Ni psaliwe ka xidoropana xa xitsongo a Saxônia, lani khale a ku vitaniwa República Democrática Alemã (GDR). Wutomi la hina kaya a li tsakisa naswona vapsali va mina a va ni djondzisa mahanyelo ya manene. A tiko la hina a li fumiwa hi politika comunista, hi mhaka leyo vanhu a va nga li nyiki lisima wukhongeli, naswona mina a ni nga kholwi swaku Xikwembu xi kona. Nkama na ni li mutsongo ku ya ka 18 wa malembe a ni kholwa ka tidjondzo timbirhi: Ku nga djondzo ya leswaku Xikwembu a xi kona ni djondzo ya wu comunismo.

Hi mhaka muni a ni li rhandza wu Comunismo? Hikusa a swi ni tsakisa ku tiva swaku vanhu hinkwavu va fana. Naswona a ni kholwa swaku vanhu a va fanele va kuma minchumu ya ku ringana leswaku ku nga vi ni va ku ganya kumbe swisiwana. Hi mhaka leyo a ni tirha hintamu swaku ni pfunisa a nhlengeletanu ya majovhem ya va comunista. Nkama na ni ni 14 wa malembe ni sungule ku pfunisa ka ntirho wa ku yentxa mapapela ya khale ma tlhela ma va ya nyuwani. Varhangeli va doropa la Aue lani a ni tshama kona va tsakile hintamu hi ntirho lowu a ni wu yentxa lakakuva va ni nyika ni xihiwa. Hambileswi a ni li mutsongo a ni tiva va politika comunista va vanyingi, hi mhaka leyo a ni tibyela swaku ni ta va ni wutomi la ku tsakisa.

Hi 1989 a muru wa Berlim wu diliziwile, naswona mimfumu ya yinyingi ya va comunista va Europa yi helisiwile, leswo swi ni khumbe hintamu! Kambe a swi helelenga lanu. Ni game ni tsumbula swaku a mfumu wa tiku la mina a wu ni wukanganyisi himtamu. Hi xikombiso, lweyi a a nga nyimi ni wu comunismo a a nga na tinfanelo ta ku fana ni vanhu van’wana. Se ni sungule ku karhateka ni tivutisa swaku: Swi kotekisa ku yini leswo? Kasi a wu comunismo a li yentxi swaku vanhu hinkwavu va fana? Indje a wu comunismo la pfuna?

Ni sungule ku chaya ni ku dezenyara. Leswi a ni li ka xikola xa ku chaya a ni pimisa ni ku nghena a universidade swaku ni ta swi djondza ku yampsa leswi a ni swi yentxa. Se a ni tivona ni li muchayi wa ndhuma ni munhu lweyi a dezenyaraka kahle, ni tlhele ni tshika ni mahanyelo ya manene lawa va nga ni djondzisa wona nkama na ni li muntsongo. Swoswi lexi a xi li xa lisima ka mina a ku li ku tlanga ni ku tshama ni tintombhi ta tinyingi hi nkama wa wun’we, kambe ku chaya ni ku dezenyara a swi ku hetanga ku karhateka loku a ni li na kona. Phela a ku chava ka mina a ku voneka ni ka minchumu leyi a ni yi dezenyara, a ni tivutisa swaku: Kasi ku ta yentxeka yini ka nkama lowu taka? Hi mhaka muni hi hanya?

Ti ni hlamalisile tinhlamulu ta swivutiso swa mina. Siku lin’wana na ni li xikola a ni bula ni vanhu lava a ni djondza na vona hi leswi swi nga ta yentxeka ka nkama lowu taka. A ni djondza na Mandy * lweyi a a li Mboni ya Yehovha, a ni byele leswi: “Andreas loko u lava ku kuma tinhlamulu ta swivutiso swa wena hi wutomi ni hi leswi swi nga ta yentxeka ka nkama lowu taka u fanele u tiva leswi Bibele li swi vulaka.”

Mina a ni swi kholwanga hintamu leswi Mandy a nga swi hlaya, hambileswo ni zame ku sungula ku lerha Bibele. Mandy a ni kombe Buku la Daniyele ndzima 2, ni hlamalile nkama ni nga yi lerha. Ndzima leyi yi vulavula hi mimfumu ya yinyigi leyi a yi ta va kona ni ka masiku ya hina, Mandy a tlhele a ni komba a wuprofeta lin’wana ka Bibele leli a li vulavula hi minchumu leyi yi nga ta yentxeka ka nkama lowu taka, phela se a ni ti kumile tinhlamulu ta swivutiso swa mina: Hi mani a nga tsala a wuprofeta leli? Kumbe hi mani a nga vulaka a minchumu na swi nge se yentxeka? Indje Xikwembu xi kona hikakunene?

Mandy a ni kombe Horst na Angelika, vona a va li Timboni ta Yehovha naswona a va li nuna na nsati va ni pfunile ku twisisa Bibele. Ni tekele ku swi vona swaku Timboni ta Yehovha hi tona ntsena ti pfunaka vanhu ku tiva swaku vito la Xikwembu hi Yehovha. (Tipisalema 83:18; Matewu 6:9) Ni djondze swaku Yehovha a hi nyika ntsembo wa ku kuma wutomi la ku kala li nga heli a paradesi lani misaveni Tipisalema 37:9 yi li: “Lava tshembaka Yehovha vata hanya misaveni.” Ni tsakile hintamu hi ku tiva swaku hinkwavu lava va tshembaka Yehovha va ta kuma wutomi la ku kala li nga heli.

Kambe a swi ni karhatela ku txintxa wutomi la mina la khale swaku ni hanya hi minawu ya Bibele. A ni fanele ni djondza a ku tiveka hansi hikusa a ku chaya ni ku dezenyara a swi ni yentxe ni va munhu wa ku tibyela, naswona swi ni karhatelile hintamu ku tshika minchumu ya ku biha leyi a ni yi yentxa. Ni mu khensa hintamu Yehovha hileswi a nga ni lehisela mbilu a tlhela a ni rivalela ni ku vona minzamu leyi hi yi yentxaka swaku hi tsakisa mbilu ya yena.

Ku kholwa ka leswaku Xikwembu a xi kona ni ka mafumelo ya wu comunismo swi li khumbe hintamu wutomi la mina ku sukela na ni li mutsongo ku ya fika ka 18 wa malembe. Kambe Bibele li txintxe wutomi la mina. Leswi ni nga swi djondza swi ni pfunile ku va ni nga ha chavi leswi swi nga ta yentxeka ka nkama lowu taka, ni tlhela ni tiva swaku ni hanyela yini. Hi 1993 ni tsakamisiwile, naswona hi lembe la 2000 ni chadile na Tabitha lweyi a mu rhandzaka hintamu Yehovha. Swoswi hi heta nkama wa wunyingi na hi pfuna vanhu van’wana swaku va li tiva ku yampsa Bibele, vanhu va vanyingi lava hi kumanaka na vona a va ni wutomi la ku fana ni la mina, a va kholwa ka politika la wu comunismo ni ka leswaku Xikwembu a xi kona, ni tsakile hintamu hileswi ni va pfunaka ku mu tiva ku yampsa Yehovha.

Nkama ni nga sungula ku djondza Bibele ni Timboni ta Yehovha vapsali va mina va hlamalile hintamu, kambe a va swi vona swaku leswo swi txintxa wutomi la mina. Na tsaka hileswi va lerhaka Bibele ni ku ya mintlhanganwini.

Mina na Tabitha hi tsakile hikusa hi hanya hi minawu ya Xikwembu, hi xikombiso Bibele li vula swaku nuna na nsati va fanele va tshembeka ni ku hanya hi leswi Bibele li swi vulaka, leswo swi tiyisa muchadu wa hina. — Vaheberu 13:4.

Swoswi a na ha swi chavi leswi swi nga ta yentxeka ka nkama lowu taka, ni ni ndjangu lowu wu nga tala hi Timboni ta Yehovha amisaveni hinkwayu. Ka ndjangu lowu ku ni ku rhula, ha twanana naswona hinkwerhu ha fana, leswo a ni swi lava ku sukela khale.