Hi Mhaka Muni Timboni Ta Yehovha Ti Nga Yendli Mafexta Ya Ku Tlhanganisa Malembe?

CHAYA

Timboni ta Yehovha a ti yendli mafexta ya ku tlhanganisa malembe hikusa ti kholwa leswaku Xikwembu a xi swi tsakeli. I ntiyiso swaku Bibele a li vuli hi ku kongoma swaku swi bihile ku yendla mafexta ya ku tlhanganisa malembe, kambe li nga hi pfuna ku twisisa swilo leswi fambisanaka ni mafexta lawa hi tlhela hi vona swaku hi wani mavonelo ya Xikwembu ka mhaka leyi. A hi voneni 4 wa swilo leswi fambisanaka ni mafexta ya ku tlhanganisa malembe hi tlhela hi vona leswi Bibele li swi vulaka ka mhaka leyi.

Mafexta ya ku tlhanganisa malembe ma sukela ka vanhu lava kalaka va nga gandzeli Xikwembu. Hi ku ya hi Dicionário-Padrão de Folclore, Mitologia e Lendas, la Funk na Wagnalls, mafexta ya ku tlhanganisa malembe ma sungule ka vanhu lava a va kholwa swaku hi siku leli munhu a tlhanganisaka malembe hi lona ku ta mimoya ya ku biha naswona yi lava ku vavisa lweyi a tlhanganisaka malembe, se loko ku ni vanghanu ni maxaka ya yena na va mu navelela swilo swaswinene swi yendla swaku a vhikeliwa ka mimoya yoleyo ya ku biha. Buku leli nge A Tradição dos Aniversários de Nascimento li vula swaku ku tsala masiku lawa munhu a psaliwaka hi wona a swi pfuna leswaku va kota ku tiva masiku ya yena ya tindjombo hi ku ya hi lava va tivaka swa tinyeleti, buku leli li tlhela li ku: “A mavhela lawa ma tirhisiwaka siku leli munhu a tlhanganisaka malembe hi lona mani matimba ya ku yendla swaku leswi munhu a swi navelaka swi yendleka.”

Hambileswo, Bibele li vula swaku swi bihile ku yendla masalamusi ni ku vhumbata kumbe “swilo swa ku fana ni leswo.” (Deteronoma 18:14; Vagalatiya 5:19-21) Nchumu xin’wani lexi nga yendla swaku Xikwembu xi helisa doropa la Babilona a ku li hi leswi vanhu va kona a va vhumbata hi ku tirhisa tinyeleti. (Esaya 47:11-15) Timboni ta Yehovha a ti fambi ti sencha swaku swihena hinkwaswu swi huma kwini, kambe loko Bibele li nyikela nkongomiso wa ku fana ni lowu kombisaka swaku swi bihile ku tirhisa wudimona Timboni ta Yehovha ta wu yingisa.
Vakreste va ku sungula a va nga yendli mafexta ya ku tlhanganisa malembe. - A Enciclopédia Delta Universal li vula swaku Vakreste va ku sungula “a va teka mafexta ya ku tlhanganisa malembe, na ma huma ka vanhu va ku kala va nga gandzeli Xikwembu.” Bibele li kombisa swaku vapostolo ni van’wani lava nga djondzisiwa hi Yesu hi ku kongoma va hi vekele xikombiso lexi hi faneleke hi xi tekelela. — 2 Vatesalonika 3:6.
Bibele lo vula swaku hi fanele hi tlangela lifu la Yesu ntsena. (Luka 22:17-20) Leswo a swi fanelanga swi hi hlamalisa hikusa Bibele li vula swaku “siku la ku fa la yampsa ku tlula siku la ku psaliwa.” (Ekleziyaxta 7:1) Nkama lowu Yesu a nga fa se a a tiyendlele vito lalinene phambeni ka Xikwembu, hi mhaka leyo siku la ku fa ka yena a li li la lisima ku tlula siku leli a nga psaliwa hi lona. — Vaheberu 1:4.
Bibele a li vulavuli hi mutirheli wa Xikwembu lweyi a nga yendla fexta la ku tlhanganisa malembe. A ku na leswi Bibele li swi fihlaka ka mhaka leyi, hikusa li vulavula hi vanhu lava a va nga tirheli Xikwembu lava nga yendla mafexta ya ku tlhanganisa malembe. Kambe ka mafexta hamambirhi lawa Bibele li vulavulaka hi wona, a ku yendlekanga minchumu yayinene. — Genesa 40:20-22; Marka 6:21-29.

Ku nga va leswaku vana va Timboni ta Yehovha va kwata hi mhaka leswi va kalaka va nga hambeliwi mafexta ya ku tlhanganisa malembe?

Vapsali lava nga Timboni ta Yehovha va kombisa swaku va rhandza vana va vona ku nga li hi siku leli va tlhanganisaka hi lona malembe ntsena, kambe masiku hinkwawu ndzeni ka lembe. Va rhandza ku nyika vana va vona maprezenti va tlhela va va hambela mafexta. Phela vapsali va tekelela xikombiso xa Xikwembu lexi nyikaka vana va xona swilo swaswinene hi mbilu hinkwayu. (Matewu 7:11) Hi mhaka leyo, vana va Timboni ta Yehovha a va titwi na va luza hileswi va kalaka va nga hambeliwi mafexta ya ku tlhanganisa malembe, vona leswi vana van’wani va nga swi vula:

“Swa tsakisa loko va ku nyika prezenti na u nga swi nyimelanga.” — Tammy, 12 wa malembe.
“Vapsali va mina a va ni nyiki prezenti loko ni tlhanganisa malembe, kambe va ni nyika prezenti hi masiku man’wani leswo swa ni tsakisa hikusa va ni nyika na ni nga swi nyimelanga.” — Gregory, 11 wa malembe.
“U pimisa swaku xifextani xa 10 minutu, bolo ni ku yimbeleliwa i fexta la hikakunene? Tani kaya ka mina u ta vona swaku fexta i yini!” — Eric, 6 wa malembe.