NHLOKOMHAKA YA DJONDZO 37
Tiveki Hansi U Tlhela U Yingisa Yehovha na Swi Suka Mbilwini
‘Xana ahinge titsongahati ngopfu kutlula swoswo ka Tatana wa hina?’ — HEV. 12:9.
LISIMU 7 Yehovha, Ntamu wa Hina!
LESWI HINGATASWI DJONDZA *
1. Hi mhaka muni hi fanele hi tiveka hansi ka Yehovha?
HI FANELE hi tiveka hansi * ka Yehovha hi mhaka leswi anga Mutumbuluxi wa hina naswona hi yena anga ni mfanelo ya kuhi byela leswi hi faneleke hiswi yendla. (Nhla. 4:11) Kambe xivangelo xin’wana lexihi yendlaka himu yingisa hileswaku yena i mufumi lwenene kutlula vafumi hinkwavu. Kuringana malembe yotala kuve ni tihosi to hambanahambana amisaveni kambe ayi kona leyinga tshama yi fuma kufana na Yehovha. Hi yena ntsena Xikwembu lexinga ni wutlhari, lirhandzu, ntwelawusiwana ni timpsalu. — Ekso. 34:6; Rhom. 16:27; 1 Yoh. 4:8.
2. Hikuya hi Vaheveru 12:9-11, hi swihi swivangelo leswihi yendlaka hi lava kutiveka hansi ka Yehovha?
2 Yehovha a lava leswaku himu yingisa hi leswi himu rhandzaka kungali hileswi hi chavaka kumu kwatisa, hikusa i B’ava wa hina lweyi ahi rhandzaka. Loko Pawulo a tsalelela Vaheberu, a te: ‘Titsongahateni ngopfu kutlula swoswo ka Tatana’ hikusa ahi layela “kuhipfuna”. — Lerha Vaheveru 12:9-11.
3. a) Hingaswi kombisa kuyini swaku hi tiveka hansi ka Yehovha? b) Hi swihi swivutiso leswingata hlamuliwa ka djondzo leyi?
3 Hinga tiveka hansi ka Yehovha hi kuyendla hinkwaswu leswi hingaswi kotaka leswaku himu yingisa ka swilo hinkwaswu, ni loko hi lwisana ni kulava kuyendla swilo hikuya hi matwisiselo ya hina. (Swi. 3:5) Loko himu tiva kahle Yehovha ni wumunhu la yena switahi vevukela kumu yingisa. Hi mhaka muni? Hi mhaka hinkwaswu leswi aswi yendlaka swi fambisana ni wumunhu la yena. (Pis. 145:9) Loko hi ya hi djondza hi Yehovha hita ya himu rhandza hintamu, naswona ahingata nyimela leswaku ahi nyika swinawanawana ka xin’wana ni xin’wana. Kambe hita zama kudjondza kupimisa ni kutitwa hi ndlela leyi Yehovha a titwaka ha yona, ivi hi balekela swilo swobiha. (Pis. 97:10) Kambe minkama yin’wani aswi vevuki kuyingisa Yehovha. Hi mhaka muni hi vula leswo? Naswona i yini leswi madoda ya bandla ni vapsali vangaswi djondzaka ka xikombiso xa Nehemiya lweyi a ali Mufumi, Hosi Davhida na Mariya mamani wa Yesu? Ka djondzo leyi, hita kuma tinhlamulu ta swivutiso leswi.
HI MHAKA MUNI MINKAMA YIN’WANI SWI KARHATA KUTIVEKA HANSI KA YEHOVHA?
4-5. Hikuya hi Varhoma 7:21-23, hi mhaka muni minkama yin’wani swi karhata kuyendla kurhandza ka Yehovha?
4 Nchumu wun’wani lowu yendlaka swinga vevuki kuyingisa Yehovha hileswi hikwerhu hi psaliweke na hi li ni xidjoho naswona ahi hetisekanga. Hi mhaka leyo, ahi minkama hinkwayu swihi vevukelaka kuyingisa Xikwembu. Loko Adamu na Eva va xandzukele Xikwembu hi kudla handzu lowu awu tsimbisiwile, avo tibohela hi voxe swaswinene ni swakubiha. (Gen. 3:22) Ni nyamuntlha, vanhu ava na mhaka ni Xikwembu kufana na Adamu na Eva naswona va lava kutibohela hi voxe swaswinene ni swakubiha.
5 Hambileswo, hinga hambana ni vanhu lava hileswi hi tivaka Yehovha naswona himu rhandzaka, minkama yin’wani swahi tikela kumu yingisa. Hambi mupostola Pawulo swimu humelelile leswo. (Lerha Varhoma 7:21-23.) Kufana na Pawulo, hina hi lava kuyendla swilo leswi tsakisaka Yehovha. Kambe minkama hinkwayu kulaveka hi lwisana ni kunavela ka hina ka kuyendla swilo swobiha.
6-7. Hi xihi xivangelo xin’wana lexi yendlaka minkama yin’wani swi karhata kuyingisa Yehovha? Nyikela xikombiso.
6 Xin’wana lexinga yendlaka swihi tikela kuyendla kurhandza ka Yehovha hi leswi hinga tolovela ndhavuku ni mapimisela ya vanhu va lomu hinga kulela kona. Vanhu votala vatahi byela swilo swa kuhambana ni leswi Yehovha aswi lavaka. Kutani hi fanele hi lwa hilaha hinga kotaka ha kona leswaku hinga pimisi kufana na vona. Ahi voneni xikombiso.
7 Swi tolovelekile ka tindhawu tin’wana akuva vampsha ma hlohloteliwa kutirha leswaku mata kuma male yotala. Makwerhu Mariya * a kumane ni xikarhatu lexi. Na angese djondza ntiyiso, se a afundhe ka univhersidade la kuhlonipheka atikweni. Maxaka ya yena mamu hlohlotele kulava ntirho lowu awutamu yendla a hloniphiwa hi vanhu van’wana ni kutlhela a hola male yayinyingi. Na yena aaswi lava. Hambileswo, loko a djondze ntiyiso ni kutlhela a rhandza Yehovha a cince mapimu, kambe aswimu vevukelanga. Yena a te: “Minkama yin’wani ni pfulekeliwa hi mukhandlu wa kukuma male yotala, kambe naswi tiva leswaku swoleswo switani sivela kutirhela Yehovha kufana ni leswi nimu tirhelisaka xiswona swoswi. Kambe hi mhaka leswi ninga kulisisiwa xiswona swahani tikela kuyala. Hi mhaka leyo, ni kombela Yehovha ani pfuna akuva ninga pfumeli a ntirho lowungani sivelaka kuyendla leswi nimu yendlelaka swona swoswi.” — Mat. 6:24.
8. Hita bula hi yini ka djondzo leyi?
8 Hilaha se hiswi voneke ha kona, kuyingisa Yehovha swahi vuyelisa. Kambe lavangani wutihlamuleli vofana ni madoda ya bandla, vapapayi na vamamani, loko va tiveka hansi ka Xikwembu kuta vuyeliwa ni vanhu van’wani. Kutani swoswi, hita bula hi swikombiso swin’wani swa le Bibeleni leswi swingatahi pfuna kutirhisa wutihlamuleli leli hingana lona hi ndlela leyingata tsakisa Yehovha.
I MPSINI LESWI MADODA MANGASWI DJONDZAKA KA XIKOMBISO XA NEHEMIYA?
Madoda na wona ma tirha a kulunghiseni ka Yindlo ya hina ya Wugandzeli, kufana ni leswi Nehemiya angaswi yendla loko kupfuxetiwa lirhangu kumbe muru wa Yerusalema (Vona maparagrafu 9-11) *
9. Hi swihi swikarhatu leswi Nehemiya anga kumana na swona?
9 Yehovha a nyike madoda wutihlamuleli lalisima la kuhlayisa vanhu vakwe. (1 Pet. 5:2) Madoda manga djondza swotala ka ndlela leyi Nehemiya anga khoma vanhu va Xikwembu ha yona. Leswi a ali mufumi wa Yudeya, Nehemiya a ani wutihlamuleli lotala. (Neh. 1:11; 2:7, 8; 5:14) Pimisa hi swikarhatu swin’wani leswi a kumaneke na swona. Atempeleni, a tsumbule swaku Vayuda van’wani ava yendla swilo leswi aswi kombisa kudelela wugandzeli la Yehovha. Naswona avanga humesi minyikelo leyi ayita hlayisa Valevhi hikuya hi Nawu lowu Yahovha aava nyike wona. Hambi hi Nawu wa Savata avangahawu landzeli. Naswona ava teke vavasati va matiko lava avanga gandzeli Yehovha. Phela Nehemiya a afanele a yendla xokarhi ka xiyimu lexi xa kukarhata. — Neh. 13:4-30.
10. Nehemiya aava khomisa kuyini vanhu va Yehovha?
10 Nehemiya anga tirhisanga wulawuli leli a ali na lona leswaku a sindzisa vanhu kulandzela mavonelo ya yena. Kuhambana ni leswo, a khongele ka Yehovha hi mbilu hinkwayu a kombela leswaku amu pfuna. Naswona a djondzise vanhu Nawu wa Yehovha. (Neh. 1:4-10; 13:1-3) Hi kutiveka hansi, Nehemiya a tirhe ni Vayisrayele kuloni hambi ka ntirho wa kupfuxeta muru wa Yerusalema. — Neh. 4:15.
11. Hikuya hi 1 Vatesalonika 2:7, 8, madoda ma fanele mava khomisa kuyini vamakwerhu?
11 Swingaha yendleka madoda ya bandla manga kumani ni swikarhatu leswi Nehemiya a kumaneke na swona, kambe mangamu tekelela hi tindlela to hambanahambana. Hi xikombiso, ma yendla leswi mangaswi kotaka leswaku ma pfuna vamakwerhu abandleni. Naswona ama tivoni na ma yampsa kutlula van’wani hileswi manga ni wutihlamuleli. Kuhambana ni leswo,ma kombisa timpsalu ka vamakwerhu hinkwavu. (Lerha 1 Vatesalonika 2:7, 8.) Leswi ma tivekeka hansi ni kutlhela ma rhandza vamakwerhu, ma vulavula hi ndlela ya lirhandzu na vona. André lweyi anga ni malembe yotala na a li doda, a te: “Ni tsumbule swaku loko doda li ni lirhandzu ni xinghanu swava khumba vamakwerhu naswona swiva susumetela kutirhisana ni madoda”. Tony lweyi na yena anga ni malembe yotala na a li doda a vule leswi: “Ni zama kutirhisa leswi Bibele lihi khumbukisaka swona ka Vafilipiya 2:3 naswona ni lwela kuteka van’wana va li vakulu ka mina. Leswo swini pfuna akuva ninga sindzisi vamakwerhu leswaku vani yingisa hi nkanu.”
12. Hi mhaka muni swi li swa lisima kuva madoda ma tiveka hansi?
12 Madoda ma fanele ma tiveka hansi hikusa Yehovha na yena wa tiveka hansi. Hambileswi Yehovha anga Hosi Leyikulu ya tumbuluku hinkwawu, “wa korhama” leswaku “a tlakusa xisiwana axi susa ankumeni”. (Pis. 18:35; 113:6, 7) Bibele lihi byela swaku Yehovha ava nyenya ngopfu lava tibyelaka. — Swi. 16:5.
13. Hi mhaka muni doda li fanele li kota ‘kufuma kumbe ku lawula lirimi la lona’?
13 Doda leli li tivekaka hansi ka Yehovha li fanele li kota ‘kufuma kumbe ku lawula lirimi la lona’. Handle ka leswo, loko kova ni munhu lweyi ali delelaka lingahamu phatlula hi marito. (Yak. 1:26; Gal. 5:14, 15) André lweyi hi vulavuleke ha yena a te: “Leswi ninga doda, minkama yin’wani ni titwa ni navela kuva bongela vamakwerhu lava kalaka vangani hloniphi. Hambileswo, ni yanakanyisise hi swikombiso swa vavanuna votshembeka va le Bibeleni, naswona leswo swini pfuna kuvona lisima la kutiveka hansi ni kuva munhu worhula.” Doda linga kombisa swaku la tiveka hansi ka Yehovha hi kuvulavula hi ndlela ya lirhandzu ni vamakwerhu kupatsa ni madoda man’wani abandleni. — Kol. 4:6.
I MPSINI LESWI VAPAPAYI VANGASWI DJONDZAKA KA HOSI DAVHIDA?
14. Hi lihi wutihlamuleli leli Yehovha ali nyikeke vapapayi, naswona a lava leswaku vali tirhisisa kuyini?
14 Yehovha a nyike vapapayi wutihlamuleli la kurhangela andjangwini. Naswona a lava va djondzisa, va kongomisa ni kulaya vana va vona. (1 Kor. 11:3; Efe. 6:4) Kambe leswo aswi vuli swona leswaku vanga tirhisa wulawuli la vona hilaha va lavaka ha kona. Leswi Yehovha anga yena Musunguli wa ndjangu, vapapayi vata tihlamulela ka yena hi leswi vayi khomisaka xiswona mindjangu ya vona. (Efe. 3:14, 15) Vapapayi va kombisa leswaku va yingisa Yehovha hi kutirhisa wulawuli la vona hi ndlela leyi tsakisa Xikwembu. Vona vanga djondza swotala ka wutomi la Hosi Davhida.
Swikhongelo swa papayi lweyi anga Mukreste swi fanele swi kombisa swaku a tiveka hansi ka Yehovha (Vona maparagrafu 15-16) *
15. Hi mhaka muni Hosi Davhida a li xikombiso xa kahle ka vapapayi?
15 Yehovha anga vekanga Davhida leswaku a rhangela ndjangu wa yena ntsena, kambe a afanele a rhangela ni tiko hinkwalu la Israyele. Tani hi hosi, Davhida a ani wulawuli kambe minkama yin’wani aangali tirhisi kahle wulawuli la yena naswona a yendle swihoxo 2 Sam. 11:14, 15) Hambileswo, a kombise kutiveka hansi ka Yehovha hi kupfumela kulayiwa hi yena. A khongele ka Yehovha amu byela leswi a atitwisa xiswona. Naswona a zame hilaha anga kotaka ha kona leswaku a yingisa Yehovha. (Pis. 51:1-4) Handle ka leswo, a tiveke hansi ivi a pfumela kulayiwa ni hi vavasati. (1 Sam. 19:11, 12; 25:32, 33) Davhida a djondze swotala ka swihoxo swa yena naswona a teke ntirho lowu aawu yendlela Yehovha wu li wa lisima hintamu ka yena.
swa kukarhata. (16. Vapapayi vanga djondza yini ka Davhida?
16 Vapapayi vanga djondza yini ka Hosi Davhida? Vapapayi, minga tirhisi wulawuli la n’wina hi ndlela yobiha. Pfumelani loko mi yendla swihoxo, mitlhela mi pfumela loko van’wana vami laya hi kutirhisa Bibele. Loko mi yendla leswo, mindjangu ya n’wina yitami hlonipha hileswi mi tivekaka hansi. Loko mi khongela ni mindjangu ya n’wina, phofulelani Yehovha leswi mi titwisaka xiswona. Loko mi yendla leswo, mindjangu ya n’wina yitaswi vona leswaku hikakunene maswi lava kukongomisiwa ni kupfuniwa hi yena. Xa lisima ka hinkwaswu, yendlani leswaku kutirhela Yehovha kuva nchumu wa lisima hintamu awuton’wini la n’wina. (Det. 6:6-9) Kuva xikombiso xa xinene, switawu vuyelisa ngopfu ndjangu wa wena.
VAMAMANI VANGA DJONDZA YINI KA MARIYA?
17. Hi lihi wutihlamuleli leli Yehovha angali nyika vamamani?
17 Yehovha a tlhele a nyika vamamani wutihlamuleli la lisima hintamu andjangwini, nakambe ava nyike wulawuli lokarhi ka vana va vona. (Swi. 6:20) Leswi vamamani vaswi yendlaka ni leswi vaswi vulaka swinga khumba vana va vona wutomi la vona hinkwalu. (Swi. 22:6) Ahi voneni leswi vamamani vangaswi djondzaka ka Mariya, mamani wa Yesu.
18-19. Vamamani vanga djondza yini ka Mariya?
18 Mariya aama tiva kahle Matsalwa. A ali munghanu wa Yehovha naswona aamu hlonipha ngopfu. A alava kuyendla hinkwaswu leswi Yehovha aaswi lava hambiloko leswo aswita cinca wutomi la yena. — Luk. 1:35-38, 46-55.
Hambiloko mamani a karhalile kumbe a kwatile a fanele a yendla mizamu ya kukombisa lirhandzu ka ndjangu wa yena (Vona paragrafu 19) *
19 Vamamani, ku ni swilo swotala leswi mingaswi djondzaka ka Mariya. Xa kusungula: Kulaveka mi tiyisa wuxaka la n’wina na Yehovha hi kudjondza Bibele ni kukhongela siku ni siku. Xa wumbirhi: Mi fanele mi tiyimisela ku cinca a wuton’wini la n’wina leswaku mi tsakisa Yehovha. Hi xikombiso, swingaha yendleka mi kulisiwe hi vapsali lava ava hantla va kwata naswona ava vulavula hi ndlela yophatlula ni vana va vona. Kutani ungaha pimisa leswaku swa yamukeleka kukhoma vana hi ndlela leyo. Hambiloko se u djondzile hi Yehovha swingahaku karhatela kutikhoma ni kulehisela mbilu vana va wena ngopfungopfu loko vaku lutlela Efe. 4:31) Loko u titwisa xileswo i swa lisima akuva u kombela Yehovha leswaku aku pfuna. Lidiya, mamani mun’wana a te: “Minkama yin’wani aswi lava ni khongela ngopfu akuva ninga bongeli n’wana wa mina loko angani yingisi. Makhambi man’wana ani tsemerhisa marito loko nimu bongela ivi ni khongela hi ndzeni ka mbilu ni kombela Yehovha a ni pfuna. Xikhongelo xini yendla ni tikhoma.” — Pis. 37:5.
na u karhalile. (20. Hi swihi swikarhatu leswi vamamani van’wana va kumanaka na swona funtshi vangaswi hlulisa kuyini?
20 Xikarhatu xin’wana lexi vamamani vanga vaka na xona i kutsandzeka kukomba vana va vona lirhandzu. (Tito 2:3, 4) Van’wana ka vona, va kulisiwe ka miminti leyi vapsali va kona avangali na xinghanu ni vana. Loko na wena u kulisiwe hi ndlela leyo, unga yendli swihoxo swa kufana ni swa vapsali va wena. Mamani lweyi a tivekaka hansi ka Yehovha, a fanele a djondza kukombisa lirhandzu ka vana va yena. Swingahamu karhatela kucinca mapimiselo, matitwela ni mayendlela ya swilo. Kambe swa koteka, naswona leswo swita yendla leswaku yena ni ndjangu yena va tsaka.
TAMA U TIVEKA HANSI KA YEHOVHA
21-22. Hikuya hi Esaya 65:13, 14, hita vuyeliwa hi yini loko hi yingisa Yehovha?
21 Hosi Davhida aaswi tiva leswaku i swinene kuyingisa Yehovha. A tsale leswi: “Swileriso swa Yehovha swi lulamile, swi tsakisa mbilu; Minawu ya Yehovha yi basile, yi phatimisa matihlo. Hi mhaka ya swona nandza wa wena wa tsundzuxiwa; lweyi aswihlayisaka, a ni vuyelo likulu.” (Pis. 19:8, 11) Namuntlha hinga vona kuhambana lokunga kona xikarhi ka lava va tivekaka hansi ka Yehovha ni lava va yalaka kumu yingisa. Lava va yingisaka Yehovha vata “ba nkulungwana hi kutsaka hi mhaka ya xiyimo lexinene xa mbilu”. — Lerha Esaya 65:13, 14.
22 Loko madoda, vapapayi na vamamani va tiyimisela kuyingisa Yehovha, wutomi la vona lita yampsa, mindjangu ya vona yita tsaka naswona bandla hinkwalu lita va ni vun’we. Kambe xa lisima hintamu, hi leswaku vata tsakisa mbilu ya Yehovha. (Swi. 27:11) Aku na xa kutsakisa kutlula leswo awuton’wini!
LISIMU 2 Hi Wena Yehovha
^ par. 5 Ka djondzo leyi hita vona swaku hi mhaka muni hi fanele kutiveka hansi ni kuyingisa Yehovha swi suka mbilwini. Naswona hita djondza swaku madoda ya bandla ni vapsali vangali tirhisisa kuyini wutihlamuleli leli vanga na lona ni kutekelela xikombiso xa Nehemiya lweyi a ali Mufumi, Hosi Davhida na Mariya mamani wa Yesu.
^ par. 1 MARITO LAMA HLAMUSELIWEKE: A rito lelinge, kutiveka hansi, lingahava ni mongo wokala wungali kahle ka vanhu lava bohekaka kuyingisa munhu wokarhi na vangaswi lavi. Hambileswo, vanhu va Xikwembu lava yingisaka hi kuswi rhandza, ava titwisi xileswo hi kutiveka hansi.
^ par. 7 Ka nhlokomhaka leyi, mavito man’wani ma cinciwile.
^ par. 62 NHLAMUSELO WA SWIFANISO: Doda lokarhi li le kutirheni ni n’wana wa lona a kulunghiseni ka Yindlo ya hina ya Wugandzeli kumbe Salão do Reino, kufana ni leswi Nehemiya angaswi yendla loko kupfuxetiwa muru wa Yerusalema.
^ par. 64 NHLAMUSELO WA SWIFANISO: Papayi wokarhi a khongela ka Yehovha ni ndjangu wa yena na swi suka mbilwini.
^ par. 66 NHLAMUSELO WA SWIFANISO: Xifanyani xokarhi xi heta nkama wawunyingi na xitha magemi na xingase hamba T.P.C.. Hambileswi mamani wa xona a vuyaka hi le ntirhweni na a karhalile, axi laya hi kutirhisa marito ya kahle.