Uánikua ambe xarhatasïndi eska Migueli, o “san Migueli”, eskaksï máru relijionicha na arhijka, jindeeska nombri ma enga Biblia íntskuka tata Jesukristuni antede ixú Echerirhu jurhani ka ístu tátsekua. a Karakatechaksï uandasïndi eska Migueli arhijperaspka Satanasini jingoni tátsekua enga na Moisési uarhipkia ka eska jarhuataspka ánjelini ma paraka íntskuntapiringa Tata Diosïri aianhperakuani profeta Danielini (Daniel 10:13, 21; Judasʌ 9). Migueli kuájpisïndi Jeobaeri juramukuani ka uarhiperasïndi Tata Diosïri ikiatspiticha jingoni. Ísï jimbosï újti páni indeni nombrini enga jindeeka “¿Né Ísïiski Eska Tata Diosï?” (Daniel 12:1; Jaŋaskuecha [Apocalipsis] 12:7).

 Ju je exeni andichisï újki ísï uandani eska tata Jesukristu jindeeska arkanjeli Migueli.

•   Migueli jindeesti “arkanjeli” (Judasʌ 9). Títulu arkanjeli arhikuekasïndi “ánjelicheri jefi” ka tsimani bersikuelucharkusï jati Bibliarhu. Ka tsimapuru, uandakua arkanjeli xarhatasïni eska máechakua ánjelinkusï arhikuekajka. Jesukristueri ambe uandaparini enga na tsíntajkia, ma inde bersikulu uandasïndi “Tata auandarhu uératini kétseati ka uinhachaati. Ísï uinhachaati komueska arkanjeli ma” (1 Tesalonika 4:16). Seguni i tekstu, Jesúsi ísï uandasïndi eska arkanjeli ma. Ísï jimbo, uaakachi uandani eska Jesúsi mismu jindeeska Migueli, arkanjeli.

•   Migueli orhekupaxati auandarhu anapu ejersituni. “Migueli ka imeeri ánjelicha uarhiperasptiksï dragonini jingoni”, enga jindeeka, Noambakiti (Jaŋaskuecha 12:7). Kánikua juramukua jatsisti auandarhu. Ísï jimbosï Biblia arhijti ʻprinsipi ma enga kánikua juramukua jatsikaʼ ka “kʼéri juramuti” (Daniel 10:13, 21; 12:1). Inde títuluechaksï xarhatasïndi eska jindeeska “ánjelicheri juramuti”. Ísï uandasïndi Migueliri ambe David Aune enga kánikua mítekuka Nuebo Testamentuni.

   Biblia ma nombrintkusï uandajti imeeri enga kánikua juramukua jatsika para ánjelichani juramukuani. Uandasïndi eska “Jesúsi chpiri jingoni xarhantaaka auandarhu imeeri ánjelicha jingoni engaksï xáni uinhapitika” (2 Tesalonika 1:​7, 8; Mateu 16:27). Ka ístu 1 Pedru 3:21, 22 arhisïndi eska Jesúsi ʻkenchintaska auandarhu [...] ka eska imasï juramukuani jajka ánjelichani ka uinhapitichani ka juramutichaniʼ (1 Pedru 3:​21, 22). No sési japirindi enga Tata Diosï Jesúsini ka Miguelini íntskusïnga juramukua paraksï ánjelichani juramukuani ka ístu eskaksï no úpiringa sési pájperani. Úsïngachi kuranguni eska Jesúsi ka Migueli májku kʼuiripunisï arhikuekajka.

•   Migueli “anhandeati” jiáni enga “kánikua uandanhiakuarhiaka” ma ambe enga no méni úkuarhini japka (Daniel 12:1). Libru de Daniel jimbo, uandakua “anhandeati” sánderu jiáni úrakuarhesïndi para uandantani eska rei ma ambe ma úska enga jukaparhakueka (Daniel 11:​2-4, 21). Jesukristu, enga arhinhajka Tata “Diosïri Uandakua”, uénaati úni ambe enga újka “Rei reicheri ka Juramuti juramuticheri” para kénditaani iámindu Tata Diosïri ikiatspitichani ka kuájchakuni imeeri iretani (Jaŋaskuecha 19:11-​16). I ambe jiáni uáti enga “kánikua no sési [nitamakuarhinhaani jauaka]. No méni ísï nitamakuarhinhaxapti desde enga kʼuiripu kueraanhaka” (Mateu 24:21, 42).