JARHUAJPERATA PARA FAMILIAUECHA
Nénajtsï uá jarhuatani chári sapini para sési nirani jarhani eskuela
Ísï xarharasïndi enajki chári sapi no tsitijki eskuela nirani ka no uékasïndi tarea úntani ni estudiarini. Indeni ambe jingoni, imeri kalifikasionichaksï sánderu ka sánderu no sési jarhasïndi, ístu na enga jámajka ima. ¿Ambejtsï uá úni para jarhuatani chári sapini paraka sési nirani jauaka eskuela?
Ambe engajtsï jatsika para mítini
Afuersa úrani ambe ma, sánderu kʼéati problema. Afuersa úrani ambe ma chári sapini, uáti eska sapi kánikua uandanhiauaka eskuela ka ístu kʼumanchikuarhu. Para sapi nóteru xáni uandanhiania, jamberi chkuanderaati, no exerpiantani imeri kalifikasionichani, ima firmarini sïrandani kalifikasionicherini ka no táti jembecha o no nirani eskuela. Ini ambe jingoni, problema sánderu kʼéati.
Intsïkuarhini ambe ma sapini, jamberi no úkuarhiati ísï eskachi na erokuarhini jarhajka. Táti ma enga arhinhajka Andrew, uandantasïndi: “Para úni eska juchari uátsï sapichu jánguarhintaaka, intsïkuarhisïngachi ambe ma imeri kalifikasionicha jimbo, peru indeni ambe úparini, soluchi úsïnga eska ima sánderu imani ambe uékani jauaka ambe engachi íntskuaka. Enga no sési nikupiringa eskuela, sánderu kómu pʼikuarherani jarhasïrendi imani ambe jimbo engachi no íntskuenga ka eska kalifikasionicha jimbo”.
Uandani eska maestruecha no sési jorhentpisïnga, no jarhuataati chári sapini. Chári sapi uáti eratsini eska uáka ambakiti kalifikasionichani jatsiani no jánguarhintaparini. Ístu sapi uáti máteruechani kulpariuani enga ima no sési uáka ambe ka uékani eskaksï máteruecha jarhuataaka imeri problemecha jingoni. Ísïsti, no jorhenguarhiati ambakiti ambe para jiáni enga kʼériuakia: responsabli úkuarhini imani ambe jimbo enga ima uáka.
Ambe engajtsï jatsika para úni
Pʼíngukuarhini na engajtsï pʼikuarherani jauaka. Engajtsï ikiani jauaka, nójtsï jatsiska para jiáni uandontskuarhini chári sapi jingoni imeri kalifikasionicheri ambe. Táti ma enga Brett arhinhajka, uandasïndi: “Juchiti uarhiitini ka jíndeni, sánderujtsïni sési nichesïndi engachi jiáni uandontskuarhijka juchari sapiicha jingoni engachi no ikiani jarhajka ka sánderuchi kurhangukuasïnga”.
Bibliaeri konseju: “Jánguarhi je iáminduecha sóntku kurhanguni, peru ióndantsï mokukuarhini, ka ístu ióndantsï ikiani” (Santiagu 1:19).
Exe je nákiski problema. Ambe enga újka eskaksï sapiicha no sési nirani jauaka eskuela, jindesti eskaksï eskuela no sési kánhasïnga, engaksï máteru eskuelarhu mótsijka, chéni eksameni úntani, familieri kʼérati problemecha, no kʼuínchani, no jatsini ambakiti orariu ma ka no úni jingontku jarhani klaserhu. Asï eratsi je eska chári sapi xépetiska.
Bibliaeri konseju: “Ima enga jánhaskakua xarhatajka ambe ma jimbo, sési nikuati” (Proverbios 16:20).
Ú je ambe ma para chári sapi úni jorhenguarhini. Orariu ma ú je para estudiarini ka para tarea ambe úntani. Exe je nani enga chári sapi uáka tarea ambe úntani enga no ma ambe ójkutaaka, komu tele ka selulari. Ú je eska chári sapi particha jimbo úntaaka tareani para úni sési jorhenguarhini. Hector, Alemania anapu táti ma, uandasïndi. “Enga niárani jauakia para eksameni ma úntani, pauani pauanchi sánhani estudiarisïnga, ka no meru jiáni enga niáraakia”.
Bibliaeri konseju: “Jarhasti ma tiempu para iámindu ambe” (Eclesiastés 3:1).
Ú je eska sapi tsitiaka jorhenguarhini. Enga chári sapi niáraska kurhanguni na enga marhuakujka iásï eskuela nirani, sánderu tsitiati estudiarini. Por ejemplu, exeati eska matematika uáka jarhuatani para ima sési úrani imeri tuminani.
Bibliaeri konseju: “Mímixekua jatsi, jánhaskakua jatsi. [...] Kánikua jukaparhara” (Proverbios 4:5, 8).
Konseju ma: jarhuata je chári sapini tarea ambe úntani, peru asï cha úkuanta je. Andrew uandasïndi: “Juchari nanaka sapichu mintsikasïrendi eskachi jucha eratsipiringa ka ima nómbe”. Jorhenda je chári sapini eska jandiajku úntaaka tarea ambe.