupostola Petro a hlamusele swaku Yehovha ‘anga lavi leswaku ni mun’we wa hina alahleka, kambe alava leswaku hinkwavu vata kuhundzukeni’. (2 Pet. 3:9) Hikakunene Xikwembu xi ni mhaka ni vanhu. Xi lava swaku vanhu va hundzuka na xi ngase tisa wuyavanyisi la xona. — Esa. 48:17, 18; Rhom. 2:4.

Ni namuntlha vanhu hinkwavu va fanele vaxi tekela nhlokweni xitiviso xa lisima lexi nyikeliwaka amisaveni hinkwayu, naswona va fanele vaswi yendla hi xihantla. Loko Yesu aha li laha misaveni a nyikele xitiviso xa leswaku misava leyi ya kubiha yita helisiwa ka nhlomulu lowukulu. (Mat. 24:21) Mayelana ni wuyavanyisi la nkama lowu taka, Yesu a vule wuprofeta leli hlamuselaka kahle swilo leswi aswita humelela leswaku a pfuna valandzeli va yena kutiva nkama lowu aswita humelela hi wona. Yesu a vulavule hi swiyendlakalu leswikulu leswi humeleleka namuntlha amisaveni hinkwayu. — Mat. 24:3-12; Luk. 21:10-13.

Hikuya hi wuprofeta leli, Yehovha a rhamba vanhu hinkwavu leswaku vamu yingisa ni kumu tirhela. A navela leswaku vanhu lava yingisaka va hanya wutomi la kuyampsa swoswi ivi va kuma minkateko ankameni lowutaka, amisaveni leyimpsha ya kululama. (2 Pet. 3:13) Akuva a pfuna vanhu leswaku va kombisa lipfumelo ka switshembiso swa yena, Yehovha ava nyika rungula la yena lelingata ponisa wutomi la vona. Rungula la kona i ‘Evhangeli . . . ya Mfumu’ leyi Yesu a vuleke swaku “yitachumayeliwa misaveni hinkwayu, tani hi vumboni ka vanhu va matiko hinkwawu.” (Mat. 24:14) Xikwembu xi hlengelete vagandzeli va xona va ntiyiso akuva va nyikela “wumboni” kumbe rungula la xona, leli se li fikeke amatikweni ya kolomu ka 240. Yehovha a lava leswaku vanhu votala vaxi tekela nhlokweni xitiviso xa yena akuva vata pona ka “xidzedze” lexi taka, kunga wuyavanyisi la yena la kululama. — Sof. 1:14, 15; 2:2, 3.

Ahi kanakani swaku Yehova a nyika vanhu nkama lowu yeneleke loko a nyikela xitiviso xokarhi xa wuyavanyisi hikusa hi ni swikombiso swotala leswi tiyisekisaka mhaka leyi. Kambe, xivutiso lexi salaka hi lexi: Kungava leswaku vanhu vataxi yingisa na nkama waha li kona? Onge hinkwerhu ka hina vachumayeli va Rito la Xikwembu hinga tinyimisela kupfuna vanhu votala hilaha hinga kotaka ha kona leswaku vata pona loko kulovisiwa misava leyi yobiha.