Timboni ta Yehovha ti tirhisa Mabibele ya ku hambana loko ti lava ku djondza. Kambe ti rhandza hintamu Bibele la Wuhundzuluxeli la Misava ya Nyuwani leli nga kona hi tirimi ta tinyingi. Timboni ta Yehovha ti rhandza hintamu Bibele leli hileswi li tirhisaka vito la Xikwembu, li vulavulaka ntiyiso li tlhela li twisiseka.

•   Ku tirhisa vito la Xikwembu. Vahundzuluxeli van’wana va Bibele a va li tirhisanga vito la Xikwembu lani a swi fanela. Hi Xikombiso, wuhundzuluxeli lin’wana li tsale kolomu ka 70 wa vanhu lava nga yentxa swaku li humesiwa Bibele kambe ka Bibele la kona a nga tsaliwanga n’winyi wa Bibele ku nga Yehovha Xikwembu.

   Ku hambana ni Mabibele lawo, Wuhundzuluxeli la Misava ya Nyuwani li veke vito la Xikwembu ka tindhawu ta tinyingi lomu a li li kona nkama Bibele li nga tsaliwa hi wona. Kambe vahundzuluxeli va kona a va nga swi lavi swaku ku tsaliwa mavito ya vona.

•   Ku vulavula ntiyiso. A hi vahundzuluxeli hinkwavu va nga tsala leswi a swi ta ka Mabibele ya ku sungula. Hi xikombiso, ka Matewu 5:22, Bibele lin’wana li li: “Mani na mani lweyi a karihelaka makwavo a ta fanela ku yavanyisiwa. Lweyi a nge ka makwavo: ‘U xiphukuphuku’ a fanele ku yisiwa ka muyavanyisi lweyi a nge ka yena ‘xihunguki ndziwena’ a faneliwa hi ndzilu wa tihele.” Swi nga yentxeka vahundzuluxeli va tirhise rito leli nge “tihele” hileswi a va kholwa swaku vanhu lava yentxaka swa ku biha va ta hisiwa ka ndzilu wa ku kala wu nga heli. Kambe leswo a swi kona ka Bibele. Hi mhaka leyo Wuhundzuluxeli la Misava ya Nyuwani li vulavulaka ntiyiso ka ndzimana leyi: “Lweyi a tshamelaka ku kwatela makwavo a ta ti hlamulela a tribunali kambe lweyi a rhuketelaka makwavo a mu poyila a ta ti hlamulela ka tribunali la likulu. Kambe lweyi a nge ‘xiphunta ndziwena’ a ta faneliwa hi Gehena ya ndzilu.”

•  Ku twisiseka. Wuhundzuluxeli la linene li fanele li vulavula ntiyiso kambe li tlhela li twisiseka. Vona xikombiso, ka Matewu 5:3, Yesu a tirhise marito lawa loko ma hundzuluxeliwa ma vulaka swaku: “Ku katekile swisiwana moyeni”. Leswi marito lawa ma kalaka ma nga twisiseki ka leswi hi vulavulisaka xiswona namuntlha, a Wuhundzuluxeli la Misava ya Nyuwani li vula leswi hi ndzimana leyi: “Va tsaka lava va ti karhatelaka ku va vanghanu va Xikwembu.”

 Handle ka ku li tirhisa vito la Xikwembu, li vulavula ntiyiso li tlhela li twisiseka, Wuhundzuluxeli la Misava ya Nyuwani li hambanile ni Mabibele man’wana hikusa a li xavisiwi. Leswo swi yentxa swaku vanhu va vanyingi lava a swi va karhatela ku lerha Bibele, swoswi va li lerha hi lirimi la vona.