Enga na nitamajka tiempu, máru temungurhirichaksï sánhani arhisïndi nóteru xarhatatsperania eskaksï xénchperasïnga. ¿Jatsipirintsï para uandanhiani enga inde ambe úkuarhini jaka chári temungurhirikuarhu?

•  Ambe engajtsï jatsika para mítini

•  Ambe engajtsï jatsika para úni

 Uékperakua kánikua jukaparakuesti para temungurhiri ma sési jarhani. Ísï eska na uétarhija t’irekua ka itsï para ma sési jarhani ka uinhapiti, someni xarhatatsperani uékperakua, uáti eska temungurhiri ma sési jauaka. Nájkirukaksï ióni páni jauakia temungurhirini, uarhiiti o acheeti, uétarhinchasïndi pʼikuarherani eska uámba o témba seguirixaka uékani ka jukaparharani.

 Ima enga ambakiti uékperakua xarhatajka, no imeri ambejku pendienti pásïndi. Uékasïndi eska máteru sési jauaka. Ísï jimbo, ima enga sési kámpijka, pendienti jarhasïndi enga imeri témba o uámba uétarhinchaaka xénchperakua ka jánguarhintasïndi xarhatakuni, enbesi de jiántku na enga jatini uékaaka.

 Sáno méntkisï, uarhiitichaksï sánderu uétarhinchasïndi eskaksï xarhatakuauaka xénchperakua ka eska acheeticha. Jamberi acheeti xénchajti témbani. Peru enga solu tsipa ka chúrikua xarhatakuaka eska xénchasïnga o solu antesi de relasioni seksuali jatsini, jamberi uarhiiti no xáni segura jauati eska uámba xénchasïnga. Sánderu sésisti eska méntku úndaaka xarhatakuni xénchperakua.

 Uandakuecha jingoni xarhatatspera je eskajtsï xénchperasïnga. Engajtsï solu arhiska “kánikuakini xénchasïnga” o “tʼuri jindeska juchiti mintsita”, uáti eska chári acheeti o uarhiiti pʼikuarheraaka eskajtsï xénchasïnga.

 Bibliaeri konseju: “Jimboka inde ambesï uandanhajka enga mintsitarhu uinirini jarhajka” (Mateu 12:34).

 Ambe engajtsï uáka úni: Asï solu arhi je chári uarhiitini o acheetini ambe engajtsï pʼikuarherajka, karaku je ambe ma o mensaji ma karaku je engajtsï sési jásï ambe arhiaka.

 Ukuecha jingoni xarhata je eskajtsï xénchasïnga. Engajtsï kamanharhijka, putimukuni o jájki jupikuni, merujtsï xarhatasïnga eskajtsï xénchasïnga. Ístujtsï uáka xarhatani xénchperakua engajtsï pʼarhiriaka, xénchperakua jingoni eratini o ménisï intsïkuarhini ambe ma. Máteru ambe engajtsï uáka úni parajtsï xarhatani uékperakua, jindesti imani ambe úni enga marhuauaka. Por ejemplu, acheeti úpirindi jarhuatani témbani bolsechani paani engaksï piáni ambe nirajka, mítakuni puerta, jarhuatani jupanhantaani o jupani ka úmantani ambe ma. Para uánikua uarhiiticha, i ambe no solu jindesti jarhuajperata, sino eskaksï xarhataminhasïnga xénchperakua.

 Bibliaeri konseju: “Jaue uékperani no solu uandakua jimbojku sino jarhuatperani ka sési jimbo uékperani” (1 Juanu 3:18).

 Ambe engajtsï uáka úni: Májkueni sési káma je chári uarhiitini o acheetini eska jiáni engajtsï nobiuepka.

 Arhuta je tiempu parajtsï tsimarhantku jarhani. Tsimarhantkujtsï jarhani, úsïndi eska chári temungurhirikua sési jauaka ka xarhatakusïngajtsï chári uarhiitini o acheetini eskajtsï sési pʼikuarherasïnga imani jingoni jarhani. Ísïsti, úkua jukasïndi arhutani tiempu engajtsï sapiichani kaajka o engajtsï jatsijka para úni ambe ma enga jukaparhakueka. Peru jamberijtsï uáka exeni parajtsï ménisï solu nirani xanharani tsimarhantku.

 Bibliaeri konseju: “Erakuni ambe enga sánderu ambakitiika [o jukaparhakueni]” (Filipusʌ 1:10).

 Ambe engajtsï uáka úni: Nájkirukaksï kánikua okupadu jarhajka, máru temungurhirichaksï ménichanisï planichani uásïndi paraksï tsimarhantku “nirani senarini” o “márku úni ambe ma fin de semana jimbo”.

 Sánderu sési mítpera je. No iámindu kʼuiripuechaksï májkueni uétarhinchasïndi eskaksï xarhatakuauaka uékperakua. Uandontskuarhi je nénajtsï sánderu tsitisïni eskaksïni xarhatachiaka uékperakua ka engajtsï uétarhinchajka eskaksïni sánderu xénchaaka. Tátsekua, jánguarhinta je imani ambe úni enga chári uarhiiti o acheeti uétarhinchajka. Miá je eska uékperakua kánikua jukaparhakueska paraka temungurhiri ma sési jauaka.

 Bibliaeri konseju: “Ima enga uékpijka, [...] no uékasïndi imeri ambejku” (1 Korintu 13:4, 5).

 Ambe engajtsï uáka úni: Enbesi dejtsï afuersa uékani eskaksïni xénchaaka, kurhamarhikuarhi je: “¿Ambe uá úni pararini juchiti uarhiiti o acheeti sánderu xénchani?”.