VAMPSHA VA VUTISA
Hi Mhaka Muni Swi Li Swinene Ku Ya Mintlhanganwini Ka Yindlo ya Wugandzeli?
Timboni ta Yehovha ti tlhangana kambirhi hi vhiki ka tindhawu leti vitaniwaka Tiyindlo ta Wugandzeli. Ku yentxeka yini ka mintlhanganu yoleyo naswona u nga yentxa yini swaku u pfuneka hi mintlhanganu leyi?
Ku yentxeka yini ka Yindlo ya Wugandzeli?
Yindlo ya Wugandzeli i ndhawu leyi ku djondziwaka ka yona Bibele. Hi tlhela hi djondza swaku hi nga swi tirhisisa ku yini ka wutomi la hina la siku ni siku leswi hi swi djondzaka. Mintlhanganu leyi yi nga ku pfuna:
ku djondza ntiyiso hi Xikwembu.
ku twisisa swaku hi mhaka muni minchumu yi tshamise xileswi namuntlha.
ku va munhu wa kahle.
ku kuma vanghanu va vanene.
Indje a wu swi tiva? Tindhawu leti Timboni ta Yehovha ti tlhanganaka ka tona ti vitaniwa Tiyindlo ta Wugandzeli hikusa ka tindhawu toleto ku djondziwa hi Mfumu wa Xikwembu. — Matewu 6:9,10; 24:14; Luka 4:43.
Hi mhaka muni swi li swinene ku ya mintlhanganwini?
Leswi u swi djondzaka swi ta ku pfuna. Lweswi u nga ta swi djondza loko u li ka mintlhanganu ya Timboni ta Yehovha swi ta ku pfuna ku “kuma wutlharhi.” (Swivuriso 4:5) Leswo swi vula swaku Bibele li nga ku pfuna ku yentxa swiboho swa swinene ka wutomi la wena. Naswona li nga ku pfuna ku kuma tinhlamulu ta swivutiso swa lisima swa ku fana ni leswi nge:
Vona tinhlokomhaka tin’wana ta ma dixkurso lawa ma yentxiwaka ka mintlhanganu ya ku hela ka vhiki:
Hi Mhaka Muni Hi Fanele Hi Pfumela Ku Kongomisiwa Hi Bibele?
U Nga Pfuniwa Hi Yini Loko U Ni Swikarhatu?
Leswi Mfumu Wa Xikwembu Wu Hi Yentxelaka Swona Swoswi.
“Siku lin’wana ni rhambe munhu lweyi a ni djondza na yena a xikola swaku a ta ka mintlhanganu. Yena a tshame kusuhi ni ndjangu wa hina hi tlhela hi tirhisa xikan’we mabuku, a game a ni byela swaku a tsake hintamu hi mintlhanganu ni tinhlamulu leti a ti nyikeliwa hi vamakwerhu. A tlhele a vula swaku ka kereke ya yena a ku na mabuku ya manyingi ya ku djondza hi wona ku fana na hina.” — Brenda.
Indje a wu swi tiva? Ka mintlhanganu ya Timboni ta Yehovha ku ngheniwa mahala naswona a ku hlengisiwi male.
U ta tiyisiwa hi vanhu van’wana. Bibele li vula swaku nchumu xin’wana lexi xi yentxaka swaku Vakreste va tlhangana hi leswaku va ta “tiyisana.” (Vaheberu 10:24, 25) Ku tlhangana ni vanhu lava va rhangisaka Xikwembu va tlhela va rhangisa vanhu van’wana swa tiyisana ka misava leyi vanhu va djondzisiwaka swaku va fanele va rhangisa leswi vona va swi rhandzaka.
“Minkama yin’wana ni nga ha titwa ni karhalile loko siku li hela, kambe ku ya tlhangana ni vanhu van’wana ka Yindlo ya Wugandzeli swa ni pfuna swaku ni kuma ntamu ni tlhela ni tsaka, loko ku hela mintlhanganu ni titwa ni tsakile funtshi ni lunghekile ku ya tirha hi siku leli li landzelaka.” — Elisa.
Indje a wu swi tiva? Ku ni mabandla ya Timboni ta Yehovha lawa ma tlulaka 120.000 amisaveni hinkwayu lawa ma tlhanganaka ka tindhawu ta ku tlula 60.000. Lembe ni lembe ku yakiwa kolomu ka 1.500 wa Tiyindlo ta Wugandzeli swaku ku tlhanganiwa ka tona. *
^ par. 20 Leswaku u kuma Yindlo ya Wugandzeli ya le kusuhi deketa la va nge: “Mintlhanganu” u gama u deketa la va nge lavetela “Ndhawu Ya Le Kusuhi Na Wena.”
