I Mani Vito la Xikwembu? Xikwembu hi xoxe xi li: “Hi mina Yehovha. Leli i vito la mina”. (Esaya 42:8) Vito la Xikwembu li tsaliwe ka 7.000 kumbe kutlula aBibeleni. Kambe vahundzuluxeli va kutala va cince vito la Xikwembu aBibeleni na swinga fanelanga. Ka ndhawu ya lona va tsale rito lelinge “Hosi” kumbe man’wana. Xikwembu xi lava u va munghanu wa xona, hi mhaka leyo xi tsakela kuva uxi ‘vitana hi vito la xona’. — Tipisalema 105:1.

Mavitanela Man’wana ya Yehovha. Bibele li tlhamusela Yehovha tani hi “Xikwembu”, “Wa Matimba Hinkwawu”, “Mutumbuluxi”, “B’ava”, “Hosi” ni “Mufumi Lwenkulu”. Ka swikhongelo swa kutala leswinga ka Bibele, kupatsiwa mavitanela lawa ni vito la Xikwembu lelinge Yehovha. — Daniyele 9:4.

 Xikwembu xi Tshamise Kuyini? Xikwembu i moya. (Yohane 4:24) Bibele lahi tiyisekisa swaku ‘aku na munhu lweyi anga tshama a vona Xikwembu’. (Yohane 1:18) Bibele li kombisa swaku vanhu vangaxi kwatisa kumbe ‘vaxi tsakisa’ hikusa xi ni mintlhaveko. — Swivuriso 11:20; Tipisalema 78:40, 41.

Wumunhu la Xikwembu. Xikwembu axi kheti vanhu hi kuya hi tiko. (Mintirho 10:34, 35) Nakambe i Xikwembu xa “timpsalu ni xa ntwelawusiwana, lexi hlwelaka kukwata, ni lexinga ni lirhandzu lotshembeka ni ntiyiso”. (Eksoda 34:6, 7) Kambe ahi voni 4 wa swilo leswi tsakisaka leswi Xikwembu xinga na swona.

Matimba. Leswi xinga “Xikwembu xa Matimba Hinkwawu”, xi ni matimba ya kukala manga heli leswaku xi yendla hinkwaswu leswi xiswi tshembisaka. — Genesa 17:1.

Wutlharhi. Wutlharhi la Xikwembu li tlula wutlharhi hinkwalu. Hi mhaka leyo Bibele li li hi xona “xili xoxe xa vutlhari”. — Varhoma 16:27.

Kululama. Minkama hinkwayu Xikwembu xi yendla swa swinene. Xikwembu axi phazami naswona axi na wubihi. — Deteronoma 32:4.

Lirhandzu. Bibele li li “Xikwembu i lirhandzu.” (1 Yohane 4:8) Phela axo kombisa lirhandzu ntsena kambe xona hi xoxe i lirhandzu. Hinkwaswu xiswi yendlaka xiswi yendla hi mhaka ya lirhandzu. Naswona lirhandzu lelo lahi pfuna hi tindlela ta kutala.

Wuxaka la Xikwembu ni Vanhu. Xikwembu i B’ava wa hina wa le matilweni lweyi a rhandzekaka. (Matewu 6:9) Hingava vanghanu va yena loko hi pfumela ka yena. (Tipisalema 25:14) Kunene, Xikwembu xiku rhamba kuva uxi tshinelela hi xikhongelo u tlhela u ‘hoxa kuvilela ka wena hinkwaku ka xona, hikusa xaku hlayisa.’ — 1 Petro 5:7; Yakobo 4:8.

Yesu a hi Xikwembu. Yesu a hambanile ni swivumbiwa swin’wana hinkwaswu hikusa hi yena ntsena anga vumbiwa hi Xikwembu hi xoxe na xinga na munhu mun’wana. Hi yona mhaka leyo Bibele limu vitanaka N’wana wa Xikwembu wa mun’we. (Yohane 1:14) Loko Yehovha se a vumbe matevula ya yena Yesu, amu tirhisile tanihi “mutirhi lweyi anga ni wuswikoti” leswaku a yendla swilo leswin’wana hinkwaswu. — Swivuriso 8:30, 31; Vakolosa 1:15, 16.

 Yesu Kreste anga zanga a vula swaku i Xikwembu. Kuhambana ni leswo a te: ‘Ni huma ka yena [Xikwembu], naswona hi yena lweyi ani rhumeke.’ (Yohane 7:29) Loko a vulavula ni mun’wana wa vadjondzisiwa va yena, Yesu a vitane Yehovha a ku: “Tatana wa mina, anga Tatana wa n’wina” a tlhela a ku “Xikwembu xa mina, xinga Xikwembu xa n’wina.” (Yohane 20:17) Loko se a file, Xikwembu ximu pfuxile leswaku aya hanya matilweni xi tlhela ximu nyika wuhosi lelikulu a vokweni la xona la xinene. — Matewu 28:18; Mintirho 2:32, 33.

Yesu Kreste Angaku Pfuna Kutshinela Kusuhi ni Xikwembu

Yesu a te lani misaveni kutahi djondzisa hi B’ava wa yena. Yehovha hi yexe a vule leswi hi Yesu: “Lweyi i N’wananga lweyi arhandzekaka; muyingiseni.” (Marka 9:7) Yesu a tiva Xikwembu kutlula hinkwerhu. A te: ‘Aku na lweyi a tivaka Tatana leswaku i mani, loko angali N’wana, ni lweyi N’wana a lavaka kuhlavutela Tatana ka yena.’ — Luka 10:22.

Yesu a kombisa wumunhu la Xikwembu hi kuhelela. Yesu a tekelele ngopfu B’ava wa yena lakakuva aswi fanela kuva a ku: “Lweyi anivoneke, avonile Tatana”. (Yohane 14:9) Yesu a kongomise vanhu ka Xikwembu hi kukombisa lirhandzu la B’ava wa yena hi marito ni mintirho. A te: “Hi mina ndlela, ni ntiyiso, ni vutomi; aku na munhu lweyi ataka ka Tatana, loko kungali ha mina.” (Yohane 14:6) A tlhele a ku: ‘Vagandzeli va ntiyisu vata gandzela B’ava hi moya ni ntiyisu, hikusa kuvula ntiyiso, B’ava a lava vanhu va kufana ni lava kuva vamu gandzela.’ (Yohane 4:23) Vona! Yehovha a lavetela vanhu va kufana na wena lava lavaka kutiva ntiyiso hi yena.