“Tinyikeleni, mi ta swi tiva swaku ni Xikwembu. Ni ta tlakusiwa xikarhi ka matiko; ni ta tlakusiwa amisaveni.” — Tipisalema 46:10, Wuhundzuluxeli La Misava Ya Nyuwani.

 “Miyelani, mi ta swi tiva swaku ni Xikwembu, ni ta tlakusiwa xikarhi ka matiko; ni ta tlakusiwa amisaveni.” — Tipisalema 46:10, Versão Rei Jaime.

 Xikwembu xi lava leswaku vanhu hinkwavu va xi gandzela, va tlhela va tiva swaku ko va xona ntsena lexi faneliwaka hi ku fuma misava. Matimba ni Wuhosi leli xi nga na lona, swi wu kombisa kahle ntiyiso lowu hinkwerhu hi lavaka ku hanya hilaha ku nga heliki hi faneleke hi wu tiva. — Nhlawutelo 4:11.

 “Tinyikeleni, mi ta swi tiva swaku ni Xikwembu.” Mabibele man’wani ma hundzuluxela marito lawa ya ku sungula ma ku “Miyelani.” Leswo swi yendle leswaku vanhu vavanyingi va va ni mavonelo ya ku hoxeka ya leswaku marito lawa, i nawu lowu a wu kombisa leswaku ku fanele ku kombisiwa xihlonipho ku tlhela ku miyeliwa loko vanhu va li kerekeni. Kambe marito lawa ya Xiheberhu lawa ma nge “tinyikeleni mi ta swi tiva swaku ni Xikwembu” i marito ya Yehovha a Xikwembu lawa ma kongomisaka vanhu misaveni hinkwayu leswaku va tshika ku lwa na yena va tlhela va pfumela leswaku o va yena ntsena lweyi a faneliwaka hi ku gandzeliwa.

 Xitsundzuxu xa ku fana xi kumeka ka Tipisalema ndzima 2. Ka ndzima leyi, Xikwembu xi tshembisa ku helisa lava va xi kanetaka. Kambe lava va xi tshembaka, va tinyimisele ku yingisa nkongomiso, wutlharhi ni ku tlhela va tshemba matimba ya xona. “Lava va tumbelaka ka xona” va ta tsaka va tlhela va sirheleleka loko va kumana ni swikarhatu swa ku tika. — Tipisalema 2:9-12.

 “Ni ta tlakusiwa xikarhi ka matiko; ni ta tlakusiwa amisaveni.” Ka nkama lowu nga hundza, Yehovha Xikwembu a dzunisiwile hi mhaka ya leswi a nga tirhisa matimba ya yena swaku a vhikela vanhu va yena. (Eksoda 15:1-3) Se ka nkama lowu taka, a ta tlakusiwa amisaveni hinkwayu loko vanhu hinkwavu va ta tiveka hansi ka wuhosi la yena, va tlhela va mu gandzela. — Tipisalema 86:9, 10; Esaya 2:11.

 Buku lin’wani li vule leswaku Pisalema 46 “i lisimu leli dzunisaka matimba ya Xikwembu, muvhikeli wamukulu wa vanhu va yena.” Vanhu va Xikwembu loko va yimbelela Tipisalema 46, a va kombisa leswaku va swi tshemba swaku impela Yehovha a ta va vhikela a tlhela a va pfuna. (Tipisalema 46:1, 2) Marito ya Mupisalema lweyi, a ma va khumbukisa leswaku minkama hinkwayu Yehovha a a li na vona. — Tipisalema 46:7, 11.

 Leswaku va tiyisa ntshembo lowu va nga na wona wa leswaku Yehovha a na wona matimba ya ku va vhikela, mupisalema a va khumbukise leswaku va pimisa hi swilo leswi Yehovha se a a va mahelile. (Tipisalema 46:8) A vulavule hi matimba ya Yehovha ya ku helisa tinyimpi. (Tipisalema 46:9) Ka minkama ya ku tsaliwa ka Bibele, Yehovha a helise tinyimpi hi ku vhikela vanhu va yena ka valala va vona. Naswona Bibele li tshembisa leswaku ku nga li khale, Yehovha a ta yendla swa ku tlula leswo hi ku helisa tinyimpi hinkwatu leti nga kona amisaveni hinkwayu. — Esaya 2:4.

 Indjhe ni namuntlha Yehovha wa ha tama a va pfuna lava va mu gandzelaka? Ina. Mupostolo Pawulo a kutxe Vakreste swaku va tshemba leswaku Yehovha a ta va pfuna loko va lava ku pfuniwa. (Vaheberu 13:6) Se, a marito lama kumekaka ka Tipisalema 46, ma tiyisa tshembo lowu hi nga na wona wa leswaku matimba ya Xikwembu ma ta hi vhikela, ma tlhela ma hi pfuna swaku hi vona Xikwembu ku fana ni “ndhawu ya ku tumbela ni matimba ya hina.” — Tipisalema 46:1.

Sixtira vhidiyo leli la ku goma leswaku u vona leswi ku vulavuliwaka hi swona ka buku la Tipisalema.