A vanghanu va ntiyiso va tshembana minkama hinkwayu. Va fana ni vamakwavu lava rhandzanaka va tlhela va pfunana, ngopfungopfu loko va kumana ni swikarhatu.

 “Munghanu wa ntiyiso a ni lirhandzu minkama hinkwayu.” Marito lawa ma nga tlhela ma hundzuluxeliwa ma va “vanghanu va ntiyiso va kombisa lirhandzu minkama hinkwayu.” Rito la Xiheberu leli li nga tirhisiwa lani leli nge “lirhandzu,” a li vuli ntsena leswi munhu a titwisaka xiswona, kambe li vula lirhandzu la ntiyiso leli munhu a li kombisaka hi mintirho. (1 Vakorinto 13:4-7) Vanghanu va ntiyiso a va hambani loko va kumana ni swikarhatu kumbe loko va tshuka va kwatisana. Vona va rivalelana minkama hinkwayu. (Swivuriso 10:12) Naswona munghanu wa ntiyiso a nga kwati kumbe a va ni wukwele loko munghanu wa yena a yendlekeliwe hi swilo swaswinene. Ku hambana ni leswo, a tsaka na yena. — Varoma 12:15.

 “Munghanu wa ntiyiso . . . i makwenu wa ntiyiso loko u li ku karhatekeni.” A ndzimana leyi ya Swivuriso yi tirhise rito leli nge “makwenu” hikusa vamakwavu va rhandzana. Loko munhu a yendla hinkwaswu leswi a nga swi kotaka leswaku a pfuna munghanu wa yena lweyi a nga ku karhatekeni, a va na a yendla leswi a a ta swi yendlela makwenu wa yena loko a kumana ni swikarhatu. Lirhandzu la vamakwavu a li heli kambe li ya li kula hambiloko va kumana ni swikarhatu hikusa va rhandzana va tlhela va hloniphana.

 A buku la Swivuriso li tale hi marito ya wutlharhi lawa ma yendlaka swaku lweyi a lerhaka a nyimanyana a pimisa. Ku tala ka swilo swi nga tsaliwa ka buku leli swi tsaliwe hi Hosi Solomoni funtshi a a tirhisa matsalelo ya mapowema ya Xiheberu lawa a ma nga tirhisi ma rima kumbe marito ya ku fana. Kambe a a tlhanganisa mavhersu mambirhi lawa ma nga ni mongo wa ku fana kambe na a tirhisa marito ya ku hambana. Kumbe a tlhanganisa mavhersu mambirhi lawa ma nga ni mongo wa ku hambana. Ndzimana ya Swivuriso 17:17 i xikombiso xa mavhersu mambirhi lawa ma nga tlhanganisiwa na ma ni mongo wa ku fana kambe na ku tirhisiwa marito ya ku hambana. Kambe xikombiso xa mavhersu mambirhi lawa ma nga tlhanganisiwa na ma ni mongo wa ku hambana i buku la Swivuriso 18:24 leyi nge: “Ku ni vanghanu lava nga lunghekela ku phatlulelana, kambe ku ni munghanu lweyi a tshembekaka ku tlula makwenu.”

 Nkama Solomoni a nga tsala Swivuriso 17:17, swi nga yendleka a a pimisa hi wunghanu leli papayi wa yena Davhida a a li na lona na Yonatani, lweyi a a li n’wana wa Hosi Sawulo. (1 Samuwele 13:16; 18:1; 19:1-3; 20:30-34, 41, 42; 23:16-18) Hambileswi a va nga li maxaka a va rhandzana hintamu swinene ku tlula leswi vamakwavu va rhandzanaka xiswona, leswi swi nga yendla leswaku Yonatani a za a veka wutomi la yena anghozini leswaku a ponisa Davhida. a

 “A munghanu a kombisa lirhandzu minkama hinkwayu, naswona a va makwenu ka minkama ya ku karhata.” — Bibele La Inglês Básico.

 “A munghanu a tama a va munghanu, naswona a va makwenu lweyi a nga psaleliwa ku ku pfuna ka minkama ya ku karhata.” — Bibele La Tradução de Moffatt.

 “Munghana wa munhu wa n’wi rhandza hi masiku, i makwavu emakhombyeni.” — Bibele La Sociedade Bíblica de Moçambique.

 Sixtira vhidiyo leli la ku goma leswaku u vona leswi ku vulavuliwaka hi swona ka buku la Swivuriso.