“Kuma ku tsaka kakukulu ka Yehovha, naswona a ta ku nyika leswi mbilu ya wena yi swi navelaka.” — Tipisalema 37:4, Wuhundzuluxeli La Misava Ya Nyuwani.

 “Tsakela HOSI Xikwembu, kutani xona xi ta ku nyika leswi mbilu ya wena yi swi navelaka.” — Tipisalema 37:4, Bibele La Mahungu Lamanene.

 Mupisalema a khutaze vanhu va Yehovha a leswaku va kuma ntsaku hi ku va ni wuxaka leli nga kusuhi swinene na yena. Hinkwavu lava nga ni wunghanu la ku tani na Yehovha va nga tiyiseka swaku yena a ta va nyika hinkwaswu leswi va swi navelaka.

 “Kuma ku tsaka kakukulu ka Yehovha.” Marito lawa ma nga ha tlhela ma vula swaku “tsaka hintamu hi mhaka ya Yehovha,” kumbe “tsaka swinene hi mhaka ya HOSI,” kumbe “tsaka hi mhaka leswi HOSI yi nga ku tshembisa swona.” A pontu ka marito lawa i kuva hi tsaka hi ku helela hi mhaka leswi hi tirhelaka Xikwembu xa ntiyiso. (Tipisalema 37:4) Kasi swi lava ku vula yini leswo?

 Lava va tirhelaka Yehovha loko va lava ku yendla swilo va rhanga hi ku tiva swaku Yehovha a pimisa yini hi mhaka ya kona, kuva va yendla leswo va tirhisa Bibele. Va xi tiva kahle Xikwembu, naswona va swi tiva swaku ku xi yingisa hi swona swi nga kahle. Ku yendla leswo swi va pfuna swaku va va ni lipfalu leli nga basa va nga tipeti ka swikarhatu swa ku tala va tlhela va yendla swiboho swaswinene ka wutomi la vona. (Swivuriso 3:5, 6) Hi xikombiso, lava va tirhelaka Xikwembu va tshama na va rhulile, hambiloko lava va yendlaka swa ku biha swi tikomba ingaku swi va fambela kahle ka wutomi la vona, a va karhateki hi swona. (Tipisalema 37:1, 7-9) Naswona lava va tirhelaka Xikwembu va tsaka hi ku tiva swaku ku nga li khale Xikwembu xi ta helisa wubihi hinkwalu, naswona xi ta va hakela lava va tshamaka na va tshembekile, naswona va nga ni mahanyelo yamanene. (Tipisalema 37:34) Xin’wani lexi va yendlaka va tsaka i ku tiva leswaku hinkwaswu leswi va swi yendlaka ka wutomi la vona swa yamukeliwa hi Xikwembu. — Tipisalema 5:12; Swivuriso 27:11.

 “A ta ku nyika leswi mbilu ya wena yi swi navelaka.” Marito lawa ma nga tlhela ma hundzuluxeliwa hi ndlela leyi: “A ta hlamula swikhongelo swa wena” kumbe “a ta ku nyika leswi u swi navelaka hi mbilu ya wena hinkwayu.” I ntiyiso swaku Yehovha a nge hi nyiki xin’wani ni xin’wani lexi hi mu kombelaka. Ku fana ni papayi lweyi a nga na lirhandzu, Yehovha wa swi tiva leswi nga swinene ka vana va yena. Se hi mhaka leswo leswi hi mu kombelaka ni ndlela leyi hi hanyaka hi yona swi fanele swi fambisana ni ku rhandza ka yena. (Swivuriso 28:9; Yakobe 4:3; 1 Yohani 5:14) Funtshi Yehovha i “Mutwi wa xikhongelo,” hi nga tiyiseka swaku swikhongelo swa hina a ta swi yingisa. — Tipisalema 65:2; Matewu 21:22.

 Tipisalema 37 yi tsaliwe hi Hosi Davhida lweyi a a tshama aIsrayele wa khale. Naswona a tsale Tipisalema leyi hi ku landzelelana ka maletra ya Xiheberu. b

 Davhida a khomiwe hi ndlela ya ku biha. A a fanele a baleka hosi Sawulo ni van’wani lava a va lava ku mu dlaya. (2 Samuwele 22:1) Hambileswo, Davhida a a mu tshemba swinene Yehovha. Funtshi a a tiyiseka swaku a ta helisa lava yendlaka swaku biha. (Tipisalema 37:10, 11) Hambiloko swi tikomba ingaku swi va fambela kahle, va ta helisiwa “ku fana ni byanyi la vherdi” leli womaka. — Tipisalema 37:2, 20, 35, 36.

 Tipisalema 37 yi vulavula hi ku hambana loku nga kona ka vanhu lava va yingisaka Xikwembu ni lava kalaka va nga xi yingisi. (Tipisalema 37:16, 17, 21, 22, 27, 28) Se a buku leli la Tipisalema li hi pfuna leswaku hi kuma a wutlharhi ni ku tlhela hi va vanhu lava va yamukelekaka ka Xikwembu.

 Sixtira vhidiyo leli la ku goma leswaku u vona leswi ku vulavuliwaka hi swona ka buku la Tipisalema.