Hina Timboni ta Yehovha hi kholwa hinkwaswu leswi Bibele li hi djondzisaka swona. Se loko hi ya hi li twisisa ku yampsa Bibele, funtshi hi tsumbula swaku ku ni swin’wani leswi lavaka ku yampsisiwa, hi tekela ku txintxa. a

 Leswo swa fambisana ni leswi kumekaka ka Bibele ka Swivuriso 4:18. Yona yi li: “Ndlela ya lava ku lulama yi fana ni ku vonakala loku voningaka nimixo loku ku yaka ku voninga anze li xa.” Ku fana ni ku voninga ka dlambu loko li voninga nimixo, loko li ya lixa hi kota ku vona kahle leswi nga matlhelweni ya hina. Hilani ku fanaka, Xikwembu xi hi pfuna ku twisisa ntiyiso lowu nga ka Bibele hi kutsongokutsongo hi nkama wa kona, ngopfungopfu ka masiku lawa ya wugamu. — 1 Pedru 1:10-12; Daniyele 12:4.

 Ku fana ni leswi vanhu lava a va tirhela Yehovha a nkameni lowu nga hundza a va ni mapimiselo ya ku kala ma nga li manene swi nga lava swaku va txintxa ndlela leyi vona a va pimisa hi yona, na hina a hi fanelanga hi karhateka kumbe swi hi hlamalisa loko ku tshuka ku va ni ku txintxa.

•   Moxe a a pimisa swaku se a lunghekile ku humesa vanhu va Xikwembu aGibita, kambe Xikwembu xi mu pfumelele kuva a yendla leswo, se na ku hundze 40 wa malembe. — Mintirho 7:23-25, 30, 35.

•   Vapostolo a va nga li twisisi wuprofeta leli a li vulavula hi Mesiya, la ku fa ka yena ni ku pfuxiwa ka yena. — Esaya 53:8-12; Matewu 16:21-23.

•   Vakreste va nkama lowu nga hundza a va ni mapimiselo ya ku kala ma nga li manene, hikusa vona a va pimisa swaku “siku la Yehovha” se a li fikile hi nkama lowuyani. — 2 Vatesalonika 2:1, 2.

 Se, hi ku famba ka nkama Xikwembu xi game xi lunghisa ndlela leyi a va titwa ha yona. Ninamuntlha hi tama hi khongela ka Xikwembu hi xi kombela leswaku xi hi pfuna ku hi twisisa Bibele ni ku tlhela hi txintxa loko swi laveka. — Yakobe 1:5.