“Acheeti ka uarhiiti ma engaksï tembuchatini jaka, úpirindi kánikua úkua jukanchani xarhatani tekaantskua pauani pauani. Para ma enga no tembuchatini jaka, tekaantskua xarhatani úpirindi ísï xarharani eska no jukaparhakua ambeeska, joperu kánikua jukaparhakua ambesti paraka temungurhiri ma uáka sési irekani” (John).

•  ¿Andijtsïsï jatsi para tekaantskua xarhatani?

•  ¿Ambeksïni jarhuata parajtsï sánderu tekaantskua xarhatani?

•  Kánikua jukaparhakuesti tekaantskua xarhatani

•   Engajtsï tembuchatini jakaia, úpiringajtsï imani ambejku exeni enga no sési újka chári acheeti o uarhiiti.

   “Engari sáni ióni páni jakaia uambuchatini, úpiringari imani ambejku exeni engari no tsitijka chíti acheetiri. Ka enga ísï úkuarhijkia, sánderu úkua jukasïndi tekaantskua xarhatani” (Jessena).

•   Engajtsï no jatsiaka tekaantskua, úpiringajtsï no eratsentaparini uandani ambe ma.

   “No eratsentaparini uandasïnga imani ambe engani pʼikuarherani jarhajka. Engani sánderu tekaantskua jatsipiringa, úpiringa sési eratsentani ambe ma ka nómbe ma uandani” (Carmen).

   Biblia uandasïndi: “Ima enga uékpijka, tekaantasïndi ka sési útspini” (1 Korintu 13:4). Tsimani kʼuiripu engaksï uékperajka, jatsipirindiksï para tekaantskua xarhatatsperani, joperu no méntkisï ísï úkuarhisïndi. John enga uénakuarhu uandakia ambe ma, ístu uandasïndi: “Para niárani sánderu tekaantskua xarhatani, ma jatsisti para kánikua jánguarhintani. Jimboka ísï eska náki uéjki kualidadi ma, tekaantskua niárasïndi sóntku kʼamakurhini, peru kánikua úkua jukasïndi para sánderu xarhatani”.

•   Enga úkuarhijka ima ambe engajtsï no erokuarhini japka.

   Ejemplu: Chári acheeti o uarhiiti arhisïndiksïni ambe ma engaksïni kánikua no sési pʼikuastajka ka chájtu uékapiringa májkueni no sési pʼikuastantani.

   Bibliaeri konseju: “Asï jirejiresï ikia jimboka ikiani, tontuecheriska” (Eclesiastés 7:9, nota).

   Ambe engajtsï uáka úni: Erokuarhi je. Antedejtsï uandani ambe ma, jánguarhi je eratsentani eska chári acheeti o uarhiiti nóksïni uékaska no sési pʼikuastani. Libru Fighting for Your Marriage (Luche por salvar su matrimonio), uandasïndi: “Sáno iáminduechachi úsïnga ambe ma, imani ambe jimbo engachi eratsejka eska arhikuekaxapka juchari acheeti o uarhiiti ka nóchi erokuarhisïnga para míteni ambe enga meru arhikuekani japka”.

   Joperu ístu, engaksïni chári acheeti o uarhiiti meruksïni uékaska no sési pʼikuastani, chá tekaantskua xarhata je ka asï májkueni no sési pʼikuasta; engajtsï ísï úska, nóterujtsï arhijperaakia. Biblia uandasïndi: “Jima enga no jarhajka chkari, chpiri pátakuarhisïndi” (Proverbios 26:20).

   “Engari uénajka ísï exeni chíti uarhiitini komu nema engakeni ikiachejka, erokuarhi sáni ka eratsenta andirisï xénchajki ka sóntku ú ambakiti ambe imani jimbo” (Ethan).

   Eratsi je ini ambe:

  •  ¿Ambejtsï úsïni enga chári acheeti o uarhiiti uandajka o úni ambe ma enga chá no sési exejka?

  •  ¿Nénajtsï uá sánderu tekaantskua xarhatani enga ménderu úkuarhiaka inde ambe?

•   Enga someni úkuarhijka ima ambe enga chá no tsitijka.

   Ejemplu: Chári acheeti o uarhiiti méntkisï ióndasïndi úni ambe ma ka chájtsï jatsiska para méntkisï erokani ka inde ambe úsïndi eskajtsï chá ikiauaka.

   Bibliaeri konseju: “Ka tekaantsperanta je ka puátsperantani” (Kolosasi 3:13).

   Ambe engajtsï uáka úni: Asï chári ambejku eratsi je, sánderu sési exe je ambejtsï uá úni parajtsï tsimarhani sánderu sési irekani. Kurhamarhikuarhi je: “Engani ikiaska ka engachi arhijperaaka, ¿jarhuatajtsïni parachi sánderu sési irekani?”. Ístu, miá je eska Biblia uandasïnga: “Jimboka jucha iáminduecha mámaru ambe jimbo pekadu úsïnga” (Santiagu 3:2). I ambe arhikuekasïndi eskajtsï chájtu jatsiska para jánguarhintani sánderu sési úni ambe ma.

   “Ménisï, sánderu tekaantskua xarhatakuasïnga juchiti amiguechani ka eska juchiti acheetini. Ka peeka ísïka jimbokani sánderu tiempu jarhasïnga imani jingoni ka úsïnga exeni ambe enga no sési újka. Joperu engani tekaantskua xarhatakuska, ístuni xarhatakusïnga eskani xénchasïnga ka eskani janhanharhisïnga. Jimbosï xáni jukaparhakueti eska temungurhiricha xarhatatsperaaka tekaantskua” (Nia).

   Eratsi je ini ambe:

  •  ¿Xarhatakusïntsï tekaantskua chári acheetini o uarhiitini enga ima támisï újka ambe ma?

  •  Sánderu orhepani, ¿nénajtsï uá sánderu tekaantskua xarhatani?