Leswi nga ndzeni

•  Marito Ya Ku Pfula 2

•  Xuma Xi Nga Ka Rito La Xikwembu 3-5

  •  Dixkursu 3

  •  Lavetela Xuma Ka Rito La Xikwembu 4

  •  Ku Lerha Bibele 5

•  Hisekela Ntirho Wa Ku Chumayela 6-14

  •  Ku Sungula Mabulu 7

  •  Ku Yendla Marevhizita 8

  •  Ku Djondzisa Vanhu Bibele 9

  •  Ku Tlhamusela Van’wani Leswi Hi Kholwaka Ka Swona 10

  •  Dixkursu 11

  •  Leswi nga Ndzeni 12

  •  Mayendlela 13

  •  Ku Tirhisa Mavhidiyo Ni Mabuku 14

•  Mahanyelo Ya Hina Vakreste 15-16

  •  Djondzo ya Bibele Ya Bandla 16

•  Marito Ya Ku Pfala 17

•  Ku Bumabumela ni Switsundzuxu 18

•  Nkama 19

•  Loko Bandla Li Yendzeliwa Hi Mudjikelezi 20

•  Vhiki La Asembleya Kumbe Kongresu 21

•  Vhiki La Xitsundzuxu 22

•  Mulanguteli Wa Ntlhanganu Wa Mahanyelo Ni Ntirho 23

•  Mufambisi Wa Ntlhanganu Wa Mahanyelo Ni Ntirho 24

•  Mutsundzuxi Wa Madoda Ni Vapfunisi Va Bandla 25

•  Masala Man’wani 26

•  Mavhidiyo 27

1. Nkongomiso lowu nga ka papela leli wu ta pfuna hinkwavu lava nga ni swiyavelo ka Ntlhanganu wa Mahanyelo ni Ntirho wa Hina Wa Wukreste. Hinkwavu lava nga ni swiyavelo va fanele va lerha nkongomiso lowu, ni lowu nga ka Xibukwana xa Mahanyelo ni Ntirho na va nga se sungula ku lulamisela swiyenge swa vona. Vachumayeli hinkwavu va fanele va kombeliwa swaku va titsalisa leswaku va ta nyikiwa swiyavelo ka ntlhanganu lowu. Vanhu van’wani lava vaka kona nkama ni nkama a mintlhanganwini naswona va kholwaka leswi Bibele li swi djondzisaka va tlhela va hanya hi matshinya ya minawu ya Bibele, na vona va nga nyikiwa swiyavelo. Mulanguteli wa Ntlhanganu wa Mahanyelo ni Ntirho a fanele a kambela a tlhela a tlhamusela hinkwavu lava kalaka va nga li vachumayeli lava navelaka ku titsalisa leswi lavekaka swaku va faneleka a tlhela a va byela loku va faneleka. A fanele a va kambela na ku ni lweyi a va fambiselaka xidjondzo (kumbe mupsali lweyi i nga mboni wa n’wana lweyo). Leswi kambeliwaka swaku munhu a faneleka swi fana ni leswi kambeliwaka loko munhu a lava kuva muchumayeli wa ku kala a nga se tsakamisiwa. Nhlengeletanu ndzima 8, par. 8.

 MARITO YA KU PFULA

2. 1 minutu. Vhiki lin’wani ni lin’wani, loko se ku game lisimu ni xikhongelo, mufambisi wa ntlhanganu a fanele a pfuxa ku navela ka lava nga ka ntlhanganu hi ku tlhamuselanyana leswi nga ta djondziwa a tlhela a vula tipontu ta lisima leti nga ta pfuna bandla.

XUMA XI NGA KA RITO LA XIKWEMBU

3.    Dixkursu: 10 minutu. Nhlokomhaka ya dixkursu leli yi kumeka ka Xibukwana xa Mahanyelo ni Ntirho naswona yi ni 2 kumbe 3 wa tipontu ta lisima. Li fanele li vekiwa hi doda kumbe mupfunisi wa bandla lweyi a fanelekaka. Loko ku sunguliwa buku la nyuwani la Bibele, ku ta va ni vhidiyo la xingheniso xa buku lolelo leli nga ta kombisiwa. Muveki wa dixkursu a nga ha kombisa ku yelana loku nga kona ka vhidiyo ni dixkursu la yena. Kambe a fanele a tlhamusela tipontu hinkwatu ta lisima ti nga ka Xibukwana xa Mintlhanganu. Loko nkama wu mu pfumelela, a fanele a vulavula hi mafoto lama nga ka Xibukwana xa Mintlhanganu lama nga yendleliwa ku tlhamusela kahle mhaka leyi ku djondziwaka hi yona. Muveki wa dixkursu a nga ha peta tintlhamuselo leti nga ka mareferensiya man’wani loko ntsena ti pfuna ku basisa tipontu ta nhlokomhaka leyi nga ka Xibukwana xa Mintlhanganu.

 4. Lavetela Xuma ka Rito la Xikwembu: 10 minutu. Lexi i xiyenge xa swivutiso ni tinhlamulu lexi kalaka xi nga na xingheniso hambi hi marito ya ku pfala. Xi fanele xi vekiwa hi doda kumbe mupfunisi wa bandla lweyi a fanelekaka. A fanele a yendla vayingiseli swivutiso swimbirhi leswi nga ka Xibukwana xa Mintlhanganu. Handle ka leswo, a fanele a vona swaku swa boha ku lerha tindzimana leti nga tsaliwa kumbe ihim. Lava hlamulaka va fanele tirhisa 30 wa masegundu.

 5. Ku Lerha Bibele: 4 minutu. Xiyenge lexi xi fanele xi vekiwa hi makwerhu wawanuna. Lweyi a nga ta lerha a nga fanelanga a yendla xingheniso kumbe mahetelelo. Mufambisi wa ntlhanganu a fanele a pfuna vamakwerhu lava swaku va lerha kahle leswi nga tsaliwa, hi ndlela leyi twisisekaka, hi ku khuluka, va khandzihisa lomu swi lavekaka, va txintxatxintxa rito, va hlonipha mapontu ni mavirgula, va tlhela va lerha hi ndlela ya ntumbuluku. Leswi tindzimana tin’wani ti nga leha naswona tin’wani ti nga goma, mulanguteli wa ntlhanganu a fanele a pimisa kahle hi lweyi a nga ta mu nyika swaku a lerha.

HISEKELA NTIRHO WA KU CHUMAYELA

 6. 15 minutu. A xiyenge lexi xi yendleliwe ku pfuna vachumayeli hinkwavu swaku va yampsisa machumayelelo ni madjondziselo ya vona. Loko swi koteka, madoda na wona ma nga ha nyikiwa swiyavelo leswi. Hinkwavu lava nyikiwaka xiyenge lexi va fanele va lerha va tlhela va tirhisa tipontu va nga ti kuma ka broxura Tinyiketeli ni le ka broxura Rhandza Vanhu leli nga kombisiwa ka maparentex a tlhelweni ka xiyavelo ka Xibukwana xa Mintlhanganu. Hi ku famba ka nkama, ku ta hleliwa xiyenge lexi nga ta va ni mabulu ni vayingiseli. Xiyenge lexi xi ta vekiwa hi doda kumbe mupfunisi wa bandla lweyi a fanelekaka. —Vona  paragrafu 15 leswaku u vona swaku swi yendlisiwa ku yini swiyenge leswi nga ni mabulu ni vayingiseli.

 7. Ku sungula mabulu: Xiyenge lexi xi nga yendliwa hi makwerhu wawanuna kumbe wawansati. Loko a li wanuna, mupfunisi wa yena a fanele a li wanuna; loko a li wansati, mupfunisi wayena a fanele a li wansati. Naswona swa pfumeleliwa swaku xi vekiwa hi wanuna ni wansati va ndjangu wun’we. Va nga xi veka na va nyimile kumbe na va yo tshama. —Vona  maparagrafu 12 na 13 leswaku u vona swaku ku nga ha vulavuliwa hi yini ka swiyenge leswi ni mayendlela ya kona.

  8. Ku yendla marevhizita: Xiyenge lexi xi nga yendliwa hi makwerhu wawanuna kumbe wawansati. Loko a li wanuna, mupfunisi wa yena a fanele a li wanuna; loko a li wansati, mupfunisi wayena a fanele a li wansati. Loko wanuna ni wansati va nyikiwa nkombiso lowu va fanele va li va ndjangu wun’we. (Vutirheli bya Mfumo 5/97 paj. 3 hi Xitsonga) Nkombiso lowu va nga wu yendla na va nyimile kumbe na va tshamile. Xitudanti xi fanele xi kombisa swaku xi nga vula swaku yini leswaku xi yisa mahlweni mabulu lawa ma nga hundza. —Vona  maparagrafu 12 na 13 leswaku u vona swaku ku nga ha vulavuliwa hi yini ka swiyenge leswi ni mayendlela ya kona.

 9. Ku djondzisa vanhu Bibele: Nkombiso lowu wu nga yendliwa hi makwerhu wawanuna kumbe wawansati. Loko a li wanuna mupfunisi wa yena a fanele a li wawanuna, loko a li wawansati mupfunisi wa yena a fanele a li wawansati. (Vutirheli bya Mfumo 5/97 paj. 3 hi Xitsonga) Nkombiso lowu va nga wu yendla na va nyimile kumbe na va tshamile. Xiyenge lexi xi fanele xi kombisa djondzo ya Bibele leyi nga xikarhi, loko makwerhu a nga byeliwanga nchumu. A swi bohi ku lerha maparagrafu hinkwawu hambileswi swi kalaka swi nga tsimbisiwi.

 10. Ku tlhamusela van’wani leswi hi kholwaka ka swona: Loko xiyenge lexi ku ta va dixkursu, li fanele li vekiwa hi makwerhu wawanuna. Loko ku li nkombiso, wu nga yendliwa hi makwerhu wawanuna kumbe wawansati. Loko a li wanuna mupfunisi wa yena a fanele a li wanuna, loko a li wansati mupfunisi wa yena a fanele a li wansati. Loko wanuna ni wansati va nyikiwa nkombiso lowu va fanele va li va ndjangu wun’we. Makwerhu a fanele a hlamula xivutiso lexi fambelanaka ni nhlokomhaka hi wutlharhi ni hi ndlela ya ku twisiseka, na a tirhisa rungula leli nga nyikeliwa. Makwerhu a ta tilangela ha yexe swaku a ta vula kumbe ihim lomu a nga li kuma kona rungula leli a li tirhisaka.

 11. Dixkursu: Xiyavelo lexi xi fanele xi vekiwa hi makwerhu wawanuna tanihi dixkursu la ku kongomisiwa ka bandla. Loko dixkursu li sekeliwe kapontu yi nga ka Xiyengetelo A wa broxura Rhandza Vanhu, makwerhu a fanele a kombisa swaku ndzimana kumbe tindzimana leti nga kombisiwa ti nga tirhisiwa ku yini ka ntirho wa ku chumayela. Hi xikombiso a nga ha tlhamusela swaku hi ta yi tirhisa loko swi te yini ndzimana leyo, leswi yi tlhamuselaka swona ni leswaku hi nga mu pfunisa ku yini lweyi hi vulavulaka na yena leswaku a yi twisisa. Loko dixkursu li sekeliwe ka yin’we ya tidjondzo ti nga ka broxura Rhandza Vanhu, makwerhu a fanele a kombisa swaku hi nga li tirhisisa ku yini rungula lelo ka ntirho wa nsimu. A nga ha tlhamusela kahle xikombiso lexi nga ka pontu 1 ya djondzo yoleyo kumbe ndzimana yin’wani ni yin’wani leyi nga kona ka djondzo leyo, loko swi pfuna.

  12. Leswi nga ndzeni: Rungula leli nga ka paragrafu leli ni leli landzelaka li fambelana ni swiyenge “Ku sungula mabulu” ni “ku yendla marevhizita”. Loko ku nga nyikeliwanga nkongomiso wun’wani, muchumayeli a fanele a tlhamusela ntiyiso wu nga ka Bibele lowu nga wa lisima ka munhu lweyi a vulavulaka na yena ni ku mu siyela mhaka leyi va nga ta vulavula hi yona ka khambi leli landzelaka. Makwerhu a fanele a langa mhaka leyi nga nkameni leyi tsakeliwaka hi vanhu va le mugangeni. A ta tilangela swaku a ta nyikela buku kumbe ku kombisa lin’we la mavhidiyo lawa ma nga ka Switirho swa ku Djondzisa hi swona. A matshan’weni ya ku dekorara kumbe ku veka ka nhloko marito hinkwawu lawa a nga ta ma tirhisa, muchumayeli a fanele a yampsisa leswi a bulisaka xiswona, a vulavula hi ndlela ya ntumbuluku ni ku kombisa swaku a ni mhaka ni lweyi a bulaka na yena.

 13. Mayendlela: Muchumayeli a fanele a tirhisa mayendlela lawa a nga yaveliwa wona a tlhela a ma twananisa ni xiyimu xa lomu a tshamaka kona. Hi xikombiso:

1. (1) Yindlo ni Yindlo: Ka mayendlela lawa u nga ha chumayela hi yindlo ni yindlo —hi ku gongondza xipfalo, hi telefone, kumbe hi ku tsala karta—swi tlhela swi patsa ku yendla revhizita ka munhu lweyi u nga mu kuma ka yin’we ya 3 wa tindlela leti nga kombisiwa.

2. (2) Ku chumayela swa kola na kola: Mayendlela lawa ma kombisa leswi hi nga ma londzovotisaka xiswona mabulu ya siku ni siku leswaku hi chumayela. Swi nga ha patsa kuva hi bula hi mhaka yi nga ka Bibele ni lava hi tirhaka na vona, lava hi djondzaka na vona xikolweni, vayakelani, lava hi nga khwela na vona ka xibomba ni tindhawu tin’wani loko hi yendla mintirho ya hina ya siku ni siku.

3. (3) Ku chumayela ka ndhawu ya ku tala vanhu: Mayendlela lawa ma nga ha patsa ku chumayela hi xikarinyana ni ku chumayela lomu ku nga ni switolo, switaratwini, ka ma jardim, lomu ku vekiwaka mimovha ni tindhawu tin’wani leti nga tala vanhu.

 14. Ku tirhisa mavhidiyo ni mabuku: Hi ku ya hi xiyimu, muchumayeli a nga tilangela swaku a ta tirhisa vhidiyo ni ku nyikela buku kumbe ihim. Loko xiyavelo xi lava ku tirhisiwa vhidiyo kumbe loko muchumayeli a tilangela ku tirhisa vhidiyo, a nga ha vulavula hi lona kumbe ku li tlhamusela, kambe a li fanelanga li kombisiwa ka nkama wa xiyenge xa vona.

  MAHANYELO YA HINA VAKRESTE

15. Loko se ku yimbeleliwe lisimu, ka 15 minutu wa ku sungula, ku tirhisiwa xiyenge xin’we kumbe swimbirhi leswaku ku pfuniwa vamakwerhu ku tirhisa leswi va swi djondzaka ka Bibele. Loko ku nga nyikeliwanga nkongomiso wun’wani, swiyenge leswi swi ta vekiwa hi madoda kumbe vapfunisi va bandla lava fanelekaka. Kambe xiyenge xa swilaveko swa bandla xi fanele xi vekiwa hi madoda ntsena. Loko ka xiyenge xa kona ku vuya swaku mabulu, lweyi a vekaka dixkursu a nga ha yengetela swivutiso swin’wani handle ka leswi nga ka xibukwana xa mintlhanganu. A fanele a yendla a xingheniso xa ku goma, leswaku a ta va ni nkama wa ku yanela wa ku tlhamusela tipontu hinkwatu, ni ku pfumelela swaku ku hlangamela vamakwerhu va vanyingi hi ku nyikela tinhlamulu. Loko ku ni entrevhixta, loko swi koteka, makwerhu lweyi a nga ta hlamula swivutiso a fanele a ya swi hlamula hala phambeni, a nga fanelanga a swi hlamula na a tshame ka ndhawu ya yena.

  16. Djondzo ya Bibele ya Bandla: 30 minutu. Yi ta fambisiwa hi doda leli fanelekaka. (Ka mabandla lawa ku nga ni nhlayo ya yitsongo ya madoda ku nga ha tirhisiwa vapfunisi va bandla lava fanelekaka loko swi laveka) Ntlawa wa madoda hi wona wu faneleke wu langa swaku hi vamani lava fanelekaka ku fambisa djondzo ya Bibele ya bandla. Lava nga langiwa va fanele va djondzisa kahle va tlhela va wu yava kahle nkama; va fanele va yendla swaku matsalwa lama nga khoma mhaka ma twisiseka kahle ni ku pfuna hinkwavu leswaku va twisisa lisima la ku tirhisa leswi va swi djondzaka. Lava fambisaka djondzo va nga ha kuma switsundzuxu leswi pfunaka ka nkongomiso lowu kombisaka leswi swi faneleke swi fambisiwa xiswona swiyenge leswi nga ni swivutiso ni tinhlamulu. (Murindzi 04/23 paj. 24, kwadru) Loko djondzo yi hela a swi bohi swaku lweyi a yi fambisaka a yengetela swin’wani swaku a ta tlhanganisa nkama. Loko swi koteka, vhiki ni vhiki ku fanele ku tirhisiwa vamakwerhu va ku hambana leswaku va fambisa djondzo ni ku lerha maparagrafu. Loko mufambisi wa ntlhanganu a kombela swaku ku pumbiwa nkama wa Djondzo ya Bibele ya Bandla, mufambisi wa yona a ta swi vona swaku a ta swi yendlisa ku yini. A nga ha langa leswaku maparagrafu man’wani ma nga lerhiwi.

MARITO YA KU PFALA

  17. 3 minutu. Mufambisi wa ntlhanganu a ta pfuxeta tipontu ta lisima leti nga djondziwa ka ntlhanganu, a gama a vula leswi nga ta djondziwa ka vhiki leli landzelaka. Loko nkama wu pfumela, a nga ha tivisa mavito ya lava nga ta va ni swiyenge ka vhiki leli landzelaka. Loko ku nga nyikeliwanga nkongomiso wun’wani, mufambisi a ta tirhisa nkama wa marito ya ku pfala leswaku a nyikela switiviso kumbe ku lerha makarta. Switiviso swin’wani swa ku fana ni nkama wa ntlhanganu wa ntirho wa ku chumayela kumbe xikala xa limpeza a swi fanelanga swi tivisiwa. Swi fanele swi namaketiwa ka kwadru la switiviso. Loko ku ni switiviso swa swinyingi leswi nga ta tlula 3 minutu, lweyi a fambisaka ntlhanganu a fanele a kombela vamakwerhu lava nga ta veka madixkursu ka xiyenge xa “Mahanyelo ya Hina Vakreste” leswaku va pumba nkama wa vona. (Vona  maparagrafu 16 na  19.) Ntlhanganu wu fanele wu pfaliwa hi lisimu ni xikhongelo.

 KU BUMABUMELA NI SWITSUNDZUXU

18. Loko ku gama xiyavelo xin’wani ni xin’wani xa xitudanti, mufambisi wa Ntlhanganu wa Mahanyelo ni Ntirho a ni 1 minutu kuva a bumabumela a tlhela a nyikela switsundzuxu hi kuya hi djondzo leyi makwerhu a nga yaveliwa yona. Mufambisi wa ntlhanganu a nga fanelanga a tivisa djondzo leyi xitudanti xi tirhelaka ka yona na xi nga se veka xiyenge xa xona. Kambe loko se xi gamile ni loko se a xi bumabumelile swi suka mbilwini, loko a swi lava, a nga vula djondzo leyi xitudanti a xi tirhela ka yona a tlhela a vula swaku hi mhaka muni xi xi hetisise kahle xiyenge xa xona, hi ku ya hi djondzo ya kona, kumbe ku xi tlhamusela hi lirhandzu swaku hi mhaka muni swi li swa lisima kuva xi tlhela xi tirhela ka djondzo yoleyo ni leswi xi nga swi yendlisaka xiswona. Mufambisi wa ntlhanganu, a nga ha tlhela a vulavula hi swilo swin’wani leswi a nga swi vona ka xiyavelo, loko a vona swaku swi ta pfuna xitudanti kumbe vachumayeli hinkwavu. Loko ntlhanganu se wu gamile kumbe hi siku lin’wani, loku a swi tsakela, hi tlhelweni, mufambisi wa ntlhanganu a nga ha nyika xitudanti switsundzuxu swin’wani swa lisima leswi nga ka broxura Rhandza Vanhu, Tinyiketeli, kumbe ka buku Xikolo xa Vutirheli leswi fambelanaka ni djondzo leyi a xi tirhela ka yona kumbe yin’wani. — Leswaku u kuma leswi yengetelekeke hi ntirho wa mufambisi wa Ntlhanganu wa Mahanyelo ni Ntirho ni wa mutsundzuxi wa madoda ni vapfunisi va bandla, vona  maparafu 19,  24 ni 25.

NKAMA

     19. Mufambisi wa ntlhanganu ku patsa ni hinkwavu lava nga ni swiyenge a va fanelanga va tlulisa nkama wa vona. Hambileswi Xibukwana xa mintlhanganu xi kombisaka swaku xiyenge ha xin’we xi ni nkama wa ku gama kwini, loko u tlhamusele kahle hinkwaswu ku tlhela ku sala nkama, a swi bohi ku yengesela swin’wani leswaku u ta fikelela nkama lowu u nga nyikiwa wona. Loko makwerhu a dla nkama, a fanele a nyikiwa switsundzuxu axihundleni hi mufambisi wa ntlhanganu kumbe hi mutsundzuxi wa madoda ni vapfunisi va bandla. (Vona  maparagrafu 24 ni 25.) A ntlhanganu hinkwawu, ku patsa ni tinsimu ni swikhongelo, wu fanele wu heta wora ni 45 minutu.

LOKO BANDLA LI YENDZELIWA HI MUDJIKELEZI

 20. Loko bandla li yendzeliwa hi mudjikelezi, ntlhanganu wu fanele wu landzela leswi nga ka Xibukwana xa Mintlhanganu. Kambe ku ni leswi nga ta txintxanyana: Djondzo ya Bibele ya Bandla yi ta pfaletiwa hi dixkursu la ntirho la 30 minutu leli nga ta vekiwa hi mudjikelezi. Na a nga se rhamba mudjikelezi swaku a ta veka dixkursu la yena, mufambisi wa ntlhanganu a fanele a pfuxeta leswi nga djondziwa, a vula leswi nga ta djondziwa vhiki leli landzelaka, a nyikela switiviso loko swi li kona, a lerha makarta loko swi laveka, a vula nhlokomhaka ya dixkursu la mudjikelezi a gama a mu vitana. Loko a heta dixkursu la yena, mudjikelezi a ta pfala ntlhanganu hi lisimu leli a nga li langa naswona loko a swi lava a nga ha vitana makwerhu mun’wani swaku a ta pfala hi xikhongelo. Ka vhiki la ku hlawuleka, a ku fanelanga ku tirhisiwa masala man’wani leswaku ku yendliwa minkombiso ya switudanti kambe loko ku ni grupu leli tirhisaka masala wolawo, li nga ha tlhangana hambi a li kona mudjikelezi. Kambe loko ku fika nkama wa dixkursu la ntirho la mudjlkelezi va fanele va tlhangana ni bandla.

VHIKI LA ASEMBLEYA KUMBE KONGRESU

 21. A ku na mintlhanganu ya bandla hi vhiki la asembleya kumbe kongresu. Vamakwerhu va fanele va khumbukisiwa swaku mun’wani ni mun’wani a fanele a djondza yexe kumbe hi ndjangu leswi a swi ta djondziwa ka mintlhanganu ya vhiki lelo.

 VHIKI LA XITSUNDZUXU

22. Loko Xitsundzuxu xi khomiwa xikarhi ka vhiki, Ntlhanganu wa Mahanyelo ni Ntirho a wu nga te khomiwa.

 MULANGUTELI WA NTLHANGANU WA MAHANYELO NI NTIRHO

23. Ntlawa wa madoda wu fanele wu langa doda lin’we swaku li tirha tanihi mulanguteli wa Ntlhanganu wa Mahanyelo ni Ntirho. A ni wutihlamuleli la ku tiyiseka swaku ntlhanganu wu famba kahle naswona hinkwavu va landzela nkongomiso lowu nga nyikeliwa lani. Mulanguteli wa ntlhanganu a fanele a vulavulisana kahle ni mutsundzuxi wa madoda ni vapfunisi va bandla. Loko Xibukwana xa Ntlhanganu wa Mahanyelo ni Ntirho se xi kumeka, mulanguteli wa ntlhanganu wa Mahanyelo ni Nirho a fanele a nyikela swiyavelo swa mintlhanganu hinkwayu ya xikarhi ka vhiki swa ku ringana tiwheti timbirhi. Leswi swi patsa ni swiyenge swin’wani swa ku kala swi nga li swa switudanti, i nga swiyenge swa vafambisi va ntlhanganu wa xikarhi ka vhiki (ka lava nga langiwa hi ntlawa wa madoda) ni swiyavelo swa switudanti. (Vona  maparagrafu 3-16 ni  24.) Loko a nyikela swiyavelo a fanele a pimisa hi ntanga, ntokoto wa makwerhu ni swaku makwerhu yelweyo swa mu fanela ku vulavula hi nhlokomhaka yoleyo. Xiyavelo xin’wani ni xin’wani xi fanele xi nyikeliwa na ka ha sale 3 wa mavhiki kumbe ku tlula. Ku fanele ku tirhisiwa formulariyu leli nge Mahanyelo ya Hina Vakreste Papela La Xiyavelo (S-89) loko ku nyikeliwa a swiyavelo swa switudanti. Mulanguteli wa Ntlhanganu wa Mahanyelo ni Ntirho a fanele a tiyiseka swaku xiyimiso xa ntlhanganu xa vekiwa ka kwadru la switiviso na xi ni swiyavelo hinkwaswu. Ntlawa wa madoda wu nga veka doda kumbe mupfunisi wa bandla swaku a mu pfunisa. Kambe o va madoda ntsena lawa ma nga nyikelaka swiyavelo swa ku kala swi nga li swa switudanti.

     MUFAMBISI WA NTLHANGANU WA MAHANYELO NI NTIRHO

24. Vhiki lin’wani ni lin’wani, doda lin’we li tirha tanihi mufambisi wa ntlhanganu wa Mahanyelo ni Ntirho. (Ka mabandla lama nga ni nhlayo ya yitsongo ya madoda ku nga tirhisiwa vapfunisi va bandla lava fanelekaka, loko swi laveka.) Mufambisi wa ntlhanganu a fanele a lulamisela marito ya ku pfula ni ya ku pfala, naswona hi yena a tivisaka swiyavelo hinkwaswu ku patsa ni vaveki va swona, naswona hi ku ya hi nhlayo ya madoda, a nga tlhela a veka swiyenge swin’wani ngopfungopfu leswi swi lavaka ku kombisiwa vhidiyo ntsena. A nga fanelanga a hlwela swaku a vitana makwerhu lweyi a landzelaka. Ntlawa wa madoda hi wona wu nga ta boha swaku i vamani va nga ta fambisa ntlhanganu. Lava fambisaka ntlhanganu va nga ha txintxana vhiki ni vhiki. Loko swi koteka, Mulanguteli wa Ntlhanganu wa Mahanyelo ni Ntirho a fanele a fambisa ntlhanganu minkama ya yinyingi ku tlula madoda laman’wani. Loko doda li fambisa Djondzo ya Bibele ya Bandla, swi vula swaku hambi ntlhanganu li nga wu fambisa. Doda leli fambisaka ntlhanganu li fanele li nyikela switsundzuxu ni ku tlangela switudanti hi lirhandzu naswona li fanele li tiyiseka swaku ntlhanganu wu hela hi nkama. (Vona  maparagrafu 17 ni  19.) Loko mufambisi wa ntlhanganu a swi lava naswona palku ku ni ndhawu, ku nga ha vekiwa mikrofoni wun’wani lowu a nga wu tirhisaka swaku a vitana lavanga ni swiyenge. Leswo swi ta yendla swaku lavanga ni swiyenge va nga dli nkama. Loko a swi lava a nga ha tshama ka meza lowu nga ka palku kumbe ka xitshamu lexi nga kusuhi ni palku loko ku lerhiwa Bibele ni loko switudhanti swi hetisisa swiyavelo swa swona ka xiyenge lexinge “Hisekela Ntirho wa Ku Chumayela”. Ku yendla leswi swi nga maha leswaku ku nga dliwi nkama.

MUTSUNDZUXI WA MADODA NI VAPFUNISI VA BANDLA

25. Loko swi koteka, ku fanele ku tirhisiwa doda leli vekaka kahle madixkursu. Loko swi laveka, mutsundzuxi wa madoda hi yena a nyikelaka switsundzuxu ka madoda ni vapfunisi va bandla. A fanele a va nyika switsundzuxu leswi fambelanaka ni swiyenge leswi va nga swi hetisisa ka Ntlhanganu wa Mahanyelo ni Ntirho, madixkursu, ku lerha maparagrafu, ku fambisa Djondzo ya Murindzi kumbe Djondzo ya Bibele ya Bandla. (Vona  paragrafu 19.) Loko bandla li ni madoda ya manyingi lama djondzisaka kahle, ku nga ha txintxiwa mutsundzuxi wa madoda ni vapfunisi va bandla lembe ni lembe. A swi bohi leswaku mutsundzuxi wa madoda ni vapfunisi va bandla a nyikela switsundzuxu ka xiyavelo xin’wana ni xin’wani.

 MASALA MAN’WANI

26. Loko switudanti swi li swinyingi, mabandla ma nga ha tirhisa masala man’wani leswaku ku va ni swiyenge swa switudanti. Sala lin’wani ni lin’wani li fanele li va ni mufambisi lweyi a nga ni wuswikoti, loko swi koteka ku nga va doda. Loko bandla li nga na madoda yamanyingi, ku nga ha tirhisiwa mupfunisi wa bandla. Ntlawa wa madoda hi wona wu nga ta boha leswaku ku ta tirhisiwa mani ni leswaku a ta txintxana ni van’wani kumbe ihim. Mufambisi a fanele a landzela leswinga ka paragrafu 18. Loko ku tirhisiwa masala man’wani, switudanti swi fanele swi kombeliwa leswaku swi ya ka wona loko ku hela xiyenge lexinge “Lavetela Xuma ka Rito la Xikwembu”. Loko swiyenge hinkwaswu swa “Hisekela Ntirho wa Kuchumayela” swi hela swi fanele swi tlhelela a sala principal.

 MAVHIDIYO

27. Ku ni mavhidiyo lama lulamiseliwaka ntlhanganu wun’wani ni wun’wani. Mavhidiyo ya ntlhanganu wa xikarhi ka vhiki ma ta kumeka ka JW Library leswaku ma tirhisiwa hi tindlela ta ku hambana hambana.

© 2023 Watch Tower Bible and Tract Society of Pennsylvania

S-38-CGM 11/23