Ku sukela na ni li mutsongo a ni swi rhandza swiharhi ni minsinya, ni kuva ka tindhawu ta ku saseka. Naswona vapsali va mina a va swi rhandza ku ni yisa ka tindhawu leti a ni ta swi vona kahle, leti nga kusuhi ni Finlândia. Phela swiharhi ni swi rhandza hintamu. Nkama na ni ya ni kula a ni nga swi rhandzi ku vona vanhu na va hlupha swiharhi. Ni nghene ka nhlengeletanu leyi a yi lwela tinfanelo ta swiharhi, lana a ku ni vanhu lava a va pimisa ku fana na mina.

Hi lwele tinfanelo ta swiharhi. Hi hangalase mahungu hi tlhela hi hamba xitereka leswaku hi kombisa ku karhateka ka hina hi switolo leswi a swi xavisa swikhumba swa swiharhi ni ma laboratório lawa a ma tirhisa swiharhi swaku ma ringisa minchumu hi swona. Hi hambe nhlengeletanu ya nyuwani ya ku vhikela swiharhi. A hi hiseka hintamu ka ntirho lowu, hi mhaka leyo nkama ni nkama a hi lwisana ni mfumu, ni khomiwile ni yisiwa djele minkama ya yinyingi.

A ni nga karhateki hi swiharhi ntsena, a ni karhateka ni hi ku hlupheka loku nga kona misaveni. Hi ku famba ka nkama ni ve ka tinhlengeletanu ta tinyingi ta ku fana ni Anistia Internacional ni Greenpeace. Phela ntamu wa mina hinkwawu a ni wu tirhisa leswaku ni pfuna tinhlengeletanu leti. A ni pfuna swisiwana, vanhu lava hluphekaka ni lava faka hi ndlala.

Kambe a ni swi vona swaku a ni nge swi koti ku txintxa misava. Hambileswi tinhlengeletanu leti a ti zama ku lulamisa swikarhatu swa switsongo, leswin’wana a swi ya swi kula hintamu. Wubihi a li ya li tala amisaveni hinkwayu, naswona a ku nga na munhu lweyi a a kota ku li helisa. A ni titwa ni nga ha na matimba.

Leswi ni nga vona swaku a ni nge yentxi nchumu ni sungule ku pimisa hi Xikwembu ni Bibele. Se a ni tshame ni djondza Bibele ni Timboni ta Yehovha. A swi ni tsakisa ku vona swaku Timboni ta Yehovha a va li vanhu va vanene naswona a va ni mhaka na mina, kambe hi nkama wolowo a swi ni karhatela ku txintxa wutomi la mina, kambe swoswi minchumu se a yi txintxile.

Ni sungule ku lerha Bibele leli a ni li na lona, naswona li ni pfunile hintamu. Ni kume tindzimana leti a ti vula swaku hi fanele hi swi hlayisa kahle swiharhi. Hi xikombiso, Swivuriso 12:10 yi li: “Munhu wa ku lulama a hlayisa swiharhi swa yena.” Naswona ni vone swaku a hi Xikwembu xi vangaka swikarhatu amisaveni, kambe lexi yentxaka hi va ni swikarhatu hi leswi vanhu va kalaka va nga yingisi minawu ya Xikwembu. Swi ni tsakisile ku djondza swaku Xikwembu xa hi rhandza naswona xa hi lehisela mbilu. — Tipisalema 103:8-14.

Hi nkama wolowo ni tsale xipapelana ni kombela buku leli nge: Xana Bibele Yi Dyondzisa Yini Hakunene? (hi Xitsonga). Ku te Timboni timbirhi ta nuna na nsati ti ta sungula ku djondza na mina. A ni hlwelanga, ni sungule ku ya mintlhanganwini ka Yindlo ya Wugandzeli. Ni sungule ku swi rhandza leswi a ni swi djondza.

Bibele li ni pfune ku txintxa wutomi la mina. Ni tshike ku dzaha ni ku nwa hintamu byala, ni txintxa mavulavulelo ya mina ni mayambalelo ni leswi a ni va vonisa xiswona lava fumaka. (Varoma 13:1) Ni tlhele ni tshika ni mahanyelo ya mina ya ku biha, hikusa ka wutomi la mina a ni tiyentxela hinkwaswu leswi a ni swi lava.

Leswi a swi ni karhatela hintamu i ku tshika tinhlengeletanu leti a ti lwela tinfanelo ta vanhu ni swiharhi. Swi teke nkama leswaku ni txintxa mavonelo ya mina. A ku sunguleni a ni vona ingi swi bihile ku tshika tinhlengeletanu leti. Hambileswo, swi ni tsakisile ku tiva swaku i Mfumu wa Xikwembu ntsena lowu nga txintxaka misava hinkwayu. Leswo swi ni yentxe ni tirhisa a ntamu wa mina hinkwawu leswaku ni pfuna a Mfumu lowu ni tlhela ni djondzisa vanhu van’wana hi wona. — Matewu 6:33.

Ka wutomi leli a ni li ka lona a ni hambanisa vanhu hi mintlawa yimbirhi, vanhu va ku yentxa swa swinene ni vanhu va ku yentxa swa ku biha. Naswona a ni tolovela ku lwisana ni lava a va yentxa swa ku biha. Kambe Bibele li ni pfunile swaku ni nga ha nyenyi vanhu van’wana. Swoswi ni zama ku kombisa lirhandzu ka vanhu hinkwavu. (Matewu 5:44) Ni yentxa leswo hi ku va chumayela mahungu ya ku tsakisa ya Mfumu wa Xikwembu. Swa ni tsakisa ku vona swaku ntirho lowu wu yentxa swaku vanhu va tsaka, va va ni ku rhula va tlhela va va ni ntshembo.

Ni ve ni ku rhula ka mimpimiso ni tlhela ni titwa ni li mavokweni ya Yehovha. Se na swi tiva swaku lweyi a nga yentxa swilo hinkwaswu a ta helisa ku hluphiwa ka vanhu ni swiharhi, naswona a nge pfumeleli swaku misava ya hina ya ku saseka yi helisiwa. Handle ka leswo, a ta tirhisa Mfumu wa yena leswaku a lunghisa hinkwaswu leswi nga wonhiwa. (Esaya 11:1-9) Leswi ni tsakisaka hintamu a hi ku tiva leswo ntsena, kambe i ku tlhela ni pfuna van’wana swaku na vona va swi tshemba. Swoswi a na ha swi lavi ku txintxa misava.