¿Ambeeski itsï atakuarhini?
Ambe enga Biblia uandajka
Itsï atakuarhini arhikuekasïndi eska ma kʼuiripu iámu inchameaka itsïrhu ka ménderu uémentani. a I ambe xarhatasïndi andi enga Jesúsi itsï atakuarhipka riurhu ma enga sáni kʼépka (Mateu 3:13, 16). Ístu, májkueni úspti Etiopía anapu ma, enga kurhajkuarhipka eskaksï itsï atapiringa jiáni engaksï jimeesïsï nitamani japka enga “itsï jatapka” (Ukuecha 8:36-40).
Ambe enga arhikuekajka itsï atakuarhini
Bibliarhu itsï atakuarhikuani terukutantasïndi jatsintskua jingoni (Roma 6:4; Kolosasi 2:12). Itsï atakuarhini arhikuekasïndi eskachi nóteru úsïngia imani ambe engachi uénani uénga ka eskachi uénasïngia ísï irekani eska kristianu ma enga aiakukuarhekia Tata Diosïni. Itsï atakuarhini ka ima ambe engachi újka antede itsï atakuarhini, jindeestiksï jarhuatakuecha engajtsïni Jeoba íntsaajka parachi úni ambakiti konsiensia ma jatsini jimbokachi mintsikasïnga tata Jesukristueri uarhikuani (1 Pedru 3:21). Ístu, Jesúsi jorhentpisti eskaksï imeeri chúxapaticha jatsiska para itsï atakuarhini (Mateu 28:19, 20).
¿Enga ma itsï jimbo itsï atakuarhijka nóteru pekadu jukarasïnia?
Nómbe. Biblia jorhentpisïndi eska Jesúsiri iurhirijkusï újka kénditaani juchaari pekaduechani (Roma 5:8, 9; 1 Juanu 1:7). Ka engachi uékajka eskajtsïni marhuacheaka imeeri uarhikua, jatsiskachi para mintsikani imani, mójtakuni juchaari irekuani para úni ísï eskajtsï na jorhendajka ka itsï atakuarhinchi (Ukuecha 2:38; 3:19).
¿Jorhentpisïni Biblia eskaksï charhakuecha jatsiska para itsï atanhani?
Nómbe, Biblia no arhisïndi eskaksï charhakuecha jatsiska para itsï atanhani. Máru relijionichaksï seremonia ma úsïndi paraksï “itsï ataani” charhakuechani, itsïksï atajtsïkuasïndi ka nombri jatsikuani. Peru itsï atakuarhikua jindeesti para imeecha engaksï jatirikia ka engaksï kurhangujka “ambakiti aianhperakuani Tata Diosïri juramukueri ambe” ka jakajkunksï ambe engaksï jorhenguarhijka (Ukuecha 8:12) I kʼuiripuechaksï jatsisti para kurhaani Tata Diosïri karakatani, jiókuarhini ka mójtakukuarhini, ambe ma engaksï charhakuecha no újka ísï úni (Ukuecha 2:22, 38, 41).
Ístu, Biblia xarhatasïndi eska para Tata Diosï kristianu uájpeecha engaksï sapiratiika ísï exeasïnga eska pímbinharhaticha, jimbokaksï imeecheri taaticha jurhimbitku marhuakusïnga Tata Diosïni (1 Korintu 7:14). Enga sési japiringa eskaksï charhakuechani itsï ataapiringa, íksï charhakuecha no úpirindi marhuanchani imani ambe engaksï máteruecha újka. b
Ambe engaksï eratsejka itsï atakuarhikueri ambe
Máruksï ini ambe jakajkusïndi: Para no iámu inchamani nemani itsïrhu, uaatiksï ísku itsï atajtsïkuni sáni.
Ambe enga ísïika: Iámindu imeechani enga Biblia uandajka eskaksï itsï atakuarhiska arhisïndi eskaksï iámu inchamespka itsïrhu. Por ejemplu, Tata Diosïri Karakata uandasïndi eska, enga Felipe itsï atapka Etiopía anapuni, tsimarhanksï “itsïrhuksï inchamespti” ka tátsekuaksï uémintaspti (Ukuecha 8:36-39). c
Máruksï ini ambe jakajkusïndi: Enga Biblia uandajka eskaksï iámu familiarhu anapuecha itsï atakuarhispka, ístu arhikuekasïndi eska charhakuechantu ísï. Por ejemplu, enga Biblia uandajka kárseliri kuáriri ma enga Filipusï anapuepka, arhisïndi: “Ima ka iámindu imeeri kʼumanchikuarhu anapuechaksï itsï atanhaspti” (Ukuecha 16:31-34).
Ambe enga ísïika: Enga Biblia uandajka eska kárseliri kuári itsï atakuarhispka ístu uandasïndi eskaksï kurhanguspka “Tata Diosï Jeobaeri uandakueri ambe” ka eskaksï kánikua tsípispka (Ukuecha 16:32, 34). I ambe xarhatasïndi eska, engaksï japka charhakuecha kárseliri kuáriri anapu kʼumanchikuarhu jiáni engaksï familiarhu anapuecha itsï atakuarhipka, charhakuechaksï no itsï atanhaspti, jimbokaksï no úsïreenga kurhanguni Tata Diosï Jeobaeri karakatani.
Máruksï ini ambe jakajkusïndi: Enga Jesúsi uandapka eska Reinu sapirhaticherispka, uandaxapti eskaksï charhakuechani jatsiska para itsï ataani (Mateu 19:13-15; Markusʌ 10:13-16).
Ambe enga ísïika: Jesúsi no itsï atajperakueri ambe uandaxapti jiáni enga sapiicheri ambe uandapka. Sánderu sési, xarhataxapti eska para Tata Diosïri Reinurhu jarhani uétarisïnga ísïini eska sapirhaticha, o enga jindeeka, kaxumbitini ka uékani jorhenguarhini (Mateu 18:4; Lukasʌ 18:16, 17).
a Uandakua griegu enga tradusirikuarhijka komu “itsï atakuarhikua” jima uandakuarhu ueratini jurasïndi enga arhikuekajka “inchameni” (exe je Compendio del Diccionario teológico del Nuevo Testamento, pájina 97).
b Eska na uandajka The International Standard Bible Encyclopedia, “no náni uandasïndi eskaksï itsï atauaka charhakuechani ixú NT [Nuevo Testamento]”. Ístu uandasïndi eska i ambe ueenaspka etsakuarhini jimboka “itsï atakuarhikua kánikua jukapararanhaska ka no sési kurhangunhantani”, o eska itsï atakuarhikua pikurpintasïnga pekaduechani (bolumeni 1, pájina 416, 417).
c Uandasïndi Diccionario Enciclopédico Salvat: “Ióntki anapu ITSÏ ATAKUARHIKUARHU [...] inchamajpinhasïrendi, i ambe úkuarhispti Iglesia kristianarhu” (1967, bolumeni 2, pájina 577).
Jamberijtsï ístu uéjka ini ambe míteni
KURHAMARHIKUECHA ENGA BIBLIA MÓKUANTAAJKA
¿Úsïnksï iámindu relijionicha eskachi Tata Diosïni andarhieraaka?
Bibliajtsïni aiangusïndi tsimani ambe parachi míteni mókuntskua.
JUKAPARHAKUA AMBE ENGA BIBLIA JORHENTPIJKA
¿Jaiapanhiantasïni Tata Diosï iámindu relijionichani?
Uánikua kʼuiripuechaksï eratsisïndi eskaksï iámindu relijionicha jurhimbitiska.
BIBLIAERI JORHENGUARHIKUECHA
Exe je na enga úkuarhijka Biblieri jorhenguarhikua ma
Uaatiksïni nema jorhendani Biblieri ambe no ma tumina jingoni.