Hina Timboni ta Yehovha ha tikarhata swaku mindjangu ya hina ni ya van’wana yi va ni ku twanana. Hi hlonipha Xikwembu lexi nga yentxa swaku ku va ni mindjangu. (Genesa 2:21-24; Vaefeza 3:14,15) Hi ku tirhisa Bibele xi djondzisa vanhu misaveni hinkwayu a minawu leyi nga yentxaka swaku mindjangu yi tsaka.

 Hi yentxa hinkwaswu swaku hi tirhisa leswi Bibele li swi djondzisaka, swa ku fana ni ku va nuna, nsati ni vapsali va vanene. (Swivuriso 31:10-31; Vaefeza 5:22-6:4; 1 Timotiyu 5:8) A wutlharhi li nga ka Bibele li nga pfuna mindjangu, hambi leyi ku nga ni wukhongeli la ku hambana. (1 Pedru 3:1, 2) Vona leswi vanhu van’wana va nga swi vula loko nsati kumbe nuna a sungule ku va Mboni ya Yehovha:

•   “Ka 6 wa malembe ya ku sungula ka muchadu wa hina a hi tshamela ku holova. Loko Ivete a sungula ku va Mboni ya Yehovha, ku lehisa mbilu ka yena ni ku tiveka hansi swi sungule ku ni tsakisa. Ku txintxa ka yena ku huluxe muchadu wa hina.” — Clauir, wa Brasil.

•   “Mina a ni nga swi tsakeli nkama nuna wa mina a nga sungula ku djondza Bibele ni Timbon ta Yehovha hikusa a ni pimisa swaku Timboni ta Yehovha ti hohlota mindjangu. Kambe swoswi se na swi vona swaku Bibele li pfune muchadu wa hina.” — Agness, wa Zâmbia.

 Ka ntirho wa hina wa ku chumayela, hi komba vanhu hinkwavu swaku ku tirhisa leswi Bibele li swi vulaka swi nga va pfuna

•   Ku langa kahle munhu lweyi va lavaka ku chada na yena

•   Swi va fambela kahle ka lembe la vona la ku sungula la muchadu

•   Ku hanyisana kahle ni vapsali va nuna kumbe va nsati

•   Ku tirhisa kahle male

•   Ku kala va nga tshami hi ku holova

•   Ku djondza ku rivalelana

•   Ku djondzisa vana

 Minkama yin’wana swi nga yentxeka. Hi xikombiso, hi 1998 a Instituto lexi vitaniwaka Sofres xi kambisise michadu leyi nuna kumbe nsati a nga sungula ku va Mboni ya Yehovha. Se xi vone swaku ka 20 wa michadu wun’we wa kona a wu ni swikarhatu swa swikulu.

 Yesu a vule swaku lava yingisaka tindjondzo ta yena minkama yin’wana a va ta va ni swikarhatu ka mindjangu ya vona. (Matewu 10:32-36) Ntivi leyi vitaniwaka Will Durante yi vone swaku hi nkama wa mfumu wa Roma “Vakreste a va lumbetiwa swaku i vahohloti va mindjangu.” Namuntlha Timboni ta Yehovha ti lumbetiwa hi minchumu leyi fanaka. Kambe i ntiyiso swaku lweyi a vaka Mboni ya Yehovha hi yena a yentxaka swaku ku va ni swikarhatu a ndjangwini?

 A Tribunal Europeu dos Direitos do Homem loko li kambela timhaka ta ku fana ni leti li vule swaku minkama ya yinyingi lava kalaka va nga li Timboni ta Yehovha hi vona va yentxaka swaku ku va ni swikarhatu hi ku kala va nga pfumeli swaku “munhu wa ndjangu wa vona a tilangela wukhongeli la yena.” Li tlhele li vula swaku “leswi swa yentxeka ni ka mindjangu leyi nuna na nsati va nga ka wukhongeli la ku hambana, hambi hi ka Timboni ta Yehovha leswo swa yentxeka.” Hambileswo Timboni ta Yehovha a ti tshiki ku yingisa nawu lowu nge: “Loko van’wana va mi yentxela swa ku biha mi nga va tlheliseleni hi swa ku biha. . . . Loko swi koteka hanyani hi ku rhula ni vanhu hinkwavu.” — Varoma 12:17,18.

 A Timboni ta Yehovha ti yingisa nawu wa Bibele wa ku chada “a Hosini ntsena”, leswi vulaka swaku ti fanele ti chada ni vanhu lava na vona va nga Timboni ya Yehovha. (1 Vakorinto 7:39) Nawu lowu i wa Bibele naswona wa tirha hikakunene. Hi xikombiso, a revhixta lin’wana li nga humesiwa hi Journal of marriage and family la 2010 li vule swaku “nuna na nsati lava va nga ka wukhongeli la lin’we naswona va nga ni mahanyelo ya ku fana ni ku tlhela va kholwa minchumu ya ku fana” minkama ya yinyingi va ni michadu ya ku tiya.

 Hambileswo Timboni ta Yehovha a ti xengeteli munhu swaku a tshika nuna wa yena kumbe nsati wa yena lweyi a kalaka a nga li Mboni ya Yehovha. Bibele li li: “Loko makwerhu a ni nsati lweyi a kalaka a nga li mupfumeli a nga mu tshiki loko nsati yelweyo a swi lava ku tama a tshama na yena; ni loko wansati a ni nuna lweyi a kalaka a nga li mupfumeli a nga mu tshiki.” (1 Vakorinto 7:12,13) Timboni ta Yehovha ta wu hlonipha nawu lowu.