Leswi hi nga Timboni ta Yehovha hi yendla hinkwaswu swaku hi hanya hi Wukreste leli Yesu a nga li djondzisa ni leli vapostolo a va hanya hi lona. Nhlokomhaka leyi li kombisa swin’wani leswi hi kholwaka ka swona.

1.   Xikwembu. Hi gandzela Xikwembu xin’we xa ntiyiso ku nga Yehovha, Mutumbuluxi lweyi a nga ni matimba hinkwawu. (Tipisalema 83:18; Nhlawutelo 4:11) Yena i Xikwembu xa Abrahamu, Moxe na Yesu. — Eksoda 3:6; 32:11; Yohani 20:17.

2.   Bibele. Hina hi pfumela swaku Bibele li ta hi ka Xikwembu, naswona i rungula la xona leli yaka ka vanhu. (Yohani 17:17; 2 Timotiyu 3:16) Leswi hi swi kholwaka swi sekeliwe ka 66 wa mabuku ya Bibele leswi patsaka “Testamentu Ya Khale” ni “Testamentu Ya Nyuwani”. Profesori Jason D. BeDuhn a hlaye swaku hinkwaswu leswi Timboni ta Yehovha “ti swi kholwaka ni leswi ti hanyisaka swona swi sekeliwa ka leswi Bibele li swi vulaka hikakunene ku nga li mavonelo ya tona.” a

    Ha kholwa ka Bibele hinkwalu. Kambe loko hi zama ku twisisa Bibele, ha pfumela swaku tindzimana tin’wani ta Bibele ti tlhamusela swilo leswi namuntlha swi yendlekaka kumbe leswi nga ta yendleka; ni swaku tindzimana tin’wani ti tirhisa marito ya swifaniso, swikombiso kumbe marito ya switokhozelo lawa ma nyimelaka swilo swin’wani. — Nhlawutelo 1:1.

3.   Yesu. Hi hanya hi leswi Yesu a nga swi djondzisa hi tlhela hi tekelelela xikombiso xa yena. Hi teka Yesu na a li Muponisi wa hina ni N’wana wa Xikwembu. (Matewu 20:28; Mintirho 5:31) Kambe hi djondzile ka Bibele swaku Yesu a hi Xikwembu xa Matimba Hinkwawu, leswi swi vula swaku Bibele a li djondzisi swaku ku ni swikwembu swinharhu ka xin’we. — Yohani 14:28.

4.   Mfumu wa Xikwembu. A hi nchumu xi nga ka timbilu ta vakreste, kambe i mfumu wa hikakunene lowu nga amatilweni. Mfumu lowu wu ta susa mimfumu hinkwayu ya vanhu se wu yendla ku rhandza ka Xikwembu hi misava. (Daniyele 2:44; Matewu 6:9, 10) Leswo swi ta yendleka ku nga li khale hikusa Bibele li vula swaku hi hanya ka “masiku ya wugamu”. — 2 Timotiyu 3:1-5; Matewu 24:3-14.

    Yesu hi yena Hosi ya Mfumu wa Xikwembu. A sungule ku fuma ku sukela hi 1914. — Nhlawutelo 11:15.

5.   Ku Ponisiwa. Nkutsulu kumbe lifu la Yesu li yendla swaku swi koteka akuva hi chunsiwa ka xidjoho ni lifu. (Matewu 20:28; Mintirho 4:12) Leswaku munhu a kuma leswo a fanele a va ni lipfumelo ka Yesu, a txintxa mahanyelo ya yena a tlhela a tsakamisiwa. (Matewu 28:19, 20; Yohani 3:16; Mintirho 3:19, 20) Leswi munhu a swi yendlaka hi swona swi kombisaka swaku a lipfumelo la yena i la ntiyiso naswona la hanya. (Yakobo 2:24, 26) Kambe ku ponisiwa a ku xaviwi ko koteka ntsena hi mhaka ya “timpsalu tatikuku ta Xikwembu.” — Vagalatiya 2:16, 21.

6.   Matilo. Yehovha Xikwembu, Yesu Kreste ni tintsumi ta ku tshembeka va tshama amatilweni. b (Tipisalema 103:19-21; Mintirho 7:55) Leswaku va ya fuma na Yesu ka Mfumu ku ni vanhu vavatsongo ku nga 144.000 lava va nga ta pfuxiwa swaku va ya hanya matilweni. — Daniyele 7:27; 2 Timotiyu 2:12; Nhlawutelo 5:9, 10; 14:1, 3.

7.   Misava. Xikwembu xi tumbuluxe misava swaku yi va kaya ka vanhu hi nkama wa ku kala wu nga heli. (Tipisalema 104:5; 115:16; Eklesiasta 1:4) Xikwembu xi ta katekisa vanhu lava va xi yingisaka hi ku va nyika wutomi la ku kala li nga heli ka paradesi lani misaveni na va nga ha vabyi. — Tipisalema 37:11, 34

8.   Wubihi ni ku xaniseka. A wubihi ni ku xaniseka swi sungule nkama ntsumi yin’we ya Xikwembu yi nga xi djikela. (Yohani 8:44) Nkama yi nga terekela Xikwembu ntsumi leyi yi chuliwe mavito lawa: “Sathana na Davulosi”. Sathana a hlohlotele vanhu va ku sungula swaku va tipatsa na yena ka ku pfukela Xikwembu. Leswo swi tise swikarhatu swaswinyingi swa ku vava ka vana va vanhu va ku sungula. (Genesa 3:1-6; Varoma 5:12). Leswaku ku hlamuliwa swihehlo leswi Sathana a nga swi pfuxa, Xikwembu xi pfumelele swaku ku va ni wubihi ni ku xaniseka. Kambe a xi nga ta swi pfumelela swaku swi va hi ndlela yoleyo hi nkama wa ku kala wu nga heli.

9.   Lifu. Vanhu lava va nga fa a va ha li kona. (Tipisalema 146:4; Eklesiasta 9:5, 10) A va le ku hluphekeni a tiheleni.

    Xikwembu xi ta pfuxa vanhu va vanyingi lava va nga fa. (Mintirho 24:15) Kambe lava va nga yala ku yingisa Xikwembu va ta helisiwa swa wugamu funtshi a va nga ta va ni tshembo wa ku tlhela va pfuxiwa. — Nhlawutelo 20:14, 15.

10.   Ndjangu. Hi hanya hi leswi Xikwembu a xi swi lava nkama xi nga sungula muchadu ku nga leswaku wanuna a chada ni wansati. A wukati li fanele li hela ntsena loko mun’we ka lava va nga tekana a yendla a wutunga la swa masangu. (Matewu 19:4-9) Ha tiyiseka swaku a wutlharhi leli kumekaka ndzeni ka Bibele li nga pfuna mindjangu swaku swi yi fambela kahle. — Vaefeza 5:22–6:1.

11.   Wugandzeli la hina. A hi xi tirhisi xihambanu naswona a hi gandzeli swifaniso. (Deteronoma 4:15-19; 1 Yohani 5:21) Vona swilo swin’wani swa lisima ka wugandzeli la hina:

    •   Ku khongela ka Xikwembu. — Vafilipiya 4:6.

    •   Ku lerha ni ku djondza Bibele. — Tipisalema 1:1-3.

    •   Ku pimisa hi leswi hi swi djondzaka ka Bibele. — Tipisalema 77:12.

    •   Ha tlhangana swaku hi khongela, hi djondza Bibele, hi yimbelela, hi vulavula hi lipfumelo la hina, ni ku tiyisa vamakwerhu ni van’wani. — Vakolosa 3:16; Vaheberu 10:23-25.

    •   Ku chumayela “mahungu ya ku tsakisa ya Mfumu.” — Matewu 24:14.

    •   Ku pfuna van’wani lava va lavaka ku pfuniwa. — Yakobo 2:14-17.

    •   Ku yaka ni lunghisa Tiyindlo ta Wugandzeli ni tindhawu tin’wani leti hi ti tirhisaka swaku hi djondza Bibele amisaveni. — Tipisalema 127:1.

    •   Ku pfuna lava weliwaka hi makhombo ya ntumbuluku. — Mintirho 11:27-30.

12.   Nhlengeletanu ya hina. Hi yavanile hi mabandla lawa ma voneleliwaka hi ntlawa wa madoda. Madoda lawa a ma na muholo naswona vona a hi vafundhisi kumbe va lumba ntlawa wa ku hlawuleka. (Matewu 10:8; 23:8) A hi humesi swa wukhume kumbe ma dízimo naswona a ku hlengisiwi male ka mintlhanganu ya hina. (2 Vakorinto 9:7) Mintirho ya hina hinkwayu hi seketeliwa hi minyikelo ya ku tirhandzela leyi munhu a yi yendlaka axihundleni.

     Ntlawa Lowu Rhangelaka lowu kumekaka a sede la hina, ku nga ntlawa wawutsongo wa vakrete va ku wupfa wu nyikelaka nkongomiso ka Timboni hinkwatu amisaveni hinkwayu. — Matewu 24:45.

13.   Ku twana ka hina. A Timboni ta Yehovha amisaveni hikwayu ti khohlwa swilo swa swin’we. (1 Vakorinto 1:10) Hi yendla hinkwaswu swaku hi nga yavani hi mhaka leswi munhu a ganya kumbe a nga xisiwa, lomu munhu nga psaliwa kona, kori ya xikhumba ni swin’wani. (Mintirho 10:34, 35; Yakobo 2:4) Hi ni chunseko wa ku tilangela leswi hi swi lavaka na hi kongomisiwa hi lipfalu leli nga djondzisiwa hi ku tirhisa Bibele. — Varoma 14:1-4; Vaheberu 5:14.

14.   Mahanyelo ya hina. Hi zama hinkwaswu swaku hi nga karhateki hi leswi hina hi swi lavaka ntsena, kambe hi kombisa lirhandzu ka timhaka hinkwatu. (Yohani 13:34, 35) Hi fambela kule ni mahanyelo lawa ma nga kwatisaka Xikwembu, ku psata ni ku chela ngati. (Mintirho 15:28, 29; Vagalatiya 5:19-21) Hi vanhu va ku rhula naswona a hi yi nyimpini. (Matewu 5:9; Esaya 2:4) Ha yi hlonipha mimfumu ni minawu ya yona loko yi nga lwisani ni minawu ya Xikwembu. — Matewu 22:21; Mintirho 5:29

15.   Leswi hi va khomisa swona van’wani. Yesu a te: “U fanele u rhandza vanhu van’wana xileswi u tirhandzisaka xiswona”. A tlhela a hlaya swaku vakreste “A hi va misava”. (Matewu 22:39; Yohani 17:16) Phela hambileswi hi kalaka hi nga mangheneli maguwa ya misava ni leswi hi kalaka ni ngheni ka politika, naswona a hi titlhanganisi ni tikereke tin’wani, hi yendla hinkaswu swaku ‘hi yendlela hinkwavu swa swinene’. (Vagalatiya 6:10; 2 Vakorinto 6:​14) Kambe ha swi hlonipha leswi van’wani va swi bohaka ka timhaka leti. — Varoma 14:12.

 Loko u ni swivutiso hi leswi Timboni ti kholwaka ka swona u nga lerha ka site la hina, kumbe u fona kumbe u tsalela xin’wani xa swikotoriyu swa hina, u sixtira mintlhanganu ya hina kusuhi ni lomu u tshamaka kona kumbe u bula ni Mboni ya Yehovha ya muganga wa wena swaku u kuma tinhlamulo.