Pekadu jindeesti ambe ma enga ma uáka, pʼikuarheraaka o eratseaka imani ambe enga no janhanharhiaka Tata Diosïri leini (1 Juanu 3:4; 5:​17). Biblia arhisïndi eska pekadu ma úni jindeesïnga no sési ambe úni Tata Diosïni japarini, o no úni imani ambe enga sési jaka (Santiagu 4:​17).

 Idiomecha jimbo enga karanhapka Biblia, uandakuecha engaksï úrakuarhika para tradusirini “pekadu” arhikuekasïndiksï no úni pʼitarani, o no úni ambe enga ma uékani japka. Por ejemplu, Biblia uandasïndi eska ióntki anapu Israelirhu, jarhaspkaksï soldaduecha ma engaksï kánikua sési úrenga jondani ka eska engaksï kʼuanirenga tsakapuni “úsïreendiksï pʼitarani” ambe ma. Engaksï tradusiripiringa i uandakuani eska meru na jindeeka, arhipirindi: “nóksï pekadu úsïreendi” (Jueces 20:16). Ísï jimbo, pekarini jindeesti no niárani úni ambe engajtsïni Tata Diosï arhijka imeeri ambakiti juramukuecha jimbo.

 Jimboka Tata Diosï Kueraajpiriska, sésikua jatsisti para uaxastaani juramukuechani para kʼuiripuecha (Jaŋaskuecha [Apocalipsis] 4:​11). Ka juchachi jatsiska para kuenta íntskuntani imani ambe jimbo engachi úni jarhajka (Roma 14:12).

¿Úpirini ma no méni pekarini?

 Nómbe, jimboka Bibliarhu arhisïndi eskaksï “iáminduecha pekadoriska ka nóksï méni uaati xáni kʼéri ambeeni eska Tata Diosï” (Roma 3:​23; 1 Reyes 8:​46; Eclesiastés 7:​20; 1 Juanu 1:8). ¿Andisï inde ambe úkuarhijki?

 Uénakuarhu, Adáni ka Eba nóksï pekarisïrendi, jimbokaksï perfektu kueraanhaspka, ísï eska Tata Diosï na jásïika (Génesis 1:​27). Joperuksï, nóteru perfektuesptia jimbokaksï nóteru kurhajchaspkia Kuerajpirini (Génesis 3:​5, 6, 17-​19). Engaksï uájpeechani kánguarhiapka kéritaasptiksï ka imeechajtuksï pekadu jingoni andajpenuspti ka nóksï perfektuespti (Roma 5:​12). Ísï eska rei Dabidi na uandapka: “Engani andajpenupka tʼuini no sési úrispkia” (Salmo 51:5).

¿Máru pekaduecha sánderu no sési jarhaski eska máteruecha?

 Jo. Por ejemplu, Biblia uandasïndi eskaksï Sodoma anapu acheeticha ʻno sési úrispka ka kánikuaksï no sési ambe niátasïrendiʼ, ka eska imeecheri pekadu ʻkánikua kʼéraspkaʼ (Génesis 13:13; 18:20). Ju je exeni tanimu ambe enga uandajka na enga xáni no sésiika pekadu ma.

1.   Na enga xáni no sésiika. Bibliarhu arhisïndi eska ísku jándikua, idoluechani kómarhiani, sïpani, kauicheeni, euakuarpini, uándikpini ka sïkuamikua ambe úni, jindeeskaksï kʼérati pekaduecha engachi no jatsika para uaani (1 Korintu 6:​9-​11; Jaŋaskuecha 21:8). Bibliarhu arhisïndi eskaksï ménderueniska ima pekaduecha engachi uékaparintku uaajka ka imeecha engachi no uékaparintku uaajka, por ejemplu, uandani o úni ambe ma enga no sési pʼikuastauaka máteruechani (Proverbios 12:18; Efesu 4:​31, 32). Joperu, Bibliajtsïni ístu pʼímarhisïndi parachi no uandani o eratseni eska pekadu ma no no sési jarhaska, jimboka inde ambe úpiringa úni eskachi sánderu kʼérati pekaduechani uaapiringa (Mateu 5:​27, 28).

2.   Ambe enga jimbo ma újka. Máruksï pekadu ambe úsïndi jimbokaksï no míteaska Tata Diosïri juramukuechani (Ukuecha 17:30; 1 Timoteo 1:​13). Nájkiruka Biblia no uandajka eskaksï sési jarhaska, xarhatasïndi eskaksï ménderueniska eska ima pekaduecha engaksï Tata Diosïri juramukuechani míteparini ísï újka (Números 15:30, 31). Biblia arhisïndi eska ima kʼuiripu enga uékaparintku pekadu ma újka “no sési jásï mintsita ma” jukaska (Jeremías 16:12).

3.   Na enga xáni uelta újka. Biblia xarhatasïndi eska no májkueniska ma uelta pekadu ma úni ka eska méntku úni jarhani pekadu ma (1 Juanu 3:​4-8). Tata Diosï jusgariasïndi imeechani engaksï mítejkia ambe enga sési jaka ka uékaparintkuksï no sési ambe úni (Ebreu 10:26, 27).

 Kʼuiripuecha engaksï kʼérati pekaduechani uaakia jamberiksï kánikua no sési pʼikuarherajti imani ambe jimbo engaksï úkia. Por ejemplu, rei Dabidi karaspti: “Jimbokani méntku miáni jarhasïnga imani ambe engani no sési úka; kʼuetsapeti ambeesti, kánikuamendu kʼuetsapesti para ji” (Salmo 38:4). Joperu, Biblia aiatspesïndi: “Eska kʼuanhatsentaaka Jeobani jingoni enga pʼamojperakua xarhatakuaka, eska kʼuanhatsentaaka juchaari Tata Diosï jingoni, jimboka ima kánikua tekaakuntaaka” (Isaías 55:7).