Griegu jimbo uandakua enga Bibliarhu úrakuarhejka para tsíntskua, jindeesti anástasis, enga arhikuekajka “anhandentani (jauarani) ménderu”. Enga kʼuiripu ma tsíntajka, ísïisïndi enajkiksï jauatajki ka seguirini májkueni jásï kʼuiripu máeni eska ante de uarhini (1 Korintu 15:12, 13).

 Uandakua tsíntskua no jarhasti Antiguo Testamenturhu, enga jindeeka, Karakata Ebreaecha. Joperu, ini karakatecha jimbo uandasïndi eska jarhaska erokuarhikua ma para uarhiriicha. Profeta Oseasini úraparini, Tata Diosï aiatspesti: “Ji pʼímutantauaka Tumbarhu uératini enga xáni uinhapitiika, uarhikuarhu uératini juánguauaka” (Oseas 13:14; Job 14:13-15; Isaías 26:19; Daniel 12:2, 13).

 ¿Naniksï tsíntaa uarhiricha? Máru kʼuiripuechaksï auandarhu tsíntasïndi para Kristuni jingoni reini (2 Korintu 5:1; Jaŋaskuecha [Apocalipsis] 5:9, 10). Biblia uandasïndi eska i jindeeska “uénani anapu tsíntskua”, o engaksï “orhetku ueenaka tsíntani” (Jaŋaskuecha 20:6; Filipusʌ 3:11). I uandakuechaksï xarhatasïndi eska jauaka máteru tsíntskua. Ka ima kʼuiripuecha engaksï jiáni tsíntaaka, engaksï sánderu uánikueka, Echerirhuksï irekaati (Salmo 37:29).

 ¿Ambe úkuarhisïni enga nema tsíntajka? Tata Diosï íntskusti Jesúsini uinhapikua para tsítantaani uarhirichani (Juanu 11:25). Ka Jesúsi úrasti ini uinhapikuani para jauatantani “iámindu imeechani engaksï inchatsikurhini jaka”, ka uaati eskaksï ménderu iáminduecha ísï jáxeaka eskaksï na járhatipka, ka ísïksï jámani ka iámu ambeksï miántani (Juanu 5:28, 29). Imeecha engaksï tsíntaaka para Echerirhu irekani, kuerpuksï ma jatsiati kʼuiripeteri ka úniiri enga sési jauaka ka enga no pʼamenchaaka (Isaías 33:24; 35:5, 6). Imeecha engaksï tsíntaaka para auandarhu irekani intsïnhaatiksï “kuerpu ma enga espiritueka”, ísï jimbo, nóksï xarharasïndi jimbokaksï espiritueska (1 Korintu 15:42, 43, 50; 1 Korintu 15:44).

 ¿Neechani tsítantaaua? Biblia jorhentpisïndi eska Echerirhu Tata Diosï tsítantauaka “imeechani engaksï sési jámaka ka ístu imeechani engaksï no káni sési jámaka” (Ukuecha 24:15). Máru engaksï Tata Diosïni sési marhuakuka komu Noé, Abraáni ka Sara, imeecha jingonksï kuenta úkuarhisïndi engaksï sési jámaka (Génesis 6:9; Ebreu 11:11; Santiagu 2:21). Ima kʼuiripuecha engaksï no niáraka míteani Tata Diosïri juramukuechani ka ístu kurhajchaani, imeecha jingonksï kuenta úkuarhisïndi engaksï no káni sési jámaka.

 Joperu, imeecha engaksï no uékaka kurhajchani Tata Diosïni ka nóksï uékani móantani, nóksï méni tsíntaati. Engaksï i járhati kʼuiripuecha uarhijkia, nóksï jatsisïndi erokuarhikua para tsíntani (Mateu 23:33; Ebreu 10:26, 27).

 ¿Káni úkuarhia tsíntskua? Biblia tʼuini uandarixaptia eska tsíntskua auandarhu ueenapiringa uéxurhini 1914 jimbo, enga Kristu juramuni japiringia auandarhu (1 Korintu 15:21-23). Tsíntskua Echerirhu jiáni úkuarhiati enga tata Jesukristu juramuni jauakia Mili Uéxurhini, ini tiempu jimbo echeri paraisu ma úkuarhintaati (Lukasʌ 23:43; Jaŋaskuecha 20:6, 12, 13).

 ¿Andichisï jakajkujki eska jarhaska tsíntskua? Jimboka Biblia uandasïnga nuebe kʼuiripuecheri engaksï tsítanhantapka ka méntkisï kʼuiripuechaksï jarhaspti engaksï exepka eska i ambe úkuarhispka (1 Reyes 17:17-24; 2 Reyes 4:32-37; 13:20, 21; Lukasʌ 7:11-17; 8:40-56; Juanu 11:38-44; Ukuecha 9:36-42; 20:7-12; 1 Korintu 15:3-6). Ma enga sánderu mítekuarhika jindeesti Lasarueri. Enga tʼámu jurhiatikua páni japkia uarhiri, Jesúsi tsítantaspti uánikuechani japarini (Juanu 11:39, 42). Ni imeecha engaksï ikiakuenga Jesúsini, úpiksï uandani eska no ísïispka, astaksï uékasïreendi uándikuni Jesúsini ka Lasaruni (Juanu 11:47, 53; 12:9-11).

 Eska na arhijka Biblia, Tata Diosï jatsisti uinhapikua para úni tsítantaani imeechani engaksï uarhikia. Ima iámindu ambe miáxati mándani kʼuiripueri enga tsítantaaka, jimboka ima iámindu ambe úsïnga úni. (Job 37:23; Mateu 10:30; Lukasʌ 20:37, 38). Ima no solu úsïndi tsítantaani uarhirichani, sino ístu uékasïndi ísï úni. “Kánikuari uékaaka ísï úni chiiti kueraakata jingoni” (Job 14:15). Biblia uandasïndi eska Tata Diosï ísï pʼikuarheraaka enga tsítantauaka imeechani engaksï ixú Echerirhu irekaaka.

Ambe ma enga no ísïika tsíntskueri

 Máruksï ini ambe jakajkusïndi: Enga nema tsíntaaka, alma enga no méni uarhijka ménderu kuerpurhu niántasïndi.

 Ambe enga ísïika: Biblia uandasïndi eska alma kʼuiripu máeska iámu imeeri ambe jingoni ka no ambe ma enga tsípiti pakarajka enga kuerpu uarhijkia (Génesis 2:7; Ezequiel 18:4). Enga kʼuiripu ma tsítanhantaajka, no kúnguarhintasïndi imeeri alma jingoni, sino ménderu úkuarhintasïndi kʼuiripu, enga jindeeka alma.

 Máruksï ini ambe jakajkusïndi: Eskaksï máru engaksï tsítanhantaaka jirejiresïksï tsítanhantaaka.

 Ambe enga ísïika: Biblia uandasïndi: “imeecha engaksï no sési ambe niátaka, tsíntaatiksï paraksï jusgarinhani” (Juanu 5:29). Joperu, inde kʼuiripuechaksï jusgarinhaati imani ambe jimbo engaksï uáka ísï tátsekua engaksï na tsítanhantaakia ka no imani ambe jimbo engaksï jiáni úpka antede uarhini. Jesúsi uandasti: “Uarhiricha kurhauati Diosï Uájpeeri uandakuani, ka imeecha engaksï kurhaaka irekaatiksï” (Juanu 5:25). Engaksï kurhakuaka Kristueri uandakuani, imeecha engaksï tsíntaaka oksï ísï úni eska ima na jorhentpijka, imeecheri nombrichaksï karanhaati “librurhu enga tsípikuerika” (Jaŋaskuecha 20:12, 13).

 Máruksï ini ambe jakajkusïndi: Eska imeecha engaksï tsíntaaka májkuenksï jáxeaka eska antesi de uarhini.

 Ambe enga ísïika: Enga kʼuiripu ma uarhijkia, imeeri kuerpu teresïndi (Eclesiastés 3:19, 20).