Espiritu santu, Tata Diosïri uinhapikuesti enga ima úrajka para úni ambe ma (Miqueas 3:8; Lukasʌ 1:35). Tata Diosï axasïndi espiritu santuni enga jindeeka imeeri uinhapikua nani uéjkisï enga uétarhiaka paraka úkuarhiaka ambe enga ima uéjka (Salmo 104:30; 139:7).

 Bibliarhu, uandakua espiritu, ebreu jimbo jindeesti rúaj ka griegu jimbo pnéuma. Sáno méntkisï i uandakuechaksï arhikuekasïndi Tata Diosïri uinhapikua, enga jindeeka imeeri espiritu santu (Génesis 1:2). Joperu Bibliarhu, i uandakuechaksï ístu arhikuekasïndi ari máteru ambe:

•   Jirejtani (Ukuecha 17:25).

•   Tarhiata (Génesis 8:1; Juanu 3:8).

•   Uinhapikua enga újka eskaksï kʼuiripuecha ka animalicha tsípiti jauaka (Job 34:14, 15).

•   Na enga jámajka o na enga jásïika kʼuiripu ma (Números 14:24).

•   Imeecha engachi no újka exeani, komu Tata Diosï ka ánjelicha (1 Reyes 22:21; Juanu 4:24).

 Iámindu i ambe, no xarharasïndi, peruchi míteska eskaksï jarhaska imani ambe jimbo engaksï újka. Tata Diosïri espiritu, “ísïisti eska tarhiata, nóchi úsïnga exeni, ni p’arhini ka kánikua uinhapisti” (Diccionario expositivo de palabras del Antiguo y del Nuevo Testamento exhaustivo, de William E. Vine).

 Biblia ísï terukutantasïndi Tata Diosïri espiritu santuni komueska imeeri “jájkicha” o “deduecha” (Salmo 8:3; 19:1). Kʼuiripu ma enga atsïmu jingoni ánchikuarhijka, úrasïndi uinhapikua imeeri jájkicheri ka deduecheri anapu para imeeri ánchikuarhitani úni, ka májkueni, Tata Diosï úrasti espiritu santuni para ini ambe úni:

•   Para kueraani iámindu ambe (Salmo 33:6; Isaías 66:1, 2.

•   Para úni eska Biblia japiringa (2 Pedru 1:20, 21).

•   Parakaksï imeeri ióntki anapu marhuaricha úpiringa milagruechani uáni ka aianhpini (Lukasʌ 4:18; Ukuecha 1:8; 1 Korintu 12:4-11).

•   Para úni eskaksï k’uiripuecha engaksï imani kurhajchajka, uaaka ambakiti ambe xarhatani (Galasia 5:22, 23).

Espiritu santu no kʼuiripu máesti

 Enga Biblia uandajka eska espiritu santu ísïiska komueska Tata Diosïri “jájkicha”, “deduecha” o imeeri “jirejtakua”, xarhatasïndi eska espiritu santu no kʼuiripu máeska (Éxodo 15:8, 10). Jájkicha ima kʼuiripueri enga atsïmu jingoni ánchikuarhijka, nóksï úsïndi jandiajku ánchikuarhini jimbokaksï uétarhinchasïnga serebruni ka iámu kuerpuni. Ka májkuenisti, espiritu santu úsïndi ambe ma jiántku ka ísï eska Tata Diosï na uéjka (Lukasʌ 11:13). Ístu, Biblia terukutantasïndi espiritu santuni itsï jingoni ka ístu máteru ambe jingoni enga no kʼuiripu máeka komueska mintsikani o mimixetini. I ambe ístu xarhatasïndi eska espiritu santu no kʼuiripu máeska (Isaías 44:3; Ukuecha 6:5; 2 Korintu 6:6).

 Biblia arhisïndi eska Tata Diosïri nombri jindeeska Jeoba ka eska imeeri uájpa Jesukristu arhinhasïnga, joperu Biblia no nani uandasïndi eska espiritu santu jatsiska nombri ma (Isaías 42:8; Lukasʌ 1:31). Ma jurhiani, disipulu Estebani auandarhu anapu jánhaskua ma jimbo, exeaspti tsimani kʼuiripuechani ka no tanimu. Biblia uandasïndi: “Peru Estebani méntku espiritu santuni jukaratini, ka auandarhisï eranchiparini, exespti Diosïri tʼíntskuani, ka tata Jesukristuni imeeri jurhijkandani ladu jimbo jarhani” (Ukuecha 7:55). Espiritu santu jindeespti uinhapikua enga Tata Diosï úrapka paraka Estebani úpiringa exeni imani jánhaskakuani.

 Ambe engaksï jakajkujka máru: Espiritu santu kʼuiripu máesti ka jindeesti ma parti Trinidadiri. Ísïksï arhisïndi máru Bibliaecha jimini 1 Juanu 5:7, 8, komueska Bibliaecha Torres Amat ka Reina-Valera.

 Ambe enga jurhimbitkueka: Biblia Torres Amat uandasïndi jimini 1 Juan 5:7, 8: “Tanimuestiksï engaksï uandantajka auandarhu: Diosï Taati, ka Uandakua ka Espiritu Santu. Ka íksï tanimu májku ambeestiksï. Ka ístuksï tanimuesti engaksï uandantajka parhakpinirhu”. Joperu máru inbestigadorichaksï exestia eska apostuli Juanu no indeni ambesï karapka ka eskaksï i uandakuecha no jatsipiringa para Bibliarhu jarhani. Pori ejemplu, biblista ma enga Bruce M. Metzger arhinhajka, uandaspti: “I uandakuechaksï no Bibliarhu anapuesti ka nóksï jatsisti para Nuevo Testamenturhu jarhani” (Un comentario textual al nuevo testamento griego).

 Ambe engaksï jakajkujka máru: Biblia ísï uandasïndi espiritu santueri ambe enajki kʼuiripu máe ka ísïiti.

 Ambe enga jurhimbitkueka: Ménichanisï Bibliarhu ísï uandasïndi espiritu santueri komueska kʼuiripueri ma uandani jarhani. Pori ejemplu, Jesúsi uandaspti eska espiritu santu jarhuajpiri máeska ka uandaspti eska inde jarhuajpiri xarhatapiringa máru ambe, orhekupaapiringa, uandapiringa, kurhaapiringa, eska jurhimbikua ambe aianguapiringa Jesúsiri chúxapatichani, eska uandantapiringa Jesúsiri ambe ka eska imeeri ambe pʼipiringa (Juanu 16:7-15). Joperu inde ambe no arhikuekasïndi eska meru kʼuiripu máeska. Biblia májkueni uandasïndi jánhaskakueri, uarhikueri ka pekadueri enajkiksï kʼuiripu máe (Proverbios 1:20; Roma 5:17, 21). Pori ejemplu, Bibliarhu uandasïndi eska jánhaskakua úsïnga úni ambe ma ka eska kánguarhiasïnga uájpechani ka eska pekadu tsïjpaasïnga máteruechani ka eska uándikpisïnga (Mateu 11:19; Lukasʌ 7:35; Roma 7:8, 11).

 Ambe engaksï jakajkujka máru: Imeecha engaksï uénapka Jesúsini chúxapani ka ístu apostulicha, jakajkusïrendiksï eska espiritu santu kʼuiripu máeska.

 Ambe enga jurhimbitkueka: Biblia no inde ambe jorhentpisïndi nijtu istoria uandajki inde ambe. Encyclopædia Britannica uandasïndi eska inde jorhentperakua eska espiritu santu k’uiripu máeska ka eska ístu diosï máeska, uéxurhini 381 jimbo despuesi de Kristu pakaranhaspti eska inde ambe ísïipiringa, jiáni enga Concilio de Constantinopla úkuarhipka. Ka i jiáni úkuarhispti 250 uéxurhini tátsekua enga na uarhipkia últimu apostuli.