NHLOKOMHAKA YA DJONDZO 38
“Tanani ka Mina, . . . Nitamiwisisa”
“Tanani ka mina, n’wina hinkwenu lavakarhaleke, ni lavatikeliwaka, nitamiwisisa.” — MAT. 11:28.
LISIMU 38 Xikwembu Xitaku Tiyisa
LESWI HINGATASWI DJONDZA *
1. Hikuya hi Matewu 11:28-30, hi xihi xitshembiso lexi Yesu axi yendleke?
YESU a yendle xitshembiso xohlamalisa ka xitshungu lexi aximu yingisela loko a ku: “Tanani ka mina” kutani “nitamiwisisa”. (Lerha Matewu 11:28-30.) Xitshembiso lexi i xa ntiyiso. Hi xikombiso, ahi voneni leswi Yesu aswi yendleleke wansati lweyi a ani mavabyi yochavisa.
2. I mpsini leswi Yesu angaswi yendla ka wansati lweyi a avabya?
2 Wansati lweyi a akarhatekile naswona a alava kupfuniwa. A ye ka vadahi votala na a pimisa swaku ata dahiwa kambe aswi kotekanga, kuhundze 12 wa malembe waha hlupheka naswona hikuya hi Nawu wa Moxe, a anyamile. (Lev. 15:25) Kutani, a twe swaku Yesu a ani wuswikoti la kudaha vanhu, hiloko amu lavetela leswaka ata pfuneka. Loko amu kumile a khumbe ponta ya nguvu ya yena ivi a hanya hi kuhantlisa. Kambe Yesu angayomu daha ntsena wansati lweyi, a tlhele amu komba lirhandzu ni xihlonipho. Hi xikombiso, loko a vulavula na yena a te “n’wananga” leswi kombisaka swaku aamu rhandza ni kumu hlonipha. Hikakunene wansati lweyi a titwe na a pepile ni kutlhela a kuma ntamu. — Luk. 8:43-48.
3. Hita hlamula swivutiso swihi ka djondzo leyi?
3 Vona swaku wansati lweyi hi yena anga sungula ni mapimu ya kuya ka Yesu. Leswi swa fana ni leswi yendlekaka nyamutlha, hi hina hi faneleke hi ya ka Yesu. Kambe leswi aswi vuli swona swaku loko hiya ka Yesu atahi hanyisa hi singita loko hi vabya. Hambileswo, a tama ahi rhamba a ku: “Tanani ka mina, . . . nitamiwisisa”. Ka djondzo leyi hita hlamula 5 wa swivutiso leswi landzelaka: Hi fanele hi yendla yini leswaku hi ya ka Yesu? Swi vula yini kurhwala ndzhwalu wa Yesu? I mpsini leswi hingaswi djondzaka ka Yesu? Hi mhaka muni ntirho lowu Yesu ahi nyikeke wuhi rhulisa timbilu? Naswona hingaswi kotisa kuyini kutama hi wisisiwa hi ndzhwalu wa Yesu?
“TANANI KA MINA”
4-5. Hi tihi tindlela tin’wana leti hinga yaka ka Yesu ha tona?
4 Ndlela ya kusungula ya kuya ka Yesu i kudjondza leswi angaswi yendla ni kuswi vula hilaha hinga kotaka hi kona. (Luk. 1:1-4) I wutihlamuleli la hina kudjondza leswi Bibele liswi vulaka hi Yesu. Xin’wani lexi hingaxi yendlaka i kuyendla xiboho xa kutsakamisiwa kutani hiva vadjondzisiwa va yena.
5 Ndlela yin’wani ya kuya ka Yesu i kuyela madoda ya bandla loko hi lava kupfuniwa. Yesu a tirhisa tinyiko letinga vanhu leswaku a hlayisa tinyempfu takwe. (Efe. 4:7, 8, 11; Yoh. 21:16; 1 Pet. 5:1-3) Hi hina hi faneleke hi ya ka vona hiya kombela kupfuniwa. Ahi fanelanga hi pimisa swaku madoda mata vona leswinga timbilwini ta hina kumbe kutiva leswi hiswi lavaka na hingama byelanga nchumu. Vona leswi vuliweke hi makwerhu lweyi a vitaniwaka Julian. Yena a te: “Ni boheke kuhuma aBetele hileswi ani vabya kutani munghanu wa mina ani byele leswaku ningaha kombela madoda ya bandla akuva mani khutaza. Kusunguleni ani vona ingi aswi bohi. Kambe hi kufamba ka nkama ni yile niya kombela. Kutani liyendzo la vona li ve nkateko lowukulu.” Madoda yotshembeka ya kufana ni lawa ma yendzeleke Julian mangahi pfuna kutiva “miyanakanyu ya Kriste”. Leswo swi vula kutwisisa mapimiselo, wumunhu la yena ni kumu tekelela. (1 Kor. 2:16; 1 Pet. 2:21) Loko madoda mahi pfuna hi ndlela leyi kutava kuli nkateko lowukulu ka hina.
RHWALANI NDZWALU WA MINA
6. Yesu a avula yini loko a ku hi fanele hi rhwala kange la yena?
6 Loko Yesu a ku: “Rhwalani mpingu kumbe ndzhwalu wa mina”, swingaha yendleka a alava kuvula leswi: “Pfumelani kufumiwa hi mina”. Naswona swingaha yendleka a alava kuhi byela swaku “hi fanele hi rhwalisana ndzhwalu na yena ivi hi tirhela Yehovha xikan’we. Hi kukongoma kurhwala kange kumbe djoko la Yesu swi vula leswaku hi fanele hi tirha.
7. Hikuya hi Matewu 28:18-20, hi wihi ntirho lowu Yesu ahi nyikeke wona naswona hinga tiyiseka hi yini?
7 Hi kombisa swaku haxi yamukela xirhambu xa Yesu loko hi tinyiketela ka Yehovha ni kutsakamisiwa. Yesu a rhamba vanhu hinkwavu leswaku va ta ka yena naswona a yamukela hinkwavu lavaswi lavaka hi mbilu kutirhela Xikwembu. (Yoh. 6:37, 38) Valandzeli hinkwavu va Kreste va nyikiwe lunghelo la kutirha ka ntirho lowu Yehovha awu nyikeke Yesu. Ha tiyiseka swaku minkama hinkwayu Yesu ata va na hina leswaku ahi pfuna ka ntirho lowu. — Lerha Matewu 28:18-20.
“MIDJONDZA KA MINA”
Kufana na yesu, pfuna van’wana leswaku va kuma kuwisa (Vona maparagrafu 8-11) *
8-9. Hi mhaka muni vanhu lava ava tiveka hansi ava susumeteleka kuya ka Yesu naswona hi swihi swivutiso leswi hi faneleke hi tivutisa swona?
8 Vanhu lava ava tiveka hansi ava susumeteleka kuya ka Yesu. (Mat. 19:13, 14; Luk. 7:37, 38) Hi mhaka muni? Pimisa hi kuhambana loko aku li kona ka Yesu ni Vafarisi. Varhangeli volavo va wukhongeli avanga na lirhandzu naswona ava tibyela. (Mat. 12:9, 14) Yesu a ani lirhandzu naswona a ativeka hansi. Vafarisi ava rhandza kuva ni ndhuma ni kutlhela va tekiwa va li va lisima. Yesu a vule swaku swoleswo aswinga li kahle, a djondzise valandzeli vakwe kutiveka hansi ni kutirhela vanhu van’wana. (Mat. 23:2, 6-11) Leswi Vafarisi ava ni tihanyi, vanhu avava chava naswona ava boheka kuva yingisa. (Yoh. 9:13, 22) Kambe Yesu ava temulile hi kuva khoma kahle ni hi marito lamanene.
9 Kungava leswaku waxi tekelela xikombiso xa Yesu? Tivutisi leswi: ‘Kungava leswaku vanhu van’wana va ni vona ni li munhu worhula ni wotiveka hansi? Na pfumela kuyendla mintirho ya xiyimu xa le hansi leswaku ni pfuna van’wana? Indje niva khoma kahle vanhu van’wana?’
10. Ava titwisa kuyini vanhu lava ava tirhisana na Yesu?
10 Leswi Yesu a ali munhu worhula naswona a arhandza kuletela van’wana, valandzeli va yena avaswi tsakela kutirha na yena. (Luk. 10:1, 19-21) A khutaze vadjondzisiwa va yena leswaku vamu vutisa loko va lava kutiva swokarhi naswona a alava kutwa mavonelo ya vona. (Mat. 16:13-16) Vadjondzisiwa va Yesu va kombise kurhumbuka kufana ni minsinya leyi leyi cheliwaka kahle mati. Ava twisisa tidjondzo ta Yesu naswona ava kombisa swaku vapsala mihandzu hi kuyendla mintirho yayinene.
Ngheneka u tlhela uva ni xinghana
Vana lweyi a hisekaka ni kutlhela u chivirika
Tiveki hansi u tlhela u tirha hi matimba *
11. Hi swihi swivutiso leswi hi faneleke hi tivutisa swona?
11 Kungava leswaku u ni wulawuli lokarhi? Loko u li na lona, tivutisi leswi: ‘Loko ni li ntirhweni kumbe akaya, niva khomisa kuyini vanhu van’wana? Na yendla swaku kuva ni kurhula? Nava khutaza van’wana swaku va nchuseka loko va lava kuni vutisa swokarhi? Ni tiyimiselile kutwa mavonelo ya van’wana? Ahi fanelanga hi fana ni Vafarisi. Phela Vafarisi ava kwata ngopfu loko vanhu vanga kholwi leswi avaswi vula naswona ava xanisa lava a va ni mavonelo ya kuhambana ni ya vona. — Marka 3:1-6; Yoh. 9:29-34.
“NITAMIWISISA”
12-14. Hi mhaka muni ntirho lowu Yesu ahi nyikeke wona wuhi yendla hi kuma kuwisa?
12 Hi mhaka muni hi kuma kuwisa loko hi yendla ntirho lowu Yesu ahi nyikeke wona? Ku ni swivangelo swotala, kambe hi ta vona swingali swingani.
13 Hi ni valanguteli va kahle kutlula hinkwavu. Yehovha Mulanguteli wa hina lweyi a Tlakukeke hintamu, anga na tihanyi kufana ni murhangeli lweyi angaswi kotiki kukhensa. Yena awu teka wu li wa lisima ntirho lowu hiwu yendlaka. (Hev. 6:10) Naswona ahi nyika ntamu lowu hiwu lavaka leswaku hi hetisisa ntirho lowu ahi nyikeke wona. (2 Kor. 4:7; Gal. 6:5.) Yesu Hosi ya hina ahi vekele xikombiso xa kahle xa leswi hingava khomisaka xiswona vanhu van’wana. (Yoh. 13:15) Naswona madoda lamanga ni mhaka na hina ma zama kutekelela Yesu, “Murisi Lwenkulu”. (Hev. 13:20; 1 Pet. 5:2) Ma yendla hinkwaswu leswi maswi kotaka leswaku mava ni musa, mahi khutaza ni kutlhela mava ni xivindzi loko mahi djondzisa ni kuhi sirhelela.
14 Hi ni vanghanu lavanene kutlula hinkwavu. Aku na vanhu lavanga ni ntirho wa kahle ni vanghanu lavanga ni lirhandzu kufana na hina. Pimisa ntsena hi leswi: Hi tirha ni vamakwerhu lavanga ni mahanyelo ya kahle kambe ava tivoni na va yampsa kutlula van’wana. Va ni wuswikoti lotala kambe ava tibyeli naswona va teka van’wana va li vakulu ka vona. Ava hi teki tani hi vatirhikuloni ntsena kambe tani hi vanghanu. Naswona vahi rhandza ngopfu lakakuva va bedja ni kuhi fela loko swi boha!
15. Hi fanele hi titwisa kuyini hi ntirho lowu hiwu yendlaka?
15 Hi ni ntirho woyampsa kutlula hinkwayu. Hi djondzisa vanhu ntiyiso mayelana na Yehovha naswona hi boxa mavunwha ya Sathana. (Yoh. 8:44) Sathana a tirhisa mavunwha ya yena leswaku a yendla vanhu va heleliwa hi ntshembo. Hi xikombiso, a lava hi pimisa swaku Yehovha angahi rhandzi naswona ange tshuki ahi rivalelile swidjoho swa hina. Wolawo i mavunwha lama hetaka ntamu. Loko hi ya ka Kreste swidjoho swa hina hinkwaswu swita rivaleliwa hikusa hinkwerhu Yehovha ahi rhandza ngopfu swinene. (Rhom. 8:32, 38, 39) Switsakisa ngopfu kupfuna vanhu leswaku va djondza kutshemba Yehovha ni kuva hiva vona va yampsisa wutomi la vona.
TAMA U KUMA KUWISA KA NDZHWALU WA YESU
16. Ndzhwalu lowu Yesu ahi kombeleke leswaku hiwu rhwala wu hambanisa kuyini ni miNdzhwalu yin’wana leyi hiyi rhwalaka?
16 Ndzhwalu lowu Yesu ahi kombeleke leswaku hiwu rhwala wu hambanile ni mindzhwalu yin’wana leyi hiyi rhwalaka. Hi xikombiso, vanhu votala loko va vuya hi le mintirhweni, va titwa na va karhalile naswona vanga tsakanga. Kuhambana na vona, loko hi khumuka ka ntirho wa Yehovha na Yesu hi titwa na hi yenelisekile naswona hi tsakile. Hina hambi loko hi karhele naswona hi tirhe dlambu hinkwalu, loko kuli siku la minhlanganu ha tikoka hi ya kona. Kambe loko hi vuya hi le minhlanganwini hi titwa hi pepile naswona hi ni ntamu. Kuhumelela leswi fanaka loko hi chumayela ni loko hi djondza Bibele hi li hoxe, hiva ni vuyelo lalikulu ngopfu!
17. I mpsini leswi hi faneleke hiswi twisisa hi xiyimo xa hina naswona hi fanele hi tivonela ka yini?
17 Hi fanele hi twisisa swaku mun’wana ni mun’wana wa hina ani ntamu lowu pimiweke. Hi mhaka leyo, hi fanele hi tivonela loko hi lava kuyendla ntirho wokarhi. Hi xikombiso, hingaha heta ntamu wa hina na hi lwela kuganya. Vona leswi Yesu angaswi byela mumpsha lweyi a aganyile loko amu vutisa a ku: ‘Ningayendla yini leswaku nitadja lifuwo la vutomi lebyingaheliki?’ Mumpsha yelweyo se aawu yingisa Nawu naswona swingaha yendleka a ali munhu wa kahle hikusa rungula le li tsaliweke ka buku la Marka li kombisa leswaku Yesu “amulangutile, amurhandza”. Yesu a rhambe wanuna yelweyo a ku: ‘Famba, uyaxavisa hinkwaswu leswi unga na swona . . . ndzhaku ka leswo, tana unilandza.’ Hambileswi wanuna lweyi aaswi lava kulandzela Yesu, aswimu karhatela kutshika ‘lifuwo lelotala’ leli a ali na lona. (Marka 10:17-22) Vuyelo la kona hi leswaku a yale kurhwala ndzhwalu wa Yesu naswona a tame a tiyendla xikarawa xa lifuwu. (Mat. 6:24) Loko aku li wena awutava u lange yini?
18. I mpsini leswi minkama yin’wana hi faneleke kuswi yendla naswona hi mhaka muni?
18 Minkama yin’wana swi kahle kupimisa hi leswi hiswi rhangisaka awuton’wini la hina. Hi mhaka muni? Hi mhaka loko hi yendla leswo, hita tiyiseka leswaku hi tirhisa ntamu wa hina hi wutlharhi. Vona leswi mumpsha mun’wana lweyi hingatamu vitana Marcos aswi vuleke. Yena a te: “Ni hete malembe na ni pimisa swaku ni hanya wutomi la kuvevuka. Ani li mupfuli wa ndlela kumbe phayona, kambe ani tshamela kupimisa hi male ni kuhanya wutomi la kahle. Kutani ni zame kutwisisa swaku hi mhaka muni wutomi la mina li sungule kutika. Ni game ni twisisa leswaku ani heta nkama wunyingi na ni lavetela swilo swakuni tsakisa, kambe nkama lowu awuni salela leswaku ni tirhela Yehovha, awunga nyawuli.” Marcos a cince mapimiselo ya yena ni wutomi la yena leswaku a yendla leswi angaswi kotaka atirhweni wa Yehovha. Marcos a tlhele a ku: “Ni tshuka ni vilela hi mhaka male, kambe hi kupfuniwa hi Yehovha na Yesu naswi kota kuveka mimpimiso ya mina ka ntirho wa Yehovha.”
19. Hi mhaka muni swi li swa lisima kuva ni kulangutela lokunene?
19 Hingaswi kota kutama hi kuma kuwisa ka ndzhwalu wa Yesu loko hi yendla swilo swinharhu. Xa kusungula: Tama uva ni kulangutela lokunene. Hi le kuyendleni ka ntirho wa Yehovha. Hi mhaka leyo, hi fanele hiwu yendla hilaha yena a lavaka ha kona. Hina hi vatirhi, kambe yena i Murhangeli. (Luk. 17:10) Loko hi zama kuyendla ntirho wa Yehovha hikuya hi mavonelo ya hina, switahi tikela hintamu. Hambi hi homu leyinga ni ntamu wawukulu, loko yi zama kutikongomisa hi yoxe nakuve yi rhwale kange, naswona yi lwisana ni lweyi ayi kongomisaka, yingaha tivavisa kumbe yi hantla yi karhala. Kuhambana ni leswi, loko hi yendla ntirho wa Yehovha hi ndlela leyi ayi lavaka, hita kota kuhlula swikarhatu leswi hi pimisaka leswaku ahingeswi koti. Khumbuka leswaku anga kona munhu lweyi anga sivelaka leswaku kurhandza ka Yehovha kuhetiseka. — Rhom. 8:31; 1 Yoh. 4:4.
20. Xi fanele xiva xihi xikongomelo xa hina loko hi rhwala ndzhwalu wa Yesu?
20 Xa wumbirhi: Vana ni xikongomelo lexinene. A xikongomelo xa hina i kuyisa kudzuneka ka B’ava wa hina wa lirhandzu Yehovha. Vanhu va le minkameni ya Yesu, lava avamu landzela hi mhaka makwanga kumbe hi kulava kukuma swokarhi, va hetelele vangahaswi tsakeli naswona vawu tshikile ndzhwalu wa Yesu. (Yoh. 6:25-27, 51, 60, 66; Filp. 3:18, 19) Kuhambana na vona, lava ava rhandza Yehovha hikakunene, va tlhela va rhandza munhukuloni, va rhwale ndzhwalu wa Yesu hi kutsaka wutomi la vona hinkwalu laha misaveni na va ni ntshembo wa kuya tirha swin’we na Yesu amatilweni. Kufana na vona, hita tama hi rhwala ndzhwalu wa Yesu na hi tsakile loko hi li ni swikongomelo leswinene.
21. Hikuya hi Matewu 6:31-33, i mpsini leswi hi nyimelaka leswaku Yehovha ahi yendlela swona?
21 Xa wunharhu: Nyimela swilo leswinene. Hi tilangele kuhanya wutomi la kutitsona swokarhi ni la kutirha hi matimba. Yesu a vule leswaku hita xanisiwa. Kambe hinga nyimela leswaku Yehovha atahi nyika ntamu lowu hiwu lavaka leswaku hi kota kutiyisela. Loko hi tiyisela swikarhatu swo tala, wuxaka la hina na Yehovha lita ya li tiya hilaha kuyengeteleke. (Yak. 1:2-4) Nakambe hinga nyimela leswaku Yehovha atahi nyika swilo hinkwaswu leswi hiswi vilelaka, Yesu atava murisi wa hina naswona vamakwerhu vatahi tiyisa. (Lerha Matewu 6:31-33; Yoh. 10:14; 1 Tes. 5:11) Hi ni hinkwaswu hiswi lavaka akuva hi kota kutiyisela swikarhatu swa mixaka hinkwayu!
22. I mpsini leswi hi faneleke hi tsaka hi swona?
22 Wansati lweyi Yesu angamu daha, a kume kuwisa kusukela siku leli anga dahiwa hi lona. Kambe leswaku a kuma kuwisa hilaha kunga heliki aku laveka ava mulandzeli wa Kreste wotshembeka. U pimisa leswaku ata va a yendle yini? Loko ku li leswaku a lange kuva mudjondzisiwa wa Yesu, aata kuma vuyelo la kuva na yena amatilweni. Hinkwaswu leswi a atava aswi tshikile akuva a landzela Yesu aswingatava swa nchumu loko swi fananisiwa ni minkateko leyi aatayi kuma. Aku na mhaka ni leswaku hi ni ntshembo wa kuya matilweni kumbe wa kuhanya la misaveni, hinga tsaka ngopfu hileswi hi kumeke xirhambu xa Yesu lexinge: “Tanani ka mina”.
LISIMU 54 “Ndlela hi Leyi”
^ par. 5 Yesu ahi rhamba leswaku hi ya ka yena. I mpsini leswi hi faneleke hiswi yendla leswaku hi yamukela xirhambu lexi? Ka djondzo leyi hita hlamula xivutiso lexi, naswona hita bula hi leswaku hingaku kumisa kuyini kuwisa loko hi tirha na Kreste.
